دؤنورم اوشاق کیمی دؤره‌یه باخیب بیر قاچیرام من
قاچیبان شیللاق آتیب فیشقا چالیب اویناییرام من
بولبولون نغمه‌سینه قولاق وئیریب دویماییرام من.
شالواریم آسلانیب آما پاپاغیم شئه‌لنیب آما
نوروزون بوستانی‌نین سویو داشیب سئلله‌نیب آما
یول گلیرم اوزاقلاردان!
یوموراقلاریمی سیخیب
زوربالایب جیبلریمه باسیرام،
پالتومون جیبلرینه.
گؤزلریمی زورلا آچیب
قاباقلیغا دیریرم، قاردا بوراندا یئلده.
قولاقلاریم نام اولوب، آما
پالتومون قولاقلاری حله سویوغو احساس ائتمیر.
شالواریم شاققیللداییر
پالتووم تاپیللداییر
ایاقلاریم تیتره‌ییر
باشماغیم آغیرلاییر
یوموراغیمی پالتومون جیبلرینه باساراق
قاباغا گئدیرم من.
باخ! شالیم قیرمیزیدیر
بوینوما باغلامیشام.
آغزی - بورنوم اوستوندن بیر ساری ساریاراق
آرخادا دویونله‌ییب
بیر دویون باغلامیشام،
یول گلیرم اوزاقلاردان.
ایاقلاریم کیلیب
گؤزلریم سیزیلداییر
اما یورغونلوغو من ذره قدر بیلمیرم
یول گئدیب تیتریرم
بیر سنی دینلیرم
ای بوران ای قارا قوش
آرخاسیندان کوله‌گین.
ای گؤزل قیرمیزی دون
ساچلاری خرما گؤزلیم.
آختاریرام سنی من گؤزلری شهلا گؤزلیم
اوجا بوی قاشی کمان
گؤزلری دورنا گؤزلیم
سنی من آختاریرام قاردا بوراندا گؤزلیم.
یادا سال یازدا باهاردا بورالار گولشنیدی
هر طرف عطر گول یاسمن و سوسنیدی
غنچه لر آچمیش و بوستان دیزه جن پنجریدی
بولبولون نغمه‌سی باغدا شورو مست و فریدی
چهره‌ین بولاقدا گؤردوم ایلک دفعه خرمنیدی
گونشین نورو گؤزونده پارلادی شعله میدی؟
منی سن دامینه سالدین نه گؤزل گولشنیدی.
صبح سحر ایلک صاباح،
دان اولدوزو باتمایاراق
خوروز دوروب باننایاراق
یاغیش گئدیب گلمیه‌راق
چن و دومان کندی آلیب گئتمیه‌راق
ائشیگه چیخدیم دوناراق.
کوچه لر باریکیدی یولاق یولاق
سوواغین عطری گلیر مشامیمه اوینایاراق
دومانی سایمایاراق
قورشاغی باغلایاراق
توسدو بورغان ایلیر آغلایاراق
کوفله طوفانا سالیب خورولدایاراق
باجادان نعره چکیب کفیلدایاراق.
دیمه گلثوم خالانین کوندله‌سی پیشمه‌میش حالا
کونده‌له ایچینده‌کی حالواسی یئتیشمه‌میش حالا
عطری آما کوچه‌نی بورویوبن مست ائدیب حالا
طؤوله‌ده ماللار هامی سوت وئیریبا "مو" چکیر آما
ایاغیم سیزلاییر آما گؤزلریم آچماییر آما
کتده ایتلر هورور شیرلنیر آما
گبی یا چاتمادیم آما.
باغچانین ایچینده من تک گئدیرم سحر چاغی
چمنین شئه‌لری باشماغی یویوب پارلادیر آما
دوداغیم دوزلانیر آما اورگیم جوشلانیر آما.
دؤنورم اوشاق کیمی دؤره‌یه باخیب بیر قاچیرام من
قاچیبان شیللاق آتیب فیشقا چالیب اویناییرام من
بولبولون نغمه‌سینه قولاق وئیریب دویماییرام من.
