Mar 3, 2014

ساری

ایلقار موذن زاده
باجاسیز بالاجا بیر اوتاقدیر. خیردا یوزلوک بیر ساری لامپ یانسادا، اوتاغین قارانلیغی توز باسمیش لامپین جانسیز ایشیغینا زور گلیر. اوزانیب قارایا چالان ساری دیوارا گؤز تیکیرم. باخیشلاریم دیواری دیرماشیب سقف‌له دوورا آراسینداکی جیزیقدا یئریییر، ساعتلاردیر دیوارلا سقف آراسیندا گزیشین بیر میلچه‌یین اوچوشونو ایزله‌ییرم. خیاوانلاردا آشاغی چهارراه‌لا یوخاری چهارراه آراسینداکی گنج قیز-اوغلانلارین فیرلانماسی کیمی، هدفسیز اوچوشان یالقیز میلچک‌له داریخمالاریمی پایلاشیرام. سورغولامالار هر گون نئچه ساعت داوام ائدیر:

-        آدو یاز
آدیمی یازیرام، نکواریما کیمی بئله. فیسبوک رمزیم، ایمیل
-       
نه جور اولدو؟ هاردان گلدی؟ هانسی فینجان ایدی؟ منه ربطی یوخ‌ایدی…هه‌یه سن دئیه‌ن دی!
پنجره‌سیز اوتاق‌دا، دمیر قاپی، قارا دؤره‌لی قرنیز داشی، طوسی موکت، بیر جیلد قرآن و بیر جیلد مفاتیح‌الجنان‌دان سونرا باشقا بیر شئی یوخدور. بیر چئوره‌نی ریوایت ائدن ایکی گؤزومدور، بیرده بئنیمده‌کی نیاگارا شلاله‌سی کیمی آخان داریخدیریجی و قورخونج دوشونجه‌لریم. سس‌سیزلیک و قارانلیق، سیندان اوزه‌رینده چیرپیلان دمیر کیمی جمجمه‌می سیخیر. گؤزلریمی آچیرام. قرآن و مفاتحه ساری ایمکله‌ییب بیراز ورقله‌ییب تانری‌لا دانیشیغا کئچیرم. سس قیتلیغی‌دیر و گؤرونتو یوخلوغو. قرآنین تاریخی ناغیللاریندا یاتان دوشونجه‌لرده روحوم سیغاللانیر. کتابی قاتلاییب اوزانیرام. بیر داها دیوارلاردیر و بئینیمده‌ شلاله کیمی فیکریمدن آشیب داشان داریخمالاریم. «یالانچیا نه دئسن دئ… بیلمیرم نه جور اولدو، آمما اؤزو اؤزونه اؤلدو.» بئینیمده‌کی سسلری پوزوم دئیه جونو بارماقلاریمی ائلیه بیلدیییم قدر قولاغیما سوخورام. بوردان نئجه باش چیخارتدیغیمی هئچ بیلمه‌دیم، هر شئی بیر آخلیم(شهاب‌سنگ) سرعتی و قیسالیغیندا باش وئردی. «آسیلاجاقسان» دئدیکلرینده بوردا کیمی‌لرینین چوخ میرت اولدوغونا گولمه‌ییم گلیردی. قورخوم یوخ ایدی کی، بوشلایارلار، چتینی بیر هفته بوردایام.
دیوارلار محله‌میزده کی بورنو فیرتیقلی یاور کیمی‌دیر، هاراسینا دؤنورم هر نه قدر باخیرام یئنه ده اوزومه قاییدیر. توپو حه‌یه‌تیمیزه دوشوب پنجره‌میزین شیشه‌سینی‌ده سیندیرسایدی بئله، یئنه گلیب گؤزومه زیلله‌نیب سیرتیقجاسینا توپونو ایسته‌یه‌جکدی. چتین بیر ایش کیمی گؤزومه دوران دیوارلار. قاپینین آلتینداکی بیر بارماقلیق فضادان سالوندا یانان آغ مهتابینین ایشیغی بیراز قاپینین اؤنونو آغ بویا ایله ایشیقلاندیریب و اوتاغین ساری ایشیغیلا قاریشیر. ائشیکده بیر گؤرونتو گؤروم دئیه، بیر قیرخ ورقلی دفتر نازیکلییینده اولان قاپینین آلتینداکی جیریغین اؤنونده اوزانیب باشیمی توزلو موزائیکین اوستونه قویورام. توز اوستومه یئریییر، قاشینما دوشور باشیما. بئنیمده‌کی چیرپیشان آداملارین سسی، هردن بوتون فیکیریمین دار-دودوک کئچیدلرینی باشینا گؤتورور.
«
من نه بیلیم هاردان گلدی؟ باجادان دوشدو، من اؤلدورمه‌دیم کی. نه یه دئسن آند ایچیم، جره جهنمه کی….»
سورغولاما اوتاغینداکی گونده‌لیک دانیشیقلار بئینیمده دولانیر! دیبی بودور ایکی هفته ساخلارلار. یئنه ده بئینیمده نئچه نفرین های-هارایی قالخیب، سسلرین یئددی ائولی قونشویا کیمی گئده بیلدییینی دویورام. باشیما آغری دوشور، کیمی‌لری ساواشیر، کیمی‌لری ده اونلاری آرالاشدیرماقدا. آروادیمین قیشقیرتی‌سی، قوجا ننه‌نین شیونی، شیلله تپیک، قیزیم یئنه ساپ ساری سارالمیش، بورنونون قانی اوستونه تؤکولمه‌سین دئیه باشینی آغلایا-آغلایا یوخاری قالخیزیر. هئچ بیرینی باشا سالا بیلمیرم، باغیریرام، آروادیمین کؤهنه رادیو کیمی کسیلمز دئیینمه‌له‌رینین سسی بیر قیییغ کیمی بئینیمه سوخولوب چیخیر، یالنیز دئیینمه‌یی باجاریر، ساچلاریندان توتوب دال حه‌یه‌طده سوروتله‌ییرم، هرنه قدر آلاتیرام باشا دوشمور نه ایسه! گئجه‌لر فیسبوکا گیرمه‌ییمه دئیینمه‌یی لاپ قانیمی قارالدیردی. «خالخین دا اری وار منیم ده!» قورتارمیردی بئینیمده میلچکله‌نن دئیینمه‌لری. «قوووورتااااااار» دئییب قیشقیریرام. باجا آچیلیب بیر ال ایچری سوخولور، هئچ بیر سؤز دئمه‌دن باش بارماغینی اوووجوندا سیخماقلا نه ایسه بیر سؤز آنلاتماق ایسته‌ییر، «کس سسینی»دیر دئیه‌سن دئدییی. اوخوماغا باشلاییرام. میزیلدانیرام اؤز اؤزومله. «ساری ساچلارینی دلی کؤنلومه، باغلامیشیم چؤزولمویور میهریبان» چوخ اوزاقلاردان بیر ضعیف اذان سسی گلیر. اذان سسینی ائشیتجه‌یین بئنیمده ساواشان عائیله‌لر و اوشاقلار سوسورلار. ائله بو هفته بوراخیلارام…گلن هفته…دای آتداکی هفته یوزه یوز…بیر آی….ایکینجی آیین ایچینده‌یم. بونو ضعیف اذان سسلرینی سایماقدان الده ائتمیشم. «آخشام اذانی نم هارانین شرعی واختیلا!» هانسی شهری دئدییین سئچه بیلمیرم و هر دؤنه بو ضعیف و اومود وئریجی سسی ائشیتدیییمده دیوارین بوجاغیندا بیر جیزیق سالمیشام. اذان سسلری بیر آنا کیمی الینی دویغولاریمین اوستونده چکیب کؤنلومو توختادیر. بیر تهر دؤزه بیلیم دئیه، ایرمی‌دؤرد ساعتیمی چئشیدلی ایشلره بؤلورم. یئددی ساعت یاتماق، یاریم ساعت تووالئت، یاریم ساعت یئمک، سگگیز ساعت یئریمک، بیر ساعت قاریشقا اویناتماق، ایکی ساعت قرآن‌لا مفاتح اوخوماق، نماز و دعا، ایکی ساعت ده دیوارا باخیب بئینیمده ساواشانلاری آرالاشدیریب، آروادیملا قایینلاریمی باشا سالماق! اوتاق دا هر دقیقه ده اللی قدم وورورام، بیر ساعت ده اوچ‌مین قدم اولور، سکگیز ساعتده ایرمی‌دؤردمین قدم. دئمک اللی گون ده آلتی‌یوز کیلومتر یول.
ناهار واختی‌دیر. یئمه‌ییمی دمیر قاپینین اوستونده کی ال بویدا باجادان، واختیندان واختینا گتیریرلر. بیر ال دیر، گلیب باجادان سوخولوب وئریب گئدیر. اللر هر ایکی گوندن بیر ده‌ییشیلیر. بیری آغ-آپپاق‌دیر توکسوز و پارلاق، هئچ قیریشیغی اولمایان، ایرمی یاشیندا بیر قیز الی کیمی، بیراز ائوه آپاردیغیم ساری ساچلی قیزین الی کیمی. یئمه‌یی آلان لحظه الی توتوب اؤپوب سیغاللاماغیم گلیر، چوخ مهربان بیر ال، بیری ایسه توکلو قهوه‌ای ال. دیرناقلارینی آی دا بیر سئری توتور، آلتینا قارا چیرک توپلاشاندان سونرا. قهوه‌ای الین ایکی بارماغیندا یوغون قاشلی اوزوکلری ده وار. بعضا یئمه‌یی وئریب گئری قاییداندا باجانین قیراغینا ایلیشیر. بیر سئری  یئمه‌یی آلاندا اوستو جیزیلمیش آغ الین نارین قاسناغینا الیمی چکمک ایسته‌دیم. نه ایسه و هارداسا ایندی جیزیلمیشدی. تاکسی دان دوشنده قاپیا سورتولوب، بلکه ده بالاجا قیزی یوخسا اوغلو جیزیب. ال بیر آن دونوخدو و بارماقلارینی اووجونا ییغیب اشاره بارماغینی منه ساری اوزادیب، سانکی «گؤزلروو چیخاردارام ها بیر ده منه توخونسان!» سؤزونو دئمک ایسته‌دی. سونرا دا غضبلی بیر حالدا باجانی باغلاییب گئتدی.
ناهاری یئمیشم. ایندیسه قاریشقا اویناتماق واختی‌دیر. یئردن اون‌بئش سانت یوخاریدا بیر دئشیه گیر-چیخ‌دادیلار. یومورتاسی ترسه گلمیش قاریشقالار. دئشیکدن نارین-نارین قوملاری باشلاری اوستونده گتیریب قرنیزین بیر بارماقلیق فضاسینا تؤکورلر. ایکی آی بویوندا ایشله‌دیکلری و داشیدیقلاری قوم ایکی قاشیق اولار. یووالارینا دویو حببه‌سی قویورام. قوملاری ائشیه داشیییب دویونو ایچری سوروتله‌ییرلر. اوچ دنه قاریشقادیر. بیلمیرم ایچری ده یووالاری نه سایاقدیر، آمما هر حالدا اوچ یاتاقلی بیر یووا اولمالی‌دیر… تخمینن بیر ساعت واخت آپاریر دویو حببه‌سینی یووالارینا سوروتله‌سینلر. ایندی یقین ساری‌ساچلی قیزین گؤوده‌سی‌ده قاریشقالار یوواسی اولوب، ائوه آپاردیغیم او بیری دؤرد دنه ساری‌ساچلی قیز اؤلمه‌میشدی، آمما بیلمیرم بونا نه گلدی! ایندی یقین قاپیسیندان گیریب باجاسیندان، بورنوندان گیریب گؤزوندن چیخیرلار، دوداغینی…حئییف ساچلارینا، یوخ…ساچینا بیر ایش گؤره بیلمزلر، آمما فیکر ائله‌میرم اوزو، دوداقلاری، یاناقلاری ایندیه کیمی قالسین! گئندن گؤرن «مظلومدور» دئییر بو قبیرلرده آدام یئیه‌ن قاریشقالاری! ساچلیمین اوغروسو اولدوغونو دوشوندویومده قاریشقالارین اوچونوده اشاره بارماغیملا ازمه‌ییم گلیر، آمما هله‌لیک منی یالقیزلیقدان چیخاردیرکی، گئدنده اؤلدوررم. هردن قاریشقالارین بیری قارا قرنیز داشین اوستوندن کاریخیب ایره‌لی‌له‌نیب، یئرده طوسی موکتین اوستونه دوشور. بیزیم اؤلچوده سانکی انسان آلتی قاتلی بینادان یئره دوشور. آمما قاریشقایا هئچ نه اولمور. نه قیچی سینیر نه توپوغو چیخیر. آیاق یالین جورابسیز باشماقسیز آدام یئیه‌ن زهلم گئتمیش قاریشقا! ایکی ساعت دن چوخ چکیر اون سانتلیق قرنیز داشی یوخاری قالخیب یوواسینا قاییتسین. هئی زویروشوب یئره دوشوردو. اؤنجه «ناپلئون بناپارت» یادیما دوشدویونده اوغورسوز چیخمالارینا گؤز تیکیردیم. آمما دؤزه بیلمه‌ییب، باشیمی بیر تهر قال ائله‌مه‌لی‌ایدیم. پلاستیک قاشیغی قاریشقایا ساری اوزاتدیم و قاشیغا میندیریب، یوواسی آغزیندا یئره سالدیم.«قوی قالسین! هه، قوناق اولئ، گئت سونرا وئررسن» کرایه اوستونده تعارف‌لاشیردیم. سسیمی باشیما آتمیشدیم. باجا آچیلیب قهوه‌ای ال اوتاغا سوخولدو، «دئیه‌سن جانون قاشینیرئ»، بارماقلار بیراز منه هده بیچیب باجادان گئری قاییدیب گئتدی. اوندان سونرا قاریشقالارلا داها یاواش دانیشماغا آلیشدیم. پلاستیک قاشیغی قاریشقالارین آسانسورو اولاراق یووانین قیراغینا قویوب، اونلاری آشاغی-یوخاری آپاریردیم.
ناهار چاغیدیر. بوگون قهوه‌ای الین شیفتی‌دیر. یئمکدن بیر ساعت سوووشمامیش باجانی آچیب ایچری گیردی. گؤزباغلایانی وئریب «باغلا گؤزووه»نی بارماغیلا اشاره ائتدی.  بویون دیرناقلارینی توتموشدو. آغ الین ترسینه اولاراق چوخ عصبلی و دهشتلی ایدی. پارچانی گؤزومه باغلاییب حاماما آپاریب، قایتاردی. اوزانیب باشیمی قارا پتونون اوستونه قویورام. آزی بئش دنه قارا قویونون یونوندان چیرپیلیب، دوزلمیش پتو. قویونلارین قیرخیلان لحظه‌ده‌کی های-هارایلارینی ائشیتمک رؤیاسینا دالیرام. اوچ آیدان چوخدور بوردا اولدوغوم. سسلری زادی اونودموش کیمی، هر هانسی آغزیمدان بدنیمدن چیخان سسدن سونرا قولاقلاریم باشقا بیر سسه یئریکله‌ییر. یئنه ده قیچ آغریم توتوب. باشیمی پتونون اوستونه بؤیرو اوسته قویموشام. قولاغیم قاتلانیب و باشیمین آلتی‌لا پتو آراسیندا سیخیلیر، دئشییی توتولور بو حاللاردا اورک دؤیونتولریمین نبضینی قولاغیمدا دویورام. نفسلریم ساییلیر. دوروب اوتورورام. بوگون آغ الین شیفتی‌دیر. گلیب باجادان ایچری گیریر و گؤز باغلایانی وئررک اشاره بارماغینی گؤزومه ساری توتوب، آشاغی یوخاری آپاریر. «اونسوزدا ائله بیلیرم کی اونو گؤزومه وورمالیام و پانتومیم ایضاحی لازیم دئییل.» دئییرم اوره‌ییمده؛ گؤبود و تیریشکه‌لی‌ قهوه‌ای ال سانکی ایندیجه درگز وورماقدان قاییدیب. دانیشیق اوتاغینا آپاریر. سورغولایان کیشی چوخ مهربان بیریسی ایدی، ایستی و سئویملی سسی همیشه اومود وئریجی‌ایدی:
-       
هاردان تانیش اولدوز
-       
اینترنت دن، اوتوز زاد یاشی اولاردی، خبریم اولمادی کی. صوب دوردوم  هئله گؤردوم
سانکی سورغولایان کیشی او بیری دؤرد دنه ائوه آپاردیغیم قیزدان دا خبری وار ایدی آمما اوستونو وورموردو، بلکه ده بو کیشی همین آغ ال ایمیش. ساری نی دوشوندویومده اوره‌ییم سیخیلیر.گؤزل بیر قیز ایدی. ماوی گؤزلو. آخشام نئچه ساعت اوتاغیمدا دانیشدیق، قهوه‌سینه نئچه دنه یوخو داواسی قاتمیشدیم، آمما یوخو داواسی اؤلدورمز کی، گونده من اؤزوم لاپ بئشینی ده آتیردیم. قاییداندا هانسی داوالاری قهوه‌سینه قاتدیغیمی دقت ائتمه‌یی دوشونوردوم، یالنیز اونون درین یوخویا دالماسینی ایسته‌ییردیم. یوخولو قیزلارلا داها راحت اولوردوم. او بیری‌لری سحر دوروب گئدیردیلر، آمما بو سونونجوسو! سحر قورو گؤوده‌سینی یاتاغیمدا بؤیرومده گؤردوم، اوشاقلیقدا حه‌یه‌طیمیزدن دریب دفتریمیزین آراسینا قویدوغوموز یارپاقلار کیمی قوروموشدو. آلتیمینیجی آیین سونلاری ایدی، آغ ال اوتاغیما سوخولوب و گؤز باغلایانی وئریب منی ائشیه آپاردی. اوتاغیمدا یئریدیییم مسافت تخمینن اوچ‌مین‌آلتی‌یوز کیلومتر اولموشدو.
قبیر کیمی اوتاغیمین فضاسیندان ائشیه چیخماق، بیر اؤلونون قبیردن خورتلاییب یاشاما قاییتدیغی کیمی بیر اولای ایدی. یئنی قوخولار، هاوا، ایستی، سویوق، سسلر. بوتون دویولاریم ایشه باشلامیشدی. ایکی ساعت ماشیندا یول گئدن‌دن سونرا گؤزومو آچدیلار. بئش‌یوز نفرلیک دؤرد اوتاقلی بیر یئرده‌ایدیم. آدام گؤرمک هیجانیندان دیلیم توتولوب. دویولاریمین کیرکیره‌سینی یوخاری چکن کیمی گؤرمه، اییله‌مه، ائشیتمه، دویولاریمین ایشله‌نیلمه هیجانینی یاشاییردیم. آمما نه ایسه قبیر سیخینتیلی اوتاقدا او برزخ داریخماسیندان سونرا جهنمه بنزه‌ین بیر یئر ایدی. دؤرد اوتاقلی و من اوچونجو اوتاقدا. بیزیم‌کینده یوزاللی نفره یاخین آدام یاتیر. هر ایکی متر‌ده آلتی-یئددیسی. یئره سریلن موکتین ایللر بویو یویولمادیغی اوچون اوزه‌رینده کی چیرکلر قیرا  چئوریلیب. دیوارلار نئچه ایللر برزخ ده اولان آداملارین قارا چیرک ایچینده، بیر کوچه بازار ادبیات دفتری، کامیونلار زیغ گیرینده یازیلان عشقلاتی سؤزلرین آنتولوژی‌سی ایدی «رفیق بی کلک مادر، برو بی وفا، دیدارمان به قیامت، تو دیگه چرا
یئریییب ایک ستونون یانیندا اَیله‌شن دؤرد نفرلیک جمعین یانیندا اوتورورام. هر جمع بیرلیکده همخرج اولاراق یاشاییرلار. نئچه ساعت سوووشوب، اوخولا  ایلک گون گئدن بیر اوشاق دویغوسوندا اولان کیمی سوسارکن دانیشیق و شوخلوقلارینی ایزله‌ییرم، «خوش گلیبسن عمو!» دئییر بیری. قیرمیزی هر یانی شیرتو-شپلو قیرمیزی چیرکلی بیر لیواندا چای سوزور، «بویور چای ایچ» دئییر، «ساغول» دئییب و قنددانا داراشمیش میلچه‌یی قووالایاراق بیر قند گؤتورورم. سانکی بوردا هر کیمسه بیر نئچه نفرله بیرلیکده همخرج اولاراق یاشامالی‌دیلار. بؤیرومده بیر نفر اوزانیب و سقفه زیلله‌نیب. آلنیندا اوزون بیر پیچاق ایزی اولان اوغلان، دمپایی‌سینی باشی آلتینا قویوب اوزانیب، آغ رکابی گئیمیش یئکه‌پر جاوان اوغلانین خالکوبی‌لرینه دونوخموشدوم. هندی فیلم‌لر کاراکترینه بنزه‌ین ساچلاری گلیب بوینوندان سینه‌سینه تؤکولموش گؤزل بیر قیزین تابلوسونو یوغون قولونا دؤیدورموش، قیزین گؤزلرینده کی کیرپیکلری ساییردیم، «عمو راحت اول» سؤزو ایله اؤزومه گلدیم. «قوربانام یاشا» دئییب، چیمچه‌شه-‌چیمچه‌شه چیرکلی پلاستیک لیوانین قیراقلارینا دوداغیمی دایامادان چایی باشیما چکدیم. الیمده کی پتونو بؤیرومه قویوب دیرسکله‌نیرم. آغ رکابی‌لی اوغلان دوروب اوتوروب، علی‌موجی دیر ائله بیل آدی، منه چای تؤکن آریق قارا بیر اوغلانلا کئچن هفته‌کی یئمک ایچمک‌لرینین حساب-کتابلارینی وورودولار، «سیام ساللاخ گئت تختیمین آلتیندا کاغاذ وار اونو گتیر» سیام فنر کیمی آتلانیب تخته قونور و قیرمیزی بیستون سیگار بوکسونون آغ طریفینی کاغاذ اولاراق گتیریر و حساب-کتابا اوتورورلار. ناهار چاغیدیر. هره‌نین درین قدیمی میس کاساسی وار و اوندا یئمک یئییر. سودا پیشمیش یئرآلما ایله یومورتانی سویوب، ازیب بلله‌له‌ییریک. علی‌موجی‌نین بیر مئتیر دوخسان زاد اوجالیغی اولار. او بیری قولوندادا غضبلی بیر قارتال شکیلی دؤیولموش، ساغ بیلنگینه همیشه بیر یزدی دستمال دولاییر. «توالئته گئدیم، گلیم» دئییر. سیام ساللاخ یاواشجاسینا بوینونو ایره‌لی‌له‌ییب دئییر «عمو! سیملری قاریشاندا هئچ کیمی تانیمازهاااااا.» «آدی موجی دی نیه؟» دئییرم. «اوشاقلیغیندا ننه‌سی اؤلنده او قدر باشینی قبیر داشینا چیرپیب کی قاریشدیریب» دئییر. بوردا بیر تهر باشیمی ساخلاییم دئیه، علی‌موجی‌له آرانی سازلاماغی دوشونوردوم، توالتین سالونوندا گؤی کاشی‌لی ستونا دایانیب بیر سیگار آلیشدیریرام. او بیری دؤرد دنه ده اوزه چیخسا قورتاراجاغیم اولمایاجاق دوشونوردوم، آمما سورغولایان اونلارین هئچ اوستونوده وورمامیشدی، بلکه ده بیلیندیرمه‌ییر و سوندا اورتایا چیخاراجاق! قورخو بیت-بیره کیمی جانیما دوشموشدو، سیگارین سونلاری‌دیر، سیام ساللاخ یاخینلاشیر:
-       
گؤرم او اوتوو!
