Jan 3, 2013

دولت ماموری

د. لطیف
D. LATİF
Dövlət Mə`muru

‏ ‏‎ ‎پاییزفصلی ایدی. طبیعت ائله بیل اود توتاراق باغلاردا خزان شعله ‏چکیردی. هاوا خوش و پاییزین کولگیندن هله اثر یوخ ایدی.‏

‏ نئچه گون یاغیشدان سونرا آستارانین ساحلینده آغ بولوتلار ‏پارچالانیب خزرین شرقینده اوفقلاردا یاییلمیشدی.‏


‏ گونش ماوی گؤیده شهره ایشیق ساچاراق الوان داغلارا جلا ‏باغیشلاییردی. شهر‎ ‎سانکی دنیزین قوینوندا‎ ‎اؤز رویاسیندا سئیرائله ییر ‏گونون ایستی سیله نشئه له نیردی.‏

‏ اگرچی هاوا خوش و شهر آرامش ایچینده ایدی، آمما نظره بئله گلیردی ‏کی بو وضعیت چوخ زامان سورمه یجک.‏

‏ اونا گؤره کی گون اورتادان بیرآز کئچمیشدی بیردن شهره بیر آغیر ‏گورولتو دوشدو. سس شهری باشینا آلاراق گئت به گئت چوخالیردی. ‏

‏ گورولتو کی تمامیله شهرین ایچینه دولدو بو حالدا گؤیده بیر نظامی ‏هلیکوپتر گؤرونوردو. ‏

‏ هلیکوپتر کی آشاغی سوییه ده حرکت ائله ییردی شهرین اوستونده، ‏نئچه دؤور ووراندان سونرا، چوخ زامان چکمه دی کی توزاناق ‏سالاراق گؤمروکون محوطه سینده، ساحیله یاخین بیر چالا چوخور ‏فوتبال مئیدانیندا یئره اوتوردو. ‏

‏ نئچه دقیقه دن سونرا کی هلیکوپترین گورولتوسو کسیلدی، پروانه سی ‏لنگر وئره ـ وئره دؤوردن دوشدو. ‏

‏ توزاناق کی چکیلدی هلیکوپترین قاپیسی آچیلاراق بوآندا بیر جاوان ‏افسر و بیر قارا یاخا قاراشینلی اورتا بوی آدام هلیکوپتردن ائنیب، بیر ‏جیپ ماشینینا ساری کی او یاخینلیقدا دایانمشیدی گئتدیلر. ‏

‏ جیپین یانیندا بیر گروهبان و ایکی سیلاحلی سرباز کی بیر ساعت ‏اوندان قاباق هلیکوپتره منتظر ایدیلر دورموشدولار.‏

‏ ائله کی او ایکی آدام ماشینا یاخینلاشدیلار گروهبان سربازلارا ‏خبردارلیق وئره رک آماده باش حالیندا نئچه قدم قاباقا گئتدی، و او حالدا ‏کی اوجا سسله او افسر و قارا یاخا آداما خوشگلدین دئییردی نظامی ‏احتراملا اونلاری ماشینا طرف مشایعت ائله دی.‏

‏ سربازلار خبردارحالیندا جیپین قاپیلارین اونلارین اوزونه آچاراق ‏افسر و او قارایاخا آدام کئچیب ماشیندا اوتوردولار.‏

‎ ‎‏ جیپین قاپیلارین کی اؤرتدولر، گروهبان فرمان دالینا کئچیب ماشینی ‏یاندیردی و او حالداکی سربازلار جیپین یانیندا خبردار دورموشدولار او ‏ارتشی ماشین آرام حرکت ائله یرک گؤمروکون حیاطیندان چیخیب، هتل ‏ساحیله طرف یولا دوشدو. ‏

‏ او زامانکی او ماشین یولدا ایدی ایکی قارایاخا آدام کی کت شالوار ‏گئییب کراوات وورموشدولار هتل ساحیلده اونلارا منتظر ایدیلر. اونلارین ‏بیری کلانترینین رئیسی آقای جهاندار بیری ده امنییت سازمانینین رئیسی ‏آقای سعادت طلب ایدی.‏

‏ نئچه دقیقه دن سونرا او ارتشی جیپ هتل ساحیلین قاباقیندا ساخلادی. ‏بو حالدا ایکی خدمتکار کی اصلاح ائله یب مرتب گئیینمیشدیلر جیپه ‏ساری گئدیب ماشینین قاپیلارین اونلارین اوزونه آچاراق همان آداملار ‏ماشیندان ائنیب هتله گیردیلر. ‏

‏ مهماندارلار قوناقلارا خوشگلدین دئیب اونلاری یئمک اوتاقینا ‏گؤتوردولر.‏

‏ اونلار پالتو و بؤرکلرین چیخاردیب خدمتکارلارا وئریب، سونرا ‏مهماندارلارلا برابر بیر دؤشنمیش میزین دؤوره سنیده اوتوردولار.‏

‏ میزین اوستونده هر شئی مرتب اؤز یئرینده ایدی. بشقاب، چنگل ‏قاشیق، لیوان، ال دستمالی، مختلیف یئمکلر، ایچه جک، سالاد و باشقا ‏لازیم اولان شئی لرده دوزولموشدو. اونلار تقریبا یاریم ساعتا قدر یئمک ‏ایچمگله مشغول اولدولار.‏

‏ یئمکدن سونرا باشقا بیر خصوصی اوتاقا کئچیب، بیر میزین دؤوره ‏سینده کی اونون اوستونده گینده مختلیف ایچه جک، جوره به جوره مزه، ‏خاویار و ایکی بطری ویسکی گؤزه ده ییردی اوتوردولار.‏

‏ اونلار کی میزین دؤوره سینده یئر توتدولار امنیت سازمانینین ‏رئیسی او قارا یاخا قوناقا اوز توتوب دئدی:‏

‏ « جناب سرهنگ!.. ایجازه بویورورسوز؟»‏

‏ او قارا یاخا آدام کی تقریبا اللی یاشیندا نظره گلیردی اردبیل ‏اردوسونون باشچیلاریندان بیری سرهنگ اظهاریان ایدی. سرهنگ ‏باشینین ایشاره سیله منظورون بیلدیره رک اوحالداکی امنیت سازمانینین ‏رئیسینه باخیردی رغبتله دئدی:‏

‏ « ایجازه سیزده دی. سروان!»‏

‏ او قارا یاخا قارا شینلی آدام کی همکارلاری اونا جناب سرهنگ سؤیله ‏ییردیلر یالنیز اوردو باشچیسی یوخ، همده ساواک اداره سینین ‏بازجولاریندان بیری ایدی. اوجورکی دئییردیلر چوخ انسانلاری فدائی، ‏کمونیست آدیلا شکنجه آلتیندا قتله یئتیرمیشدی.‏

‏ بو مرموز و اسرار انگیز آدامین اصلی آدی کیمسه یه بللی دئییلدی. ‏اظهاریان اونون یالنیز مستعار آدی ایدی.‏

‏ سروان سعادت طلب سرهنگین امرینه اطاعت ائده رک بیر ‏مخصوص سئوینجله الین اوزادیب میزین اوستونده کی ویسکی بطریسین ‏گؤتوروب باشینین پیچاتین آچاراق ویسکینی استکانلارا دولدوردو. سونرا ‏بیر استکاندا سرهنگه تعارف ائله یرک دئدی: ‏

‏ « جناب سرهنگ‎!‎‏.. خدمتوزده.»‏

‏ سرهنگ اوندان تشککور ائله ییب بیر لحظه فیکره گئتدی.‏

‏ سونرا استکانی گؤتوروب ائله بیلکی بیرمتاع شئی الینه آلمیشدی ‏گولومسوندو، و بیرشئی سؤیله مه دن گؤزلرین ویسکینین رنگینه زیلله ‏ییب دوموخدو. ‏

‏ اونلار استکانلاری قووزایب ساغ اول دئه یرک بیر بیرینه ‏ووردولار. ‏

‏ سرهنگ بیر بؤیوک قورتوم ویسکی ایچَندن سونرا صفتی بوزولدو. ‏بوحالدا الین اوزادیب میزین اوستونده کی خاویاردان بیر قاشیق صرف ‏ائله ییب آغزینین مزه سین ده ییشدی. ‏

‏ اونلار سیگار یاندیریب بیر سیگاردا سرهنگه تعارف ائله دیلر. ‏سرهنگ اوحالدا کی باشینین اشاره سیله همکاریندان تشککور ائله ییردی ‏ساغ اول دئه یرک ویسکی استکانین بوشالتدی. آردیندان نئچه نفس سیگارا ‏ووراندان سونرا فیکره گئتدی. ‏

‏ او حالداکی ماوی توتون باشینین اوستوندن قالخیب یاواش یاواش اتاقی ‏بورویوردو بالا بالا خوشلانیب صحبته باشلادی.‏

‏ سرهنگ سانکی مشروبون اثریندن انرژی تاپمیشدی اؤزو اؤزونه ‏گولومسونه رک دئدی:‏

‏ « بو مجلیس بیر خاطیره نی یادیما سالیر.»‏
‏ بو حالدا غرورنان بیر آه چکدی.‏

‏ سروان ایختیاری سرهنگین ماوینی ائله بیلکی اونون صحبتیندن ‏وجده گلمیشدی سرهنگه اوزتوتوب دئدی: ‏

‏ «جناب سرهنگ.. آیا خوش بیر خاطیره دی؟»‏

‏ سرهنگ ائله بیلکی خیالیندا بیرشئیه دوشونوردو اونا جاواب وئرمه ‏یرک باشین ترپتدی. ‏

‏ اونلار کی سرهنگین سؤزونه ماراق گؤستریردیلر مننتلی ‏باخیشلاریلا اونون خاطیره سین دویماق ایسته ییردیلر.‏

‏ بو حالدا سروان ایختیاری سرهنگه اوز توتوب دئدی:‏

‏ «جناب سرهنگ. سیزی شاهین جانی!.. اگر خوش خاطیره دی ‏سؤیله یون بیزده ائشیده ک.»‏

‏ سرهنگ کی ویسکینین اثریندن اؤزون چوخ خوش و مسرور حس ‏ائله ییردی ‏

گولومسونه رک ئدی:‏
‏ « بیر آز اما خصوصی دی.»‏

‏ بو حالدا امنیت سازمانینین رئیسی بشاشت لحنیله گوله رک سرهنگه ‏دئدی:‏

‏ «جناب سرهنگ!... سیزون سؤزوز بیزه گنج اسراردی قوربان!‏
‏ بو کی شرف حضوروزا آیدین دی!»‏

‏ سرهنگ کی چوخ غرور دویاراق مسرتله اونلارین سؤزلرینه قولاق ‏آسیردی و حتتا ائله بیل کی بو خاطیره اوندا بیر بؤیوک قهرمانلیق حسّی ‏یارادیردی دئدی:‏

‏ « بو ماجرا اوزون بیر صحبتدی.»‏

‏ سرهنگ ظاهیراً ائله بیلکی ایسته مه ییردی خاطیره سین اونلارین ‏یانیندا تعریف ائله سین، آمما اوره گی ایسته ییردی عؤمرونون بو واقتیندا ‏بئلنچی بیر صحبتله اؤز شجاعت و ریشادتین همکارلارینا تعریف ائله ‏ییب اونلارین یانیندا اؤزون بیر شخصیتلی آدام تانیتدیرسین، و اؤزونه بیر ‏مخصوص احترام قازانسین.‏

‏ اونا گؤره بیر عجیب پوزونان ائله بیلکی ایسته ییردی دانیشیقیلا ‏اونلارین اوستونده بؤیوک بیر تاثیر قویسون سؤیله دی: ‏

‏ « بو خاطیره جاوانلیق خاطیره سیدی.»‏

‏ اونون سؤزونون آردیندان امنیت اداره سینین رئیسی سعادت طلب ‏مینتدارلیقلا دئدی:‏

‏ « داها گؤزل.. جناب سرهنگ!»‏

‏ سرهنگ کی میزین دؤوره سینده اوتورانلارین تعریف و تمجیدیندن ‏قیافه سینده مخصوص بیر غرور منعکس اولوردو خاطره سین باشلامادان ‏اوّل بیر نوع فخریله دئدی:‏

‏ « امیدوارم سؤزلریم سیزی یورماسین.»‏

‏ «خیر. خیر! ... جناب سرهنگ!»، سؤیله دی سروان ایختیاری تله ‏سیکلی :‏
‏ « قوربان!.. باشیمیزین اوجالیغیدی!»‏

‏ سرهنگ اوحالداکی صفتینده بیر نوع ذوق جلا تاپمیشدی، ائله ‏بیلکی بیر بؤیوک قهرمانلیق داستانین تعریف ائله ییر سؤزو بئله ‏باشلادی:‏

‏ « توت ها توت زمانیندا بیر اکیپ سرباز يانيمجا گؤتوروب، ‏دوشموشم اردبیلین کتلرينده فدائی داليجا گزیرم. قیشين اورتا آییی هاوا بتر ‏سويوخدی. او كتدن بو كنده دوشدوك آخشاما. سروان مداریان عملیاتین ‏باشچیسی گؤردیکی سربازلارينان كئف ايشينه باخماق بير آز قميش دی، ‏بهانه توتوب سربازلارا دئدی؛ ایشیمز بوردا دای بیتدی. دئدی: ماشینی ‏گؤتورون قاییدین گورهانا.‏

‏ اولاری کی یولا سالدی عینی حالدا کاتتانی چاغيريب اونا دئدی: ‏
‏ ـ آخشاما سنه قوناغوق. بیزه بير خلوت اوتاق جورراییب، بساط ‏حاضیرلا.» ‏

‏ بو حالدا سرهنگ ائله بیلکی اؤزون بیر اوزون ماجرا توصیفینه، ‏حاضیرلاییردی بیر درین نفس سیگارا ووراندان سونرا سانکی سیگاری ‏یئمک ایسته ییردی بیتیردی. سونرا ویسکی استکانین قووزایب ساغ اول ‏دئه یرک بیر بؤیوک قورتوم مشروب ایچدی. ‏

‏ اونون آردیندان همکارلاریدا اونا ساغ اول دئه یرک ویسکی ‏استکانلارین قووزایب بیر دفعه ده بوشالتدیلار.‏

‏ سرهنگ مشروبون اثریندن گؤزلرین بیر لحظه یوماراق دوداقلارین ‏بوزدو. بو حالدا گؤزلرین ویسکی استکانینا زیلله ییب تعجب لحنیله بیر ‏شئی میزیلدایاراق دئدی:‏

‏ « بتر... بیر شئیدی!»‏

‏ سرهنگ استکانین میزین اوستونه قویوب سیگار قوطی سیندان بیر ‏دانه سیگار چیخاردیب آلیشدیرماقا چالیشدی. آمما امنیت سازمانینین ‏رئیسی تئز اونا اود توتوب سیگارین یاندیردی. ‏

‏ سرهنگ باشینین ایشاره سیله اوندان تشککورائده رک نئچه نفس ‏سیگارا ووراندان سونرا ائله بیلکی ذهنینده بیر شئی یه دوشونوردو ‏سؤزونون داوامیندا دئدی:‏

‏ «بونودا البته دئمه لیم کی سروان مداریان او كـتلری چوخدان ‏تانياردی. كـندين اهالی سینين گؤزونون اودون آلميشدی. ‏

‏ حتتا اوننان قاباخ هر وقت کی آخشاما دوشه ردوک كاتتا اؤزی اؤز ‏ايشين بيله ردی. بیز دئـمك لازيم دئییلدی. اؤزی واختيندا سروانین بساطین ‏حاضیرلاردی. اؤزی بيله ردی کی سروان مداریانین آخشاما گرک جوجه ‏کبابی اولسون.»‏

‏ کلانترینین رئیسی او حالداکی تعجبله سرهنگین آغیزینا باخیردی ‏اونو تمجید ائده رک دئدی:‏

‏ « عؤموروز اوزون اولسون!.. جناب سرهنگ! بتر هیجانلی بیر ‏خاطیره دی .»‏

‏ سرهنگ ائله بیلکی خاطره سین تعریف ائله مکدن اوره گینده بؤیوک ‏بیر هیجان یارانیردی سؤزونه داوام وئره رک دئدی:‏

‏ « شامی كی اتتی پتتی خیرتده يه جن يئدوک مانقال قويوب کؤزی ‏حاضیرلادی. ‏

‏ كؤز کی قیپ قیرمیزی قیزاردی ياريم لوليه قدر گتیريب یاپیشدیردی ‏وافورون کلّه سینه . یئروز بوش!... چک ها چک !»‏

‏ سرهنگ اوحالدا کی میزین دؤوره سینده اوتوران همکارلارینین ‏قیافه سینه نظر سالیردی بیر مخصوص ذوقلا دئدی:‏

‏« اوستونن ده پور رنگ چای آداما نعشه وئریردی.»‏
‏ بوحالدا سرهنگین ماوینی اونا به به دئه یرک تملق لحنیله سرهنگه ‏دئدی:‏
‏ « دوستلاربیزیم یئریمیزمه..! جناب سرهنگ.»‏

‏ سرهنگ بیر لحظه مکث ائله ییب دوشونه رک اضافه ائتدی: ‏

‏ « بو خاطیره البته قدیم زامانین سؤزودی. اصلینده بیر شیرین یوخی ‏کیمی یادیمدا قالیب.»‏

‏ امنییت سازمانینین رئیسی سرهنگین سؤزون تصدیق ائده رک دئدی:‏

‏ «جناب سرهنگ! سیز.. دوغروداندا بئلنچی سعادتلره لایق سوز.» ‏

‏ سرهنگ کی همکارلارینین تعریف و توصیفیندن هیجانا گلمیشدی ‏سانکی سؤزونون تاثیرین اونلارین باخیشیندا آشکارا احساس ائله ییردی ‏دئدی:‏

‏ «خوب! بو هله ايشين اوّلی ایدی. ترياك كی سروان مداریانی نعشه ‏لـنديرردی، كاتتا سروانین باخیـشیقیندان ايشین بیلیب تئـز دوروب چؤله ‏چیخاندا دئیه ردی؛ جناب رئيس! سيـز مشغول اولون. منده خدمتوزده یم!» ‏

‏ سرهنگ بیر قاشیق قاتیق صرف ائله ییب بیر دانه بادام آغیزینا آتیب ‏چئینه میه باشلادی. ‏

‏ سونرا الین اوزاتدی ویسکی استکانینا و ائله بیلکی سو ایچیر بیر دفعه ‏ده استکانی بوشالتدی. عین حالدا الینین دالیلا آغیزین سیلیب دئدی:‏

‏ «البته کاتتا بونو بيلیردی اگر سروان مداریانین سؤزونه اعتنا ائـله ‏مسه سروانین سسی قالخاجاق. ‏

‏ اونا گؤره چوخ زمان چکمزدی گئجه نين قارانـليغیـندا بير هجینتی ‏ائـشيدردوک. قاپی کی آچیلاردی طرف سس سیز بیر گؤزل خانیمی ‏گتیریب سالاردی اوتاغا.»‏

‏ کلانترینین رئیسی کی سرهنگین سؤزلریندن آغزی آچیق قالمیشدی او ‏حالداکی ائله بیل گؤزلرینده برق جرقه وئریر اؤزون سرهنگه ایسته ده ‏رک تمجید و توصیف لحنیله سرهنگین سؤزونون آراسینا گیریب دئدی:‏

‏ « ساغ اولون!.. جناب سرهنگ! عشقی بیر ماجرایه اوخشاییر.»‏

بو آن امنیت سازمانینین رئیسی، سروان جهاندارین سؤزون دویاراق بیر ‏مخصوص ذوقلا گولدو و او حالدا کی لحنینده بیر نوع تحسین سرهنگه ‏نسبت آشکاراولموشدو اونلارین سؤزونه قاریشاراق دئدی:‏

‏ « ائله اونا گؤره جاوان قالیبسوز!.. جناب سرهنگ!»‏

‏ سرهنگ ائله بیل کی او تعریف و تمجیدلردن دای دریسینه ‏سیغماییردی گولومسونه رک دئدی: ‏

‏ « طرفده نه!.. هنگاما بیر شئی!»‏

‏ سرهنگ کی سؤزلرینین اثریندن میزین دؤوره سینده اوتورانلارین ‏قیافه سینده بیر نوع شور و شوق، و هیجان حس ائله ییردی و ائله بیلکی ‏غمی غرورونا قاریشمیشدی، گؤزلرینده بیر گرگین ظلماتین اثری منعکس ‏ایدی. آمما سعی ائله ییردی اونلارین یانیندا اؤزون بیر آغیر و متانتلی آدام ‏گؤسترسین. ‏

‏ بو آرادا سروان ایختیاری استکانلاری ویسکیله دولدوراراق، تحسین ‏لحنیله سرهنگه دئدی:‏

‏ «جناب سرهنگ!.. سیزی آلـله! ادامه وئروز. جالب خاطیره دی.»‏

‏ سرهنگ گولومسونه رک اوحالداکی بیر مرموز باخیشلا ‏همکارلارینین نظرین اؤزونه جلب ائله ییردی اونلارین سؤزون تصدیق ‏ائده رک فخریله دئدی:‏

‏ « البته!... اونودولماز خاطیره دی.»‏

‏ بو حالدا امنیت سازمانینین رئیسی تملق لحنیله سرهنگین سؤزونون ‏آراسینا گیردی: ‏

‏ « یاشایوز!.. جناب سرهنگ!»‏

‏ سرهنگ اونا جاواب وئرمه یرک باشین تحسین معناسیندا ترپتدی. ‏سونرا سؤزون داوامیندا دئدی: ‏

‏ « او زامانلار سروان مداریانین سؤزونون چوخ کسه ری وار ‏ایدی.»‏

‏ بو آرادا سروان ایختیاری کی مشروب استکانین قووزامیشدی، ‏سرهنگه باخاراق سسلندی:‏

‏ « جناب سرهنگ!... ساغ اولون!»‏

‏ اونلار استکانلارین بیر بیرینه ووراراق دوباره ساغ اول سسی ‏اوتاقی بورودو.‏

‏ سرهنگ کی ویسکینین اثریندن اوز گؤزونون قیریشیقی ‏درینلشمیشدی، بیر قاشیق خاویار صرف ائله دی.‏

‏ کلانترینین رئیسیده او حالدا کی مشروبون اثریندن باشین سیلکه له ‏ییردی بیر قاشیق یوغوردونان آغزینین مزه سین ده ییشیب سرهنگی ‏سؤزون داوامینا تشویق ائده رک دئدی:‏

‏ « جناب سرهنگ!.. بویوروز!»‏

‏ سرهنگ بیر درین نفس سیگارا ووراندان سونرا ائله بیلکی سؤزونه ‏هیجان وئرمک ایسته ییردی همکارلارینا دئدی:‏

‏ « فکر ائلیرم سؤزلریم سیزی یوراجاخ!»‏

‏ سروان ایختیاری کی سرهنگین صحبتیندن هیجانلی نظره گلیردی، ‏سرهنگه اوزتوتوب تلسه تلسه دئدی:‏

‏ «خیر! خیر!.. جناب سرهنگ!.. سؤزلروز چوخ اعلا دی. قوربان!»‏

‏ سرهنگ سیگارین کولون سیگارآلتینا تؤکوب اوحالداکی قیافه سینده ‏بیر نوع تکبر منعکس اولموشدو دئدی:‏

‏ «البته سروان مداریاندا کاتتانین خدمتلرینین عوضین چیخاردی.‏

اونا دئمیشدی حومه ده نقدر توت ها توت اولسادا سن آمانداسان.»‏

‏ بو حالدا سرهنگ سانکی بیر سیرّین اوستون آچماق ایسته ییردی و ‏ائله بیلکی باشقا اوتاقدا بیر کس سرهنگین سؤزلرینه قولاق آسیر آلچاق ‏سسله دئدی:‏

‏ « سروان مداریان دییه بیللم کی بو بابتدن چوخ شوخ و گؤزل ‏خانیملارلا معاشرت ائله ییردی.»‏

‏ «چوخ ماراخلیدی.. جناب سرهنگ!»، دئدی امنیت سازمانینین ‏رئیسی سرهنگین سؤزون آراسینا گیره رک.‏

‏ سرهنگ ائله بیلکی اؤز دانیشیقیندان راضی و سرخوش نظره گلیردی ‏سؤزونون داوامیندا دئدی:‏

‏ « اوجور کی عرض ائله دیم. سروان کاتتایه تذککورله دییه ردی:‏

‏ ـ سنون هئچ ذادینان ایشون اولمیجاق. سن فقط دولتین خدمتینده ‏اولاجاقسان.‏

‏ البته کاتتا اؤزو بونو بیلیردی اته گی سروانین دیزینین آلتیندادی. ‏سروان مداریان کاتتانین قاینینین فرقه ماجرا سیندان خبری واریدی.» ‏

‏ سرهنگ او ماجرانین داوامیندا ضمنی بیر خاطره یه اشاره ائده رک ‏اوحالدا کی سؤزونون آراسیندا مزاح لحنیله گولوردو دئدی:‏

‏ « کاتتا اوّل بونو اعتراف ائله میردی. بو ایش سروان مداریانا یقین ‏اولاننان سونرا سربازلاری یوللادی کاتتانین ائوینه اونو ال ایاغی باغلی ‏گتیرتدیردی پاسگاها.‏

‏ نئچه گون آج سوسوز کاتتانی پاسگاهین قارانلیغ زیرزمی سینده ‏ساخلاتدیردی.‏

‏ سروان قاباخجا او کندین پاسگاهینین رئیسی استوار ثابت مراما ‏دئمیشدی اوردا حالی اؤزونه گلنن سونرا دانیشار. ‏

‏ نئچه گوننن سونرا استوار ثابت مرام سروانا خبر وئریب دئمیشدی؛ ‏بو ایشلرینن یوموشالان دئییل. سرواندا عصبانی حالدا دئمیشدی؛ بوگون ‏اؤزوم گلیب اونو یوموشالدارام. ‏

‏ سروان او گون ناهاردان سونرا جیپی مینیب گئتمیشدی پاسگاها. ‏پاسگاهدا کاتتانی الی گؤزی باغلی ائبئله وورموشدی آغیزینین بورنونون ‏قانی بیربیرینه قاریشمیشدی. ‏

‏ دئمیشدی؛ اگر سسون چیخسا.. وئررم فدائی آدینا گولـله لرلر!...‏

‏ اوجورکی ائشیتدیم کیشینین هیکلی نئچه گون پاسگاهدا اؤلوم حالیندا ‏یئرده قالمیشدی. ‏

‏ اوننان سونرا کاتتا دای آدام اولدی. سروان مداریان هر شئی ایسته ‏سئیدی بیرغلام کیمی سروانین قوللوغوندا دایاناردی.»‏

‏ سرهنگ اظهاریان نئچه نفس سیگارا ووراندان سونرا ائله بیلکی ‏فیکری کئچمش زامانلاردا سئیرائله ییر سؤزونون داوامیندا دئدی:‏

‏ « منکی فرقه غائله سینده ریشادتلریمه گؤره درجه آلیب سروان تمام ‏درجه سینه کئچمیشدیم، داها او منطقه دن عوض اولوب باشقا بیر منطقیه ‏گئتدیم. اما او خوش گونلرکی سروان مداریانینان اوردا چکمیشدیم، او ‏خاطره لر هله ده ذهنیمده قالمیشدی...» ‏

‏ البته سرهنگین منظورو " فرقه غائله سیندن" همان 21 آذر 1325 ‏ایدی. او فاجعه ده کی آذربایجان خلقی، شاهین سیلاحلی قوه له رینین ‏طرفیندن قتل عام اولموشدو.‏

‏ سرهنگ او حالداکی بیر مخصوص افتخارلا همکارلارینا باخیردی ‏ائله بیلکی قدیم گونلرین حسرتین چکیر سؤزونون داوامیندا دئدی:‏

‏ « نئچه ایل او زاماننان کئچمیشدی. بير گون جیپی مینیب سروان ‏مداریانینان همان کنده سوردوک. پاییز فصلینین آخیرلاریدی. آخشام ‏اوستونه ياخين كنده یئتیشیب همان كاتتانی تاپدوخ. ‏

شاواخ كی قارالدی كاتتا بیزی ائوینه دعوت ائله یرک دئدی: ‏

‏ ـ جناب رئیس! خدمتوزده اولاخ!‏

‏ سروان مداریان تعارف اهلی دئییلدی. دئدی:‏

‏ ـ ائله سنی گؤرمیه گلمیشوک.‏

‏ سروان اؤزی آدام صرافی ایدی. تا بونی دئدی گؤردوک کیشینین ‏رنگی آتدی.»‏

‏ سرهنگ بو حالدا امنیت سازمانینین رئیسینه باخاراق اضافه ائتدی:‏

‏ «او زامانكی سروان مداریان او منطقه نین رئیسی ایدی کاتتا ‏سروانین قاباغیندا بيرغلام كيمی داياناردی.‏

‏ آمما بو دفعه او حالداكی دای او منطقه دن گئتمیشدوک کاتتانین ‏رفتاريننان حس ائله ییردوک بیزه قاباخكی كيمی سايغی گؤرستمیر بير آز ‏سويوخ نظره گلیر. ‏

‏ بو حركت سروان مداریانا بتر ده يمیشدی. اما هله بير سؤز دئمه ‏ییردی. اؤزون ساخلاشديریردی.‏

‏ شام واختی کی اولدی فيكرائله دوك کاتتا دوباره همان برنامه نی ‏حاضيرلاياجاغ. اما بو دفعه او حالدا کی اؤزی بیزی ائوينه دعوت ائله ‏ميشدی داها او برنامه لردن خبر اولمادی.»‏

‏ بوحالدا امنیت سازمانینین رئیسی سرهنگین سؤزونون آراسیندا ‏دئدی:‏

‏ « جناب سرهنگ!.. جماعاتین اوزی چوخالیب.» ‏

‏ سرهنگ باشینین حرکتیله سروان سعادت طلبین سؤزون تصدیق ائده ‏رک او حالدا کی گؤزلرینده بیر نوع تهدید حس اولونوردو تاکیدله دئدی:‏

‏« چوخ!..» ‏

‏ بوحالدا سرهنگ سانکی بیرطلبکار کیمی اؤزون حاقلی گؤسته رمک ‏ایسته ییردی سؤزونون داوامیندا دئدی:‏

‏ « كاتتانين بير دنه چوخ گؤزل قیزی واریدی. قیز ائله اره گئتملی ‏ایدی.‏

‏ شام واختی کی اولدی سفره سریب، چای دمله یيب بير آز چؤركدن ‏ذاتان قويدولار سفره یه. بیز هله چوخ پاپئی اولمادوخ. سروان مداریان ‏دئدی:‏

‏ ـ بو شئیلرهله معده نی موليّن ائله مگ ایچون دی. ‏

‏ هردن ده كاتتا سروان مداریانا دئییردی؛ جناب رئیس! اگر قايماغی ‏يوغوردی،.. مئيلوزچکمير اوشاخلارا دئییم؛ باشقا بیر شئی ‏جورراسینلار.‏

‏ سرواندا کیشیه بی اعتنا باخاراخ اخمینن دئییردی؛ فعلا یئتر!»‏
‏ سرهنگ سؤزونه هیجان وئره رک اضافه ائتدی:‏
‏ «کاتتانین عایله سی کی یئمه یین یئدی، سفره نی بالا بالا ‏يیغیشديرديلار.‏

‏ بیزده بو بیریسی اوتاخدا گؤزله ییردوك ايندی سفره دؤشه یيب بیزه ‏جوجه دن ذاتدان گـتيره جك لر. ‏

‏ هئی گؤزله دوک گؤردوک خبر اولمادی. بير ساعت كئچدی خبر ‏اولمادی. ايكی ساعت کئچدی گؤردوک خیر خبر اولمادی.‏

‏ وقتی يقين ائله دوک، ائله شام بو ایمیش و تويوخدان ذاتدان خبر ‏يوخدی، سروان مداریانین قانی خاراب اولدی.‏

‏ عصبانی حالدا دیل دوداغینین آراسیندا کاتتانین دالیجا میزیلدییاراق ‏تهدیدله دئدی: بيشرف!.. آغيز بورون بو یئره يئتيريبسن، کی دای دولت ‏مامورينا هميت وئرمیرسن!..»‏

‏ سرهنگ سؤزونون آراسیندا بیر درین نفس سیگارا ووراراق او ‏حالداکی ماوی توتون آغیز بورونوندان قالخیب اوتاقی بورویوردو سؤزون ‏داوامیندا دئدی:‏

‏ « سروان بهانه داليجا گزیردی زهرين کاتتایا تؤكسون.‏
‏ ناراحتلیقدان بیر سیگار یاندیریب، بیرینده کاتتایا تعاریف ائله دی.‏
کاتتا سروانین سیگارینا میل گؤرستمدی. دئدی: اؤزومون سیگاریم وار.‏
‏ اما سروانین اصراریلا سیگاری قبول ائدیب یاندیردی.»‏

‏ سرهنگ بو حالدا ائله بیلکی قدیمکی همکارینین قدرتین تعریف ائله ‏مکدن مخصوص بیرلذت آپاریردی سؤزونون آردیجا دئدی:‏

‏ « سروان مداریان اؤزی آدام شناس ایدی. بیلیردی نجور گرک آدامی ‏غافیلگیرائله سین. ‏

‏ اونا گؤره هله کیشیه بیر شئی دئمه ییردی. اما گؤزلریندن زهر ‏یاغیردی. کاتتادا بونو آشکارا احساس ائله ییردی. ‏

‏ او جور کی عرض ائله دیم. سروان حؤصله لی آدام ایدی. اوقدر ‏گؤزلدی تا کاتتا سيگاری آخیراجان چكدی.»‏

‏ سرهنگ بو حالدا ائله بیکی سروان مداریانین قدرتین گؤزه چکمک ‏ایسته ییردی گولومسونرک مخصوص بیرافتخارلا سؤزون داوامیندا ‏دئدی:‏

‏ « کاتتا هر شئیدن بی خبر آخیر نفسلرین سیگارا ووراندا، سروان ‏بیردن بومب كيمی پارتلادی. دئدی:‏

‏ ـ بيشرف!‏‎ ‎آغیـز بورون بو يئره تئتیریبسن شاهین تاجینا اهانت ائله ‏ییرسن!‏

‏ و همن عصبانی حالدا قالخیب سيگاریـن كونه سين کاتتانین اليندن آلیب ‏آغیزينا نه گلیردی اونا ديدی.»‏

‏ سرهنگ ائله بیلکی او حادثه نی تعریف ائله مکدن بیر مخصوص حظّ ‏آپاریردی صحبتین داوامیندا هیجانلا دئدی:‏

‏ « بیچاره کاتتا قورخوسوننان دیلی توتولموشدی.‏
‏ سروان سیگارین کونه سین اونا گؤرسدیب دئدی: ‏

‏ ـ سن بو تاجی یاندیریرسان؟!‏
‏ دئدی:‏

‏ ـ ايندی گؤره جكسن بو ایش سنه نئچیه باخاجاق! ‏

‏ دئدی: ‏

‏ ـ ايندی وئره جیم سربازلار پاسگاهدا گؤنووی سويوب دریوه سامان ‏تپه جكلر.»‏

‏ سرهنگ اظهاریان او حالدا کی قیافه سینده بیر ذره ده مرّوت اثری ‏گؤرونموردو سؤزون داوامیندا دئدی: ‏

‏ «كیشی قورخوسوندان آداملیخدان چیخمیشدی: ‏
‏ ـ ایشتیباه ائله میشم!.. آقا رئیس!‏

‏ ـ ایشتیباه ائله یبسن! چوخدا ایشتیباه ائله یبسن!، چیغردی سروان ‏کیشینین باشینا.‏

‏ نه عرض ائله ییم، کاتتا بلكه ده عؤمرينده بئله بیر شئییه دیقت ائله مه ‏ميشدی. حتا بیلمیردی سروان مداریانین سیگاری تاج نشاندی.‏

‏ اونا گؤره هؤل هؤل دوشموشدی ال آیاقا:‏
‏ ـ آقا رئیس!.. بالالاریما رحم ائله!‏
‏ آرواد اوشاغیدا سیزلایردیلار. ‏

‏ ايشيم يوخ. گؤردوک هاميسی آغلاشيرلار سروان داها منصرف ‏اولدی. اماعصبانی حالدا كيشيه دئـدی: ‏

‏ ـ بو دفعه سنی باغيشلیرام!.. گئـت قوربان اول آرواد اوشاغووا.. ‏يوخسا وئرردیم پاسگاهدا گؤنووی سویاردیلار! »‏

‏ سرهنگ کی سعی ائله ییردی او واقعه نین جزئییاتین تمامیله شرح ‏وئرسین دئدی: ‏

‏ « کاتتا بیلیردی ایلیشیب. اونا گؤره یالواریردی: ‏
‏ ـ ایشتباه ائله میشم... آغا رئیس! عفو ایله!‏

‏ سروان عصبانی حالدا کیشینین باشینا چیغیراراق دئییردی:‏

‏ ـ بلی کی ایشتیباه ائله یب سن! لاپ غلط ائله یب سن!.. آنلاماییبسان! ‏باشووی دووارا ووربسان!.. احمق آدم!‏

‏ دئییردی:‏

‏ ـ اوره گون کی ایسته میر فدائی فرقه چی آدينا زیندانلاردا چورويه ‏سن!‏

‏ گؤردیلر سروان مداریان حددن آرتیق عصبانيدی سسلرین کسدیلر. ‏

‏ ال ایاقا دوشه رک آرواد قیزینا توو توتدی تئز گتیریب ايكی ميتکكه ‏سروانین بئلينین دالينا آتدیلار.»‏

‏ سرهنگ اظهاریان او حالدا کی او خاطیره نین شرحینده اؤزون چوخ ‏مسرور و نشئه لی حس ائله ییردی سؤزونه داوام وئره رک اضافه ائتدی:‏

‏ « سروان هله ده عصبانی ایدی . کیشیه تهمت ووراراق دئییردی:‏

‏ ـ هئچ بو اولدوزلاردان اوتانیب خجالت چکميرسن؟.. دولت ‏مامورونین قاباغينا ياوان چؤرك قويورسان؟

‏ همن لحظه کیشیه امر ائله یب دئدی: ‏
‏ ـ بیز آج اوق! بیزه بيرشئی دوزلدون! ‏
‏ کاتتانین گؤزلری قورخوسوننان بره لمیشدی. ‏
‏ سسی اسه اسه دئدی: ‏
‏ ـ نه بيشيره ك؟.. آغا رئیس!‏
‏ سروان مداریان کیشینین باشینا چیغیریب دئدی: ‏
‏ ـ نه بيشيره جك سن!.. ده وه دن، آدامدان، اششکكدن!‏
‏ دئدی:‏
‏ ـ قاباخجا نه بيشيره ردون؟
‏ كيشی بير لحظه دوشونوب دئدی:‏
‏ ـ آنلادیم. آقا رئیس!‏
‏ سرواندا عصبانی حالدا دئدی:‏
‏ ـ آنلایرسان.. اما گئج آنلایرسان! ‏
‏ دئدی:‏
‏ ـ سنی کیمی آدمین حقی اؤلومدی!» ‏

‏ سرهنگ اظهاریان بوحالدا ائله بیلکی همکارلارینین یانیندا غروروندان ‏دریسینه سیغماییردی سرخوش لحنیله دئدی:‏

‏ « یئروز بوش!.. چوخ زمان چکمه دی چیلوو خوروش و جوجه ‏کابابین اییی اتاقی بورودی.‏

‏ شامی کی خرتته یه جن یئدوک کیشی مانقالی گتیریب کؤموری ‏قیزارتی.» ‏

‏ سرهنگ ائله بیلکی او کئفلرین دادی هله ده آغیزیندا قالمیشدی بیر ‏مخصوص شوقلا سؤزونون داوامیندا اضافه ائتدی: ‏

‏ « نعشه میز کی حسابی جورراندی سروان سرخوش حالیندا کاتتایه ‏رمزینن باخاراق دئدی:‏

‏ ـ قیزا سؤیله گلسین مانقال باشينا!‏
‏ كيشی ائله بيل سروانین سؤزون هله قاوارمامیشدی دئدی:‏
‏ ـ نه بويوردوز! .. آقا رئیس؟
‏ سروان کیشیه توو توتوب دئدی : ‏
‏ ـ نه بويوراجیام!.. قیـزا دئگینن گلسین مانقال باشینا!‏

‏ کتتا سروانین سؤزونن دوموخاراخ قورخوسوننان ال آياقی تیتره ‏ییردی.‏

‏ ائله بیلکی سروانین سؤزونه هله ده اينان ماميشدی مظنون باخاراق ‏دئدی:‏

‏ ـ آقا رئيس! .. قیزی؟
‏ سروان کیشینین باشینا چیغیریب دئدی: ‏
‏ ـ به کیمی؟!.. اششگی؟ ‏
‏ دئدی: ‏
‏ ـ تئز اول!..»‏

‏ سرهنگ کی بو ماجرانی بیر مخصوص لذتله تعریف ائله ییردی ائله ‏بیلکی او خاطیره سرهنگین نعشه لی گونلرین یادینا سالیردی آرادا بیر ‏سیگار یاندیریب ویسکی استکانین دیبینده کی مشروبی باشینا چکیب ‏دئدی: ‏

‏ «کاتتا دیل دوداغینین آراسیندا بیر شئی میزیلدییاراخ قاپینی آچیب ‏اوبیریسی اوتاقا گیردی. بیر لحظه قاپینین دالیننان بیر بوغونتی سس ‏گلیردی.‏

‏ قاپی کی آچیلدی گؤردوک کیشی قیزین بيلنگيندن توتوب سورویه ‏سورویه گتیریر. ‏

‏ قیزی مانقالین باشینا گتیریب بوغولموش سسله باشینا چیغیردی. ‏دئدی: ‏

‏ ـ اوتور!‏

‏ قیز گؤزلرينین ياشی آخا آخا سس سیز یئره اوتوردی. صفتی قیپ ‏قیرمیزی قیزارمیشدی. ایضطرابدان بدنی یارپاق کیمی تیتره ییردی. ‏باخیشیغیندان بيلینیردی ده ده سی شيلله له ییب. » ‏

‏ سرهنگ بو حالدا ائله بیلکی بیر تاسفلی حادثه یه اشاره ائله ییردی ‏دئدی:‏

‏ « بو صحنه نی گؤرنده سروانین اعصابی خاراب اولدی. گؤردی ‏قیـزين آغلار صفتی مجليسين عیشین پوزاجاق قیـزين باشينا چیغيریب ‏دئدی:‏

‏ ـ دور گؤزومون قاباغيندان جهنم اول..!‏
‏ دئدی:‏
‏ ـ بوردا زیريلداما..! ‏
‏ قیـز اسه اسه دوروب او بيریسی اوتاغا گئتدی.»‏

‏ سرهنگ ائله بیل کی کئچمیش گونلرین حسرتین چکیردی بو حالدا ‏بیر مرموز فیکیر صفتینین قیریشلارین درینلشدیریردی. آمما اؤزون او ‏یئره قویمایاراق بیرمخصوص غرورلا سؤزون اوزاداراق دئدی: ‏

‏ « ترياك بیزی نعشه لنديرميشدی. اوستونن ده نئچه دنه پر رنگ ‏چای ایچننن سونرا سروان مداریان كيشيه زهرلی باخيب دئدی:‏

‏ ـ بو ماشين دولتین دی. بوراجان بنزين ياندیریب. ‏
‏ دئدی:‏
‏ ـ بونون خرجی نه اولاجاق؟ ‏
‏ کیشی سروانین سؤزون نن دوموخموشدی.‏
‏ اؤزی اؤزینه دانیشاراخ بیر لحظه دوشونوب باشقا بیر اوتاغا گیردی. ‏

‏ چوخ زامان چکمه دی هؤول هؤول قاییدیب بیرآز اسکناس گتیریب ‏سروانین دؤشکجه سینین آلتینا قویوب دئدی:‏

‏ ـ آقا رئیس... بالالاریم اؤلموشی! دار و نداریم ائله بودور.»‏
‏ سرهنگ کی سؤزلرینین داوامیندا کئفلی نظره گلیردی اضافه ائتدی:‏

‏ «سروان دای چوخ اوستون وورمادی. ‏
‏ نعشه میز کی حسابی جورراندی دوروب پالتووی گئيیب كاسکتی ‏گؤتوروب ایوانا چيخدوخ. ‏
‏ كيشی سیزلاییردی:‏

‏ ـ عفو ائله یون. آقا رئیس!‏
‏ کیشینین رفتاری آدامین اعصابین خاراب ائله ییردی. سروان تپانچانی ‏چیخاردیب تهدیدله کیشی یه دئدی: ‏

‏ ـ سسون چیخسا.. گولـله نی بوشالداجیام تپه وه!‏
‏ کاتتا گؤردی سروانین وورماخ قصدی وار سسین کسدی.»‏

‏ سرهنگ اوحالدا کی گؤزون امنییت سازمانینین رئیسینه زیلله میشدی ‏سؤزونون تعقیبینده دئدی:‏
‏ « سروان مداریان گؤردی اؤزی اؤز دیلیله دئمه سه کیشی وظیفه ‏سینه دوشونن دئییل، شوموره دؤندی.‏

‏ تپانچانی ضامیننن چیخاردیب دئدی: ‏
‏ ـ سوغاتیدا گرک دیلیم نن دئیه م. ‏
‏ کاتتا ایضطرابدان اسه اسه دئدی: ‏
‏ ـ نه سوغاتی... آقا رئیس؟ ‏
‏ سروان اخمینن دئدی:‏
‏ ـ سنون مال حیوانون یوخدی؟‎ ‎‏ ‏
‏ ـ وار... آقا رئیس! ‏
‏ ـ ایندی منظورومی آنلادون؟
‏ کیشینین دیلی توتولاراخ دئدی: ‏
‏ ‏ـ‏ آنلادیم. آقا رئیس!»‏

‏ سرهنگ بو حالدا ائله بیلکی ذهنینده بیر تراژدی صحنه یه ‏دوشونوردو سؤزونون داوامیندا دئدی: ‏

‏ « سروان مداریان بتر عصبانی ایدی. ایسته ییردی کیشینی قارانلیقدا ‏گولّه له سین.‏
‏ کاتتا بونو آنلامیشدی. آغلار سسله دئییردی : ‏

‏ ـ منی اؤلدورمه جناب سروان! بالالاریم ساغیر قالار!‏
‏ آرواد اوشاغیدا آغلاشیردیلار.‏
‏ سروانین سسی حددن آرتیق قووزانمیشدی، نیفرتله کیشینین باشینا ‏چیغریب دئییردی:‏

‏ ـ سن بیر پست!... و بیشرف آدام سان! ‏
‏ تپانچانی دایامیشدی کیشینین کله سینه تهدیله دئییردی: ‏
‏ ـ سنی کیمی خائن آدامین.. حققی اؤلومدی .» ‏

‏ سرهنگ اظهاریان بو حالدا ائله بیلکی همکارلارینین یانیندا اؤزون ‏بیر بشر دوست آدام تانیتدیرماق ایسته ییردی دئدی:‏

‏ « کاتتانین عایله سی بتر قورخموشدی. گؤردوم هامیسی آغلاشیرلار ‏رحمیم گلدی.‏
‏ سروانی تصمیمیننن منصرف ائله دیم. دئدیم: بئله نچی احمق آداملارا ‏گؤره عصابووی خاراب ائله مه.»‏

‏ سرهنگ ائله بیل کی خاطیره سین سؤیله مکدن بیرآز یورغون نظره ‏گلیردی دئدی:‏

‏ « تا سروان بیر سیگار یاندیرسین کیشی عجله ایله گیردی بیر ‏قارانلیق طؤیله یه. چوخ زاما چکمه دی بیر قوزی گتیریب ماشینین دالینا ‏آتدی.‏ سسی اسه اسه دئدی:‏

‏ ـ جناب سروان! آزدا اولسا باغیشلایون. ‏
‏ سروان عصبانی ایدی. حرصیننن کیشییه جاواب وئرمدی. ‏

‏ هاوا چوخ سویوخ ايدی. حؤصله میز يوخ ايدی كيشینين دنگینه قولاغ ‏آساق. اوندان علاوه گئجه نین قارانلیقیندا یول گئده جک ایدوک.‏

‏ حیاطه دوشوب گیریب ماشیندا اوتوردوخ. ‏
‏ سروان مداریان ماشینین پنجره سین آچیب عصبانی حالدا کاتتایا ‏تذککور وئریب دئدی:‏

‏ ـ بودونه سنی باغیشلیرام. گئت قوربان اول آرواد اوشاغووا...‏
‏ دئدی: اما گلن دؤنه، بو غلطلردن ائله سون تپانچانی بوشالدارام تپه ‏وه !»‏

‏ سرهنگ کی سؤزونده هله ده تذکر لحنی وار ایدی دئدی: ‏
‏ «سروان مداریان ماشینا ایستارت ووروب جیپین چراغلارین ‏یاندیردی. ‏
‏ اما هاوا بترخاراب ایدی. بیرلحظه دوشوندوک گئجه نی کاتتانین ‏ائوینده قالاخ. اما منصریف اولدوخ.»‏

‏ بو حالدا ائله بیلکی ویسکینین تاثیری سرهنگین سؤزلرینده ‏آزالمیشدی و سانکی گؤزلرینده بیر درین اضطراب دالغالانیردی سؤزونه ‏داوام وئره رک دئدی: ‏

‏ « او زامانلار یوللار چوخ خاراب ایدی. حیاطدن کی چیخدوخ یئل ‏یاغیش باشلامیشدی.»، سرهنگ ائله بیلکی گؤزلرینده بیر گرگین وحشت ‏منعکس اولوردو دئدی: ‏

‏ «ماشین پالچیخلی یولدا چوخ آغیر حرکت ائله ییردی. یئل سولی ‏قاری ماشینین پنجره سینه چیرپاراق وئییلداییردی.‏

‏ اطراف کتلرده حتا بیر دنه ایشخ دا گؤزه ده یمیردی. بیلیردوک ‏اگر پالچیخدا قالسوخ ایشیمیز بیته جک.»‏

‏ سرهنگ اوحالداکی ائله بیل صفتی اپریمیش آلمانین قابیغینا بنزه ‏ییردی صحبتین داوامیندا دئدی:‏
‏ « بیله خره چوخ چتینلیکله گلیب چیخدوخ شهره.»‏

‏ بو حالدا سرهنگ ائله بیلکی اؤز دانیشقیندان یورولموشدو میزین دؤره ‏سینده اوتورانلارا بیر مخصوص ژستینن باخاراق دئدی:‏

‏ « ظن ائدیرم سؤزلریمله سیزی یوردیم.»‏

‏ سروان سعادت طلب کی سرهنگه نسبت قیافه سینده بیر مخصوص ‏تشککور و میننتدارلیق اثری گؤرونوردو سرهنگه اوز توتاراق تملق ‏لحنیله دئدی:‏

‏ «یاشایوز.جناب سرهنگ!.. چوخ اعلا!... دوغرودان هیجانلی ‏خاطیره تعریف ائله دوز.‏ و او حالدا کی سوزونه تاکید لحنی وئریردی اضافه ائتدی:‏

‏ « جناب سرهنگ!.. بو قارا جماعته جللادلیق ائله مسون، آدام ‏اولمازلار.»‏

‏ سرهنگ کی اونا نسبت قیافه سینده بیر نوع اطمینان خاطر ‏گؤرونوردو ائله بیلکی باخیشین امنییت سازمانینین رئیسینین گؤزلرینه ‏قییغ کیمی باتیریردی بیر نوع غرورلا باشین ترپده رک دئدی:‏

‏ «حاخلیسوز.. سروان!»‏

‏ سرهنگ بوآندا ائله بیلکی بیر شئی یه دوشونور بیر لحظه قول ‏ساعاتینا باخدی و او حالدا کی فیکیرلی نظره گلیردی سروان ایختیاریه ‏دئدی: ‏

‏ « دییه سن به واختا قالاجیوخ.»‏

‏ بو حالدا ائله بیلکی بیر نا معلوم سببدن سرهنگین رفتاریندا بیرنوع عجله ‏گؤرونوردو گئتمک مقصدیله مهماندارلاردان تشککورائله دی.‏

‏ مهماندارلار سرهنگین امرینده منتظیر دوراراق، سرهنگ و ماوینی ‏قالخیب پالتو و بؤرکلرین گئییب همکارلاریلا ساغ اوللاشدیلار. ‏

‏ هتلدن کی چؤله چیخدیلار دئشته وار یئلی هاوانی قارالتمیشدی. ‏

‏ سرهنگ و ماوینی گیریب همان ماشینیندا کی هتلین قاباقیندا اونلارا ‏منتظیر ایدی او توردولار. ‏
‏ او حالدا کی مهماندارلار جیپین یانیندا خبردار دورموشدولار ارتشی ‏ماشین حرکت ائله ییب یولا دوشدو. ‏

‏ او زامانکی او جیپ یولدا ایدی دنیزین اوستونده اوفقون شمالیندا بیر ‏قارا بولوت سانکی بومب کیمی پارتلاماق ایسته ییردی، یئلین گوجویله ‏بورولوب گیرده لنیردی.‏

‏ تا اونلار هلیکوپتره قایتسینلار، بیر وحشتلی توفان دنیزی یئریندن ‏اویناداراق یئلین گورولتوسو گئت به گئت چوخالیردی. ‏

‏ نئچه دقیقه دن سونرا او ارتشی ماشین کی هلیکوپترین یاخینلیقینا ‏یئتیشمیشدی سربازلار خبردار حالیندا ماشینین قاپیلارین آچاراق ‏سرهنگ و ماوینی ائله بیلکی قاچاق حالیندا ایدیلار تله سیکلی ماشیندان ‏ائنیب گیریب هلیکوپترده اوتوردولار.‏

‏ او حالدا کی جیپین شوفیری ماشینین یانیندا خبردار دورموشدو چوخ ‏زامان چکمه دی کی هلیکوپتر ایشه دوشدو. پروانه سی لنگر وئره ـ وئره ‏دؤر گؤتورمه یه باشلادی.‏

‏ هلیکوپتر توزاناق سالاراق آغیرگورولتویله ائله بیل کی فوتبال ‏مئیدانین باشینا گؤتورموشدو دنیزه طرف گؤیه قالخدی و او حالدا کی بالا ‏بالا حیرانین گرده نه سینه دوغرو هاوایا یوکسلیردی قولاغی آپاران سسی ‏بیر گرگین توفانین گورولتوسونده بوغولاراق داغلارین قارانلیق ‏اوفقلاریندا گؤزدن ایتدی.‏

‏ شاواخ قارالمیشدی . خزری یئلی جاناوارکیمی آغاجلارین خوللاریندا ‏اولاییردی. نظره بئله گلیردی کی او توفان و قارا بولوتلار اؤلکه ده ایللر ‏داوام تاپاجاق ایدی. ‏
‎ ‎ ‏25.12.2012‏‎ ‎‏ ‏‎ ‎

No comments: