Apr 5, 2014

گوندلیگیمده ن بیر صحیفه

سئویل سلیمانی


سحر اوتاغین سکوتوندا گؤزلریمی آچیرام، هله اوتاق قارانلیقدی. یاتاغین یانینداکی استولون اوستوندن تلفونو گؤتوروب ساعاتا باخیرام. ساعات ۷-یه  بیر نئچه دیقه قالیر. ساعات زنگ وورمادان یوخودان آییلمیشام. بلکه دونن گئجه یاتاغا تئز گئتدییم اوچوندور. یاتاق دان قالخیب ال-اوزومه سو چکیب، چایدانین آلتین یاندیریرام، دوشونورم، حاضیرلانانا ده ک، چای قاینار دئیه : دوشونورم. بیر الیمله گئینیر، او بیریسیله سحر یئمه¬یی حاضیرلاییرام. بیر چای سوزوب یئمه یه اوتورورام. یئمه ییمی یئمه یه 10 دیقه م وار، یوخسا ایشه گئج قالاجاغام. بو گون هئچ ایشه گئتمگ ایستمیرم. آمما بیلیرم آیین باشی کردیت کارتلاریمی اؤده ینده  بو گون ایشه گئتدیم اوچون سوینه یه جم. بو گونلر ایشه گئتمه یه اؤزومو زورلایرام!
ماشینی سوره-سوره دونن گئجه اوخودوغوم خبرلر حاقیندا دوشونورم. ایشه چاتیب، گیریشده کارت چکیرم، ایسپان، ایش یولداشیم منی گؤرن کیمی تله سیک اؤزونو منه چاتدیریر، سلام وئریب  قیزینین خسته اولدوغونو دئییر. صاباح اونون یئرینه ایشه گلمه ییمی ایستیر. چوخلو درسیم وار، اما  اونوندا چتین وضعیتده اولدوغونو بیلیرم، اونا دا اورییم یانیر. آرادا قالمیش دورومدایام، ساده جه گونون یاریسین ایشله یه بیلجه ییمی سؤیله ییرم. سئوینه رک قبول ائدیب  گئدیر. کلاسا گیردیییمده ساده جه بیر نئچه اوشاغین گلدییینی گؤرورم. کلاسا گیرن کیمی اونلار سئوینرک  سئوینجکلی، آدیمی سسله یه رک اوستومه قاچیرلار. نیکلاس الیمیدن توتاراق اونونلا اویناماغیمی  ایسته ییر. جکسون ایسه اونونلا قالماغیمی ایسته ییر... بو گون سانکی اوشاقلار داها چوخ انرژیلی دیلر، بلکه ده من یورغونام. ...
ساعات ۲-نی کئچیر، تله سیک ماشینا ساری قاچیرام. یولدا دایانیب یئمک آلمالیایم. یوخسا ساعات ۵- دک کلاسدا اولاجاغیم اوچون، یئمک یئمه یه واختیم اولمایاجاق. یولومون اوستونده مکزیک رستورانی وار. اورانین تورتا ساندویجین سئویرم، اما اوزون نووبه سین گؤرونجه، اوندان الیمی اوزورم. یاخیندا اولان فست فود دا دایانیب همبرگر آلیرام. یولدا بیر الیم له ماشینی سوروب و او بیریسیله یئمک یئییرم، حیاتیم دا ایلک دفعه دیر کی قیرمیزی چیراغین آرخاسیندا دایانماغیما سئوینیرم. ان آزی یئمه ییمی بیر نئچه دیقه راحت یئییرم. کوللئجه چاتیب ماشینی پارک ائدیب  کلاسا ساری یولا دوشورم. یولدا گئده-گئده بئینیمده اوخودوغوم درسی تکرارلاییرام. کلاسا گیریرم، معللیم اوتورموش و کاغیذلارینی حاضیرلاییر و بیر نئچه دقیقه-دن سونرا درسین دئمه یه باشلاییر...
ساعات ۹-و کئچیر و من، یورغون-یورغون، درسین قوتارماسین گؤزله ییرم. آرتیق یورغونلوقدان درسه  قولاق آسا بیلمیرم. معللیمین "گئده بیلرسینیز" سؤزونو ائشیدر- ائشیتمز، چانتامی ییغیشدیریب، تله سیک یولا چیخیرام. یول یولدا، گئده-گئده یکشنبه یه اولان پلانیمی دوشونورم. آیلانی گؤره جه یم،  یکشنبه منی گؤرمه یه  گله جینی دوشنمه ک بئله منی سئویندیریر. آیلا یا اولان باغلیغیمی آرتیق نه آدلاندیریم، بیلمیرم؟ باجیم؟ قیزیم؟ ... ؟
