Mar 2, 2014

کرگدن نمایشنامه‌سینه گؤز اوجو بیر باخیش

رقیه کبیری

شوکورلر اولسون بیز ده افریقالی و آسیالی کرگدن‌لرین تورکجه نریلتیسینی ائشیتدیک.
گؤزوموز یولدا، قولاغیمیز سس ده‌ایدی. شوکورلر اولسون بیز ده گرگدن‌لرین تورکجه نریلتیسینی ائشیتدیک. بلکه‌ده ایللردیر اوزوموزه گتیرمه‌دن، اؤزوموزه آلمادان نریلتی‌لرینی ائشیدیب، کرگدنه دؤنوشدویوموزدن خوشلانیریق دئسم، یئرسیز دئییل.
«
اوژن یونسکو»نون آبسورد ژانرینی داشییان نمایشنامه‌سی، صحنه آلدیغی تبریز تئاتریندا  گؤزوموزو ایشیقلاندیردی. نریلتی‌لر قولاقلاریمیزی نوازش ائتدی.
«کرگدن» نمایشنامه‌سینین صحنه آلماسی تئاتر سئورلره سئویندیریجی بیر خبر اولسادا، اوندان اؤنم‌لیسی بو تئاترین تبریز دئییمی‌ایله، تورکجه دیالوقلاری‌دیر.۱۳۹۰نیجی ایلده منیره اکبرپورانین «اولکر اوجقار» ترجمه‌سی‌ایله «مولیر»ین چیلیس اثرینین تورکجه اجراسینین دادی داماغیمیزدایکن، کئچن هفته رابینسون و کروزو نمایشینین ایکینجی دؤوره، تبریز تئاتریندا صحنه آلماسی و بهمن آیینین ۲۳نجو گونوندن بری «کرگدن» نمایشنامه‌سی تبریز تئاترینا یئنی بیر جان باغیشلاییب.
منیره اکبر پورانین دَیرلی ترجمه‌سی‌ایله  انسانین کرگدنه دؤنوشومونو یاخیندان گؤروب، چوخلاریمیز اؤزوموزه آلدیرمادان، آددیمیمیزی تئاتر ائویندن ائشیگه قویوب- قویمامیش، یئنی‌دن کرگدن حیاتیمیزا دؤندوک. اینسان‌ سیمبولونو داشییان «موسیو برانژه»نی تئاتر صحنه‌سینین اوستونده یالنیز بوراخدیق.
چوخلاریمیز ادّعالاریمیزا گؤره ایللردیر «ژان» لا اؤزوموزو اؤزدش سانمیشیق. «برانژه» لری باشاردیقجا دانلاق آلتینا توتوب، بیزیم اؤلچولریمیزه اویغون آدام اولسونلار دئیه، اؤیود-  نصیحت وئریریک. امما دی گل کرگدنه دؤنوشوم سیراسی بیزه یئتیشسین؛ «برانژه‌»نین یولداشی ضیالی شخصیت، «ژان» کیمی اؤزوموزو ساوورماغا باشلاریق
«-
من فقط مال- داوار دوهتورونه اعتقادیم وار… نئیه منی اللشدیریسن؟ ائله بیل عجیب‌الخلقه حیئوان زاد گؤروب… هر کس الیندن گلدییی کیمی نفس چَکَر، سن منیم نفس چکماغغیمی سئومیرسن، من ده سنین نفس چکماغیوی خوشلامیرام… چوخ یاواش نفس چکیسن، آدام دئییر ایندی دوشوب اؤله‌جاخ… دوزونو آختارسان، منیم خالقدان نیفرتیم یوخدی، اصلا سایمیرام بیله لرینی، یا قوی دئییم، گؤرنده اؤفکه‌لریم گلیر آغزیما، گرک گؤز اولسونلار یولومون اوستونه چیخماسینلار، یوخسا گؤردون ازدیم هاااا…کرگدن‌لر ده بیزیم کیمی آلاهین یاراتدیقلاردی، اونلارین دا بیزیم جان یاشاماق حاخلاری وار… انسانیّت مُددان دوشدو… کرگدن اولماق چوخ دا پیس دئییل… و…»
ادّعالاریمزا باخمایاراق، سونوندا بوش- بوشونا سؤز دانیشان، اؤز دئدیغینه گؤره کرگدن حالیندا بئله ضیالی‌لیغین قورویان موسیو «دودار» کیمی، ها بئله یالنیزلیقدان قورخوب، سئودییی اینسانی بوراخان میس «لئیزی» کیمی کرگدن سوروسونه قاریشمیشیق. اولا بیلیسین، بیر نئچه نفریمیز «منطق دان» جنابلاری کیمی منطیق سیمبولوموزو- بؤرکوموزو- ، اؤزوموزدن آییرماییب، ضیالی، منطق دان بیر کرگدنه دؤنموشوک. یار- یولداشلاریمیزلا  بیر بوینوزلو، قوشا بوینوزلو کرگدن‌لردن دانیشدیب، کرگدن‌لیییمیزی لاغا قویوب، گولوشموشوک و هله ده  گولوشوروک.
کرگدنین نریلتیسی، گوج سیمبولودور. ایش و اجتماعی موقعییت‌لره باخمایاراق، انسانلار هر صینف‌دن اولور اولسون،  ائو قادینیدان توتدو، اداره رئیسینه‌جان گوج و قدرت سیمبولونون نریلتیسینین ائتگیسینده اؤز گؤیول و ایستک‌لری‌ایله کرگدنه دؤنوشورلر. بلکه ده اؤزلرینی گوج و سس سئلیینه بوراخیب، هر بیری اؤز اجتماعی موقعیتینده بیر نریلتی‌یه دؤنورلر و سونوندا یالنیز قالمیش، اؤزونو تنقیده چکن بیر ضیالی، ساده‌جه بیر اینسان اولماق و اینسان قالماق ایسته‌ین «برانژه» کیمی « من آخیرینجی آدامام… آخیرینا جان دوراجاغام» دئییب، اؤز سسی باشیندا جینگیلده‌ییر
اوسته‌لیک بابک محمودی «ژان» و میر سعید موسویان«برانژه»جنابلاریندان و باشقا آکتورلاردان باشاریقلی اجرالاری اوچون، فرهاد حق سالمی جنابلاریندان موسیقی واسیطه‌سی‌ایله کرگدن نریلیتسی،‌ قولاغیمیزی نوازش ائتدیغینه گؤره و کامران قربانی جنابلاری و گروهون باشقا یاردیمجیلارینا، بو نمایشنامه‌نی صحنه‌یه آپارماقلاریندان تشکور ائتمه‌لییک. سؤزسوز  منیره اکبر پوران، حورمت‌لری آناسی‌ایله بیرلیکده تورکجه ترجمه‌لری اولماسایدی،- اولکرین اؤز دئدیغینه گؤره دیالوقلاری آناسی ایلا بیرلیکده چئویریبلر-  بیزلر نه کرگدن سسینی ائشیده‌جکدیک، نه ده کرگدنه دؤنوشدویوموزدن خبریمیز اولاجاق‌ایدی.

۹۲٫۱۱٫۲۵

قایناق:  ایشیق سیته سی
http://ishiq.net


No comments: