Sep 25, 2018

گینه ده مهر آیی نین بیری - گینه ده بخت سیز آنا دیلیمز

س. سید آوالی

فارسجا یوخ، آنا دیلینده یاز وطنداش*!..‌.

"
دونیا آنا دیلینی" باهانا ائدیب، لاکن آنا دیلینده ن یازماق ایسته میره م‌.

یوخ... آنا دیلینده ن یازماق ایسته میره م.
بئله "انسان حقلرینده ن" یازماغاغی دا بو گون بوش بوغازلیق بیلیره م.
نیه؟... بیلیرسینیز؟..‌.
بیر اؤلکه ده کی، اوتوز میلیونا یاخین یوخسول انسان یاشاییر و بو انسانلارین اوشاقلاری مدرسه یه گئتمک اوچون یازیب - اوخوماق وسایط نی آلماغا عاجز دیلر، اورادا انسان حقلرینده ن دانیشماق، بوش بوغازلیق دئییل می؟...
دئمک ایسته ییره م کی، "انسان حقلری" نی قوروماق، ایران کیمی بیر اؤلکه ده، ویرانه بیر ائوین اوطاقلاری نین بیرینین طاقچاسیندا قویولوب و یاددان چیخان لوکس بیر شئی یه بنزه ییر.
بیرده هانکی "انسان حقلرینده ن" دانیشیرسینیز؟..‌.
انسانلاری سیز یاراتدینیز کی، اونلارین آنا دیلینده تحصیل آلیب - آلماماغینا سیز قرار وئره بیلیرسینیز؟..‌.
ایندیکی تحصیل آلماق بیر حق دیر، اوندا آنا دیلینده تحصیل آلماق هر انسانین یوز دفعه حقی دیر.
نه ایسه...

ایران کیمی بیر اؤلکه ده هله لیک اسگی قاپی، اسگی دابان اوسته آچیلدیغی اوچون، آنا دیلینده تحصیل آلماغین خمیری چوخ سو آپاراجاقدی.
اونا گؤره، او گونون گلمه ییینی گؤزله مک اولماز.

وطنداش!..‌. ائله بو گون فارس دیلینده یوخ، آنا دیلینده یاز!...

بورادان بیرینجی نوبه ده آذربایجان و ایران تورک لرینین الیت ینه سسله نیره م:
-
وطنداش!..‌. فارس دیلینده یازما!...
هئچ اولماسا فیسبوک دا، تلگرام دا و دیگر مجازی کانال لاردا و اؤز آرانیزدا یازدیغینیزی، فارس دیلینده یازمایین!.‌‌..

-
بیر ملت و اولوسونون بینووره سینی یارادان اونون ادبیات، اینجه صنعت، آنا دیلی، تاریخ و یاشادیغی تورپاقلار دی. و بونلاری یارادیب و قورویاندا، او ملتین قاباقدا گئده ن آیدین، دوزگون بیلیک و تجربه لره مالیک اولان الیت ینده ن عیبارت دیر.

-
شعر و رومان لاریزی داها فارسجا یازمایین!**..‌.
داها او زمان گلیب کی، آذربایجانلی و تورک یازیچی لارینین فارس دیلینده یازدیقلاری رومان لاری آنا دیلیمیزه چئویره ک!...
-
آنا دیلیمیزده یازیلان کیتابلارین نشرینه یاردیم ائدین!...

وطنداش!... ائله گونو بو گون، آنا دیلینده یازماغا غئیرت ائله!..‌.

"
دونیا آنا دیلی" موبارک!..‌.

*
مملکت ین ان بؤیوک تاجری، ایش وئره نی و کاپیتال صاحبی اولان اسلامی رژیم، بوتون ایپ لری الینده ساخلادیغی اوچون، فارس دیلینی تمامیله بایکوت ائله مک، ایراندا یاشایان تورکلره ممکون دئییل. لاکن بیرینجی آددیملاری آتماغا، بئله بو شوونیست و پان آریا حاکمیتی ده مانع اولا بیلمز.
**
البته آنا دیلیمیزده رومان یازماق، فارس و لاتین دیللرینده ن آنا دیلیمیزه چئویرمک، آنا دیلیمیزده صحنه و تئاتری جانلاندیرماق و حتی بعضی فیلملری آنا دیلیمیزده چکمک فعالیتی، بیر نئچه ایل دی کی باشلانمیش و گئت - گئده چوخالماقدادی. عین زماندا بعضی نشر اوجاقلاریمیز آنا دیلینده کیتابلارین نشری و سرگی له مه سی اوچون، معین آددیملار آتماغا باشلامیشدیلار.
بوتون بو فعالیت لر تقدیره شایان دیلار.
لاکن ملتیمیزین ایره لیجی قووه لری بو فعالیت لرده ن داها آرتیق حمایت ائتمه لیدیلر.


عرب الفباسیندا متن وارسا بورادا یازین، یوخسا بو سطرلری سیلین

No comments: