Jun 14, 2020

هرکیم ایستر اؤزونو سرور ایام ائله سین.

درویش اوغلو

آشاغیداکی شعر خاص بیر موقعیتده ذهنیمه گلدی. داها دوغروسو بو شعری قان قوسار کیمی قوسدوم.
اؤزونو "مارکسیست" قلمه آلان بیر دوست ایله قیسسا بیر دارتیشمامیز اولدو. بو دوستوم، آیری دوستلاریمین بیر نئچه سی کیمی، ایگیرمی نئچه ایل آلمان اؤلکه سینده یاشادیقدان سونرا آلمانجانی نه یازابیلن، نه اوخویابیلن و نه ده دوغرو دانیشابیلنلردن بیریسی دیر. مارکسیسم ادبیاتینیدا تانینمیش بیر "حدیث کتابی" اولان "آنتی دورینگ" ه اشاره ائتدیگینده باشیمدان بیر آلوو قالخان کیمی اولدو.

- آنتی دورینگی هانسی دیلده اوخویوبان؟
- فارسی.
- بیرینجیسی آلمانجادان فارسجایا چئوریلمیش بیر مطلب بیر گؤل سویو بیر استکانا دولدورماغا چالیشماق کیمی دیر. فارس دیلینین فعلی، صفتی و آنلاتیم گوجو اولمادیغینی اؤزون یوزلرجه یول تکرار ائدیبسن.
- دودک سؤز دانیشیرسان.
"دودک سؤز" آنلاتیمی چوخ خوشوما گلدی. دئمک کی بو دا اؤزونه خاص بیر منطق دیر. بیر موضوع اوستدونده دانیشدیغیمزدا منطیقمیزین یئتمدیگی یئرده ان بؤیوک یاردیمی "دودک" دن آلماغی اؤیگرندیم. سکسن نئچه میلیون نفوسو اولان بیر اؤلکه نین باشچیسینین ایشی برکه دوشنده جن لره متوسل اولدوغو بیر توپلومون "آیدین" ی دا البته کی ایشی برکه دوشنده "دودک" دن یاردیم آلار.
- چوخ یاخچی فرض بویور کی فارسی دیلینده آنتی دورینگین ایچریگی (محتواسی) بیره بیر وئریله بیلیبدیر.
- یاخچی، بس اوندا نه دئییرسن؟ 
- آنتی دورینگین موضوعسو نه دیر؟
دوستوم "اظهار علم" ائتمک اوچون بیر فرصت تاپمیش کیمی، دؤشونو قاباغا وئردی. قیسساجا بیر اؤسگوردو:
- فریدریش انگلس بو دگرلی کیتابیندا دورینگین انحرافی و ایده آلیسیتی فلسفه سینی داهیانه بیر شکیلده مو به مو نقده چکیبدیر.
- سن ده انگلسین یازدیقلارینی مو به مو اربرله ییبسن؟!؟
- بس، هن، سنین دئدیگین دودک – دودک سؤزلرینی می قبول ائده جگم؟!
- چوخ گؤزل، دورینگین اؤزونونو یازدیغینی دا اوخویبسان؟
- منیم نه ایشیم وار دورینگین اؤز یازدیغینی اوخویام، حتما او دا سنین کیمی دودک دودک سؤزلر دانیشیب دا.
حدیثین قایناغینی آخدارماغا گرک یوخدور. فلانکس اوغلو فلانکس که حضرت فلانکسین یاخین دوستو و ایدئولوژیک شریکی ایدی بئله نقل ائله ییبدیر کی....:

هرکیم ایستر اؤزونو سرور ایام ائله سین  *
در میخانه نی اؤپسون طلب جام ائله سین
سیدا عف بویور سن بو یازیق درویشی
 اذن وئر میملرینین هاممیسینی نان ائله سی
هرکس ایستر اؤزونو سرور دؤران ائله سین
پاسبانی گؤتوروب سرگرد اعلان ائله سین
مارکسیستم دئیه جهل ایله اؤوونسون بیر عؤمور
کاپیتال جزوه سینی تاقجادا قران ائله سین
تریئرده خارابا، کهنه بیر ائو تاپمیشسا
کعبه یه چاتمیش ایکن دؤورونه جولان ائله سین
دوز دئمیشلر کی بیراخماز بئله کور توتدوغونو
بیر نئچه قوپما – قیریق بیلگیسین عمان ائله سین
بیلسین اؤز بیلدیگینی عالم علمین هامیسی
علم آدی گلسه "دودک دیر" دئیه بطلان ائله سین
آفرین بیر بئله انسانه کی ایگیرمی نئچه ایل
دیلین اؤیگرنمه سین اول اؤلکه کی اسکان ائله سین
بیر طبیب ایسته سه بیر خسته یه درمان ائله یه
منع ائدیب، خسته نی اؤز جهلینه قوربان ائله سین
فخر قیلسین کی یاتیب بیر نئچه ایل زینداندا
ملیتین دوشمنینه دوست کیمی ایمان ائله سین
بیلگیسی "مردم" و "بی بی سی" اولان بیر شخصه
نه دئسین کیمسه، اونونلا نئجه پیمان ائله سین؟
گر بو درویش حقیره دئین اولسا "سنه نه؟"
گوزگوده گؤرسون اؤزون، گؤز یاشی غلطان ائله سین
کؤلن، مای  2019
 . * بیرینجی بیت سید عظیم شیروانی دن دیر.


No comments: