Mar 27, 2021

یاد ائت منی…

بهروز دولت‌آبادی(چای اوغلو) 

هر یئرده قرنفیل چیچگی، لاله گؤرنده،
ظولمات گئجه‌ده، گؤیده آیی هاله گؤرنده،
شام و سحر آرخاندا گولوم! سایه گؤرنده،
«
یاد ائت منی ای سئوگیلی جانان منی یاد ائت    !»

آل رنگه بویانمیش شفقی صبح آچیلاندا،
دان اولدوزو سیرغا کیمی آیدان آسیلاندا،
من هاردا اولام، شهرده یا داغدا، آراندا،
«
یاد ائت منی ای سئوگیلی جانان منی یاد ائت

هر یئرده کی گؤردون بیر اسیر قول‌لاری باغلی،
سورگون دوشن ائل‌لر اوره‌گی یول‌لاری باغلی،
بیر عؤمر یانیب عشق اودونا سینه‌سی داغلی،
«
یاد ائت منی ای سئوگیلی جانان منی یاد ائت

هر یئرده کی بولبول گوله حسرت قالیب آغلیر،
گول غنچه‌سینی شاختا ووروب، باغرینی داغلیر،
عاشیق‌لری زنجیر جنون بوینونو باغلیر،
«
یاد ائت منی ای سئوگیلی جانان منی یاد ائت

اون دؤرد گئجه‌لیک،گویده گؤزل آیی گؤرنده،
قار شاختا،کولک پنجره‌نی قیشدا دؤینده،
بایرام قاباغی کندقیزی ساچلارین هؤرنده،
«
یاد ائت منی ای سئوگیلی جانان منی یاد ائت

هر یئرده کی حسرتله گؤزو یولدا قالان وار،
هیجرینده وطن عشقینه قلبینده تالان وار،
«
بیژن»لری، «خسرو»لاری سازلاردا چالان وار،
«
یاد ائت منی ای سئوگیلی جانان منی یاد ائت

هر یئرده سینیق سازی، قیریق تئل‌لری گؤردون،
غربتده کی آواره دوشن ائل‌لری گؤردون،
خوش نغمه‌لی، عصیان‌لا دولو دیل‌لری گؤردون،
«
یاد ائت منی ای سئوگیلی جانان منی یاد ائت

هر یئرده کی گؤردون گئجه‌لر دورنا قاتاری،
«
بابک» کیمینی، «قوچ نبی»نی، تئللی «نیگار»ی
ال‌لر حنالی تازه گلین، بگ‌ده وقاری
«
یاد ائت منی ای سئوگیلی جانان منی یاد ائت

هر یئرده کی گؤردون ایکی ال‌لر بیر اولوبدور،
ظولمون کؤکونو قازماغا ائل‌لر بیر اولوبدور،
خوش نغمه‌لی سازلارداکی تئل‌لر بیر اولوبدور،
«
یاد ائت منی ای سئوگیلی جانان منی یاد ائت

هر یئرده کی اینسانلارا حؤرمتله باخیرلار،
دوستلوق چیراغین کوچه و بازاردا یاخیرلار،
آل بایراغی «سلطان ساوالان»یمدا تاخیرلار،
«
یاد ائت منی ای سئوگیلی جانان منی یاد ائت

هر یئرده کی گؤردون ایشیغا پرده چکیرلر،
عصیانلارا دولموش اوره‌گه نرده چکیرلر،
بیرلیک توخومون سئوگیلی تبریزده اکیرلر،
«
یاد ائت منی ای سئوگیلی جانان منی یاد ائت

هر یئرده کی گؤردون وطن عشقینده یانان وار،
دوغمادیلینی، ائل- اوبانی یاده سالان وار،
«
چای اوغلو» کیمی ایلقاری دوز عاشیق اولان وار
«
یاد ائت منی ای سئوگیلی جانان منی یاد ائت

 

عرب الفباسیندا متن وارسا بورادا یازین، یوخسا بو سطرلری سیلین

No comments: