Jul 20, 2014

من کیچیک بیر چرده ک ایدیم

علیرضا نابدل (اوختای)
 
اویانا قاچدیم سیخدیلار
بویانا قاچدیم ییخدیلار
منی یاندیریب یاخدیلار
من یارلارا قاتیلدیم
باغوانلارا ساتیلدیم
باغوان ییغدی بوخچایا
آپاردی گوی باغچایا
باغچادا بیز اکیلدیک
توپراقلارا تیکیلدیک
توپراق قارانلیق ایدی
کؤنلوم بولانلیق ایدی
گونوم گئجه م ده ن قارا
باغریم یارا ایدی یارا
چانقیل دلدی باغریمی
او بیلمیردی آغریمی
دئییردی: یازیق چردک
قویلادیلار گئتدیلر
سنی تباه ائتدیلر
سن توپراقدا چورورسن
بوغولورسان ئؤلورسن
ئؤلوم منه چاتمادی
گؤیلر قانا باتمادی
آغ بولوت لار یاتمادی
جان وئردی بولوت منه
جانلاندیم یول ایسته دیم
توپراقدان قول ایسته دیم
قول قانات وئردی توپراق
قاناتداندیم اوچماغا
حیات یولون آچماغا
حیات یولوندا غم وار
آچیق گؤزلرده نم وار...
گؤز آچدیم گؤی باغچایا
هر یانی گؤی باغچایا
من باغچادا بوی آتدیم
قیزیل گول لر بویاتدیم
قیزیل گول لر بوتاغدا
بوتاغلاریم یاتاغدا
آی، یاتاغا نور ساچمیش
بیر قیز آچیشقا آچمیش
یولدا دیر قیزین گؤزو
اوره گینده چوخ سؤزی
اوره ک لری سؤز ده لر
ایندیجه بولبول گلر.

No comments: