دونیا آنا دیلی گونو

باهار گلیر 

١٩٩٩ نجى ایل نوامبر آيينين ١٧ سينده بنگلادش ین ایستەگى اوزرينده, يونسكو, ٢١ فورالى; دونيا آنا دیلی گونو ; آدلانديردى. بو آدلانديرمانين ندەنى, ايندى كى باغيمسيز بنگلادشين گئچميشده  «دوغوپاكستان» آدى ايله بؤيوك پاكستان آدلى اؤلكەنين بير پارچاسى اولان زامانينا قاييدير. او زامان پاكستانين (ايستر دوغى, ايستر باتى) رسمى و اييتيم(تحصيل) ديلى, «اوردو ديلى » ايدى.

 

دوغو پاكستانين(ايندى كى بنگلادشين)  ديلى «بنگالجا» اولاراق اوردو ديليندەن فرقيليدير. ١٩٥٢ نجى ايلينده بنگلادشين اينديكى پايتختى «داكا» شهرى اونيورسيتت طلبەلرى, طب فاكولته طلبەلريله بيرليكده دينج نمايشه (گؤسترى ) باشلاييب و پاكستاندا «اردو» ديلى ايله ياناشى «بنگال» ديلينين رسميلەشديرمەسينى ايستەديلر. طلبەلرين نئچه سى پاكستان قووه لرينين گوللەمەسيله اؤلدورولدو.

 

 بيرلشميش ميللتلر تشكيلاتينين يونسكو قورومى, بنگلادش ين باغيمسيزليغيندان سونرا كى ايستەگينه گؤره ١٩٩٩ نجى

  ایل نويابر آيينين ١٧ سينده, ٢١ فورالى; «بین الخلق آنا دیلی گونو» ; آدلانديردى. بو گون ايلك دفعه ٢٠٠٠ نجى ايده پاريس ده قوتلاندى و سونرا  هر ايل دونيانين چشيدلى اؤلكەلرينده آنا ديلينده تحصيل آلما ضرورى ليگى ايله باغلى فرقلى پروقراملارلا قيد اولونور.

 

 ايراندادا ايلك دفعه (٢٠٠٤ ايل فورال ٢١ينده)١٣٨٢ شمسى ايلى ايسفند آيينين ٢سينده تبريزين دوكتور مبين زاليندا مدنى كولتورل فعال لارى و عين زاماندا تهراندا «بيليم و تكنولوژى» اونيورسيتتينين تورك طلبە لرى  طرفيند قوتلاما مراسيمى گئچيريلميشدى.

 

(٢٠٠٥) ١٣٨٣ نجى ايل ايسفندآيينين ٥نجى گونوايچين تبريز كولتورل فعال لارى طرفيندن اجازه آلينميش و مختلف شهرلردن چشيدلى يازيچيلار و تدقيقاتچيلارين اؤنجەدن چاغريلماسينا رغما پروقرامى مراسيم گونونده لغو ائتديلر. لاكن تهراندا «بيليم و تكنولوژى» اونيورسيتتينده تورك طلبەلرى بو گونون قوتلاماسى ايچين ايسفندآيينين ١٣نجى گونونه اجازه آلا بيلميشديلر و  همين گونده تهران بوتون اونيورسيتتلرىينين مينلرجه تورك طلبەلرى, تهرانين تورك يازيچيلار, تدقيقاتچيلار و باشقا كولتورل فعاللارى بير يئره ييغيشيب, نيطق ائتميشديلر .

 

اونلار آنا ديلينده تحصيل آلماقين ضرورليگينى و فارس ديلينه ياناشى,  تورك ديلينين - ايرانين چوخونلوقونون ديلى اولدوغونا گؤره  - رسمى اولماسينى طلب ائتميشلر. بو پروگرامدا دوكتور جواد هئيتين آنا ديلى حاقيندا چيخيشى و حاقلى آچيقلامالارى دينلييەنلرى چوخ دريندن ائتگيلەدى.

 

 آنا ديلينده تحصيل اينسانين  ان ايلكين (تمل) حققيدير. دونيا آنا ديلى گونو , چشيدلى و فرقلى ديللرى اولان بوتون دونيا ميلت لرينه, اؤزەلليكله ديللرى باشقا يابانجى بير ديلين مطلق حصاريندا دوسداقلانيب چيچكلنه بيلميەن ميللتلره قوتلو اولسون.

باهار گلیر