قیسا شعرلر

فریبا مرتضایی

(۱)

بو اوزون گئجه‌ده
سنسیزلیک
منی اؤلدوره‌جک
بیر آه یوللا چیلله‌لیک
باشیما چکیب یاتیم
 
(۲)
دونموش اوره‌یین
اووجلاریمدا
دؤن گل اریمه‌دن
گؤزلریم یولوندا

(۳)
گؤزل گونلریمیز
بو یاغان قار کیمی آغ
تر- تمیز اوره‌ییمیز
آه … قاییتمایان گونلریمیز!
 
(۴)
سوسقونلوق
یاشامین اوزون حئکایه‌سی‌دیر
اوجا اوخو
 
(۵)
گؤزلرین نؤقصانسیز سؤزلوکدور
کیرپیک چالدیقجا
یئنی صفحه‌لر دؤنور
حئیران قالمیشام
بو باخیشلارین سایسیز آنلامینا
 
(۶)
سنین یئرینه
ائویمین قاپسین
بو گونلَر شاختا چالیر
 
(۷)
گؤزلریوین گؤزللییندن سن سوروملوسان
منیم باخیشلاریمی سورغولاما
 
(۸)
بیر بولود اولایدیم
داملا- داملا دولایدیم
سسلی- سسلی یاغایدیم
سن گلن یول‌لارین
توزون, توپراغین آلایدیم

(۹)
کئچدی او زامان لار:
-گیزلن پالانج اوینادیغیمیز آن‌لار-
ائله ایتمه‌میشیک
تاپیلاق بیر داها.
 
(۱۰)
قیشین اورتاسیندا باهار گَلمیش
اینتیظار چَکن باخیشلاریمی
چیمن گؤزلرینده گزدیره‌جه‌یم.
 
(۱۱)
سورمه‌لی گؤزلرین
یوخلوغوما یاس توتوب
ائله سانیرام…
دئدیلر بو قره او قره‌دن دئییل!
یازیق سنی یاهالمیسان
گؤزل‌له‌شیب یار گلیر.
 
(۱۲)
بیر عؤمور
قوناق- باجی اوینادیم
هئچ بیلمه‌دیم
کیمین گؤزونده باجی‌ایدیم
کیمین دیلینده آجی.
 
(۱۳)
سن یوخسان
یاناقلاریمین قیریشیندان
آجی بیر چای آخیر
بیر قندیله
آغزیمین دادین آلدادیرام
بو آجینی
شیرین-شیرین باشا چکیرم
بو منیم اوره‌ک یازیمدیر
منی شیرین چاغیر.
 
(۱۴)
کیچیلیرم… کیچیلیرم
آنامین بلله‌لری بویدا
ایلک مکتب دویغولاریما
قاییدان زامان.
 
(۱۵)
دویغولاریمی  تومارلا
خیالیمین بویوندان کئچ
عرضیم  بو  قده‌ر.

منبع: http://ishiq.net/?p=7698