سیگارینی آلیشدیریر.
-       
کارتیندا پول اولار؟
-       
نئجه؟
بیراز یئمک آلاجیوخ.
«
اولار دئدیم ایکراه لا!» باشقا چاره‌م یوخ ایدی. بیری پول ایسته‌ینده ناموس یامانی کیمی آلیردیم، ساری ساچلی‌لارین‌دا ایکیسی‌له پول اوستونده ساواشدیغیم یادیما دوشور…اؤنجه پول سونرا
بیر هفته دیر بوردایام. یوزمین زاد پولومدان گئدیب، سیام و علی گیلین گونده‌کی خرجلری منه دوشور، آمما علی‌له آرانی سازلامیشام، علی‌یه‌ هرنه‌یی دئمیشدیم، اودا هئچ نه دئمه‌دن یالنیز قولاق آسمیشدی، همیشه‌لیک بوردا قالمالی اولدوغومو بویون بیلمیشدیم. آیاقلاریم کئییییب، بئنیمده‌کی ساواشان آداملارین سسی شیددتلنمیشدی. آیاغا دوروب سالونا، توالته زادا گئدنده گؤزوم قارالیر، هر یئرده بیردن دایانیب یئره اوتوروردوم. بوگون موقتی اولاراق ائشیه چیخاریلاجاقدیم. علی اصلا دانیشمازدی آمما هاوامی ساخلاردی چیخاجاغیم گونون سحریسی منی کوریدوردا قیراغا چکیب، «ائشیه چیخدین قالما، گئت، منیم بوکان دا دوستوم وار، چوخ اخی‌یم بیله‌سی‌نن، دئنن علی‌موجی‌نین یولداشیام، هر نه‌یی اؤزو یئر به یئر ائد‌ر» شوماره‌نی کؤینک جیبیمه قویوب بیر سیگار آلیشدیردیم. آمما گئده بیلمه‌رم دوشونوردوم، هر حال دا ساغول دئدیم. ساغوللاشدیق
شهر تزه بیر اؤلکه کیمی، تانینماز و اؤزگه یاناشیردی منه. تاکسی‌لار، تیزر تلوزیون‌لارینداکی تبلیغ‌لر، کهف اصحابینین دویغولاری کیمی بیر شئی. یئددی آی، یئتمیش ایل سوووشوب. موبایلیمی الیمده قوردالاییب خیابانی اوتایا کئچیردیم، ساری‌نین سون مئساژلارینی اینجه‌له‌یم دئیه، «ائوی بوشالت صاباح گئجه اون‌بیرده گله‌جم» یئددی آی بوندان قاباغین مئساژی ایدی، آروادیمی ننه‌سینین  عیادتی بهانه‌سیله، «گئت صاباح دا من گله‌جه‌یم» دئییب کنده یوللامیشدیم. آیاغینی ساخلاجا و الینی سیقنالا باسمیش کؤهنه آغ بیر پژونون ترمزی‌لا اؤزومه گلدیم، قولاغیمین بؤیروندن ویژیلتیلا سووشموشدو. شوفرشاگردی طرفیندن بیر باش ائشیه چیخیب بیر ایکی یاغلی یامان دئییب قورشون کیمی سوووشموشدولار.
بو یئددی آی دا حتی بیر دؤنه ده اولموش اولسا سراغیمی توتمایان آرواد، یقین ایندی کندده دده‌سی ائوینده اولمالی ایدی. بوشانمیشدی بلکه ده. هرگون قزئته آلدیغیم دکه‌چی اکراه‌لا منی گؤرمک ایسته‌دی. باخیشلارینی اوغورلاییب قزئته‌لره گؤزونو تیکدی، یانی کی منی گؤرمه‌دی! بیر جزامی‌نین دویغوسوندا اولماغی یاشاییردیم. تار-تانیش بیر جورلوکله ائله یاناشیب یانیمدان سوووشوردو کی سانکی منی گؤرمه‌دی. باش چهارراه دا کی الده سیگار ساتان لال دکه‌چیه یاخینلاشیب ایکی گیله کنت ایسته‌دیم. دوداغیمدا سیگاریمی آلیشدیراراق، اوجا سسله «اَبه…اَبه!» دئییب باشینی بوللالاییب دوداغینی بوزدو. سیگارا درین بیر پوک ووروب گولومسه‌ییب وداع‌لاشدیم. ائوه گئتمک اوچون تاکسی دوراغیندا دایاندیم، اوشاقلیق محله یولداشیم بهرام‌سیبیل ده دوراقدایدی، اویان-بویانا باخیب یاواشجا یاخینلاشدی، «اده لامصب اؤزو یامان ایشه قویوبسان ها، قارداش من دئیه ن اولسا چیخ گئت قالما!» و
ناهار چاغی سایخینلیقدان کوچه ده ایت اولاییردی ، قاپینی آچیب ائوه گیردیم. آروادیم دده‌سی ائوینه گئتمیشمیش، بیر چوپ ده قویمامیشدی، هر نه‌یی سوپوروب آپارمیشدی. آشپزخانه ده چوروک کابینت‌لر قالمیشدی، قاپیسینین آشاغی لولاسی چیخمیش کؤهنه سویودوجو، ساری‌لاری آپاردیغیم اوتاغین لامپینا کیمی آچیلمیشدی، حه‌یه‌طه چیخیب ایوان‌دا پله‌ده اوتوردوم. ائو بوم-بوش ایدی و بیر ساری ائوه گتیرمه‌یه یاخشی بیر واخت، آجی بیر گولومسه‌مه سیچرادی دوداغیما، اوره‌ییم قیزیشان کیمی، اللریم اسدی! بیر سیگار آلیشدیردیم. پله‌لرین قیراغیندا کی اوچ دنه تورپاغی آغارمیش گلدانین یانیندا اوتوردوم، گولون بوداغی قوروموشدو. ننه‌م یادیما دوشدو. حه‌یه‌طینین قباله‌سی منیم ائشیکده اولماغیم اوچون گیروو قویولموشدو. گئتمه‌یی دوشونوردوم، هئچ کیمی گؤرمه‌دن! قوجا ننه‌م سکته زاد ائله‌ر اؤلر. طایفا اوزومه توپوره‌جک؟ قیزیم دا کی هئچ! ۱۲ یاشینا کئچندن آغلی بعضی شئی‌لری کسیر. کنده گئتمه‌یی دوشونورم، آروادیم گیله، ننه‌م هارای چکیب آغلاییر بئینیمده، آروادیم قیشقیریر، قیزیم باشینی قاپیا چیرپیر، قایینلاریمین اللرینده‌ پیچاق آرخاما دوشوب داردودوک کوچهلرده قووالاییرلار، بیر چیخماز کوچه‌یه گیریرم. پیچاقلاییب یئرده اوزادیبلار، قونوم قونشو فار-فامیل هامیسی جنازهمین اوستونه توپورور، الیمی باشیما چیرپیرام، بئینیمده‌کی سسلری سیلیب، فیکریمی بیر یئره توپلاییم دئیه. الیمی پئنجه‌ییمین جئبینه سالیب بالاجا آینانی چیخاریب اوزومه زیلله‌نیرم. آینادا اؤزومو گؤرنده باشیمداکی سسلرده پوزولور. آخشام اوستو دور. هاوا قارانلیقلاشماق اوزره، خیاوانا چیخیرام. عسگر چئتانین مئیدان قیراغینداکی سیگار دکه‌سینه چاتیرام. بیر سیگار آلیشدیریب کؤهنه‌قالایا ساری گئدیرم.
گوندوزلری یوخو داواسی آتیب گئجه‌لری بایقوش کیمی چیخیب داردودوک کوچه‌لری شهر قورتارانا کیمی دولانیردیم. محله باشیندا کی مشه‌باباخان دان ایکی دنه کلوچه کارتونو آلیب اوتاغا سرمیشم. آخشاملار کوچه‌لری آددیملاییرام. سیگار چکیب دار باجالاردان گؤرسه‌نن ائولرین اوتاقلارینا بویلانیرام. ماوی‌گؤز ساری ساچلی گؤزل بیر قیز گؤروم دئیه. اونون کیمی بیر قیز. مدرسه‌یه بیرلیکده گئتدیییمیز گونلر کیمی، ال-اله وئریب ائوه قاییداق، اون ایل سئوگی یاشاتسایدیق‌دا، آمما چیخیب گئتمیشدی، اوزاق بیر شهره، «اونوت هر شئیی» دئمیشدی
نئچه گوندور یاتا بیلمیرم. یوخو داواسی آلمیشدیم. بیر دنه ده ساری ساچلی تاپسایدیم داها همیشه‌لیک گئدردیم. علی‌موجی‌نین بوکان‌لی یولداشی‌نین شماره‌سینی یوخلادیم. آدی کریم ایدی، گئتمک ایسته‌سم اونون یانینا گئتمه‌لی‌یم، منی مرزدن ائشیه چیخاردا بیلردی، بئش میلیونا زادا باخاجاقدی، الیمی کؤینک جیبیمه سالیب شماره‌سینین جیبیمده اولماغینی سینادیم. سحر چاغی ایدی، یاتاماق اوچون ائوه قاییدیردیم.
هله فیسبوک‌داکی قدیمی دوستلاریمین ایرمی‌سینین چیراغی یانیر. او ساری ساچلی قیزین فیسبوک چیراغی ایسه سونولو. اونون آدینا یئتیشنده خشلی سی‌‌‌‌دی کیمی اولوردوم. بیئنیم خیشیلداییردی.
تخمینا اوچ آی زاد اولاردی کی همیشه‌لیک سؤنوب. عینا او بیری دؤرد دنه ساری ساچلی قیز کیمی. گئجه‌لر سحره کیمی دانیشدیغیم، سسی، گؤزلری، اندامی، هر شئیی. اوشاقلیقداکی سئوگیلیم‌له سئچیلمیردی. اون-اون‌ایکی یاشیمداکی سئوگیلیم. گیزلین پالانج اوینایاندا همیشه ایکیمیزده قاچیب باباخان ایندی توکان ائتدییی بلوکلو یئرین آرخاسیندا گیزلنردیک. تاپیلانا قدر قوجاقلاشیب اؤپوشردیک. همیشه دیجاللیق ائدیب گؤز یوممازدیق، نه من، نه ده او. دوداقلاری باشی دایره قیرمیزی سورمالارین دادینی وئرردی. اؤلردی او آغ ساپ‌لی قیرمیزی سورمادان ساری. آمما بؤیودوک، اوزاق بیر شهره تحصیل اوچون گئتدی، همیشه‌لیک! یوخو داواسیندان نئچه‌سینی آتیب یاتمیشدیم. گئجه ساعت ۱۰ زاد اولاردی. یوخودان دوردوم، صبحانه‌نی یئییب ائشیه چیخدیم. نئچه گئجه سوووشوب، آمما یوخوسوزلوق اینجی‌دیر. گوندوزلر یاخشی یاتا بیلمیرم. داوالاریمی چوخالتمیشام. یاخشی و راحت یاتا بیلیم دئیه، بیر ورق اولوب. ایکی دنه ده یخچال‌داکی آغری داواسیندان، ایکی دنه ده سینمه‌مین چیرکینه داوا، داوالاری اسمارتیز کیمی اووجوما ییغیردیم نئچه گون ایدی. گئجه‌نی صوبحه کیمی دولاندیم. صاباحیسی دا یوخوم گلمه‌دی. سحر تئزدن شهرده دولانیردیم. داها هئچ کیم مندن قاچمیردی. سید قفه‌سینه گئتدیم. تانیشلاردان نئچه‌سی اوردایدی. مندن دانیشیردیلار. سلام وئریب بوش صندل ده اوتوردوم، سانکی من یوخ کیمی بیر شئی، دیندیریب دانیشدیرمادان سلامیمی دا آلمادیلار. کوسوب یامانلاییب چیخدیم. بوش میزی آشیریب دیشیمین دیبیندن چیخان سؤزلری دیلیمین آلتیندا دئیه‌رک ائشیه چیخدیم. تاکسی‌یا دایاندیم قوجا خالام یادیما دوشدو، مین تومن وئریب، «منی ولی‌آبادا آپار» دئدیم. خالام گیله کئچدیم. ایکی قیچینین آراسینداکی یئره سرمیش سبزینی آریتلاییردی. سلام وئردیم. هئچ باشینی دا قووزامادی. اوره‌ییم دولموشدو، گؤزلریمله بئله. چیخیب ائوه ساری قاییتدیم. ائوه کئچدیم، پلاستیک بیر توپ دوز گلدان‌لارین یانینا دوشدو. قاپیمیز چالیندی. حه‌یه‌ط ده ایدیم. قاپیا ساری گئتدیم آمما هر نه قدر چالیشدیم آچیلمادی. بیرازدان سونرا دیوارین اوستونده یاوری گؤردوم، منی هئچ وئجینه سایمادان توپونو گؤتورمک اوچون حه‌یه‌طه دوشدو. اوتاقدان ایچری بویلاندی، من ده اونون آرخاسی سوره، اوتاغا گیردی، قیشقیریب توپو یئره آتیب دهشتلی چیغیرتی‌لارلا کوچه‌یه قاچدی… بوش اوتاقدا کلوچه کارتونو اوستوده بیر نفر اوزانمیشدی. منه بنزه‌ییردی، چوخدا عجیب بنزه‌ییردی، یاخینلاشدیم. سیچانین بیری قولاغی یانیندان بیر ده سینه‌سی اوستوندن یئره آتیلیب قاچدی. قوپ-قورو تاختا کیمی اوزانمیشدیم، هئچ کیمینسه خبری یوخ. بیر هفته‌لیک اولاردیم!…
سحریسی محله قونشولاری باسدیرمیشدیلار، قاریشقالارین قونشولوغوندا، باجاسیز بالاجا اوتاغیم کیمی، هئچ بیر خیردا ساری شمع یانمادان دا، قاریشقا قوناقلیغیدیر. قاپیمدان گیریب باجامدان چیخیر. اوتاقدا اولارکن او اوچ قاریشقانی اؤلدورمه‌دیییمین حسرتی لاپ داریخدیریردی



قایناق: http://sabahiodulu.blogfa.com/page/03
ایضاح: بو حیکایه تبریز ادبی اؤدولونون حکایه بؤلومونده بیرینجی یئری قازانمیشدی.

No comments: