ینی ایلینیز اوغورلو اولسون


Nov 1, 2015

قاچقین


محمد احمدی زاده

گئجه‌نین قارانلیغی و چوخ قورخودوجو سسسیزلیگی، بوتون دوشونجه‌لرینی دوندورموشدو. کنددن چوخ اوزاقلاشمیشدی. آرتیق سو ماتورونون سسی ده ائشیدیلمیردی، یالنیز چه‌ییرتکه‌لرین سسیندن و بیرده باجاغینین سانجیسیندان سئوای، هیچ بیر زاد حیس ائده بیلمیردی. تک باشینا، چؤلون او قارانلیق گئجه‌سینده، ایره‌لی گئدیردی. هارا گئتدیگینه داییر هئچ بیر دوشونجه‌سی یوخودو و قورخو ایچره آخسایاراق یئریمه‌یه داوام ائتمکدئیدی.
بیردن اوزاقدان گلن اولاما سسی، ووجودونا سویوق بیر تر باسدیردی. تیترمه ایچینده دوشوندو:

گؤره‌سن قورد سسی‌می‌دی، یوخسا قاچماسیندان خبردار اولوب، پئشیندن دوشن ایتلرین سسی‌می؟
هر ایکیسی ده اونون اوچون یاخشی بیر ایشاره دئییلدی. بونا گؤره ده، سینان باجاغینین آغریسینی هئچ اؤنمسه‌مه‌دن سورعتینی آرتیردی.
تپه‌نین اوستونه دوغرو چیخارکن، آیاقلارینین آلتینداکی ازیلن اوتلارین خیشیلتی سسینی ائشیده بیلیردی.
چه‌ییرتکه‌لرین سسی، اوتلارین خیشیلتیسی و یاواش یاواش یاخینلاشان اولاما سسلری.
باشی گیجلمه‌یه باشلادی. یورقونلوقدان و سینان باجاغینین زونقولتوسوندان داها اؤزونو ساخلایا بیلمه‌دی. قوروموش بیر قویون قیغی کیمی، تپه دن آشاغی دوغرو دیبیرلاندی. هر  دؤنوشده باجاق آغریسینا باخمایاراق، یوموشاق اوتلارین اوستونده فیرلانیب دؤنمک، ایچینده گؤزل دویغولار یارادیردی. سانکی بیر کپنک کیمی گؤی اوزونده اوچوردو. اوشاقلیق گونلرینی خاطیرلادی.
آناسی، باجی قارداشلاری هامیسی بیرلیکده، چؤلده گزن او شاد گونلرینی یادا سالدی. یونجالارین و گول چیچکلرین آراسیندا یولداشلاری ایله، قووالا قاشدی اویناردی. گیزلیجه گوللرین اوستونه قونان کپنکلرین اوستلرینه هوبلاییب، اونلاری دیکسیندیرردی و بو ایشدن او قدر گولردی کی اؤزونو آیاقدا ساخلایا بیلمزدی. سونرا او بیری یولداشلارینی قووالاییب تپه دن آشاغی دوغرو قاچاردی.
باشینین بیر داشا چارپیلماسی اؤنجه اونو اویاندیردی و سونرا درین بیر راحاتلیغا دالدیردی. آرتیق هئچ بیر شئی حیس ائتمیردی، نه باش گیجلمه‌سی، نه باجاغینین آغریسی و نه ده اولاما سسلرینی ائشیدیردی.
کنده دؤنموشدو. یولداشلارینین یانیندایدی.
چوخلاری حوزون حوزون آغلاشیردی. قهوه‌ای‌لردن بیری، اتلی جانلی و شیشمان اولان دوداقلارینین آراسیندا دوعالار میریلدانیردی و اوبیری قهوه‌ای‌لر و آغلارلا، قارالارین بعضیلری اوندان سونرا اونون اوخودوغو دوعالاری تئکرارلاییردیلار.
بیر نئچه‌سی بوجاقدا سسسیز اوتورموشدولار. سانکی اؤلوم طالعلرینی قبوللانمیش، صاباحی و هر شئیین بیتمه‌سینی گؤزله‌ییردیلر.
بعضیلری عصبلی شکیلده اویانا بویانا گئدیردیلر.
بسدیر بو قدر قویون کیمی یاشاماق. بسدیر بو قدر مال حئیوان کیمی دوشونمک
آمما اونون باغیر چاغیرینا کیمسه قولاق وئرمیردی. هرکس اؤز کدرلی حالینا قاپانمیشدی
گئنه اوجا سسله بیر داها قیشقیردی:
آی جاماعات! اویانین آرتیق. صاباح بوردا بیر قتل عام اوز وئره‌جک. نئیه باشا دوشمورسوز. صاباح هامیمیزی اؤلدوره‌جکلر. آغلاییب، دوعا اوخوماقلا بیزیم طالعیمیز دئییشیلمه‌یه‌جک. آی میللت! ال چکین بو ایشلردن. گلین دوشونک، چارا یولونو تاپاق.
آمما کیمسه اونون هایینا جاواب وئرمه‌دی. سون دفعه گوجونو توپارلادی و نفسینی جیگرلرینه دولدوروب، بوغازینین ان درین یئریندن باغیردی:
سوسوووووووووون……………..
بیرآن هامی سوسدو، هرکس اونا دوغرو دؤندو
منیم قارداشلاریم باجیلاریم! قهوه‌ای‌لر، آغلار، قارالار! دینله‌یین منی. یولداشلاریم بئله اولماز. دوروموموز چوخ پیسدی. سیزی آند وئریرم سئودیکلریزه، هئچ اولماسا بیر دقیقه منه قولاق آسین.
هامی قولاقلارینی شوشله‌دیلر. اونون اطرافینا ییغیشیب، بیر دایره اولوشدوردولار.
سئوگیلی قارداشلاریم! آغلار، قارالار و قهوه‌ای‌لر! من، هامینی بیرلیگه و ال اله وئرمه‌گه چاغیریرام. گلین قول قولا وئره‌ک و صاباح بو قاپیدان ایچری گیرن هرکسین اوستونه یوگوروب دارماداغین ائدک. اینانین بیرلشسک، کیمسه بیزیم قارشیمیزدا دایانا بیلمز.
هامینین ایچینده پیچیلتی سسلری یاییلماغا باشلادی. اینقیلاب، عوصیان، قییام سؤزجوکلری پیچیلتی سسلرینین ایچیندن سئچیله بیلیردی.
دوعا اوخویان شیشمان قهوه‌ای سسه گلدی:
اینقیلابا گرک یوخدو. صاباحداکی اؤلنلر، شهید اولاجاقلار. صاباح هامیمیزین یئری جننتدی.
گئنه ده من اینقیلابا راضییام، چونکی اینقیلابدا دا اؤلنلرین یئری جننتدی، آمما بیر شرطیم وار. اینقیلابین رهبری قهوه‌ای‌لردن اولمالیدی. من بیر قهوه‌ای اولاراق بو اینقیلابین رهبری اولمالییام.
قهوه‌ای‌لر سسلرینی باشلارینا آتدیلار
قهوه‌ای‌لر اویاخدی… رهبرینه دایاقدی
هر طرفدن قریب قریب سسلر ائشیدیلردی.
گلین دؤولت قوراق
باش باخانیمیزی ایندیدن بللی ائتمه‌لیییک
گله جک میللی مجلیسیمیزین وکیللرینی سئچمه‌لیییک
عوصیان سؤزونو اورتایا آتماقدان پئشمان اولموشدو.
اوره‌گی بتردن سیخیلیردی، آز قالسین سیخیلماقدان پاتلایاجاقدی. ایچینده کی آشیب داشان کدر او قدر چوخودو کی،  هئچ آغلایا دا بیلمیردی. بلکی آغلایا بیلسئیدی، بیر آز دا اولسا اوره گی آچیلاردی. بیر آن او دورومدان قورتولماق ایستیردی. صاباحین اؤلوموندن چوخ، یولداشلارینین آخماقلیغیندان قاچماق ایستیردی.
قاچماق، قاچماق، هه تکجه چارام قاچماقدی
گؤزو بیردن دووارداکی، داما یاخین پنجره‌یه ساتاشدی. پنجره‌نین چوخ یوکسکده اولدوغونو و اونا نئجه چاتماغینی سالیب چیخدی.
تایلار، دوغردور تایلارین اوستونه چیخیب پنجره‌یه چاتا بیله‌رم” دئیه دوشوندو
هامی اینقیلابا رهبر سئچمک، گله‌جک دؤولت و میللی مجلیسینین وکیللری اوزه‌ره، دارتیشماقدایدی. بعضیلری هله ده بوجاقدا سسسیزجه اوتوروب، اؤز اؤلوم طالعلرینی گؤزله‌ییردیلر. آمما او اؤز قرارینی وئرمیشدی. تایلارین اوستونه چیخدی و هوبلایاراق یوکسلمه‌یه باشلادی. سونوندا باجاردی. پنجره‌یه یئتیشدی.
پنجره‌دن ائشیگه بویلانیب باخدی. هاوا قارانلیقدی. هئچ بیر شئی گؤرنموردو.
سون دفعه دؤندو و پنجره‌دن ایچه‌ری باخدی. الوئداع دئییب، اؤزونو ائشیگه آتدی. یئره دوشدوغوندا داغ کیمی آغیر بیر سانجی بوتون ووجودونو بورودو. باجاغی سینمیشدی.
گؤزلرینی آچدی. هر شئی یادینا دوشدو. تپه‌دن آشاغی دیبیرلانمیشدی. باجاغینین آغریسی اؤلدوروردو. اطرافینداکی خورولتو سسلرینی ائشیدیردی. چئوره‌سینده دولاشان قوردلاری گؤرونجه باجاغینین آغریسنی اونوتدو.
قارنینا، بئلینه و باجاقلارینا باتان ایتی دیشلری حیسس ائده بیلیردی. آرتیق هر شئی بیتمیشدی.
سحر چاغی تپه‌نین آلتینداکی قاچقین قویوندان، یالنیز آل قانینا بویانمیش بیر دریسی قالمیشدی، بیرده آچیق گؤزلری ایله، قوربان بایرامیندا تپه‌نین آرخاسیندان دوغان گونشه باخان قافاسی


http://ishiq.net/?p=13302

No comments:

Post a Comment