اوزومه بیر سو چیله دیم. کاغاذ دستمال ایله اوزومو، دوداقلاریمی سیلیب، تمیزله دیکدن سونرا بیرده سو ایله یودوم. قطارین توالتینین کیچیک گوزگوسونده بیر داها اؤزومه باخدیم. دوداقلاریم تر- تمیز ایدی. اوزومده ده بویا دان هئچ ایز بئله قالمامیش ایدی.
گون باتانا آز قالمیش کؤلنه یاخینلاشدیغیمدا ایچیمی بیر قارامسارلیق (بدبین لیک) دولدوردو. بو شهرده یاشادیغیم، یاشامیمین ان اؤنملی دؤنمینی اولوشدوران، ایکی ایل ایچینده باشیمدان کئچنلرین هامیسی بیر آرادا اونودولموشلوقدان قورتولوب، قارانلیق و آنلاشیلماز بیر بیچیمده گؤزومون اؤنونو قارالتدی. باشیم گیجه للندی، اورگیم بیر آز بولانماغا باشلادی. منه نه اولدوغونو او آن آنلایابیلمه دیم، "هاوا دگیشیکلیگینین ائتگیسی دیر" دییه اؤزومو اوغوندورماغا، تسکین وئرمگه چالیشدیم. آنجاق آلتی ساعاتلیق یولون یورقونلوغوندان تسکین فیلان ایله قورتولماق ممکن دگیل ایدی. ال چانتامی گؤتوروب، کوپه دن چیخیب، واگونون بویونجا اوزانان کریدورون سونوناجان گئتدیم. شانسیمدان توالت بوش ایدی. اؤنجه اوزومه بیر سو چیله دیم. کاغاذ دستمال ایله اوزومو، دوداقلاریمی سیلیب، تمیزله دیکدن سونرا بیرده سو ایله یودوم. قطارین توالتینین کیچیک گوزگوسونده بیر داها اؤزومه باخدیم. دوداقلاریم تر- تمیز ایدی. اوزومده ده بویا دان هئچ ایز بئله قالمامیش ایدی. قاشلاریمی الیم ایله سیغارلاییب، ساچلاریمی داراییب، باشیمین دالیندا باغلادیم. توالتین قاپیسیندان چیخارکن گئنه باشیم گیجه للندی. قطارین پنجره سینین توتاناغینی توتوب دوردوم. جامی بیر آز آشاغی چکدیم. سویوق، تمیز هاوا اوزومه وورونجا بیر آز راحاتلاندیم. جامین دالیندان کؤلنون قوجامان بیر گؤبه لگه بنزه ین تلویزیون قالا سینی گؤرونجه شهر مرکزینه یاخینلاشدیغیمیزی حس ائدیب، ائنمک اوچون تله سمگیم گرکدیگینی دوشونه رک اؤزومو تئز کوپه مه یئتیریب، پالتووم ایله کیچیک چامادانیمی گؤتوروب، کوپه نین قاپیسینین قاباغیندا ائنمگه حاضیر بیر وضعیتده دوردوم. قطار یولونون قیراغیندا سرعت ایله بیردن بیره گؤرونوب، عینی سرعت ایله بیردن - بیره گؤزومون قاباغینیدان کئچیب، یوخ اولان آغاجلار یاشامیمین عینی سرعت ایله گلیب -کئچمیش گونلرینی آنیمساتیردی. بو خارابا قالمیش دان چیخیب، گئدیگیم دؤرد ایلدن بو یاینا هر ایکی-اوچ آیدا بیر یول رحیمی، محبوبه خالا ایله قیزلارینی گؤرمک اوچون، اونلارین وئردیکلری اومید ایله گئنه گلیب، گئنه پئشمان قاییدارکن بو اوزو قارا اولموشلارین سؤزونه بیر داها اینانمایاجاغیما آند ایچمیش ایسم ده، گئنه اؤزومو آلدادیب، اونلارین اومیدلندیرمه لرینه اینانمیشام. بیر گؤزو کور اولموش گئدیب، عبدالله یا دوغرو دوزگون بیر شکیلده، " بو قیز سنی ایسته ییر" دئمگه جسارت ائتمه ییر. یالاندان منی آلداتیرلار، منه بوشونا اومید وئریرلر؛ "قیز یولداشینا، آداخلیدیر دئیه خبر گؤندردیک، موزیک گئجه سینده شعر اوخودوق، قاپیسینین آلتیندان کاغاذ آتدیق، شعر گئجه سینده آندیردیق، سون تاپدیغیمیز اوفسونچو سنین محبتینی اونون اورگینده یئرلشدیرمگه سؤز وئردی، محمد حسین ایله خبر گؤندردیک؛ عبداللة یاواش- یاواش قوجالیرسان، ائولن، بویوک قارداشینا خبر سالدیق، او راضیلاشدیرار، آیری قیزا یاخین گئدرسن تاپانچا ایله اؤلدوره ریک دئیه تهدیدائتدیک".
بو دا سون وعده، "میکائیلین تویوندا الینی الینین ایچینه قویوب، ایکینیزی بیربیرینیزه تاپیشیراجاغام". لیلانین بو سؤزونه اینانماق ایسته ییردیم. لیلا اوبیری لردن بیر آز باشقا ایدی. سؤزونده توتارلیلیق واردی. بو اینانج ایله یولا چیخمیشدیم. آنجاق وارلیغیمین درینلریندن بیر هارای چیخیردی:"یالاندیر، هامیسی یالاندیر، اینانمیرام. منی آلداتیرلار. هئچ بیرینین منه اورگی یانمیر. منی اوغوتماغا چالیشیرلار. باشدان بری هر شئی بوشونا ایدی، باشدان بری منی آلداتتیلار. چولاق اولموش یعقوب عمی ایلک باشدا، " سنی اصرافیله آلاجاغام" دئیه سؤز وئردی. پاخما لیغیمدان ایناندیم. اصرافیلی چوخ دا ایسته میردیم . آنجاق ایش او یئره یئتیشدیکدن سونرا راضیلاشمیشدیم. قالخیب، محبوبه خالا و یعقوب عمی ایله مونیخ دن بو خاراب قالمیشاجان گلدیک. اصرافیل منی گؤرونجه سئوینجیندن ال-آیاغینی ایتیردی، منی باغیرینا باسیب، یاناغیمدان اؤپدو. آنجاق ایشین جدی اولدوغونو ائشیدینجه، بیردن - بیره یوخ اولدو. توز اولوب، هاوایا اوچدو. دؤرد گون گؤزله دیکدن سونرا خبرینی بیلمیرم هانسی جهنم دن آلدیق. هاردان تلفون ائتدیگینی بئله دئمدی، " منیم ایشلریم چوخدور، بو هفته ائوه گله بیلمه یه جگم"- ی ائشیدینجه اونون دا ده ده سیندن باشقا بیریسی اولمادیغینی آنلادیم. ایشلری چوخ ایمیش، بیلمیرم هانسی دیسکودا آلمانلی قیزلارین گؤتونو یالاماقدان ائوه گلمگه زامان تاپابیلمیر ایمیش. ایلک باشدا گؤستردیگی یاخینلیق منی یالنیز بیر یول قوجاقلاماق، بیر یول اؤپمک اوچون ایدی. بئلی سینمیش یعقوب عمینین اوغلو دگیل می؟ هله بیرده اوتانمازجاسینا اؤز آنا سینا "من سنین ارینین پوخونو یویا بیلمه رم. هر زامان جبرائیلی مندن دها چوخ ایستردینیز، بو گولدسته نیزی ده اونا توتون" دئدیگینی ائشیتدیگیمده الیم چاتسا ایدی بارماغیمی سؤخوب گؤزونو اویوب، آووجونون ایچینه قویاردیم والاهی. محبوبه خالا " اولسون قیزیم، قایقیلانما، سنی جبرائیله آلارام" دئیه ساچیمی اوخشادیغیندا پیچاق ایله قارنینی سؤکوب، او اریندن آلدیغی توخوملاری نئجه سیچدیغینی اونا گؤسترمک ایسته ییردیم. جبرائیلدن سونرا دا سیرا میکائیل ایله عزرائیله یئتیشه جگینی بیلیردیم. قارنی اوت ایله دولموش منصوره خالا یددی اوغلوندان بیرینی راضیلاشدیرابیلمه یینجه، سونوندا عبدالله نی تاپدی.
