ناهاری بیرگه... بورانين گونشى آلتیندا!‏

مریم کعبی
چئویرنی: صدیقه عدالتی

MƏRYƏM KƏ`Bİ
NAHARI BİRGƏ... BURANIN GÜNƏŞİ ALTINDA!
Çevirəni: Siddiqə Ədaləti

ائل اوبانین کیشيلری، او شرف دیلنچيلری
آجی دیللریندن بدنیم یارالی
ایتیرمیش شرفلرینی
جانسیز بدنیمده آختارارلار...‏

بو شعرى گئريچى دوشونجه‌لردن دوغموش نيفرت و جهالت بيچاغى ايله عطيرساچان و گول قوخويان ياشام کؤکلرى ‏باغچاميزدان اوزولموش آسيه‌يه، شهريميزين بوتون قونچالارينا و قيزلارينا ايتحاف ائديرم. اونلار چورويوب- اپريميش ‏گله‌نکلره و عنعنه‌لره قارشى عوصيان ائتمه‌لريله حيات ايله قوجاقلاشميشلار.‏

‎1‎
آخشام گلیر ‏
و من هله ده ‏
بیر بیرلشمه‌یی گؤزلورم.‏
ائویم
اوچ بوجاقلى پاترياراشى‌نين حصارى ايچينده ‏
قاپی آرخاسیندا ...‏
شرف دیلنچیلری، قبيله‌نين ارککلرى
آجی دیللریندن بدنیم یارالی
ایتیرمیش شرفلرینی
جانسیز بدنیمده آختارارلار ‏

ائوین او بیری حیصاریندا ‏
کیتاب آداملاری....اورادا ‏
او سوچلولار ‏
شهوتلريميزى قفسده ساخلاييرلار.‏
شؤوقلريميز
سوچلارين بوخوووندان ‏
ساتين آلماقلا قفسدن قورتارارلار
‏ ‏
تمیز شهوتلر ‏
صیغه ايله...قیسط ایله ‏
ینه بیزه آزاد اولورلار

اورادا ائیواندا ….‏
ائوین حصارينين اوچونجو قاناديندا ‏
بی‌سیم دالقالارینین، واراق واراق کاغاذلارین آراسیندا
روحون ایستکینی سوسدورماق اوچون ‏
حراست قوروقچولاری،.يووا ساليبدير ‏
اونلارين...‏
‏ اللريميزين روحو اوخشايان بيرلشمه‌سيندن
‏«آنا يوردون» سارسينتى‌سى قورخوسو
بورویوب جانلارینی

ایندی آرتيق...‏
ائو بوتوولوکله چپرلنميش ‏
پنجره یه سارى تیترک پنجه لرله ‏
گونشه دوغرو، ايشيغا دوغرو...‏
‏ ایندی داها...‏
‏ بوراداجا اوچمالييام
‏ اللرين منه گرگدير
سون گؤروشمه میز بورادا اولمالی
من سنی فضادا ایسته‌ییرم ‏
گؤیله یئر آراسیندا ایسته‌ییرم

‏….....................‏

‎2‎
اوره‌ییم داريخير ...‏
يئنى يئتمه‌ليک اوچون ...‏
بیر، ناهارا منه گلسه ایدین ‏
اوره‌ییم داريخير
آسیه‌نین، زئینب‌ین، مریم‌ین عوصیانینا...‏
اونلار کی شام وعده سینه کؤنول وئرمیشلر
اوره‌ییم داريخير...‏
آخشام ایشیغیندان یورقون گؤزلريمله
باخیشیم اوتاغین دووارینا تيکيليب
اورادا...‏
نه گؤزل قوجاقلاشمیشلار
و اما شهرین اؤپوشلری ‏
بورادا....‏
‏ دونوق و سؤنوکدور ‏

‏….......‏

‎‎3‎‏ ‏
اوره‌ییم داریخیر...‏
آسیه یه
بوغدا تارلاسينا
اونونلا، بیرگه ناهار وعده‌سينه ‏
ائل اوبانین کیشیلری ‏
سامانلا بوغدانی اوزو يئله ساووردوغو یئرده.‏
و اورادا، چؤلده‌کى قيزلار
دولدوردولار کوزه لری قیزیل بوغدادان
بو آرادا اما آسیه...‏
بوغدا بایرامینا ‏
قار کیمی دون ایسته‌ییر
او آرتيق زنجیرلرینی قیریبدير ‏
روحونو اوچوردوبدور
ائل اوبانین عارینی سیلکه‌له ییب اؤزوندن
اوووو... ایندی
حياتين فخرى خلعتینی گئیمیشدير

‏ آنجاق آرتيق…‏
‏ قوردجيل‌لرين دبلرى سونا ارمیش
اونون اوچون گئرى دؤنمک يوخدو
و آسیه …‏
اونلارین بوش قدحیندن شراب ایچمک ایسته‌مه‌ییر
چونکو او...‏
اؤز گنجلیگی ایله ‏
سرخوشدور سرخوش

‎۴‎‏ ‏
‏ اللريم توتمور
پنجره ده دورا بيلمير
‏ سن ده...‏
آنجاق تئز اول، تلس
آسیه نین ناهاری بیزی گؤزله‌يير
او مزارلیقدان قاچيبدير...‏
اورادا
گومولودور قادینلارین شهوتی
یورقونلوق جانيمدان چیخدی
گؤزله‌ديگيم سنين وفاندير ‏
بیزیم وعده لریمیز
بیزیم قورخوموز بوايدى
بو ائل اوبانین وار اولوشوندان
و پيغمبرلرين توپراقا يئنمه‌سيندن اؤنجه
دوستاقلار و ساللاخ‌خانالار تيکسینلر
و بیزی...‏
گؤز یاشلاری آرخاسینداکی یاشام
حوزنلر ایچینده یوخ ائديلسين...‏

ايسته‌گيم...‏
گون اورتا چاغيندا بير گؤروش....‏
و گؤيون آلتیندا بیر رقص دير
من اوزوملوکلده قورولان ضیافتی ایسته‌میرم
آخشام اوستو بولبولون اؤتمه‌سينى ايسته‌ميرم
ناهاری من ‏
بورادا
اما بورادا
گونشیمیزین آلتیندا
سنین دوداقلارینلا
خورما آغاجلارین آراسیندا
ال- آیاغا دولاشان دبلردن اوزاق...‏
من
سئویشمه‌یی
کندده
بورادا...‏
آنا یوردومدا ایسته‌ییرم