گونئى (ايران) آذربايجانى قلم انجمنى
آذربايجان خلقى و آذربايجان ادبياتى سون ايللرده چوخ دگرلى و پارلاق اينجى لرينى ايتيرميشلر. آدی هر زامان یاشار "هاشم ترلان" دان سونرا، نوبه "مظفر درفشى" يه چاتدى و كئچن گونلرده "مظفر معلم" ده حياتينى ايتيردى.
مظفر درفشى ١٣٠٥ نجى ايلده باكى دا دوغولموش و کیچیک یاشلاردا عائله سيله بيرليكده ایرانا كؤچوب و تبريزده يئرلشميشلر. مظفرين آتاسى رضاشاهين دیکتاتورلوق سيستمينه مخالف اولموش و بير "سلطنته مخالف تشكيلات"ين عضوليگى بهانه سيله توتولموش و حبسه آتیلمیش دیر.
او زنداندا جسمى ايشكنجه لر نتیجه سینده خسته لنميش و زنداندان بوراخیلدیقدان سونرا ، شمسی ١٣١٧ نجى ايلده تبريز شهرينده وفات ائتميشدير. ١٢ ياشيندا اولان مظفر، قهرمان آناسيله بيرليگده، چاليشماغا اوز گتيرميش و چوخ اقتصادى چنينليگ لرله ياشايشه دوام ائتميشلر. رضا شاهین اؤلکه ده ن قاچدیقدان سونرا، استبداد زنخیرلری بیر آز بوشالدیغینا گؤره آذربایجانلیلار دا آزاد نفس چکمیش و آذربایجان ادبیاتیندا بير چيچكلنمه دؤورى باشلاميشدير. ائله مظفر درفشى نين ده ادبياتا اوز گتيرمه سى بو ايللره عايددير. همين ايللرده اونون فارسجا و آذربايجانجا شعرلرى یئرلی نشريه لرده فارسجا و آذربايجانجا منتشر اولونور. ١٣٢٣ نجى ايلده دانشسرانى بيتيره ن مظفر، بير ايلين ايچينده معلم ليكدن دانشسرانين معاونتينه یوکسلمیش و سونرالار فلسفه و روانشناسلیق ساحه سينده فوق ليسانسا قدر تحصيل ائتميشدير. اونون ادبٍى - بديعى ياراديجيليغي نين ان پارلاق زمانى، آذربايجانين ملى حكومتى دؤوری اولموش و او ايللرده آپاردیغی فعاليتينه گؤره، "٢١ آذر" مدالينا لايق گؤرونموشدور. مظفر درفشي اوزون ايللر "كانون نويسندگان ايران" ين عضوى اولموش و بو كانونون چئشيدلى فعاليتلرينده اؤزونه لايق رول اويناميشدير. انقلابدان سونرا اونون آذربايجانجا شعرلرى نشر امكانى تاپميش و عین زاماندا "آذربايجان" انجمنينده، سونرالار "ساهر" و داها سون اولاراق "صابر" ادبى انجمنلرينده فعاليت ائتميشدير. مظفر معلم یاشاییشی نین سونونا قدر "صابر ادبى انجمنى" نين صدرى وظيفه سينده چاليشميشدير. مظفر درفشى جمعه گونو بهمن آيي نين ١٦ سيندا قيسا بير خسته ليكدن سونرا حياتا گؤز يومموشدور. بيز بو بؤيوك ضايعه نى و آجى ايتگى نى اونون عائله سينه، ادبى انجمنلره و آذربايجان فعاللارينا تسليت دئييب و اونون خاطره سينه، "عشق اولسون" دئييريك.
گونئى (ايران) آذربايجانى قلم انجمنى
بهمن ١٣٩٣
No comments:
Post a Comment