ایبیش، منوش

ممد علی 

 ایکیسی ده، بیزیم اِوده‌ن یوز متر آشاغئدا، دروازا کوچه‌سینده گورجانلئ‌لارئن بیرینجی سُل ‌‌دؤنومونده‌کی دربندده، دیبه بیر آز قالان؛ منوش ساغدا بالا بیر هشتی کیمی‌ده؛ ایبیش ده سُلدا پیلله ایله انیلن چوخور دربندده اُلاردئلار. 

 ایبیشین اؤز آدئ ممدعلی ایدی.‌ منیم اؤزوم‌له آداش. چاغرئلان آدئ سیجیللی‌سینده‌ن دوزه‌لن بیر آد ایدی کی، بیز اِله‌میشدیک ایبیش. اُ دا بیر سؤز دِمه‌میشدی و اُلموشدو ایبیش  و  قالمئشدئ ایبیش. اُلدوغو کیمی، ابراهئمدان ایبان، ایبی ده دوزه‌لردی، و ایبان بیزیم بیر آیرئ یُلداشئمئزئن آدئ ایدی. منوش دا، اِله بیز اول‌دن اِشیتدیگیمیز سؤز ایدی و دالئسئنئ توتمامئشدئق کی، نی‌یه منوش؟ نی‌یه به یُخ!؟

منوش گیل، ایکی قرده‌ش بیر باجئ. ایبیش گیل ده، دؤرد قرده‌ش بیر باجئ. اِولری بیربیرینده‌ن اُن متر آرالئ. آمما ماراقلئ بوراسئ ایدی کی، منوشون و ایبیشین اؤزلرینده‌ن بؤیوک قرده‌شلری آداش ایدیلر. اؤزو ده نه آداش، هر ایکیسی بؤیوک آقا ! منوشون بؤیوک آقاسئ سُرالار معلم اُلدو، دیبده ده فردوسی مدره‌سه‌سینده ناظیم، و دالئسئ دا هامان یِرده رئیس. بو بؤیوک آقا شاققاواتلئ اوجابُی ایدی و منوش کیمی گؤی‌گؤز. منوش بالاجا یُخ، اینجه ایدی. ایبیشین بؤیوک‌آقاسئ آزچُخ بیر نِچه کلاس اُخوموش اُلسایدئ دا، دالئسئنئ توتمامئشدئ و اُلموشدو شاتئر.

بیز چؤره‌یه گِده‌ بیلن یاشا چاتاندا،  انگجده شاتئرحسن اللی یاشئنئ گِچمیشدی یا بیزیم اوشاق گؤزوموزه اِله گؤرونوردو. گون چئخاندان گون باتاناجان تاپان وئرئب کوره‌یی تندیره اوزالدئب، اُتوز قئرخ سانتیمتر خمیری، بیر متر، ِبیرمتر ایگیرمی سانتیمترجان اوزالدئب سرمک برک یُران و تِز قُجالدان بیر ایش ایدی. ال‌لریوی قورودازه‌ن کیمی بیر قابدا ایسلادئب، اه‌ییلیب تاغاردا ایکی الی ایله بیر سنگک‌لیک خمیری آیئرئب،  اُ ال بو ال اِدیب، کوره‌یین اوستونه قُیوب ال‌لرینی باشدان ایسلادئب اُ خمیری کوره‌یین انینه بُیونا تاپان وئراراق یایماق و بوتونونو بیر مترده‌ن آرتئق کلله قند تهرینه سالئب، اته‌یین قولاقلارئنئ اوچ بارماقلا – اوشاغئن قولاغئنئ چکه‌ن کیمی- چکیب، سُزا بش آلتئ مترلیک کوره‌ک‌له تندیرین قئزمار داشلارئ‌نئن اوستونده اُجاق یانئنا، اُرتایا، دیبه سرمک، و هر یاندا دؤرد سنگک بیربیرینده‌ن اوچ دؤرد سانتیمتر آرالئ دوزمک، آرتِسلیک ده اُلماسا آرتيزانلئق کی سایئلا بیله‌ر.  یانئ بو تهر، ریفیده ایله یُخ، کوره‌ک‌له یاپئلان بوچؤره‌یین یاپماسئ‌نئن هر بیر فندینی بیلن آدام.

شاتئر بؤیوک‌آقا استاژئنئ بیر آیرئ شاتئر یانئندا گؤردوکده‌ن، و اؤزونده‌ن خاطیرجم‌لیک تاپاندان سُنرا گلدی انگج چؤره‌کچی‌خاناسئنا. اُقده‌ر چکمه‌دی کی میرحسین آدلئ بیر آیرئ جوان شاتئر دا گلدی، و نجیب شاتئرحسنین گِتمه‌سی ایله،  بو ایکی جوان اُلدو چؤره‌کچی‌‌خانانئن کادرئ.

بونلارئن بیری ایشله‌ینده اُ بیری‌نین دینجه‌لمه وُلو ایدی، و حساب ایله چؤره‌کچی‌خانادا اُلمامالئ. دی گل کی، بو ایکی آدام بیرـ‌ بیری ایله یُلا گِتمه‌دیلر. بیز ده بیلمه‌دیک نی‌یه. آمما بیر ایکی یُل تندیر قاباغئندا کوره‌ک دآوالارئنئ گؤردوک ده، اِشیتدیک ده.

شاتئر بؤیوک‌ آقانئن تهرانا گِِتمه‌سی، و میرحسینین گجیلده، قاپئ‌نئن اِشیک  چیگنینده یمیش ساتان دوکانئ آچماسئ بو دوککودوکه، و کوره‌ک دآولارئنا سُن قُیدو.

بیر یاندان دا آقا ایله میرتقی کی، بیز لورِل هاردئ آدئ وِرمیشدیک؛ آقا  پُتا، ایسته‌مه‌لی، اوزو گولر، و میرتقی آرئق، ناجینس، چؤره‌کچی دوکانئنئ ساتدئلار ماحمود آقا کورد اُغلویا کی، اؤزونون بؤیوک اُغلو شاتئر ایدی؛ اُنون بالا قرده‌شی تارازئ باشئندا، و ساغ الی‌نین جولو بارماغئ ایله تارازئ‌نئن چؤره‌ک گؤزونو آشاغئ باسان، یانئ اسگیک ساتماغئ سِوه‌ن. بو ایش هرگون بیر نِچه یوز یُل اُلدوغوندان، اُنون جولو بارماغئ داها بوکولمه‌دی و تارازئ المایان یِرده ده قوللوق اوچون حاضئر ایدی! اُ زمان هله چؤره‌ک‌لری بوکوب آسما تارازئ‌دا چکه‌ردیلر. تک قورو چؤره‌ک چکیلمه‌زدی و عده‌دی ساتئلاردئ.

شاتئر بؤیوک آقا تهراندا شاتئرلئغئ بوراخدی، شوفرلیک اؤرگندی و بورونسوز بنزلر خطه سالئناندا اُلارئن اوستونده ایشله‌مه‌یه باشلادئ. بونون خبری تبریزده محله‌یه چاتدئ، آما گِتدیکجه یاددان چئخئب اونودولدو.

آمما ایبیش گیل تبریزده قالدئلار. آتاسئ‌نئن ایشینه گؤره بیر ایل توفارقانا گِتدیلر کی، هله حکومتین سؤزو ایله آذرشهر اُلمامئشدئ، اُلسایدئ دا، هامئ توفارقان دییه‌ردی. دالئسئ ایل قِییدیب گِنه ده سعدی مدره‌سینه گلنده بیزه دِدیگی بیرینجی سؤز بو ایدی کی، توفارقاندا یُغورت، قاتئق یُخ، جُرتان دِییردیلر. بیز ده دِدیک دا  اُردا مئرت یُغورد آغاجئنا چئخا بیلمه‌ز!.

