Aug 24, 2022

باش ساغلیغی - حسین محمدزاده صدیق ( دوزگون) حیاتا گؤز یومدو

سورگونده گونئی آذربایجان (ایران) قلم انجمنی 


ائلیمین آجییان یاراسییام من،

ال قوی نبضیمه گؤر هاراسییام من،

پارچالانمیش قلبین پاراسییام من،

هر دونا گیرسم ده یئنه" دوزگونم"،

بو آد ایله حققیم واردیر اؤیونم.

 

حسین محمدزاده صدیق (حسین دوزگون)، آذربایجانیمیزین گورکملی و تانینمیش ادبیات و اینجه صنعت  خادمی و باجاریقلی ژورنالیستی بو گون ایکی شهریور ۱۴۰۱ حیاتا گؤز یومدو.

حسین محمدزاده صدیق 50  ایلدن آرتیق، لاپ گنج یاشلاریندان آذربایجانین دیل، ادبیات و فولکولورونو تانیتدیرماغینا و گلیشمه سینه چوخلو زحمتلر چکمیش و هر نوع آزار و اذیتیه دوزموشدو. صدیق هر فرصت دن ایستفاده ائدیب آذربایجان دیل و کولتورونو تبلیغ و ترویج ائتمیشدیر. حسین محمدزاده صدیق دئمک اولار میللی حوکومتین مغلوبیتین دن سونرا ایراندا  بیرینجیلرده ن ایدی کی آذربایجان دیل و ادبیاتینی تانیتدیرماقدا چوخ جدی ایشلر گؤرموش ایدی.

حسین محمدزاده صدیق آذربایجان خالقی اؤز موقددراتینی تعیین ائتمک حاققی یولوندا دا مباریزه لر آپارمیشدیر. صدیق - ین اینقلابدان قاباق آپاردیغی فعالیتلر و اینقلاب عرفه سینده و اینقلابین ایلک ایللرینده قلمی فعالیت لری و تاسیس ائتدیگی درگی لر، میثال اوچون "انقلاب یولوندا"، "وطن یولوندا"، "یولداش" و... بونا بیر ثبوت دیر.

سورگونده گونئی آذربایجان قلم انجمنی (ایران) حسین محمدزاده صدیق- ین وفاتینی حؤرمتلی عائله سینه، دوستلارینا و اوتایلی- بو تایلی آذربایجان و دیگر تورک اولکه لرین خالقلارینا باش ساغلیغی دئییر!

 

سورگونده گونئی آذربایجان (ایران) قلم انجمنی  

 

چرشنبه 2 شهریور 1401

 24 اوت 2022


No comments: