Aug 3, 2014

غزه

محمدحسین طهماسب‌پور- شهرک -
اودون قویان کیمدیر، اود ووران کیمدیر
آنجاق اود ایچینده یانیرسان غزه!
یایین ایستی‌سینده برقین، سویون یوخ
قیشین شاختاسیندا دونورسان غزه!
نه وقت آبادلاشار ویرانه‌لرین
یاندی عاشیقلرین، دیوانه‌لرین
جان وئریب سئوگیلی پروانه‌لرین
شمع تک ارییب سؤنورسن غزه!
اود آلو ایچینده یانیرسان غزه!
داغ ـ دره‌ن قدغن، هاوان قدغن
درمانین قدغن، داوان قدغن
فریادین قدغن، دعان قدغن
کؤزه‌ریرسن کوله دؤنورسن غزه!
اود آلو ایچینده یانیرسان غزه!
باغلانیب نامردجه سو، چؤره‌ک یولون
آیاغین کونده‌لی، باغلی‌دیر قولون
کسیرلر باشینی، کسیرلر دیلین ـ
اگر دیلله‌نیرسن دینیرسن غزه!
اود آلو ایچینده یانیرسان غزه!
نیازیوا نئجه یول تاپسین کؤمک
سنه سؤز نه لازم، شعار نه گره‌ک
آنادان مهربان دایه‌نه دئمک
هامیدان یاخشی سن قانیرسان غزه!
اود آلو ایچینده یانیرسان غزه!
بیلمیرسن آی، گونون، ایلین هاردادی
لبنانین، میصیرین، نیلین هاردادی
هاردا او میلیاردی ائلین هاردادی
تاپدانیب، یونتانیب سینیرسان غزه!
اود آلو ایچینده یانیرسان غزه!
آللاه آدام اولار نه وقت بو بشر
هاچان آیدینلاشار خییریله شر
نه وقت انسان حقلی انسان تک یاشار
هاچان حقوقونا دؤنورسن غزه!
اود آلو ایچینده یانیرسان غزه!



No comments: