"تبریزین کوچه لری دولان با دولان"

س. سیداوالی 

یولداشیم هدایت سلطان زاده نین دفن مراسیمی، گون‌اورتا چاغی ساعات ایکی یاریم دادی. 

لندن شهرینین مرکزینده ن بیر نئچه مترو خطی دئییشدیکده ن سونرا، خیاوانا چیخدیغیمدا، گؤروره م‌ کی، مزارلیغا یئتیشمک‌ اوچون، هله اون دقیقه ده پیادا یول گئتمه لییم.

حتما بو تیکه یولو اوتوبوس ایله ده گئتمک‌ اولار، لاکن اوتوبوس دان خبر یوخدی؛ پیادا یولا دوشوره م. 

هاوا عینا او گون بروکسل ده "آزادلیق، عدالت، ملی حکومت" یوروشونده اولدوغو کیمی، یئللی، یاغیشلی و دوغروداندا افتضاح دی.

چتریم وار، لاکن یئل ائله اسیر کی، چتری الده ساخلاماق ممکون دئییل.

مراسیمین باشلانماسینا هله بیر ساعات وار و یاغیش دا دورمادان یاغماقدادی. مزارلیق یاخینیندا بیر الده قاییرما کافه یه گیریره م.

بیر چای آلیب و میزلرین بیرینین باشیندا اوتورام. 

کافه ده بعضی خیریم، خیردا تنقلات کیمی محصوللاردا ساتیلیر.

جاماکی دالیندا، گؤزوم ایرانلیلارین "یک و یک" لومو سویو شوشه لرینه دوشور.

کافه نی دولاندیران، گنج بیر هیندلی خانیم دی، بلکه ده پاکستانلی. 

لومو سولارینین بطری لرینی گؤردویومده، ایسته ر- ایسته مز، عاغلیما ایرانلیلارین گلوبالیزاسیون دان آلدیقلاری پای دوشور. 

باشقا مشتری لر نزدینده، ایکی نفر هموطن ده کافه ده اوتوروبلار.

دقتله منه باخیرلار. بللی دی کی اونلاردا هدایت ین دفن مراسیمی اوچون گلیبلر.

 

اوره ییم عجاییب توتولوب، اوتانماسام، ظولوم، ظولوم آغلایاجاغام.

من هارا، بورا هارا؟...

تبریز هارا، لندن شهرینین اونباسیندا یئرلشن بو مزارلیق هارا؟..

چای دان بیر قورتوم ایچیره م. آغزیمدا زققون دادی وئریر.

آذربایجان اوغلو هدایت ین طالعی حقده و بیرلیکده "آذربایجان فئدرال دموکرات حرکتینده" چییین، چییینه یئریدیییمیز گونلر دوشور.

نه قدر تبریزی سئوه ردی.

"تبریزین کوچه لری دولان با دولان،

اگر منی سئومیسن، گئت آیری دولان".

بیر نئچه گون دور کی، بیر عمور ظلمه، عدالت سیزلیگه قارشی مبارزه ائدیب، زندانلار، مهاجرت لر، حسرتلر و آجی لار چکن بیزیم "قارا گیله"، همسنگرلر، همشهریلر و اونو سئویب، سایان لار ایله "آیری دولانیر".

من ایسه دونیانین بو بیری بوجاغیندا یئرلشن بو محله ده، بو کافه ده اوتوروب و تبریزی چییینلرینده داشیییب بو مزارلیغا گتیره ن گول اوغلونو دوشونوره م. 

او ششلی قد و قامتی گؤزومون اؤنونده  جانلانیر و "آذربایجان فئدرال دموکرات حرکتی" نین کنگره سینده اؤزونه مخصوص آهنگ و ریتم ایله اوخودوغو "آذربایجان ملی مارشی" قولاغیمدا بیر دفعه ده سسله نیر و ایسته ر- ایسته مز او بخت سیز، طالع سیز ایران آدلانان وطنی ده دوشونوره م. 

وطن دئدییین‌ او تورپاق، هدایت کیمی بیر چوخلارینا دا آجیمادی. هدایت بورادا لندن ده، ساعدی اورادا پاریس ده.

یقین کی بیزه ده آجیمایاجاقدی.

 

دئمه یه دیلیم گلمیر، لاکن مرد مبارز، دلاور، ایگیت، عدالت سئوه ر و ظلمه سینه گریب، هر عذابه قاتلانان آذربایجان‌ اوغلو هدایت سلطان زاده یه آجیمایان وطن، خوش گون گؤره بیلمز.