قیسا شعرلر(۲۰)

فریبا مرتضایی

(۱)

سون باهاردا یازدیم-
توم قارشیلیقسیز دویغولاریمی؛
هارادا اولورسان اول،
فصیللره آلدیرما!
سن،
منیم ایلک باهاریمسان.

(۲ )
سسین
ایندییه‌دک قولاغیمدا؛
سندن گلن بیر سالام-
دیریلدیر منی.

یوخلا منی!
-«هله‌لیک» دئمه،
اؤلدورمه منی!

(۳)
یئنی‌دن باشلاماق
نه دئمک؟!
اوره‌ییمه یئرلشیبسن
قاداسی!

(۴)
گئری دؤنوش-
یالان دؤنوشدور.
قالان-
گئتمز!

(۵)
غم نه قده‌ر ده سس‌سیز چالا
اوره‌ک او قده‌ر
یئیین هاوا اویناییر. 

http://ishiq.net/?p=16851