بِله «مال» اُلماز…… !

احمد رحیمی‌

آنادلونون چرقتلی کندلی‌لری و اُلارئن ارلری تورکیه‌نین بیرینجی دونیا ساواشئند ا میلیونلارلا اینسان اؤلومو و سایسئز حسابسئز گولـله و بُمب ایچینده ایتیردیگی خلیفه‌لیگی، بیر تک گوللـه آتمامئش بیر داها دیریلتمه‌یه موفق اُلدولار. ایندی اوروپا بازارئ سهل دی، بیزیم دوه‌چی بازارچاسئ یُلو  دا اُلارئن اوزونه آچئقدئر. هانسئ بازارا ایسته‌رسن گیر، ایللاه دا اؤرتولو بازار !ا. هله هاراسئنئ گؤرموشوک، بو، ایشین باشلانئشئ دئر. قُی یِنی خلیفه عباسئنئ چیگنینه سالسئن و یِنی تورکیه ایشه باشلاسئن اُندا گؤره‌جه‌ییک هانسئ شاهئن، باغئشلایئن  هانسئ خلیفه‌نین  دؤرانئ دئر : خلیفه الامستأصل بیللاه، یا المستملک بیللاه، عبدولطیب یا رجب دوانیقی؟

آمما پیر اُلسونلار اسلام لاپ الده‌ن گِت هاگِتده ایدی. بو«داعش» یا «ایزیس»حضراتنئ عرض اِدیره‌م ها ! بللی دگیل هانسئ داش آلتئندان چئخئبلار اؤزلرینی خلیفه دیکه‌لدیرلر. بوردا بیزیم یاووز سلیم‌دن بویانا  قان وِریب ساخلادئغئمئز خلافتی اُ فیلان فيلان شوده آتاتورک یوز آلتئن خساره‌ت آلمامئش غرب ایمپریالیست‌لرینه قوربان وِردی. یازئق تورک ملتی- باغئشلایئن تورک اوممتی- دُخسان ایل قانئ گِتدی ایچه‌ری آمما قول‌لوغوندن ال چکمه‌دی، نِجه کی قول یارانمئشدئ اِله ده دایاندئ. کیشی ده سؤز بیر اُلار. ایندی بی یُل داعش گِتسین آشئق اُیناماغئ‌نئن دالئسئجا. تؤکمه‌ییبلر کی یِرینده‌ن دوران خلیفه اُلا. گده نه استانبولدا بلدیه رئیسی اُلوب، نه آنکارادا باشا باکئب یانئ باش باکان اُلوب، آنجاق سققلینی اوزادئب، بیرده‌ن بیره بانلایئر کئ من خلیفه‌یم.دا بیلمیر کی بوردا عبدولطیب دیر باغداددا کُر خلیفه.

یِنی تورکیه‌ده آروادلارا باش اؤرتویو، کیشیلره فس، روتبه‌لی‌لره قُتازلئسئ، وزیرلره  یا اوزد‌ه‌ن ایراق باکانلارا گِِجه‌لر سیلیندیر بؤرک گونوزلر سوموکسوز اجباری اُلاجاق. جماعت نامازئنا گلمه‌ینلره سماواردان قاینار سو آچئلاجاق !بوتون کیلیسه‌لر موزه اُلاجاق، بوتون مچیدلر سوپرمارکت. کوپن آل وِری اوچون.اوستانبولون جمعیتی اللی میلیونا قالدئرئلاجاق. بُش قالان یِرلرین هامئسئ گونه باخان اکیله‌جک. اؤزون چئرتلایئب، یاغئنئ پیشمیشده، قابئغئنئ اُروجلوق گِجه‌لری اوچون رشته ختایی پیشیرمکده یاندئراجاغئق. هر تورکیه‌لی‌یه چئراغ قاز حزبینه رأی وِردیگینی «سِچیم» کارتی ایله ثابیت اِده بیلسه، یا اوزونده اُن یِدی گونلوک سققلی اُُلسا، آروادلار ایسه آدلارئنئ یازا بیلمسه‌لر، اِوده اتی یاندئرماسالار، یا ارین راضئلئق کاغازئ ایله بهشتده ایکی اُتاق بیر دهلیز وِریله‌جک. اُردا (بهشتده) یِر اسگیک گلسه باساباس سالماق لازيم دگیل، ملاکه‌نی حیرصلندیرمه‌یین. وجهینه استانبولون یا آنکارانئن بلدیه‌سینده سوپورگه‌چیلیک وظیفه‌سی وِریله‌جک.

اوروپا بازارئنا فوری بیر اولتیماتوم وِریله‌جک : اگر یِتمیش دُققوز ایله کیمی تورکیه‌نی نِجه کی وار- باشئندا فس، بِلینده چوبوق،  اُُمباسئندا یوک- بازارا قبول اِتمه‌سه، منم سن. بیر ده باشدان اولتیماتوم وِریله‌جک بو یُل مدت‌سیز، آخئ حافظ افندی دِییب کی : «از ازل تا به ابد فرصت درویشان است» بیزیم نه‌ییمیز درویشلرده‌ن اسگیک‌دیر؟.

یِنی تورکیه اِله اُلاجاق کی، حتا رحمتلیک عثمان، عربلرین عثمانئ یُخ، تورکلرین عثمانئ اؤزو ده بو آرزودا اُلاجاق کی، کاش من ده بو دوراندا اُلایدئم، خلیفه یُخ، لاپ اِله قره فهله اُلایدئم آمما بو خلیفه‌نی درک اِده‌یدیم. یاووز سلیم آرزئ اِده‌جک بو خلیفه‌نین اُغلو اُلوب اُنو اؤلدورمک‌له یِرینه اه‌یله‌شمک‌له جمیع ماتئشقانئ اُ جومله‌دن ایلده اُن میلیون دلاردان آرتئق قازانان «تاپ مدل»‌لری یئغئب حره‌مخانایا گتیریب فحشانئن قاباغئنئ آلماق ایسته‌یه‌جک.

بو البته اؤزلویونده «قلوبالیزیاسیون» دؤرونه لایق بیر ایش دیر. باخ گؤر نِجه‌کی پولو هره‌یه بیر آز وِرسن اِله الیم خمیر قارنئم آج اُلاجاق. آمما بیرینین الینده اُلاندا گؤزو بیر زاد گؤره‌ر، حتا احسان زاددا وِره بیله‌ر. هر اِوده یا مؤسسه‌ده بیر گؤزه‌ل اُلسا، آنجاق بیر گؤزه‌ل دیر. آمما بیر یِره یئغئشاندا گولوستان اُلور.حره‌مخانا دِدیگین ده اِله بو گولوستانئ دُغرولتماق دئر. بس نه هارون‌الرشیدی نه ده عبدالحمیدی قئنایئن.

هامئ بِله بیلیردی کی موٓژیک آنجاق روسلاردا وار، نیقالای گیلین بُشقاسئندان چئخمامئش باسدئلار شورا بُیاق کوپونه بلکه قئزئل رنگه بُیانا. یِتمیش ایل بو کوپده قالاندان سُنرا، قاپ قارا چئخارتماق هامان تپیلدی قاباقکئ یِرینه. آمما بونون قولاغئناعثمانلئ خلافتینده‌ن سُنرا دُخسان ایل مدرنیسم، تورکلوک،  فیلان بهمکان اُخودولار؛ اُغورلوغا، دُغورلوغا، مال یِمه‌یه، روشوه‌ته بیرجه دستمازئن قارشئسئندا عفو قلمی چکدی. بیر تورک بیر دونیایا بده‌ل دیر، نه موتلو دور تورکوم دِیه‌نین، یازئغئن دیلی اوجوندا توک بیتدی، دیبده ده بیر «بسازبفروش»وئردئ هامئسئنئ جالاتدئ.. آلماندا یاشادئ اوممت قالدئ، آمریکادا قالدئ اُندان دا بته‌ر. آللاه وِرسین برکت بِله ده خاصا مال تاپماق اُلار آیرئ یاندا؟ سؤز اُردا دئر کی، آتا، عصمت، خلیل، قره بکیر….. هامان بو آنادُلودا عثمانلئ‌نئ بودارلایانلارئن قارشئسئندا دایاندئلار، تاریخین مئرتئنا باخ، موفتولرین قُشونو هامان بو آنادلودان گلیب قاباقجا استانبولو، [قسطنطنیه‌نی دِمیره‌م] بلی استانبولو فتح اِدیب اُرادان آنکارایا اوز توتموشلار. بو، سلطان محمد فاتحین فتحینده‌ن بؤیوک بیر فتح دیر. اُ روملاردان آلدئ، بولار «موتلو تورکلرده‌ن». یِرده ن گؤیه جان فرقی وار. اُ پاشالار عربی آدلارئ اُلدوقدا دینده‌ن سیاستده‌ اوزاقلاشماق ایسته‌دیلر. آتاتورکون گؤستریشی ایله تورک‌لشمیش آد داشئیان گول، گولن، ار دُغان، آسلان بُغان، داش دمیره دؤنمک ایشینده اُلان بو موفتی‌لر قُنشولوقدا اُلان شعارئ سس‌سیز سُوسوز گتیردیلر ایچه‌ری : بیزیم دیانتیمیز و سیاستیمیز عینی دیر.

یادئما گلیر بیر نِچه ایل قاباق فاتح محله‌سینده قاباقجا گؤرمه‌دیگیم زادلارئ(چرقتلی‌لری، بوتون محله‌ده آرواد پارچا ساتانلارئ، بارماقلا بیر کیشی بزاز گؤرستمه‌یه تاپئلمادئغئ….کیشی نه دیر پارچا ساتما نه دیر؛ بورا تبریزین قدیم امیر بازارئ دگیل کی بیر آروادا بزازلئق اِتمه‌یه یُل وِرمه‌سینلر. اوروپا بازارئنا گیرمه‌یه حاضئرلئق گره‌ک آخی، یا یُخ؟ ) گؤره‌نده یازمئشدئم : بیلمیره‌م فاتح[محله‌سی]  استانبولو دؤنده‌ره‌جک یا استانبول فاتحی؟ ایندی شست ایله دمک اُلار  کی، فاتح استانبولو اُتوب اُتوروب.

خلیفه‌لیک، سلطانلئق لوازمینده‌ن بیری ده عباره‌ت دیر بؤیوک بیر مچید سالدئرماقدان. ایکی چتینلیک وار. بیری استانبولون هاراسئندا. ایکی هانسئ آدلا؟ رجبیه؟

اردوغانیه؟ یا...؟ بوندان باشقا پایتختین دینسیزلرین ده‌ییشدیردیگی یِرده‌ن گتیریب خلیفه‌لیک یِرینده قورولماسئ قارشئدا دورور. آتاتورکون بؤرکو، کورکو آتئلاندا سِچدیگی یِری ساخلاماق نه‌یه گره‌ک دیر؟یهودیلرین اورشلیم یا بیت‌المقدسین اوستونه باشدان ال قُیمالارئ کیمی، اسلام خلیفه‌سینه سُن بش یوزایلده خلافت مرکزی اُلدوغو یِره قایئتماسئ واجیباتدان دئر.

ایندی یاخئن شرقده کی اوچ بؤیوک غربی دینین:یهودی، مسیحی، اسلام چئخدئغئ یِردیر بونلارئن بوتون چِشیدلری گؤز قاباغئندا دئر : افغانستاندا طالب‌لر، ایراندا غالب‌لر، عراقدا سالک‌لر و هالک‌لر، تورکیه‌ده مالک‌لر، مصرده ذالک‌لر،  عربستاندا حارص‌لر، لیبی‌ده پاریس‌لر، چچنستان‌دا تاواریشلر،…..آدام حیران قالئر آللاهئن ایشلرینه..  بونلارئن هامئسئنئن گؤیونو ابابیل قوشلارئ کیمی آمریکا اؤزو  اداره «ادیور»، هرده‌ن ده باشئ قارئشئق اُلاندا اسرائیله زحمت وِریر و البت کی فوق‌العاده‌سی یاددان چئخمئر.یادئندان دا چئخسا کیمی‌نین بیرچه‌یینده‌ن، کیمی‌نین اته‌یینده‌ن آسلانان فئر توک یا بُیلوق-روتبه‌نی بیلدیرمک اوچون- آسئلانلار غزه‌نی بُمبا دُلارلا کی بیزیمکی قالئر.  یِرده ده اُ  وِردیگی سیلاحلارلا – هامئنئ بیر گؤزده گؤرمک نیتی ایله، چون پولو خلیج فارس حوزه‌سینده‌ن اِِشیکده‌ن گلمیر- چال چاتلاسئن. گؤر بی یُل بو شولوغا شولوقدا بیر خلیفه لازیم ایمیش یا یُخ؟ .بیربِله اوممتی دُلاندئرماق کی، هِچ بیری ده اُبیرینی گؤرمه‌یه گؤزو یُخدور نه چتینلیکده بیر ایش دیر. گِنه ساغ اُلسونلار تورکیه اوممتی کی چتینیمیزی هاسادلاتدئلار. تبریزده دِییلن کیمی آللاه بولارئن باشئنئ قُیوب آیاغئنا داش سالماسئن. آمین.

بِله کی بوسُن گونلرده غرب «داعشی» بودارلاماغا سازالانئر؛ ُ دینجه‌لمه‌یی، یارئمچئلئق قُیوب، آرواد اوشاغئ غوربت ولایتده باشسئز بوراخئب پایتخت‌لره اوز توتان، ماشاللاه هامئسئ دا قُوورمالئق اُلموش رهبرلر تله‌سیک، اِله کی مخبرلر ده خبرسیز قالماسئن، اؤزلرینی طیاره‌لره یتیریرلر آدام هویوق قالئر کئ، بولار کی بونو بو تِزلیکده یِره چالاجاقمئشلار نی‌یه دوزه‌لتمیشلر؟ به‌یه قرار اُلمامئشدئ کئ بولار حافظ اسدین اُغلونو قذافی‌یه  تای اِتسینلر؟ یا ایندی شیعه‌لرین ایشی علوی‌لرده‌ن واجیب دیر؟ خیام بولارئ دِییرمیش کی : این کوزه‌گر غرب چنین جام لطیف؛ میسازد و باز برزمین میزندش؟ اُندا آدامئن هامئدان آرتئق اوره‌یی بو یازئق حافظ اسدین اُغلونا یانئر. یِنی خلیفه باش باکان اُلاندا اُنون رد اُلماسئنا بویروق وِرمیشدی. آمما اُ اِله اوز چئخارتمئشدئ کی، بیر ده باشدان اؤزونو سِچدیردی. ایندی گره‌ک اُنون آیئ چئخمئش اُلا.گِجی تِزی وار. دا بونو داغئتماق اوچون دوزه‌لمیش بیر اسبابی بِله کوته‌لتمه‌یه چالئشاندا گؤر بونون اؤز باشئنا نه اُیون گتیره بیله‌رلر. اُراجان کی کوردلره هر جور آغئر سیلاح وِرمه‌یه ساباخ بِواخت‌ اُلور گره‌ک بو گِجه گؤنده‌ریله‌نی اِشیده‌نده، بو یاخئن - اوزاق کِچمیشلرده بیر آیرئ یِرده «سپاه پاسداران را با سلاح سنگین مسلح کنید» شعارئ آدامئن یادئنا دوشور.‌آدامئ گولمک توتور، بِله ده ایش اُلار؟ آمما آدام اُغلو چیی (چیگ)سود اممیشدیر، اؤز اِله‌دیگی غلطده‌ن درس آلا بیلمیر. هله فرانکنشتاین‌لا ایشیمیز یُخ، طالب‌لر کی گؤزوموزون قاباغئندا دئر، یاسر عرفاتئن قاباغئنا کیمی چئخارتدئلار؟ خرجینی کیم وِردی؟ فلسطین نه گونه قالدئ؟ گویا بولارئ برغرض بِله اِدیرلر کی، بیزی یاهالتسئنلار. آخئ بیز همیشه دِمیشیک کی، هر زاد بو تولکو اینگلیسین باشئ آلتئندا دئر. بویور بو دا سنین تولکون. اُمباسئنئن توکو تؤکولموش بیر قارقا دا تاپا بیلمیرکی پنیرینی قاپسئن. آمما خلافت مقامئ بونو نِجه یاسالایاجاق؟ -چتین. قُرخمایئن بِله مورودلری اُلانا زاوال یُخدور.-اِله؟ !

بیر ده سیز اؤز هایئزا قالئن. هِچ اُلماسا بونون آدرسي، بیر نِچه آپارتمانئ، بیر آز بانکلاردا پولو و آیرئ خئرئم خئرداسئ، گمیسی زادئ وار، فوتبول اُینايئر، اؤزو ده اوچ قُل وئرئر، و عبدوللا گولو گؤنده‌ره‌جک گولبازلئغا، «گولنی»آغلاداجاق، کوچه‌ده هئرئلدایان آروادلارئ یِرینده اُتورداجاق، نظامئ‌لارئ گؤنده‌‌ره‌جک «بکً یا آللاه» اُخوماغا، اوجالانئ دئرماشدئراجاق داغئن باشئنا کی، لاپ اوجالسئن و...و...و...یِنی تورکیه کی اُلاجاق هِچ، حتی یِنی بیر دونیا دا اُلاجاق.

آللاه بیزیم کؤمه‌ییمیز اُلسون، ایللاه دا من احمد رحیمی‌نین.