کؤلنون مرکز قطار دوراغیندا ائندیگیمده اؤزومده بیر قارارسیزلیق ایله قارشیلاشدیم. گلدیگیمه بئله پئشمان اولدوم. کیمین یانینا گئدیم؟ رحیمی چوخ گؤرمک ایسته ییردیم. نه قدر غیرتسیز بیر قارداش اولسا دا، گئنه قارداشدیر. منه قارشی سویوقلوغو، منی اؤنمسه ممه سی آروادینین ائتکیسیدیر. بیلمیرم او گؤزو کور اولموش الیزابت او بویدا جوانی نه جور اؤزونه قول ائیله دی. داش اولوم دوشوم باشینا جوان، سحردن اخشاماجان حامبالیق ائله، جانین گؤتوندن چیخسین، آخشام دا ائوه گلدیگینده الیزابت خانیم اوچون ائو تمیزله، آشپزلیک ائله، اوشاق گؤتو یو. الیزابت خانیم دا سحردن آخشاما دک اوتوروب، موسیقی چالسین، تلویزیونا باخسین، گؤت- باشی ایله اویناسین، دانس کلاسینا گئتسین، یولداشلارینی قوناق چاغیرسین. اوز دوغما باجین دا، "ایکی گؤن سنی گؤرمگه گلیرم" دئیه تلفون ائتدیگینده، " دور هله بیر الیزابتدن سوروشوم گؤروم، آیری ایشی یوخدور؟ بیلیرسن من سحردن آخشاماجان توکاندایام، الیزابت ائوده دگیلسه، گلیب، بوردا یالنیز قالارسان، داریخارسان" دئییر.
"یوخ، او قارنی یانمیش الیزابتین اوزونو بیر داها گؤرمک ایسته میرم" فیکری ایله رحیمین ائوینه گئتمکدن جایدیم. "دور، گئدیب، توکاندا اؤزونو گؤروم. الیزابت خانیمی یانیندا دگیلسه منیم اؤز دوغما باجیسی اولدوغومو، ایکمیزین ده بیر قاریندان دوغولدوغوموزو بیلر" دئیه یاری کؤنوللو اون ایکی نمره لی تراموایا میندیم. تک صندللرین هامیسی دولو ایدی. قاپینین قاباغینداکی میله دن توتوب،اوردا دوردوم. ایکی نفرلیک صندلده اوتورماقدان قورخوردوم. " گئنه بیر جوان گلیب، یانیمدا اوتوراجاق، پنجره دن ائشیگه باخیرام بهانه سینه گؤزونو گؤزومون ایچینه تیکجک، اورگیمین باشی گؤونه یه جک، باغارساقلاریم دوگونله نیر کیمی اولاجاق، بیر چووالین ایچینده محبوس ائدیلمیش کیمی نفسیم دارالاجاق، بوغازیم قورویاجاق، بوتون دریم ییغیشاجاق، قؤللاریم چیگینلریمه آغیرلیق ائده جک، بؤینومون دامارلاری قوروموش کیمی سیخیشاجاق. گئنه ائسنه مه گه، ایچگیرماغا باشلایاجاغام، گئنه بارماقلاریم ایله اویناماغا باشلایاجاغام. او دا، بیر باخیشدا گول جمالینا وورولدوغومو ظن ائدیب، منی دانیشدیرماغا چالیشاجاق، "هارالیسینیز؟ هارا گئدیرسینیز؟ کؤلن ده یاشاییرسینیز؟ نه ایش ایله مشغولسونوز؟ ... بویورون گئدیب، بیرلیکده دانس ائدک". سنه نه هارا گئدیرم ایتین قودوغو، گئدیرم سیچام ده ده نین قبیرینه، شیش اوتور اوتوردوغون یئرده، اوز ایشینه باخ. بیرلیکده دانس ائتمه دیگیم بیر سن می قالمیش ایدین بو دونیا دا؟ سن کیمسن کی؟ منه اؤز عمی اوغلانلاریمدان داها می یاخینسان؟ سیز کیشیلری یاخچی تانییرام. هامینیزی تانییرام. قیزی آلتینیزا باساناجان دالیسیجا قاچارسینیز. یالوارارسینیز. " سنی سئوریرم، سنین اوچون اؤلورم، سنسیز یاشایابیلمرم، عشقی سنین ایله آنلادیم سنسیز نه گئجه بیلرم نه گوندوز..." دئیه آغلارسینیز. سونرا ایسه توز اولوب، هاوایا اوچارسینیز، زامانینیز اولماز، ایشینیز باشینیزدان آشار، باشی یوخاری جواب وئرمگه باشلارسینیز، سن ده اوبیری کیشیلردن باشقا دگیلسن... " دئیه فیکیریمدن گئچرکن بیر آن دوشوندکلریمی تراموایدا اوتوران هرکسین دققتینی چکه جک قدر اوجا بیر سس ایله دوشونموش اولدوغومو حس ائدینجه الیم ایله آغزیمی توتدوم. گؤز آلتی ساغیما سولوما باخدیم. "دوشوندوکلریمی اوجا سس ایله دوشونموش اولسام بئله، بوردا کیمسه منیم دیلیمی آنلاماز." دئیه اؤزومو ساکینلشدیرمگه چالیشارکن تراموای لوهزه اشتراسه (لوهزه خیابانی) دوراغیندا دوران کیمی آشاغی آتیلاییب، قاچماغا باشلادیم. دوشونجه لریمین بئینیمدن آخیب، بوغازیمدان یوکسه لیب، دیل- دوداغیمدا اوجا سسلره دؤنوشمه سینین قاباغینی آلابیلمیردیم، "ایت اوغلو ایتلر، نه ایسته ییرسینیز مندن، بیراخین اوز دردیمه، گئدین اوز ایشلرینیزین دالیسیجا، ایسته میرم ، گؤرمک ایسته میرم، هئچ بیرینیزی گورمک ایسته میرم..." کرئفلدر اشتراسه (کرئفلدر خیاوانی) نین اورتاسینا یئتیشینجه گوجوم توکندی، نفسیم دارالدی، قیچلاریم توتولدو، قاچماقدان یورولدوم. بوتون بدنیم تر ایچینده اوزوردو. الیمده کی دورت- بئش کیلولوق چامادان ایله نه قدر قاچدیغیمی بیلمیردیم. هارادان گلیب، بو خیاوانا یئتیشدیگیمی بئله بیلمیردیم. یاواشلادیم. قورخاقجا دؤنوب، دالیما باخدیم گؤروم اوغلان دالیمجا گلیر، یا یوخ؟ دالیمدا کیمسه یوخ ایدی. آنجاق چوخ اوزاقدان اوشاغینین الیندن توتاراق گئدن بیر خانیم گؤرونوردو. تراموایدا بیر گئنجین یانیما اوتوردوغونو، گؤزونو گؤزومون ایچینه تیکدیگینی و سونرا، " بویورون گئدیب، بیرلیکده دانس ائدک " دئدیگینی چوخ اوزاق بیر آنی کیمی خاطرلاییردیم. آنجاق بو اولایین نه زامان و هاردا اولدوغونو اؤزومه آیدینلاشدیرابیلمیردیم. هامبورگدا می ایدی ؟ یوخسا کؤلن ده می؟ دؤنوب، بیر داها دالیما باخدیم. کیمسه نین دالیمجا گلمه دیگیندن آرخایینلاشدیقدان سونرا گئری قاییتدیم. اینره کانال اشتراسه نی (اینره کانال خیاوانینی) کئچیب، اورتاسیندا بؤیوک بیر اوشاق اویناغی اولان پارکا یئتیشدیگیمده گونشین سون ایشغی آغاجلارین اوجوندان، ائولرین داملاریندان چکیلمه گه باشلامیشدی. سرین گولک آغاجلارین دیبینه تؤکولموش خزللری اوینادیردی. کیمسه نین اولمادیغی، بوم- بوش پارک اونودولموش بیر قبرستانا بنزه ییردی. قوجامان داغداغان آغاجی سون یارپاقلارینی کوله گه وئرمه مک اوچون دیره نیردی. یورقونلوقدان بیر آددیم بئله آتماغا داها گوجوم قالمامیشدی. اؤزومو آنجاق پارکین اورتاسینداکی اوشاق اویناغینین آلاچیغینا یئتیریب، تاختا پیلله لردن یوخاری چیخیب، آلاچیغین ایچینده اوتوردوم. قاشین گون باتاندان سونراکی قیرمیزیلیغی قانا دؤنموش باغریمدان دانیشیردی سانکی. اوزاقدان گؤرونن پنجره لردن تک تک ائولرده چیراغلارین یاندیغینی، گؤروب، "او ائوین تک اوشاغی اولسا ایدیم، بو ساعاتدا آتام گولر اوز ایله قاپیدان گیریب، منی قوجاغینا آلیب، "آی منیم گؤزل قیزیم، آی منیم نازلی - دوزلو قیزیم" دییه ساچیمی اوخشاسا ایدی! آتامین آلدیغی قولچاغی قاچیردیب، میطباغدا یئمک پیشیرن آناما گؤسترسه ایدیم!. آنام سئوینج ایله میطباغدان چیخیب، آتاما خوش گلدین دئیه رک اوزوندن اوپسه ایدی!" آرزولاییردیم. آنجاق پنجرلرده کی ایشیقلاری گؤردوکجه یالقیزلیق دویغوم داها دا آرتیردی، اؤزومو یاری قارانلیق، کیمسه سیز، اونودولموش بیر قبرستانا بنزه ین پارکین اورتاسینداکی ائوجیکده داها دا کیمسه سیز، داها دا اونودولموش حس ائدیردیم. ائوجیگین تاختا دووارینا دایانیب، قیچلاریمی قارنیما ییغیب، قوللاریمی دیزلریمین اوستونده چارپازلاییب، چنه می قوللاریمین اوستونه دایاییب، اوتوردوم. آغلاماغیمین قاباغینی توتابیلمدیم. آنجاق قارنیمین درینلریندن دالغالاناراق قالخیب، سینه مده هارایا، گؤزومده یاشا آلنیمدا قیریشا دؤنوشن قارا باختیمین قارالیغیندان قورتولماق ممکن دگیلدی سانکی . "یوخسا بیزیم آلین یازیمیزی قارا یازمیشلا؟" دئیه فیکریمدن گئچدی. کبری اره گئتدیگینده داها اون آلتی یاشیندا ایدی. مشدی علی اکبرین آناسی قومشوموز سلطان خانیم ایله بیرلیکده کبری نی مشدی علی اکبره ایسته مگه گلدیگی گون، نه اوچون بیزه قوناق گلدیکلرینی بیلمیردیم. او زامان داها سکگیز یاشیندا اولدوغوم اوچون هرشئیی مندن گیزله دیردیلر. آنجاق کبری نین قورخولو هیجانینی ، رنگینین ساپ- ساری اولدوغونو و قوناقلارا چای ، میوه گتیررکن اونلارین اوزونه باخمادان، بوکولوب، تیترک اللری ایله چای توتارکن ،اونلاردان نفرت ائتدیگینی، اونلارین اوزونه توپورمک ایسته دیگینی کبری نین اؤزوندن ده داها درین حس ائدیردیم. او گئجه سحره دک یاتابیلمه دیگیمی، اوزون و اییرنج خورتومونو ساغا- سولا توولایاراق منی توتوب، یئمک اوچون دالیمجا گئلن فیله بنزر قارا بیر خورتاندان قاچماق ایسترکن قیچلاریمین توتولدوغونو، نفسیمین کسیلدیگینی و ییخیلدیغیم یئرده قارا خورتانین آغیرلیغی آلتیندا بوغولارکن قابا و دویغوسوزجا گولوشونون قولاقلاریمی پاتلاتدییغینی حس ائتدیگیم قورخولو قاراباسمالاردان سویوق تر ایچینده اوزدوگومو و قونشولاری بئله یوخودان اویاندیراجاق قدر چیغیردیغیمی ایندی ده خاطرلاییرام. ایکی هفته سونراسی مشدی علی اکبر بیزه