باشین ساغ اولسون آذربایجان!

ایشیق

یاییلان خبرلر اساسیندا آذربایجانین گؤرکملی ملی شخصیتی و ائل آراسیندا «حسن آذربایجان» آدی ایله تانینان حسن هرگلی(دمیرچی) تیر آیی‌نین اوچونجو گونو تبریز شهری‌نین عالی‌نسب خسته‌خاناسیندا حیاتا گؤز یومموشدور. آذربایجانین اونودولماز شخصیتی خرداد آیی‌نین ۱۳-یندن صحتی ایله باغلی پرابلئملر سببیندن خسته‌خانایا دوشموشدور.
۱۳۲۰-نجی گونش ایلینده تبریز شهرینده آنادان اولموش «حسن دمیرچی» آذربایجان مدنیتی و ملی وارلیغی اوغروندا اوزون ایللر چالیشیب و بو یولدا مختلف اذیت‌لره و تضییق‌لره معروض قالان شخصیتلریمیز سیراسیندادیر.

او ملی ده‌یرلریمیز و اینجه‌صنعتیمیزین یورولماز کئشیکچی‌لریندن اولموش، ۱۳۶۵-نجی ایلدن تبریزده «آذربایجان» آدینا موسیقی مکتبی آچمیشدیر. بو مکتبده یوزلر گنج قیز و اوغلان آذربایجان موسیقی صنعتینده اؤز استعدادلارینی چیچکلندیرمیش و وطنیمیزین صنعتکار اوغول و قیزلارینا چئوریلمیشلر.
اوستاد «حسن آذربایجان» اوزون ایللر آذربایجان موسیقی ساحه‌سینده الده ائتدیگی تجروبه‌لرینی اؤز شاگیردلرینه کؤچورمک مقصدی ایله «آذربایجان موسیقی مکتبی» آدلی ده‌یرلی کیتابینی یازمیش و اونو آذربایجان اینجه صنعت خزینه‌سینه بخش ائتمیشدیر.
«ایشیق» – آذربایجان ادبیات و اینجه صنعت سایتی، آذربایجانین گؤرکملی ملی شخصیتی، اجتماعی و مدنی فعالی و عؤمرونون بؤیوک بیر حصه‌سینی ملی وارلیغیمیز و اجتماعی – مدنی ده‌یرلریمیزین قورونوب ساخلانیلماسیندا صرف ائده‌ن اوستاد «حسن هرگلی(دمیرچی) نین ابدی آیریلیغینی آذربایجان خالقینا، مؤحترم عائله عضولرینه و دوست – تانیشلارینا باش ساغلیغی وئریر و آذربایجان اوغلونون شرفلی خاطیره‌سینه «عشق اولسون!» دئییر.

«ایشیق» – آذربایجان ادبیات و اینجه صنعت سایتی
۰۳/۰۴/۱۳۹۷