ان امیدسیز آنیمدا بئله، گولوشو منه سئوینج بخش ائدیر. آبجی .... آبجی ... I love you... دئمه سی، سیجاق قوجاقلاماسی، دئمه سی، همده گؤزلرینی سوزدوره رک  دئمه سی، thank you Abji.... دئمه لرینین هر بیری، بیر عالمدیر. منی سئویندیرمه یه چالیشماسی بئله، شیریندیر. دونن زنگ ووروب سوروشوردوم: "آیلا ماما هاردا دیر؟" چالیشیر تورکی جواب وئرسین. آبجی شی ایز حکیمه گئدی... گولمک دن نه دئیه جه ییمی بیلمه دیم ...
سانکی آیلا طبعیتین منه بخش ائتدیگی ان گؤزل هدیه سیدیر. بو حیاتین تکرار گونلرینده ...ان کدرلی گونومده، او منه گولوش بخش ائدیر.
یئنه ده خیاللارا دالمیشام، اؤزومه گلرکن ائوین قارشیسیندایام، چاتمیشام. ماشینی نئجه سوردویومو هئچ خاطیرلامیرام .  قاپینی آچماغیمین سس ینه قونشوم چیخیر. الینده کوفی فنجانی، سلام وئریب، باشلاییر دانیشماغا. بیلیرم بوراخان دئییل، ائوه گلمه سینی تکلیف ائدیرم، یاتماق ایسته مه دییمی سوروشوب، ائوه گیریر. وسایلیمی بیر کونجه قویوب، چایدانین آلتینی یاندیریرام، قونشوم، ایشینده باش وئرن حادثه لری تعریفله ییر، من ایسه اؤز ایشیم له مشغولام. او، ۱۵ ایل اولار کی بو بینا دا یاشاییر. کرمانشاهلی دیر. ایلک بو ائوه گلدیییم گونو اونونلا تانیش اولدوم. سوروشاندا کی، کورد سن؟ جاوابیمدا " اوزوم ده بیلمیرم نه یم. آتام دا-آنام دا  قاجارلاردان اولوب. منیم ایسه تورک دیلیندن بیلدیییم آنجاق " عمی قیزی"  سؤزدور، اونو دا بی بی لریم و آتام چاغیردیغین دان یادیمدا قالیب" دئدی. بو قادینا باخاندا هردن قورخورام. اونون کیمی ایللریمی بو شهرده بیر ائوده گئچیتمه کده ن، گونده لیک ده یاشاماقدان، بینا دا اولوب بیتنلری، شهرده باش وئرنلری، ایشندن،... دال با دال حکایه لرین دانیشیر. من ایسه ساکیت باخیر و هردن بیر باشیملا هه دئییرم. آرتیق نه دئدیینی بئله ائشیدمیرم، او آندا لپ تاپیمی گؤتوروب فیس بوکو آچیرام،...  مساژلارا باخیب، خبرلری ایزله ییرم،.. کیمسه اولسا یازیشماغا باشلاییرام ... قونشو آرتیق بیلیر کی، اونو دینله میرم، دوروب بیر ساغول دئیه رک گئدیر  و من قالیرام، بیر ده یازیشمالار
 ...
گئجه ساعات بیری کئچیر یورغونلوقدان گؤزلریم آخیر. آز قالیر درسیمی ده قورتارام، اما یورغونلوقدان دوام ائده بیلمیرم.. دوروب یاتاغا ساری گئدیرم. یئریمده اوزنیرام، موغانداکی دوستوملا یازیشمیشام. هله  او هاوادایام. بورا دا گئجه ده اولسا موغانین ناهار گونشین حیس ائدیرم. بو خیاللارلا یوخویا گئدیرم. یوخودا موغاندا اولان پامبیق تارلاسینین ایچینده قاچیرام، اوشاقلیقدا قاچدیغیم کیمی. یاناقلاریم هاوانین سرینلیینی حیس ائدیر....
سان دیگو -  2014/02/09 

No comments: