روح ساغالتیجیلیقدا(پسیکوتراپی ده) اینجه لیکلر(2)

درویش اوغلو

بو یازینین بیرینجی بؤلومونو اوخوموش اولسانیز، ایکینجی بؤلومونو داها یاخشی آنلایابیلرسیز.

روح استروکترورونون ایکی آلت استروکترودان، دئملی بیلینج و بیلینج آلتییندان اولوشدوغونو، و بیلینج آلتینین بیلینجین نئچه قاتی داها بؤیوک و داها قاپساملی (هجیم) اولدوغونو گؤردوک. ایندی ایسه بو ایکی بؤلومودن هر بیرینین استروکترونو (ساختارینی) و ایشله ییشینی تک باشینا قیسساجا و عمومی شکیلده گؤرمه گه چالیشاق:

1- بیلینج (ضمیر آگاه)

بیلینج، ایچینده اولدوغوموز لحظه، بو گون، بو ساعات، بو دقیقه و بو ثانیه ائشیک دوینادان (و البته کی ایچیمزدن،  آجلیق، سوسوزلوق، آغری، سئوینج کیمی) بئنیمیزه آخان  یوزمینلرجه بیلگی دن سئچیب، حس ائتدیگیمز بؤلومودور. بو بیلگیلردن ان گئنیشی اؤز بیلینج، مکان و زمان بیلینجی دیر. "من بو لحظه، یای فصلینده، گوندز، گون اورتاسیندان سونرا، بو شهرده، بو کوچه ده و بو ائوده یازی یازماق ایله مشغول اولدوغومون بیلینجینده یم." دئیدیگمده  بیلینجیمده اولان بیلگیلردن سؤز ائدیرم. بیلینجلی تجربه ائتمه دیگیم بیلگیلر ایسه بونون مینلرجه قاتی دیر. بیلگی سایار سیستمی ایله قارشیلاشدیردیغیزدا، بیلینجی، بیلگی سایاریمیزین بئنینده و اینترنت دونیاسیندا اولان بوتون بیلگیلردن، بو لحظه بیلگی سایاریمیزین مونیتوروندا ظاهر ائتدیگیمز بؤلومو ایله قیاسلایابیلریک. رنگلی بیر تاراققا نین پاتلادیغینی گؤزوموزون اؤنونده جانلاندیراق. تاراققانی اوتلاییریق، خزنه سیندن آیریلیب هاوادا اون - اون ایکی متر اوجالماغا باشلاییر. بو اوجالما مسیرینده بئش متر اوجالیغا چاتدیغی زامان، آرتیق بیر متر اوجالیقداکی حالتینده دگیل، بیزیم گؤزوموز ده آرتیق بیر متر اوجالیقداکی حالتینی آلقیلامیر. اون متر اوجالیغا یئتیشدیگینده گئنه ده اؤنجه کی حالتلری یوخ اولوب، بیز ده اؤنجه کی حالت لرینی آلقیلامیریق. پاتلاماغا باشلادیغیندا بئش قیرمیزی توپ چیخیر و اطرافینا قیرمیزی ایشق ساچیر. بو قیریمزی توپلار داغیلماقدا ایکن هر بیرینین ایچیندن بئش ساری توپ چیخیر وا اطرافلارینا ساری ایشیق ساچیر. بو ساری  ایشیقلاری گؤردوگومز لحظه، آرتیق قیریمیزی ایشیق ساچماق یوخ اولوب، قیرمیزی ایشیغی آرتیق گؤرموروک. ساری توپلارین هر بیرینین ایچیندن ده بئش ماوی توپ چیخیر و پاتلاییب اطرافینا ماوی ایشیق ساچیر و سونوندا ایشیقلارین هامیسی هاوادا قارالیر و یوخ اولور. بو پروسه نین هر مرحله سینی (ثانیه نین نئچه دن بیری قدر بیر زامان ایچینده) گؤردوگوموز لحظه بیر اؤنجه کی مرحله سی آرتیق یوخ اولوب. بیلینج رنگلی بیر تاراققانین پاتلاما پروسه سینده گؤردوگوموز لحظه لر کیمی آنجاق کیچیک بیر لحظه دن اولوشور. ایچینده اولدوغوموز بو لحظه نی بیلینجلی تجربه ائدیریک، آنجاق بیر اؤنجه کی لحظه بیلینجدن چیخیب، بیلینج آلتینا سورولوبدور. بیر- بیرینین آردی اولان بو کیچیک لحظه لرده بئینیمیزه آخان بیلگیلر بئین ده ایشله نیلیب (ساخت و پرداخت اولونوب) بیزده وارلیغین سورکلیلیک (تداوم) دویغوسونو یارادیر.

2- بیلینح آلتی (ضمیر ناآگاه)

بیلینج آلتی ییغینتی (تراکمی) بیر بیلگی سیستیمی دیر. هر انسانین بیلینج آلتی سی  انسان سویونون بوگونه قدر ییغدیغی بیلگیلرین هامیسینی ایچرمکده دیر (احتوا ائتمکده دیر). بو بیلگیلر ژنلریمیزده، دئملی بیر انسانی اولوشدوران تک - تک هر سلولون ایچینده، اتیمیزده، سوموگوموزده، قانیمیزدا یئرلشیبدیر. ایکی آیاغیمزین اوستونده دیک یئریه بیلدیگیمیز، آنلاملی و هدفمند دانیشابیلمه گوجوموز، گونلوک ایشلریمیزین بیر چوخونو (اکمک، بیچمک، پیشیرمک، یوماق، ائو تیکمک، پالتار یاماماق) یئرینه یئتیره بیلمگیمیز، اؤز بیرئیسل (فردی) اؤیگرندیکلریمیزین آنجاق بو ییغینتی بیلگیلر اوستونه اوتورماسی یولو ایله ممکن اولدوغو کیمی، بارماقلاریمیز ایله مینیاتور چکمک و ابریشم خالچا توخوماق کیمی ظریف ایشلر گؤره بیلدیگیمیز ده هر فردین اؤز یاشامیندا اؤیگرندیکلرینین، کئچمیش نسللردن آلدیغی ییغینتی بیلگلر اوستونه اوتورماسی ایله ممکن اولماقدادیر.  بو ییغینتی بیلگی سیستمی اؤز ایچینده هؤرگولنمیش (سازمان یافته) بیر سیستم دیر و اؤز ایچینده نئچه آلت سیستمدن اولوشوبدور. بللی بیلگیلر، بللی قاتلاردا (لایه) هؤرگولنیب و اؤزونه خاص آلت سیستمی یارادیبدیر. بو قاتلار آناتومیک، یوخسا فیزیولوژیک قاتلار دگیل، رونتگن و ام.آر.تی (ماگنت رزونانس توموگرافی) شکیللرینده بئله گؤرونمه سی ممکن اولمایان بیلگی ایشله مه قاتلاری دیرلار. کئچمیش نسللردن ییغدیغیمیز بیلگیلری بیلگی سایار سیستمی ایله قارشیلاشدیردیغیمزدا، اساس سیستم بیلگیلرینه  ( اوپئریتینگ سیستم) بنزتمک اولار. فردی یاشامیمیزدا اؤیگرندیکریمیز ایسه پروگرام بیلگیلری ایله قارشیلاشدیریلابیلر. بیلگی سایار سیستمینده پروگرام لارین ایشله یه بیلمه سی اوچون، پروگرامدان داها گئنیش و داها درینلرده اوتورموش بیر اساس بیلگی ایشله مه (ساخت و پرداخت اطلاعات) سیستمین اوستونده اوتورمالارینی آنلایابیلدیگیمیز کیمی، روح استروکتروندا دا فردی یاشامیمیزدا اؤیرندیکلریمیزین (پروگراملارین) اؤزلریندن داها گئنیش و داها درینده یئرلشمیش بیلگی سیستمی اوستونه قورولماقلاری گرکدیگینی آنلایابیلریک. بو بیرینجی بیلگی سیستمینین اولوشماسینی و هورگولنمه پروسه سینی آنا رحمینده کئچیردیریک. آنا رحمینده کی جنینین گلیشمه (تکامل تاپما) مرحله لرینین، بوتون جانلیلارین، و انسان نسلینین گلیشمه مرحله لرینین قیسسا بیر سناریوسو اولدوغونو جنین بیلیمی (امبریولوژی) آیدینلاتماقدادیر. دئملی آنامیزدان دوغولدوغوموز گون، کئچمیش نسللریمیزدن آلدیغیمز بیلگیلر ایله دوغولموش اولوروق. بو بیلینج آلتی قاتیندان بیلینجیمیزه چیخابیلن چوخ کیچیک بؤلومو آنجاق یوخولاریمیزدا گؤره بیلدیگیمیز، آنلاماغیندا چتینلیک چکدیگیمیز سمبولیک گؤرونتولر، سسلرو دیوغولاردیرلار. ایلان قورخولو خطر سمبلو اولاراق، اوچماق سئوینج، باشاری و موفقیت سمبولو اولاراق،  دار بیر یئرده سیخیشماق دویغوسو گونلوک یاشامدا مالی، یوخسا اجتماعی بیر دارکئچیتده (تنگنا) دا اولماغین سمبولو اولاراق و .........یوخولاریمیزدا ظاهیر اولور. بیر توپلومدا اولان جمعی اینانجلار، سمبوللار و اسطوره لر ده بو بیلینجسیزلیک قاتیندان قایناقلانیر. یاخچیلیق و پیسلیک سمبوللاری، اهریمن و اهورامزدا، انسان نسلینین کؤکونو سمبوللاشدیران آدم و حوا، جن و پری، شیطان و ملک و یوزلرجه بئله سمبول و اسطوره بو بیلینچسیزلیک قاتیندان قایناقلانیر. سویس لی روح بیلیمچیسی کارل گوستاو یونق بیلینج آلتینین بو قاتینا آرشائیش، ویا آرخایش بیلینج قاتی آدینی وئریر. عمر خیام بو بیلینج آلتی قاتینین کؤلتورلشدیریلمیش سمبوللارینی بو رباعی سینده دیله گتیریر:

گردون نگری ز قد فرسوده ماست

جیهون اثری ز اشک پالوده ماست

دوزخ شرری ز رنج بیهوده ماست

فردوس دمی ز وقت آسوده ماست.

کئچمیش نسللردن آلدیغیمیز بیلیگیلر و بونلارین سمبوللاری بیر تک انساندا یوخ، کیچیک بیر گروه انساندا یوخ، بلکه میلیونلارجا و میلیاردلارجا انساندا اورتاق بیلگیلر اولدوغوندان، یونگ بو بیلینجه توپلومسال (کولکتیو) بیلینج و توپلومسال بیلینج آلتی دئییبدیر. یالنیز آذربایجاندا یوخ، یالنیز اورتادوغودا یوخ، یالنیز آسیا قاره سینده یوخ، یئر کوره سی اوستونده یاشایان بیر چوخ توپلومدا جین، پری، ملک، آدم، حوا، شیطان و ....بو سایاقدان سمبوللارا اینانیلیر. بو بیلگیلرین کولتورلشدیریلمیش سمبوللاری کولکتیو بیلینجی اولوشدوردغو کیمی بیلینجسیزلیکده قالان بؤیوک بؤلومو ایسه کولکتیو بیلینج آلتینی اولوشدورور. هر انسان (آنادان دوغما فلج لردن سیوای) ایکی آیاغی اوستونده دیک یئرییر، هر انسان (آنادان دوغما لال - کارلاردان سیوای) دانیشیر. بئیله بیر قابلیته مالک اولدوغوموزون نییه  لیگینی و نئجه لیگینی بیلینجلی تجربه ائتمیریک، بئله بیر قابلیتی "بدیهی" بیلیریک.

کولکتیو بیلینجین یایغین و گوندلیکده اولان بیر شکلی، بیر توپلومدا دانیشیلان و یازیلیب – اوخونان دیل دیر. دیل بیر توپلومو اولوشدوران (تشکیل وئرن) انسانلارین اورتاقلاشا ایشلتدیکلری و بیربیرلری ایله ارتباط قورابیلمک اوچون یارارلاندیقلاری سسلی سمبول لاردیر. هئچ بیر دیل (اسپرانتو دان سیوای) قیسسا بیر زاماندا و انسانلارین بیلینجلی و ایستکلی گیریشیمی (جهد و کوشش) ایله اولوشوب گلیشمه ییبدیر. تماماً ترسه سینه، هر توپلوم مینلرایل سورموش اولان  تاریخی گلیشمه (تکامل) پروسه سینده، بیر دیل گلیشدیردیگینین بیلینجینده اوماقسیزین،  اؤز دیلینی گلیشدیریبدیر. دیلین تاریخینی، یازیلی دیلین میدانا گلدیگی چاغا دک آختاریب – تاپابیلیریک. آنجاق سؤزلو دیلین قدمتینین بو تاریخدن چوخ داها اؤنجه کی چاغلارا دایاندیغینی تصور ائتمک چتین دگیل دیر. دئملی دیل چوخ ائسکی نسللریمزدن گله – گله بیزه  چاتمیش بیر کولتیو بیلینج دیر. بو آنلامدا دیل کولکتیو بیلینج اولدوغونون یانیندا، عینی زاماندا آرخاییش بیر بیلینج دیر. دیل باره سینده فیکیر یورماق چوخ گئنیش و آیرینتیلی بیر موضوع الدوغو اوچون، بو یازینین سونراکی بؤلوملرینده بو موضوع اوستونه تکرار قاییداجاغیق

سؤزو بیر یئره ییغارساق، دئملی بیلینج آلتی هؤرگولنمیش (سازمان یافته) و سیستملی بیلگیلر ییغینی دیر. بو بیلگی ییغینی اؤز ایچینده نئچه آلت سیستمدن (زیرمجموعه) و هر آلت سیستم گئنه اؤز ایچینده نئچه آلت سیستمدن اولوشوبدور. بو آلت سیستملرین ان گوبوتو آرخائیش (کولکتیو) بیلینج آلتی و بیرئیسل (فردی، شخصی) بیلینج آلتی اولاراق آییرلابیلر.

یازینین آردی وار