ایبیشین اؤزونده‌ن بیر ایکی یاش بؤیوک قرده‌شی عبدولحسین‌ین نم هاردان بِینینه دوشموشدو آمریکایا گِتسین. انگج مِیدائئندا آخشاملار خواندنیها مجله‌سینی آچئب «اِجیپشئن قزِت و اجیپشئن مِیل» آدلئ روزنامه‌لرده‌ن یازئلان خبرلری دِییب و بو اوچ سؤزون آمریکا دیلینده معناسئنئ بیزه دییه‌ردی. بیلدیک کی بونون قوشو قُنوب اُرا و بیر اُ قده‌ر ده چکمه‌دی کی، عبدولحسین انگج میدانئنا گلمه‌دی، و بو سطرلر یازئلاندا دا اُردا گؤرونمه ییب!  دا اُ گِتدی، نه خبر، نه اتًر. بیر داش آلتدان، بیر داش اوستده‌ن.

ایبیش گیلین راستاکوچه‌ده عمی اُغلولولارئ وار ایدی، اوچ قرده‌ش احمدآقا، حسن و محسن. احمدآقا بیزیم حسن عم‌اُغلو کیمین یوک ماشئنئ شوفری ایدی. یاخچئ آدام ایدی. آروادئ بیزیم آنا طرفده‌ن قُهوموموز ایدی. محسن بالاجا، جئبئلدئز، راستاکوچه دیلینی دب سالانلاردان بیری، بیر متر اللی آلتمئش سانتیمترده‌ن یوخارئ اُلمازدئ. بیر هاوا دا تک آیاق ایدی. سُرا دا گِتدی تهراندا آذربلایجانلئ‌لار یاشایان محله‌ده آد چئخارتدئ. بیلمه‌دیم نه ایش گؤره‌ردی. بلکه ده تک آد چئخارتمئشدئ. قُجالاندا آلزایمر توتموشدو. بونو بیزه حاج احمدآقا اُلموش مشهدی احمدین قئزئ دِدی.

 

بیزیم محله اوشاقلارئندان مدره‌سه‌یه گده‌نلرین چُخو، آلتئنجئ کلاسئ قورتارئب قورتارمامئش مدره‌سه‌دن گِتدیلر. یانئ بیر چُخو یُخسول‌لوقدان، بیر آزئ‌نئن درسه شُوقو اُلمادئغئندان بو ایشی گؤردولر. بیر آزئ دا دُققوزونجودان سُرا  دایاندئلار. چُخ آزالمئش قالانلار دیپلُماجان اُخودولار. ایبیش ده منوش دا من ده بونلاردان اُلدوق. و بو بیزیم بیرـ‌‌ بیریمیزله دوشونجه بیرلیگینی آرتئردئ و یُلداشلئق رابطه‌سینی درین‌لتمه‌یه سارئ آپاردئ. و بیزی داها بیر اوشاق کیمی یُخ، بیرـ بیرینه حؤرمت و محبتی اُلان گنج‌لر کیمی یاخئنلاتدئ. آز اوشاق، بیزیم سعدی‌ یُلداشلارئمئزدان کُنکوردان اُیانا یُل تاپدئ.

بیز دُققوز ایل سعدی مدره‌سه‌سینده اُخودوغوموز زمان، منوش‌لا باشدان دیبه، ایبیش‌له ده بیر ایل توفارقان پارانتزینده‌ن سووای، اُنون تایئ، کلاسداش ایدیک، یانئ کلاس یُلداشئ ایدیک.

 

اُ زمان کلاسلاردا شایئرلاردان بیری «مبصر»، بیری ده «مستحفظ» اُلاردئ. اُنو دا آقا مکبری ناظيم سِچه‌ردی. اوشاقلار سیاحته چئخاندا، مستحفظ کلاسدا قالاردئ یا کلاسئن قاپئسئ آغزئندا دایاناردئ کی، هِچ کیم سیاحتده کلاسدا قالماسئن و زنگ وئرئلمامئش کلاسا گِتمه‌سین. مبصر آمما، هامئ کلاسا گلنده‌ن سُرا معلم گلیب چاتانا کیمی، اوشاقلارئ سس‌سیز ساخلاماغا چالئشاردئ. سؤزه باخمایانئن دا آدئنئ دُسقادا یازاردئ کی، معلم گلیب گؤروب، اُنا چئمخئرئب یا اُنو دانلاسئن.

بیر جار بیزیم مبصروموز اوقانئ آدلئ بیر یِکه‌پر شایئرد ایدی. اُوقان، ایندی بُستان‌آوا اُلموش  اُوجان‌ ماهالئ‌نئن کندلرینده‌ن بیری‌نین آدئ ایدی. اُوقاندان گلمه. اوقانئ سُرالار اؤزو گِدیب معلم اُلدو. آمما نوحه دِمه‌یه برک شُوقو وار ایدی، اِله کی بیر نوحه کیتابئ دا چئخارتمئشدئ.

بیر گون بو اُوقانئ ایبیشین آدئنئ یازدئ دُسقایا. ایبیش دِدی اُنو سیل، معلم گؤره‌ر، پیس ایشدی. دِدی سیلمه‌ره‌م. ایبیش دِدی بس اِله ده اوستونه ایکی یاز. اُ دا دِدی : هن، تِ- تِز دِ، ایندی گؤره‌سن. اُ  تِز-تِز یِرینه، تِ-تِز دییه‌ردی.

 مدره‌سه حیه‌تینده آتدئ-توتدو، دیریلتدی، اُینایاندا ایبیش ده، منوش دا اُینایاردئلار. آمما آخشام

مدره‌سه‌دن چئخاندان سُنرا بیزیمله اُیناماغا گلمه‌زدیلر، یانئ هِچ واخت علیخان آغزئندا یا انگج میدانئندا ناققئشلئ، پیل‌دسته‌ده اُلمازدئلار. آنجاق مدره‌سه اُیونلارئندا، و مدره‌سه‌ده گؤروشردیک.

 

گونلر ایل‌لر کِچدی. دُققوز ایل سعدی‌ده اُخودوغوموز زمان کؤچدو. سعدی‌نی قورتاراندا کلاس یُلداشلارئ سپه‌لندی. بیر پاراسئ بازارا- بازاردا آتالارئ‌نئن دوکانئنا یا حیجره‌سینه- بیر پاراسئ دا هره‌سی دیپلُم آلماق اوچون بیر مدره‌سه‌یه داغئلدئ. ایبیش منوش‌لا گؤروشلریمیز آزالدئ، وگِتدیکجه سِیره‌لدی.

 

دیپلُمدان سُرا بیرده‌ن بیره هامئلئغا گؤزله‌نیلمه‌ز بیر یِرده یئغئشمالئ اُلدوق : تهراندا باغشاه سربازخاناسئ مشق میدانئندا، بیر سحر ساعات آلتئ‌دا، گون چئخمامئش.

 

سربازچئ‌لئق اوچون تبریزده منطقه آدلانان بیر اداره‌دن کاغاز آلمالئ ایدیک. اُندا منطقه‌نین رئیسی سرهنگ عطابخش ایدی. بیزیم اصغر قدس آدلانان بیر ملی (یانئ دولتی اُلمایان)  مدره‌سه‌ده معلم‌چی‌لیگه باشلایئردئ. آمما بیله‌سینده‌ن خراجنامه یا دا معاف‌لئق کاغازئ ایستیردیلر کی، هِچ بیری ده یُخ ایدی.

بیر گون من گِتدیم منطقه‌ده سرهنگ عطابخشین یانئنا و دِدیم بِله دِییرلر بیر قانون وار کی، بیر اِوده‌ن ایکی آدامئ بیر یِرده سرباز آپارماق اُلماز. دِدی بلی. دِدیم بس نِجه اُلور کی، سیز همی منیم بؤیوک قرده‌شیمی، همی ده اؤزومو سرباز آپارماق ایسته‌ییرسیز؟ دِدی وقتیزدی دا. دِدیم ایکیمیز بیرده‌ن کی اُلماز. دِدی ایندی ایستیرسن نه دییه‌سن؟ دِدیم من سرباز گِدیره‌م قرده‌شیمه معاف‌لئق وِرین. دِدی به‌یه سن گِتدین و سرباز دوشمه‌دین. اُندا هر ایکیز ده معاف اُلارسئز و بیزیم باشئمئزا بؤرک گِچه‌ر. دِدیم منیم سرباز گِتمه‌ییم حتمی دیر. دِدی نی‌یه؟ دِدیم دُوطلب گِدیره‌م. دا بونا سؤز یُخدو کی؟ اُنون معاف‌لئغئنئ ایندی‌دن وِره بیله‌رسیز دا. دِدی اُ گره‌ک کتبی یازئلا. دِدیم نِجه ایسته‌سز کاغازئ یازارام. یازدئم و اُلار دا تهرانا گِدیب سرباز اُلماغئمئ بیر اعزام وره‌قه‌سی دِییلن کاغازا یازئب منه وِردیلر. دِدیم ایندی بی‌یُل اُ معاف‌لئق نِجه اُلسون؟. یازدئلار کی، فیلنکس یانئ اصغرین قرده‌شی دُوطلب گِتمک اوچون، اؤزونه ایکی ایل معاف‌لئق وِریلیر.

 

بللی اُلدو کی ایبیش ده، بیر آیرئ یُلداشئمئز دا، البته هره‌ اؤز بیلدیگی بیر سببه، دُوطلب یازئلئب‌لار. آمما منوش یُخ. منوش کؤکونده‌ن ایسته‌میردی سرباز گِده.

اُ گون سحر ساعات آلتئ‌دا باغشاهدا بیزیم نومره وئرئلمئش اعزام کارتلارئمئزئ ده‌ییشدیلر. نی‌یه‌سینی بیلمه‌دیک. هر ایلین گؤردویو ایش بِله ایمیش کی، مین نفر سرباز ایسته‌ینده (البته دیپلُمو اُلانلارئن، عادئ سربازلارئ یِرلی دیبلی گؤتوره‌ردیلر)  قاباقجا دُوطلب‌لری آیئرئب، سایئب مین نفرده‌ن اسگیک گلمیش سایا پوشک آتئب تاپاردئلار و قالانلار پوچ چئخئب معاف اُلاردئلار.

 

آمما بو ایل بیزلر صفه دوزولنده‌ن سُرا دِدیلر دُوطلب گؤتورولمه‌یه‌جک. و قورعه چکمه‌یه باشلادئلار. منیم تبریز کارتئمئن  دیب عده‌دی اوچ ایدی. آمما تازا کارتدا ده‌ییشیلمیشدی، داها اوچ دگیلدی.. افسرلر نومره یازئلمئش داشلارئ قوتویا تؤکوب چالخالادئلار و بیرینجی نومره‌نی چئخاردئب اُخویاندا اوچ سسی میدانئ بورودو. هامئدان، برک هورا سسی قُپدو. منیم قاباقکئ کارتئم قالسایدئ ایلک آلتئ یِددی یوز نفرده‌ن بیری اُلاجاقدئم. ایبیش و اُبیری یُلداشئمئز دا منیم تایئم. دُوطلب اُلمایان منوش بیرینجی نومره‌ده سرباز دوشدو. دا هارا یِتیشه‌جاق. ایلانئن یارپئزدان زهله‌سی گِده‌ر،‌ اُ دا گله‌ر یوواسئ‌نئن دیبینده بیته‌ر.

بولارئ میدانئن آراسئندا صفه دوزوب گؤز قاباغئندان اوزاقلادئب و قالانلارئ ایکی نومره‌لی و اوچ نومره‌لی قورعه ایله سِچیب، کسری قالانا دِدیلر کارتلارئ گتیرین مؤهورلمه‌یه.

دا ایندی گِجه‌نین قره‌نلئغئ دوشموشدو، میدانئن قئراغئندا بیر نِچه میز اوسته ایشئق سالماق اوچون قُیولموش یانئق زنبورولار قاباغئندا باساباس دوشدو، و آخشام ساعات سکگیزه یاخئن کارتئمئزا پوچ یازئب مؤهورله‌دیلر. و اُنو قاپئدا دوران نظامئ‌لارا گؤرسدیب چئخدئق.

 

منوش اِله اُردان سرباز گِتدی و ایکی ایل قالمالئ اُلدو.  بو آرادا بیز منوشو گؤره بیلمه‌دیک.

من تبریزه قِییدیب پوچ کارتئ منطقه‌یه آپاردئم معاف‌لئق کارتئ آلام. بللی ایدی کی، رئیس گؤرمه‌میش معاف‌لئق زاد اُلمازدئ. سرهنگ عطابخش منی گؤروب پوچ کارتا باخدئ و دِدی قُی سنه بیر سؤز دِییم. سیز ایکی قرده‌ش غریبه بیزه دُققوز قُیدوز. دِدیم اختیارئز وار جناب سرهنگ، اؤزلری دُوطلب ایسته‌مه‌دیلر. بیزیم بیر دُققوز قُیماغئمئز اُلمایئب کی. دِدی قُی هله قالسئن گؤروم. من ده اِله بیر یُل‌لوق قُیدوم قالدئ. هِچ واخت دالئسئجا گِتمه‌دیم. اصغری ده، معلم‌لری سربازلئقدان معاف اِتمه قانونو بیریُل‌لوق قورتاردئ و سرهنگ دانئشان دُققوز قُیما بیتدی.

 

نِچه ایل سُرا، گونلرین بیرینده، بیر ایش اوچون ساعات قاباغئندا  ثبت اداره‌سینه گِتمیشدیم، دهلیزده باش منیم باش منوشون. چُخ سِویندیم. اؤپوش گؤروش. منوش سن بوردا نه عجب؟ دِدی بوردا ایشلیره‌م، نه ایشین وار؟ دِدیم بس بِله. منی آپاردئ بیر  اُتاغا، و اُرداکی ایشله‌ین جوانا دِدی بو منیم مدره‌سه یُلداشئم‌دی ایشینی تِز یُلا سال. سُرالار منوش بیر تُسباغا فولکس واقن آلمئشدئ و منی خیاواندا زاددا گؤره‌نده گؤتوروب آپاراردئ. آمما گؤروشلریمیز بِله تصادوفی زادلارا باغلئ ایدی.

 

ایبیشی آمما باغشاهدان چئخاندا دا گؤرمه‌دیم. همی قاپئ قاباغئ برقابا بنده‌ر قابا، جوانلارئن آتاآنالارئ، همی ایچه‌ریده نِچه مین جوانئن ازدهامئ بیرینی تاپماغا چُخ یُل وِرمه‌زدی.

دِمه‌به ایبیش کنکورا قُشولوب یا قُشولمامئش، آلماندا اُخوماغا گِتمیشدی. دا من، و بِله بیلیره‌م منوش دا ایبیشی بیر یُل‌لوق ایتیرمیشدیک. من منوشو آیه‌مده سایه‌مده گؤره‌ردیم آمما ایبیش هم شهرده‌ن هم ده اؤلکه‌دن گِتمیشدی و آلماندا نم هانسئ شهرده، نم هانسئ دانشگاهدا، نم هانسئ درسی اُُخویوب، قِییدیب گلیب تهراندا آب کره‌ج آدلانان و سُرالار الیزابت بولوارئ اُلان یِرده وزارت کشاورزی دامداشئندا ایشله‌ییرمیش. بیزیم ده، تبریزده اُتورموشوق اُنون هِچ بیر زادئندان خبریمیز یُخ.

 

بونلار بو ساده‌لیکده کی یازئرام اُلمامئشدئ. سعدی مدره‌سه‌سی، دالئسئ دیپلُم، سربازچئ‌لئق قضیه‌سی، درسین دالئسئنئ توتماق و هابِله، آیلارا، ایل‌لره باخمئشدئ. هره بیر یاندا، هره بیر چالئشمادا. ایل‌لر بو تهر گِچدیگی ایله، مین اوچ‌یوز اُتوزلاردان، مین اوچ‌یوز اللی‌لرین یارئسئنا چاتئب، اُنو دا آشئب مین اوچ‌یوز اللی یِددی اُلموشدو. مین اوچ‌یوز اللی یددی. اُلدوغوموز، گؤردویوموز، یاشادئغئمئز اللی یِددی.

 

بیر آخشام اِوده ایدیم تلفون زنگ چالدئ. گؤتوردوم. - ممدعلی اؤزون سن؟ ددیم هن. دِدی من منوش. - منوش گون هایاندان چئخئب؟ دِدی گله‌رسن دییه‌ره‌م. ایبیش گلیب اُتورموشوق سنی گؤزلوروک. هاردا؟ هتل اینترناش‌دا. ایبیش دوشن هتل‌ده آشاغئدا سالُن‌دا اُتورموشوق. یِیین گل.

