Oct 17, 2016

قفس - ... تبریزین یوز مینده ن آرتیق یوخسول اوشاقلارینا

س. حاتملویی

ایراندا حاکیم اولان گئریجی، غدار اسلام رژیمی نین اذنی و حمایتی ایله نشر اولونان ده رگی لرده ن بیری ده، مهرنامه آدلی بیر ژورنال دی. بو ژورنال ین 23- نجو نمره سینده، کمال اطهاری آدلی بیر جنابین مصاحبه سینی اوخودوم. کمال اطهاری جنابلاری اؤلکه نین ان بویوک پرابلم لرده ن بیری ساییلان مسکن مسئله سینی یولونا قویماق اوچون چالیشیب و پلان حاضیرلایانلاردان بیری دیر.
اطهاری جنابلاری بو مصاحبه ده، حاکیم صینف ین ادعاسینا گؤره " ام القرا" اسلام اولان بو اؤلکه ده یاشایان انسانلارین یاشاییشی حاقدا حیرت آور سؤزلر دانیشیر.
اطهاری جنابلاری نین سؤزلرینین اساس و چرده یی بونلاردان عبارت دیر:
- 80 میلیون ایران نفوسونون 54 میلیونو شهرلرده یاشاییرلار. بونلاردان یوزده اللی سینه یاخین، یانی 25 میلیون نفری «چوخ یوخسول» حسابلانماقدادیلار.
-  «چوخ یوخسول» دئییله ن بو انسانلارین یاشادیقلاری ائولری، استاندارد نرم لارا گؤره ائو آدلاندیرماق اولماز.
- بونلارین اوشاقلارینین اوخودوقلاری مدرسه لر، اوچ شیفت ده چالیشیرلار.
- بو انسانلارا هئچ بانک بورج وئرمیر.
- اونلارین یاشادیقلاری محله لرده، اوزون زامانلار سو و الکتریک یوخدور و شهرلرین بلدیه لری، بو محله لری رسمیته تانیمیرلار. «حلبی آباد» آدلانان بو محله لرده، دونیایا گؤز آچان اوشاقلار، عمور بویو بو محله لرده یاشاماغا محکوم دیلار. بو اوشاقلارین محکوم اولدوقلاری سفالت ده ن قورتولماق امکانی، اولدوقجا آزدیر.
- ایران الیت ینین  سؤزده مدافعه ائتدیکلری " وطنداش" حاقلاریندا، بو 25 میلیون انسانین یاشام حاقلاری یوخ کیمی دیر.
*****
بو مصاحبه نی اوخومادان اول، تبریزین بلدیه رئیسی نین بیر دانیشیغینا راست گلمیشدیم. او بو دانیشیقدا، تبریز شهرینده یوخسول لارین سایی سینی یاریم میلیون نفر دئمیشدی. بو یاریم میلیون انسان، تبریزین احمد آباد، یوسف آباد، خلیل آباد، حیدر آباد، شمس آباد، زوراباد، ایده لی،  سئلاب، قوشخانا، ماللازینال،آخماقیه، زمزم، امامیه و قازان داغی محله لرینده یاشاماقدادیلار.
*****
بو مصاحبه نی اوخویارکن، ته نیکه ده ن، تاختادان دوزلمیش بو سوواخلی ائولرده یاشایان اوشاقلارین طالعی عاغلیما گلیب و آدی هر زامان یاشار بویوک شاعیریمیز بختیار وهاب زاده نین دئدییی کیمی  "اوجالمادان، آلچالان بو کؤرپه لری" دوشونوب «قفس شعری» نی یازدیم:

قفس

"
سنت" لرده ن هؤرولموش
بیر قفس ده،
و "بویوک"، "کیچیک" آدلی
سینیرلار ایچری سینده ...
یاشادیق.
او "دونیادا" یانارسان
چاتی سیله ایله آسیلدیق.
بویویوب، بویا- باشا چاتدیق
آمما "بویوک" اولمادیق.
تیکانلی مفتیل لرده ن
چکیلمیش
"
وارلی"، "یوخسول" سینیری،
او تایا کئچمه یه اذن وئرمه دی.
 


No comments: