ینی ایلینیز اوغورلو اولسون


Sep 21, 2013

مدرسه لرین آچیلیشی موناسیبتی ایله بیانیه‏

گونوموزده ایراندا یاشایان اوشاقلارین یوزده یئتمیشی اؤز آنا دیللریندن باشقا بیر دیلده تحصیل ‏آلماغا مجبور اولونورلار. بئله لیکله هر ایل درسلرین باشلاماسیلا بیرگه، دیل و کولتور ‏استعماری داها یئنی بیر نسیل آذربایجانلی یا تحمیل اولونور.‏

اؤز آنا دیللرینده تعلیم تربیه دن محروم اولان اوشاقلار، مدرسه ده آنا دیللری یاساق اولان یئنی ‏یئتمه لر ساوادلانماق اوچون اؤنجه دیللرینی و سونرا دا کیملیک و کولتورلری نین بؤیوک ‏پارچاسینی بوراخیب دَییشدیرمه یه مجبور قالیرلار. بو سببدن آسیلی، غیر فارس میللت لرین ‏آراسیندا تحصیللی لرین ساییسی گئتدیکجه آزالیر. بونونلا بیرگه ایراندا وار اولان سیاسی - ‏ایجتماعی - ایقتصادی برابرسیزلیک داهادا درینله شیر. بو آیری سئچگی لیک نتیجه سینده غیر ‏فارس میللتلر گونو- گوندن داها آرتیق حاشیه یه سورولوب، مارژیناللاشیرلار.‏


بو راسیست سیستئمین هدفی، غئیری فارس میللتلرین دوشونجه گوجونو محدودلاشدیرماق، ‏توپلومدا سس سیزلیک کولتورو یارادیب، بو میللتلری حاکیم سیاستین خیدمتینه گتیرمکدیر.‏

هر میللتین دیلی نین آزاد و رسمی اولونماسی او میللتین آزادلیغی یولوندا آتدیغی ان اؤنملی ‏آددیملاردان بیریدیر. هابئله هر اوشاغین اؤز آنا دیلینده تحصیل آلماسی او اوشاغین ان ایبتدائی ‏حقلریندن بیری ساییلیر. بیر میللتین اوشاقلارینی بو حقدن محروم ائتمک او میللتین ان طبیعی ‏حاققینی و آزادلیغینی اینکار ائتمک دئمک دیر. ‏

سورگونده گونئی آذربایجان (ایران) قلم انجومنی، دیل و کولتور استعمارینا و عومومیتله ایراندا ‏حاکیم اولان رسمی (دولتی) و غیررسمی راسیسمه قارشی میلتیمیزین موباریزه سینی حیمایت ‏ائتمه یی اؤزونه هدف و وظیفه گؤرور.‏

مهر آیی نین بیرینده مدرسه لرین باشلانماسی دؤولتی راسیزمین گوجلنمه سی و تکرار تولید ‏اولونماسیدیر. اؤز میللتیمیز و بوتون ظولم آلتینداکی میللتلرله بیرگه بو دولتی راسیزمه قارشی ‏چیخیب و دئییریک:‏

اؤز دیلینده مدرسه   /   اولمالیدیر هر کسه

آنا دیلیمیزین رسمی لشمه سی، دیل و دوشونجه آزادلیغی اوغورندا موباریزه ائدیب و حبس ‏اولونان عزیزیلریمیزین قئید - شرطسیز آزادلیغی نی دیله ییریک.‏

سورگونده گونئی آذربایجان (ایران) قلم انجومنی
شهریور 1392

No comments:

Post a Comment