بو‌ گؤزلر‌ نه لر گؤردولر و‌ داها نه لر گؤره جکلر

س. سئیداوالی 

 

فئدرال آلمانین قاباقکی پایتختی اولان بون شهرینین یاخینلیغیندا، «رئماگئن» -Remagen آدلانان شهرده، بیر کافه ده اوتوروب شراب ایچیره م.

«رئماگئن»، فئدرال آلمانین راین‌ نهری نین‌ قیراغیندا یئرلشن آلتی بؤیوک شهر‌ و آشاغی- یوخاری آلتی یوز قصبه و‌ کندلرده ن بیریدی.

۱۲۳۳ کیلومتر اوزونلوغوندا اولان راین چایی، اروپا قطعه سینین آلتی اؤلکه سینده آخدیغی حالدا، آشاغی- یوخاری دوققوز یوز کیلومتر اوزونلوغو ایله، آلمانین ان‌ اوزون آنا نهری و‌ مملکتین آخان دامارلاریندان بیریدی. مملکتین اوکو سیستمی نین گؤزو، او جمله ده بو نهرین آخیشینا باخماقدادی.

اوتوردوغوم کافه، بورالاردا «بیرگارتن» -Biergarten- آدلانیر.

«بیرگارتن» دئدییین‌ مکان، آلماندا مختلف عنعنه وی و سنتی آبجو ایچمک یئرلرده ن بیریدی.

بو مکانین فرقی باشقا میخانالار و کافه لر ایله، یئرلشدییی یئر اولور. «بیرگارتن»، بیرینجیسی آچیق هاوادا و ایکینجیسی ممکون‌‌ قدر گؤزل منظره لی یئرده اولمالیدی.

اوتوردوغوم مکان دا، آچیق هاوادا و راین نهرینین بئش آلتی متر فاصله سینده یئرلشیبدی.

 

آتش کس ین بیرینجی گونودور.

آلتی هفته یه یاخین گئجه- گوندوز استرس، چاره سیزلیک، او بخت سیز مملکتین قئیدینه قالان هر کسی اولدوغو کیمی منی ده آیاقدان‌ سالمیشدی.

دونن‌ گئجه ده، آتش کس ین نتیجه سینی گؤزله یه ره ک، گؤزومه یوخو گیرمه ده ن سحر ائتمیشم.

آمما بیر آی دان‌ چوخ هر گون گؤزله دیییم بو خبری ائشیتدیکده ن سونرا، ایندی چوخ گؤزل آنلاری کئچیریب، دوستلاریمی دوشونوب و اونلارین یئرینی بورادا بوش گؤروره م.

دوست دئییره م، آمما منه بیر دوست دان داها چوخ یاخین انسانلاردان دانیشیرام.

بونلارین هر بیریله من‌ بیر تاریخ‌ کئچیرمیشم. بو دوستلار ایله‌ منی باغلایان، کئچیردییمیز اون‌ ایللرده ن چوخ، زندان، مهاجرت، یوخسوللوق و قورخو دولو قاچاق گونلری یاشاماق اولموشدور.

فارسلا دئمیش بو «هم دندان» دوستلاریم‌‌ ایله آی دا و یا ایکی آی دا بیر دفعه گؤروشوب، بیرلیکده یئمک یئییب، بیر آبجو و یا شراب ایچیب، دونیا و‌ مافیهادان، هاوادان و سو دان دانیشیب و بیرلیکده گؤزل ساعاتلار کئچیریریک.

اطرافیمدا اوتورانلار انسانلارین چوخو، مکانین «بیرگارتن» اولدوغونا گؤره آبجو ایچدیکلری حالدا، مشدی عباد فیلمینده «حسن بگ» ین دئدییی کیمی، من ایسه شراب ایچیره م.

شراب اعلا دی، هاوا گونشلی، ایلیخ و چوخ‌ گؤزل دی و بئش- آلتی متر یاخینلیغیمدا سس سیز و صدا سیز آخان راین‌ نهرینین لپه لری، قوموش رنگینده و اینانیلماز گؤزل و‌ محتشم دیلر.

باشیمین اوستونده ماوی گؤی ده، پشمک کیمی بولوتلار، هر شئی ده ن خبرسیز، بیربیرینین دالیسندان سوزوب، گونشه کؤلگه سالمادان، آخیب گئدیرلر.

بوتون میزلر دولودولار و اطرافیمدا اوتوران انسانلارین بیر چوخو آلتمیش- یئتمیش یاشلاری آراسیندا، آمما هامیسی شن و راحات گؤرونورلر. اونلارین‌ بو قدر شن‌ اولمالاری، بلکه‌ نئچه‌ گون دورمادان یاغیش یاغدیقدان‌ سونرا، هاوانین‌ بو قدر گؤزل اولماسینین‌ برکتلرینده ن بیریدی.

راین نهری نین قیراغیندان دوچرخه اوستونده گنج قیز و اوغلانلار، قیسا شالوارلار و تی شرت لریله کئچیرلر. بونلارین بعضی لرینین قوللاریندا و بودلاریندا دؤیولموش رنگارنگ خالدؤیمه لری واردی.

بیر نئچه‌ گنج سئوگیلی قیز- اوغلان، قول بویون نهرین قیراغینداکی نرده لره دایانمیش، غم سیز، کدرسیز سویون آخیشینی سئیر ائدیرلر.

اطرافیمداکی انسانلارین یئمک- ایچمک طرزلرینه باخدیغیمدا، اونلارین آغ ساچلارینی، اللرینده یاشلیلارا مخصوص اولان قهوه ای لکه لری، صوراتلاریندا و آنلیلاریندا کی قیریشلاری گؤردویمده، منه چوخ یاشلی گلیرلر.

آمما حیاتیمدا کئچیردییم ائنیشلی- یوخوشلی ایللر گؤزومون اؤنونه گلدییینده، بیر آن اؤزومه گلیره م:

بو انسانلاری یاشلی گؤره ن گؤزلر، ایکی آی دان سونرا، یئتمیش اوچ ایل اولاجاق کی، سویون آخیشینا، بولوتلاردان‌ یاغان یاغیشا و گونشین ایشیغینا باخماقدادیلار.

بو گؤزلر، یئتمیش اوچ‌ دفعه قیش فصلی نین یئرینی بهار فصلی نین آلماسینی گؤرموشلر و حیاتیمدان قالان ایللر و آیلاردا، داها نه لر گؤره جکلر.