یورد حسرتی

علیرضا میانالی
‏(قریب دویغولار کیتابیندان)‏

Əlirza Miyanalı
Yurd həsrəti
‎(Qərib Duyğular kitabından)‎

بیر ساده غم ایدی غمیم؛

بوردا اونی داغ ائیله دیم‎.‎
یورد یئریندن اوزاق دوشدوم،
اوره ییمی یاغ ائیله دیم‎.‎

اریتدیم ده گیله- گیله؛
آما اوزوم گوله- گوله‎.‎
بیلمه دیم یوخ، بیله- بیله
شورانلیقدا باغ ائیله دیم‎.‎

سئوینج اکدیم، کدر دردیم،
اه مه ییمی یئله وئردیم‎.‎
قاخینج اولدی منه دردیم،
اؤز- اؤزومی لاغ ائیله دیم‎.‎

من چه که نی فیل چه کنمز؛
بم ناله می ذیل چه کنمز‎.‎
گون وار اونی ایل چه کنمز،
دئمه یینیز آغ ائیله دیم‎.‎

بو یول عادی کئچیملی یوخ،
بوردا نه سه سئچیملی یوخ‎.‎
حسرتیم من بیچیملی یوخ،
یورد حسرتین داغ ائیله دیم‎.‎

‎*****‎
یئنه ده یورد یئری یوخوما گیریب؛
آنالی گونلریم قاییداجاقدی‎.‎
هاچاندی آغریدان اوره ییم آغلیر،
آنام اوره ییمی اوووداجاقدی‎.‎

شفا اللرینی چه که جک یئنه،
نه آغریم قالاجاق، نه بیر تشویشیم‎.‎
یئنه اولاجییام ارکؤیون جوجوق،
یاغ کیمی گئده جک یئنه هر ایشیم‎.‎

یئنه مینه جی یم گنجلیک آتینا؛
ال چاتماز اولسادا او منه ایندی‎.‎
گؤردویوم هرنه وار یوخی اولسادا
بودور کوسکون کؤنول دانیشدی، دیندی‎.‎

یئنه کوچه میزده محترم خالا،
قارشیما چیخاجاق اؤز آنام کیمی‎.‎
یولا چیخدیغیمدا یاخشی یول دئییب،
آردیمجا باخاجاق اؤز آنام کیمی‎.‎
یئنه ده ساچلاریم سیغاللاناجاق؛
یئنه ده عؤمرومه نور یاغاجاقدی‎.‎
ساغیمدا، سولومدا باجیم، قارداشیم،
آتام آرخامداجا داغ اولاجاقدی‎.‎

یئنه او گونلره قاییداجییام؛
یئنه دردلریمی اونوداجییام‎.‎
بو حسرت، بو نسگیل، بو غم گئده جک،
تپه دن دیرناغا اود اولاجییام‎...‎

غریبه گلسه ده، یاد گؤرونسه ده،
منی بیر گون دویان تاپیلاجاقدی‎.‎
بوگون اولماسادا بیلیره م، او گون،
یورد یئری یوخوسی چین اولاجاقدی‎.‎

اوندا هئچ نیسگیلیم، مرادیم قالماز؛
ائله بیر عؤمری من یاشاییب اؤلسم‎.‎
بو گئجه یوخوما گیرن وطنین
اؤلمه رم یئنه بیر قوینونا گیرسم.