سنی سئومک

سخاوت عزتی(عندلیب)

یامان آغیر دردیمیش
آی گولوم سنی سئومک!
منی مندن آلارمیش
نه بیلیم سنی سئومک!

نه دینه اییلیرسن
نه ایمانا گلیرسن
سن اؤزونده بیلیرسن
نه ظولوم سنی سئومک!

دردی یوز – یوز عؤموردن
سئوینجی بوز عؤموردن
بو وفاسیز عؤموردن
حاصیلیم سنی سئومک!

سئوگی دوردو – اینجی‌دیر
چوخدا منی اینجی‌دیر

کؤنلومون سئوینجی‌دیر
سئوگیلیم سنی سئومک!

عندلیبه گوواه‌دیر
سئون کیمسنه شاه‌دیر
آما ندن گوناه‌دیر
من اؤلوم سنی سئومک!