عزیز نسین - چئویرن: ا.م. جواد
من رئزين بير دگنگم! اؤزوم ده آمئريکا اصيللى‌ام. منه قدر آمئريکادان بورالارا
ان اول دئموکراتييا گلميشدي، سونرا جيپ، دالينجا دا دگنک، ياني من. جيپ ايله دگنک،
بيز ايکيميز دئموکراتييانين آچديغي جيغيرلا گلديک.
من رئزين بير دگنگم! بورالارا آمئريکان کؤمگيله، آمئريکان عاليجنابليغيندان
گلديم. روحا گيرمه‌ديم، قويروقدا دولانديم، بويروق اولدوم.
هر يئرده سيخينتي
اولور، اولاجاق. آوتوموبيل شيني، احتياط حيصه لر قحطه چيخسا دا، من ال آلتيندايام.
منيم سيخينتيم چکيلمه‌دي، بول بول احتيياجي قارشيلاديم.
من رئزين بير دگنگم! بورادا هئچ قابلار دا ديش فيرچاسي يوخ ايدي، اونون يئرينه
تاختا ديش چؤپلري ايستيفاده ائديرديلر. من گلمه‌ميشدن ده يئريمه وار ايدي، آما فيل
سينيريني پوليسلر دئييل، خالق ايستيفاده ائديردي، خالقين فيل سينيري ايشلتمه‌سينه
قاداغا قويولدو. ايندي فيل سينيرينين يئرينه من کئچديم.
من رئزين بير دگنگم! اوزوم قارادير. يومشاق گؤرونورم، آما يومشاقليغيما
آلدانمايين. مندن اول منيم عوضيمه ايستيفاده ائتديکلري مئشه اودونو، زوغال چوبوغو
مرحمته گلير، قيريلير، من اصلا قيريلمارام. ايکى اوزلو سيياستچي کيمي اوزوم هم
قارا، هم ده يومشاقدير. اگيليب بوکولورم، آما هئچ بير زامان قيريلميرام.
من رئزين بير دگنگم! اؤزونو تانيمايانلارا، يئريني گؤستريب اؤزلريني
تانيتديريرام، اؤزومو د… منيم يئريم پوليسلرين بئلي و الى‌دير! ايش گؤرمه‌ين
واختلاردا، قيوريليب قارا افعى ايلان کيمي قاپي آرخاسيندا ميسماردا قويروغومدان
آسيلي دورورام.
من رئزين بير دگنگم! ايگيريمينجي عصرين ان بؤيوک تاپينتيسي منم. آتومدور،
هيدروگئن بومباسيدير،منيم يانيمدا هئچ بير شئيدير. ايندي دئموکلون قيلينجى‌نين
يئريني من توتدوم. آزادليق منيم کؤلگمده يوخولايير، من اونون باشي اوزرينده
ساللانيب دورورام.
من رئزين بير دگنگم! ووردوغوم يئردن سس گتيررم. منيم گتيرديگيم سس، هم
قاريشيق، هم ده نوتسوزدور. آما اينسانلارا هر مقاميندا يانغيلي نغمه‌لر اوخودور.
قارشيمداکي لال اولسا، ديل آچير، قارغالار توتوقوشو اولور، ديل بيلمه‌ين بولبول
کيمي اؤتور. حاکيمدن اول ائله من اينسانلاري سورغو-سوالا چکيرم. قارشيمدا تعليم
گؤرموش مئيمونا دؤنه‌جکسيز.
-بير دانيش! دئيرم، سسينيز چيخار.
-سوس! دئديمسه، کيريميشجه دورارسيز.
-آللاه، آللاه!… دئيه باغيرسانيز دا، من ناله، آجي سسلرينيزي
ائشيتمرم. ووجودوم واردير، آما قولاغيم، گؤزوم، اورگيم يوخدور.
من رئزين بير دگنگم! کوتله‌ني داغيدان منم. ژورناليستلرين بئينينه ائنن منم.
ايدخال مالي، آزادليغي ديمديک آياقدا ساخلايان، رسمن دئموکراتيياني قورويان منم.
ائي اينسانلار، من رئزين بير دگنگم! سيزه سون سؤزوم بودور: قولاغينيزدا سيرغا
اولسون! باشقا بيرينين باشينا، بئلينه ائنديم، بو آندا قونشونون آغريسيني سيز حيس
ائتميرسينيز، صاباح سيزين باشينيزا، بئلينيزه ائنه‌جگم. باشقاسي دگنک يئيير، «اوووه
اؤلدو» دئييرسيز، صاباح نؤوبه سنيندير، «اوووه اؤلسون» دئيه‌جکلريني اونوتما. منيم
ياراديليشيم بئله‌دير. بو گون سئويننلر صاباح دگنکلنمگه محکومدور. هئچ قولاق
آسمارام، ائنرم بئيينلرينه، بئللرينه.
ائي اينسانلار، من رئزين بير دگنگم! دگنک سسينه قولاق وئرين. 
No comments:
Post a Comment