شالواریم آسلانیب آما پاپاغیم شئه‌لنیب آما
نوروزون بوستانی‌نین سویو داشیب سئلله‌نیب آما
بلکه ده حیدرین اوغلو اونو سئلله‌ندیریب آما
گون چیخیر داغ دؤشونه باخ نه گؤزل پارلاییر آما
گول پری قالخماییر آما کؤنلومو آلماییر آما
نه گؤزل شاققیلداییر کندین چایی باللانیر آما
من بهشت ایچینده‌یم اویغو دو بو دوغرومو آما.
کتابی دسته‌له‌ییب کش‌له اونو باغلاییبان باغریما باسدیم
قاپینی شاققیلادادیب ائشیگه قاشدیم
قالانین اوستونه باخدیم
قالاغین اوستونه چیخدیم اورادان ایوانا باخدیم
باسمالیق اوسته قاچیب شیللاق آتیب مکتبه قاشدیم
رجبین بؤرکونو قاپدیم.
مشخطی قاتاییبان جؤهره باسدیم
کاغاذین اوسته چکیب آدینی یازدیم
اوتانیب اوکالاییب تندیره آتدیم.
آنام دئیدی آی قارالی / ساقالی توخماق قارالی
قامتی دورنا قارالی / ائومیزه مهمان قارالی
توخماغی سن گتیر منه / ات داشینی داها بئله
کوفته اتین دؤیوم بئله / کوفته سالیم کونده‌لمه
کوفته سالیم من بالاما / زورباسی چومباق بالاما
یاناخلاری چون شاماما / ایاقلارین چیرمالاما
آنا جان گل یانیما قوربان اولوم من
ساچینا حیران اولوم من.
یونو ایش سال تیشیه ایپ توخو اوندان
موملایب کلفله‌ییب سؤز اوخو اوننان
گتیریم میللریوی منه توخو سپت داشی
باجیمادا بویون شالی
قارداشیما بادیشلاری.
کوچه ده اوشاقلار اوینار ال آغاش
خرمن اوسته آیری دسته اویناییرلار کوس آغانج
اما من سپت داشیلا داشی آتدیم "قادارا"
بلکه گئتسین او تایا.
قیزلار اوردا هامیسی قاققیلداییب شاققیلداییر
ساچلارین هئچ دارامیر.
"گول باجی" آغزا سالیب نئچه‌ینی چینیری
مهری دومسوکلیری.
توپلانیب بیر یئره هامی
چونبه‌لیب بیر یئره هامی
مش داشی شاققیلدادیب اویناییبان اوخولار هامی
نه گؤزل گولورلر هامی.
گئدیرم کونبزه من جوما آخشامی توپلانار هامی
سؤز وئریب سؤز آلار هامی
من مویز جیبلریمه دولدوروبان شیللاق آتاندا
قیزلارا بیر گؤز آتاندا
ارسلان چونباغی قاپدی
منه بیر دیلین چیخارتدی.
قونشودا "کهلیک" خالا های و هوار سالدی گلیب قاپینی کسدی
او باغیردی قاپیدان "خاور باجی" سسینی کسدی
آنامین "میس قازانی" قارالدی بسدی
توستودن اوشاقلار هامی اؤسگوروب بوغولدی قاشدی
الیوین ایستی‌سینه کنگر آشی پیققیلداییب قاینادی داشدی
مارالین کفگیری دوشدو ترلانین دونو بولاشدی
"گول‌آغا" کنگر آشیندا اوینادی آتیلدی قاشدی.
قار اریر باهار گلیر سازاق اسیر
پالتووم شاققیلداییر سازاق کسیر
داغ دؤشونده گول‌آغا یئلده اسیر
کنگری عسگر کسیر
ائششه‌گین آرخاسینا قالدیریبان یولدا چکیر
"قادار"ین سویو دورویسا کفلنیر
قار اریر یئر بوغلانیر یئلده اسیر
نوروز اولمامیش حله نوروز گولو چؤلده اسیر
منیم آما دیزیمی سویوق کسیر.
No comments:
Post a Comment