اِوده دِدیم : بالا من گِتدیم، شاما گؤزله‌می‌یین. گِدیره‌م اینترناش‌دا ایبیش‌له منوشو گؤره‌م.

 

گیردیم ایچه‌ری. بؤیوک سالُنون بیر یانئندا بولارئ تاپدئم. اِله بیل سعدی‌ده کلاسدا اه‌یله‌شیب‌لر.

اؤپوش گؤروش. ایبیش ایگیرمی ایل دی سنی گؤرمه‌میشم. دِدی منوش دا سنین تایئن. من ده سیزین تایئز. بِله‌نچی بیر زمان آدام بیلمیر هایاندان باشلاسئن.  قارسُن دا دالبادال «بِک‌لری» گتیریر. بیر آزدان باخئر، قاشلارئن قُوزایئر. من دن منوش دان باش اندیریریک. گِنه ده گلیر. اِله بیل قارسُن دا دویوب کی، بِله بیر زادئ لاپ یاخئن گله‌جکده داها اِده بیلمه‌یه‌جک.

دا ایندی منوش‌لا من تبریزده‌ییک، ایبیش تبریزه قُناق. قُناغئن بُرجو سؤزه باخماق، بیزیم ده بُرجوموز قُناغا قوللوق.

اوچ دؤرد ساعات دانئشدئق،  نه‌لر دِدیک، نه‌لر اِشیتدیک؛ دانئشدئقجا دا میزین اوستو دُلدو و بو نِچه ساعات دانئشئقلاردان یادئمدا قالانئ ایبیشین تهراندا اُ بولواردا اوجا دامداشئن دؤرد بِشینجی مرتبه‌سینده اُتاغئ آدرسی دیر.

آز قالئردئ قره قره‌نی مینسین، ایبیش دوردو قالخدئ اُتاغئنا کی، سحر طیاره ایله تهرانا قِییتسین. منوش دا منی میندیریب فولکس واقئنا گتیردی اِوین قاباغئندا سالدئ و اؤزو گِتدی اِولرینه.

 

ایکی آی سُرا من دانشگاه‌دا ایشیمه قِییتمیشدیم. هله هِچ یان هلهله‌دن ولوه‌له‌دن دوشمه‌میشدی.

اداری بیر ایش اوچون منی تهرانا یُل‌لامئشلار. آرادا ماشئن توتوب بولوارا گِتدیم. اداره‌ده بوتون آیرئ یِرلر کیمی گل گِت، فُقول کراوات آزالئب، سققل‌لر ایکی گونلوک‌دن بیر هفته‌لیگه کیمی کُریدورلاردا گؤزه چالئر.  اوچ دؤرد اُتاغا باخدئم . بیر ایکی آدامدان سُروشدوم. دیبده بیری منی آختاران کیمی گؤروب سُروشدو آقا نه آختارئرسئز؟ دِدیم بو نم‌ده بو نیشان‌دا بیر آدام. بیر باخدئ، بیر آز دوروخدو و دِدی هن اُ.... دا بوردا دگیل.  اُ  اُغلان نه بیلیردی کی من بیلمه‌دیم.

 ایبیش نه اُلموشدو؟ پاکا چئخمئشدئ؟ بو تِزلیکده؟ نی‌یه؟ نه اوچون؟

 

ایبیش بو یُل دُغرودان و بیر یُل‌لوق ایتمیشدی.  اُ  ایگیرمی ایلده‌ن سُرا، بیر یُل بولوت آلتئندان چئخان آی کیمی، اؤزونو گؤرسدیب، گِنه بولوت دالئسئنا چکیلیب باتمئشدئ. هِچ آیرئ بیر آدرسیم ده یُخ ایدی.

نه اُلدوسونو بیلمه‌دیم.

اِله بیل دا هِچ واخت بیلمه‌یه‌جه‌یم !

آخ نِجه  گؤیلوم ایسته‌ردی بیر ده گؤره‌م بیله‌لرین. بیر یِنی‌یِتمه‌لیک، گنجلیک تاریخینی بیر ده دانئشئب ازبرلمه‌سینی....

 

ممدعلی