قوناق گلدیگی آخشام کبری دانیشابیلمیردی. آتامین "بله" دئدیگینی گئری قایتارابیلمه یه جگینی بیلدیگی اوچون بوتون وارلیغی ایله، "یوخ، من بو کیشینی ایسته میرم" دئیه باغیران اعتراضینی ایچینده بوغماق زوروندا قالدیغیندان چنه سی قیفیللانمیش ایدی. ائرته سی گوندن ساعاتلارجا ائوین بوجاغیندا دیزلرینی قوجاقلایاراق اوتوروب، قارا- قارا دوشوندوگونده آنام " قیزیم قورخما، عادت ائلرسن، آلتی - یئددی آی سونرا مشدی علی اکبری دونیالاردان دا داها چوخ سئوه جکسن" دئیه اؤگوت وئرردی. آنجاق کبری نین بئش آیلیق بویلو ایکن بیر سحر چاغی مشدی علی اکبرین سیلله- یوموروغوندان پاتلامیش دوداغی و قارالمیش اوز- گؤزو ایله آغلایاراق ائوه گلدیکی آلتی- یئددی آی بئله چکمدی. آتام قاینالتی سفره سینین باشیندا درین- درین دوشوندوکدن سونرا یئیب، ایچمه دن آیاغا قالخدیغیندا، اوزونو آناما چئویریب، " من ائویمده دول قیز ساخلایا بیلمرم! گؤتور بو قیزی آپار اؤتور ائوینه، ائو سؤزسوز، گور عذابسیز اولماز!" دئیب، کبری نین اوزونه بئله باخمادان قاپیدان چیخدی. آخشام گئری گلدیگینده ایسه کبری نین روحونون، یئدیگی سیچان داواسی ایله یئر اوزونده اولان بوتون باغلاردان قوپوب، گؤیلره اوچاراق سونسوز آزادلیغا قاووشدوغونو ائشیتدیگینده گؤز یاشلارینین قاباغینی توتماغا چالیشارکن، دیل دوداغی آراسیندا " آلین یازیسینا قارشی گئدیلمز" دئدی.
هاوا قارالماغا باشلایینجا گئجه نی اوردا کئچیرده بیلمه یه جگیمی دوشونه ره ک قالخیب، گئتمک ایستدیگیمده، تراموایداکی اوغلانین لوهزه اشتراسه دوراغیندا دوروب، منی گؤزله یه جگی قورخوسو بوتون وارلیغیمی قاپسادی. چامادانیمی آچیب، قارا پولیوریمی چیخاردیب، گیرده له ییب، کؤینگیمین آلتیندا یئرلشدیردیکدن سونرا "" بویلودور" دئیه آرتیق هئچ بیر اوغلان منه یاخین گلمز" دوشونجه سی ایله قالخیب، گئن- گئن آددیملار ایله یولا دوشدوم. "کیمین یانینا گئدیم؟" سوروسو گئنه فیکریمه گلدی. او دورومدا آرتیق رحیمین یانینا گئده بیلمز ایدیم. اونا دوغرودان بویلو اولمادیغیمی آنلاتینجایا قدر اون سفر باشیمی کسمیش اولاردی. یاخشی تانییرام، قارداشیم دگیل می ؟ غیرت داماری آنجاق منه قابارار. آغزینی آچیب، یعقوب عمییه، قودوقلارینا، یادا محبوبه خالایا بیر یول، نییه بو قیزین غرورو ایله اویناییرسینیز؟ نییه بو قیزی بوش وعده لر ایله آلداتیرسینیز؟ نییه بو قیزی الدن اله سالیرسینیز؟ نییه بو قیزا آد قویورسونوز؟ نییه بو قیزین گله جگینی پوزورسونوز؟ دئمگه جرئت ائتمدی ایسه ده، منی گؤرونجه غیرت داماری شاهلانار " آبروموزو آپاردین، نه زاماناجان سنه ار آختاراجاغام، سنه ار آختارماقدان باشقا ایشیم-گوجوم یوخ مو؟ کؤلنده نه وار کی هر هفته باشی قالخیب گلیرسن بورایا؟ " بو دوشونجه ایله یولومو دگیشدیریب، پارکین ساغ یانیندان بازار میدانینا ساری اوزانان دار کوچه یه گیردیم. هارا گئتمک ایسته دیگیمی آرتیق بیلمیردیم. محبوبه خالانین ایکینجی قیزی لیلا فیکریمه گلدی. قوجا دونیادا منیم دردیمی آنلایجاق بیریسی وار ایسه، آنجاق لیلا اولابیلر. گئدیب، اوتوروب هر شئیی آغدان قارایا اونا آنلاتاجاغام: "باشیما نه لر گله جگینی بیلمیردیم. یعقوب عمی هفته لرجه زور ووردوقدان سونرا "صغری نی دا کبری کیمی بدبخت ائله مه یین، بیراخین گلسین آلمانا، درس اوخویوب، خوشبخت اولسون، اونو اصرافیله آلاجاغام، بوتون سوروملولوغو منیم بوینوما، من اؤز گلینیمین دوقتور اولماسینی ایسته ییرم" دئیه آتامی راضیلاشدیردیغیندا، سئوینجیمدن قاناد چیخاردیب گؤیه اوچماق ایسته ییردیم. نه الوان خیاللار قوروردوم. نه گؤزل آرزولاردا یاشاییردیم. آوروپادا آرتیق باش اؤرتوسونون آلتیندا بوغولماق زوروندا اولمایاجاق ایدیم. یازین ایستیسینده اوزون مانتونون ایچینده تر تؤکمکدن دریم چورومه یه جک ایدی. ایکینجی درجه دن بیر انسان دگیل، هر قادین و هر کیشی ایله عینی حاقلارا صاحب اولاراق اونیورسیته یه گئدیب، اوغلانلار ایله بیرلیکده درس کلاسیندا اوتوراجاق ایدیم. قار کیمی آغ اوزون کوینگی گئییب، خسته خانادا خسته لرین یاخچیلاشماسی اوچون چالیشاجاق، یارالیلارین یارالارینی توخداداجاق، انسانلیغا یئنی جان قاتان گئنج قادینلارین دوغماقلارینا کؤمکچی اولاجاق ایدم. آنجاق سنین آتان اولان گؤزو کور اولموش یعقوب عمی منی باشقا نیت ایله آلمانا گئتیرمک ایسته ییرمیش....". " بو سؤزلری هاردان چیخاردیرسان؟ بو یالانلاری هاردان تاپیرسان؟ منیم آتاما نییه بهتان وورورسان. من آتامی یاخشی تانییرام. منه باخ بیزه بئله بهتانلار یاپیشماز. کؤنلون باشقا شئیلر ایسته ییردی ایسه، آوروپادا آوروپالی قیزلار کیمی بو گون بو اوغلانلا صاباح او بیری اوغلانلا بیرلیکده اولماق ایسته ییردینسه، بیزه نه. نییه گتیریب پوخونو بیزیم اوستوموزه سورتورسن. قالخ گئت منیم ائویمدن، منیم سنین قاراباسمالارینا قولاق وئرمگه زامانیم یوخدور. بیرده منیم آتاما بئله یالانلار یاپیشدیرماغا چالیشسان آغزینی قولاغینین دیبینه جن جیرارام.
لیلانین یانینا گئتمه گه گرک قالمادی. اونو گؤرمه دن، آغزیمی آچیب، تک کلمه بئله دئمه دن جوابیمی آلدیم. "لیلا منیم دردیمی آنلار" فیکرینین آنجاق بوش بیر خیالدان آیری بیر شئی اولمادیغی گؤزومون قاباغیندا گون کیمی آیدینلاشدی. ایللردن بری دردیمه قولاق آسیب، منی آنلایاجاق بیرینی آختارارکن، اؤزومو آنلامادیغیمی، اؤزومو آلداتدیغیمی بیر آن ایچینده باشا دوشدوم. فیکریمدن کئچنلرین دگیشدیگی کیمی یولومو دا دگیشدیردیم.
"واللاهی صاباحاجان گؤزله یه بیلمرم. کیمسه نین گؤزونه گؤرونمه دن، کیمسه نه زامان گلدیگیمی بیلمه دن، بوردان دوز عبدالله نین ائوینه گئدیب، قاپیسینی دوگوب، دیشیمین دیبیندن چیخانی سؤیله یه جگم: ایتین اوغلو آیلارجا دالیمجا گلیب، یالواران سن دگیل می ایدین؟ آیاغیما دوشوب، آغلایان سن دگیل می ایدین؟ "سنسیز یاشایابیلمرم" دئین سن دگیل می ایدین؟ "پوخونو یئه ییم" دئین سن دگیل می ایدین؟ نه اولدو ایندی ؟ نییه بو یول جن بسم الله دان قورخان کیمی منیم آدیمدان بئله قوروخورسان؟ یوخسا سن ده منی یالنیز بیر یول آلتیوا باسماق ایسته ییردین؟ مندن نه گؤزله ییرسن، بیر قیزین اوغلانین آیاغینا گئتدیگی هاردا گؤرونوب؟ آنجاق ایندی من اؤزوم گلدیم. سون سؤزون نه دیر؟ ایسته ییرسن یا یوخ...؟"
بو فیکیرلرده ایکن نه قدر زامان کئچدیگینی، هارالاردان کئچیب، گلدیگیمی، هاردا کؤینگیمین آلتینا یئرلشدیردیگیم پولیوری چیخاردیب، چامادانیما قویدوغومو و نه جور "دوم کلیساسی" نا یئتیشدیگیمی آنلایابیلمدیم. کؤلن قاطار دوراغینین قاباغینداکی ساعات اون بیری گؤستریردی. دوم میدانیندان قاطار دوراغینا ائنن پیلله لرین اوستونده اوتوران جوان قیزلارلا اوغلانلار، اللرینده کی عراق شیشه لری، ییرتیق و چیرکین پالتارلاری ایله، سیگار توسدوسوندن سارالمیش بارماقلاری و آلکولون ائتکیسی آلتیندا قیزارمیش چیرکین یاناقلاری، قولاق- بورونلارینا و دوداقلارینا تاخدیقلاری دمیر حلقه لری ایله بیربیرینین قوجاغینا گیریب، چیرک و چیرکین بارماقلاری ایله بیربیرینین چیرک و چیرکین ساچلارینی اوخشاییردیلار. "ائو سؤزسوز، گور عذابسیز اولماز" دئیه ائودن چیخاردان آتالاری، "سنی اوغلوما آلاجاغام" دئیه سؤز وئریب، آلداتان عمیلری، "قیزیم قایغیلانما، سنی اوبیری اوغلوما آلارام" دئیه تسکین وئرن خالالاری، "آبروموزو آپاردین، هاچاناجان سنه ار آخداراجاغام" دئیه باشلارینا چیغیران قارداشلاری، "سنین قاراباسمالارینا قولاق آسماغا زامانیم یوخدور" دئیه قووالایان خالاقیزیلاری و اؤنجه یالواریب، آغلایان، سونرا توز اولوب، هاوایا اوچان سئوگیلیلری یوخ مو ایدی بونلارین؟ یوخسا بونلاردا بئله بیر آتادان، بئله بیر عمی دن، بئله بیر قارداشدان، بئله بیر خالادان بئله بیر سئوگیلیدن قاچیب، ییرتیق پالتاردا، چیرکده - کثافتده، آلکول ایچیب، حشیش چکمگی، آجلیقدا، سوسوزلوقدا، زیبیل قابلاریندان ییه جک آخدارماغی، دیلنچیلیکله، اوغورولوقلا یاشاماغی و گئجه نی بوردا، دوم میدانیندا سویوق و ایسلاق پیلله لرین اوستونده سحرائتمگی اونلارین اوزونو گؤرمکدن یئی می بیلیرلر؟
قطارین جامیندان گینه کولنون تلویزیون قالاسینی ایزله یردیم. آنجاق بو یول قارانلیقدا بوغولموش قوجامان قالا اوزاقلاشاراق کیچیلیب، گؤزدن ایتیردی. کولن شهری، بو خارابادا یاشادیغیم گونلریمین، زامانین کئچیشی ایله اونودولموشلوقدا یوخ اولدوغو کیمی، ثانیه لرین آخیشی ایله کیچیلره ک قارانلیقدا گؤرولمزلیگه ساری اوزاقلاشیردی. ساعاتلارجا دوروب بو منظره یه باخماق ایستردیم. آنجاق کوپه نین قاپیسینی آچیب، ایچری گیرن بیلیطچی دقتیمی داغیتدی. بیلیط آلمادیغیمی سویله یینجه، "اولسون، اؤنملی دگیل، سیز هارا گئتمک ایسته دیگینیزی سویله یین، من اونا گؤره بیلیط یازیم" دئدی. "هارا گئتمک ایسته ییرم؟" سوروسونا جواب تاپابیلمه دیگیمدن، "بیلمیرم، هارا گئتمک ایسته دیگیمی بیلمیرم" دئدیم.
No comments:
Post a Comment