Dec 27, 2012

گلین دوشونک!‏

علیرضا میانالی
غریب دویغولار کیتابیندان
Əlirza Miyanalı
Gəlin Düşünək!
‎Qərib Duyğular kitabından

بیر ایلده بئله جه گئتدی، آ قارداش‎!‎
نه سن دئین اولدی، نه ده من دئین‎.‎
هئچ نه ده ییشمه دی، هئچ نه، آ قارداش،
یئین همندیسه، یئییلن همن‎.


ده ییرمان داشینا اوخشادیق آرتیق؛
بیریمیز آتداییق، بیریمیز اوستده‎.‎
دن اویوتمه ییمیز قالیب بیر یانا،
هه در فیرلانیریق بو بحثه- بحث ده‎.‎

نییه دوشونموروک، گؤره سن نییه؟
دن کی یوخ، بوشونا فیرلانیریق بیز‎. ‎
بیر ایش گؤرنمیریک، اودورکی، قارداش
هه در فیرلانماغی ایش سانیریق بیز‎.‎

آخی بوش فیرلانان ده ییرمان داشی
قانمیریق، ان آزی اؤزون یئیه جک‎.‎
بو چوخ آیدین دی، چوخ آیدین، آ قارداش،
سورتولن داش کی، دن اویوتمه یه جک‎.‎

قاپاقلیق اولمایاق، گلین دوشونک؛
او گون یئتیشدیسه وای حالیمیزا‎.‎
او گون یئتیشدیسه، او گون آ قارداش،
گره ک اؤلوم یازاق بیز هامیمیزا‎.‎

قویون بو ناغیلی یازیب بیتیریم؛
قویون یازیم بیر آز من راحات اولوم‎.‎
نییه یاخالاسین بیزی آ قارداش‎-‎
نییه یاخالاسین ائله بیر اؤلوم‎.‎

کندیمیز یادیما دوشوبدور منیم؛
منی دوشوندورور اوردا گؤردویوم‎.‎
ائله بیل هم سسدی، هم قافیه دی،
اوردا گؤردویومله، بوردا گؤردویوم‎.‎

یادداشسیز ملتیک بلکه، نه بیلیم؛
گؤروب گؤتورموروک اولوب کئچه نی‎.‎
بو گون خیال چه کیب آپاریب منی،
کندی دولاندیریب بوتون گئجه نی‎.‎

ده ییرماندا دئییل، قاپاقلیق گؤردوم،
گؤردویوم داشلاری من هر تین باشی‎.‎
قاپاق قویولاجاق پوخ قویوسونا
بوشونا فیرلانان ده ییرمان داشی‎.‎

بیزده کی، یاتمیشیق فیل قولاغیندا،
اولوب کئچن لری آخی گؤرموروک‎.‎
بوشونا فیرلانان او داشلار کیمی
سن منی، من سنی هله سورتوروک‎.‎

نییه دوشونموروک، گلین دوشونک؛
محو اولماق اوزره دیر من- من سؤیله ین‎.‎
قاپاقلیق اولماغا یارییانلاردی
اؤزویله باشقاسین تن دوشونمه ین‎.‎

بیر ایلده بئله جه گئتدی، آ قارداش‎!‎
نه سن دئین اولدی، نه ده من دئین‎.‎
هئچ نه ده ییشمه دی، هئچ نه، آ قارداش،
یئین همندیسه، یئییلن سن، من‎.‎

No comments: