گنجعلی صباحی ۱۳۶۸-۱۲۸۵
١٣٢۶-نجی ایلین باھاری ایدی. داریخما منه ال وئردیییندن
قصبه‌نین اطرافینا گزمه‌یه چیخمیشدیم. قات- قات اوجالان سیار داغلارین قوینوندا
یئرلشن «مظفّر قالاسی»نین طبیعت گؤزللییی اینسانین روحونو اوخشاییردی. داغلارین
اته‌ییندن شاریلتی ایله آخیب، اینسان عؤمرو کیمی گئدن چایلارین ھمھمه‌سی، ھر
طرفده قایناییب قالخان دورو بولاقلارین زمزمه‌سی، حزین- حزین اسن یئلدن، رقصه
گلن یارپاقلارین پیچیلتیسی، آزاد قوشلارین بوداقدان- بوداغا سیچرایاراق، سئوینجله
دولو، شیرین نغمه‌لری، منی اوز غم- خیال دونیامدان آییرمیش، گول چیچکلرین عطری توتغون شراب تک منی
مست ائتمیشدی.
