Aug 5, 2015

بلکه بو هرنه یین سونو دور

سعید فیوضات
 
بلکه بو هرنه‌یین سونو‌دور

بلکه بو
چیرپینمالارین سونو دور
ایسلاق رؤیالاریم
گون قاباغیندا سویا گئدیر
سنی کؤلگه‌ن آپاریر بیلیرم
بوجار
گل بو یولچونون گؤروشونه
یوخسا
بیزده کیتاب
بیرگئجه ده، تونقال اولور
وار یوخ اولور
یوخ وار اولور
بیزده آلزایمئر قایناشیر
و تاریخ
اؤزگه قاپیسی‌دیر
چؤرک بایراق اولاندان
شهر دانیشمیر
و هر سحر
خیاواندان اورک‌لری سوپورورلر
ایندی یاشاماق نه‌دیر؟
:
قانلی یول‌لارا سپیلن دوز.
و بیز؟
:
بالتانین گؤزونده آغلاغان مئشه.
قانیمدا بیر ویروس وار سؤکور داماریمی
اونسوز دا بو داغ
کسیب خیریمی(۱)
هله ده بو باغلی قاپی‌نین آرخاسینداکی پنجره
کار خیاوانا دانیشیر
و سیاست
گولون واختی باغبانین ائشیتمز قولاغی‌دیر
بو بَده(۲) سحر
منه شینه‌ییر
دَهَنز(۳) اؤزونو سویا چکیر
او قیز آی ایشیغیندا، گونش‌له‌نیر
ایندی آنام بالیقلی دا آخیر
و گئدیر، لای لای گئجه‌لریمدن
ایندی زنجیر سسی گلیر
بو ناغیل‌سیز گئجه‌لردن
ائشیدیرم
کؤلگه‌م، قارانلیقدا اوتوروب آغلاییر
بیر اینجه سس
دولان با دولان کوچه‌لرده
منی سسله‌ییر
پنجره‌م ده گئجه‌دن بیر ناخیش قالیب
ساعات داریخدیقجا
زاوالا گئدیر
دورما
گل
بلکه بو گؤروشمک‌لرین
سونو‌دور
بلکه بو هرنه‌یین سونو‌دور
۱۹/۱/۹۴
(
۱)-  خیر = نفس
(
۲)- بَده = غیر-اصل
(
۳)- دَهَنز = دنیز

No comments: