دیللشمک

الشن بؤیوکوند

Elshen Boyukvend‏
İKİ ŞEİR

گؤیرچین‌لرین سنین دؤشلرین آراسیندا
یووا قورماق ایسته‌یی
و اوتاق اوره‌یینین دؤیونمه‌سی
سوورولمایاجاق یادداشیندان


دیللشمک

دیلین‌له دیل‌له‌شرسه شرابلی دیلیم
اوره‌ییم باراماسیندان اوچوشار دوداغین
آچیلارسا هؤرولموش ساچین
دیکسینر اوتاغین هاواسی
و آلوولانار ائحتیراس لامپاسی
بوتون ماهنی‌لاری اونوتماق
و مینلرجه اورپشمیش توکون
اؤپوش سیمفونی‌یاسی یاتاغیندا اوزانماق
هوجئیره‌لریمیزین مؤولانا سایاق
وجده گلمه‌سی‌نی دوشون
دوی
دوداغیمیزدا قیغیلجیم چیچه‌یینین جوجه‌رمه‌سی
گؤیرچین‌لرین سنین دؤشلرین آراسیندا
یووا قورماق ایسته‌یی
و اوتاق اوره‌یینین دؤیونمه‌سی
سوورولمایاجاق یادداشیندان.‏
پنجره گؤزوندن توزو سیلر گونش
و سئرچه‌لرین اؤپوشمه‌سی یانسی‌یار
اوتاغیمیزین دیوارینا
دیلین‌له دیل‌له‌شرسه شرابلی دیلیم
اوره‌یین باراماسیندان
اوچوشار دوداغیم.‏
‏
موغان 26/9/1391‏

Didilmiş yun kimiyəm‏
məxmər parçasında sırılıb‏
yorğanın olub‏
əndamına büküləcəyəm‏
heç bir qəzəl söyləmədən‏.
Dəniz boyda sinəndə‏
üzəcək dodağım balıq kimi‏
və ağ qayış kimi‏
dolanacaq belinə əllərim‏.
Gövdəmizsə‏,
iki dəmirçəkən* kimi‏
yapışacaq bir-birinə‏
bir axşam boyu