May 7, 2017

اوجادان دوشونورکن (1) - آرابسک

س. سیداوالی

اوجادان دوشونورکن

اؤزوم- اؤزومه یاخالاندیم
...
دواملی اولاراق نشره وئرمه یه چالیشدیغیم بو یازیلار, کئچن اوچ- دورت ایلین عرضینده مجازی دونیادا گؤردوکلریم, ائشیتدیکلریم و اوخودوقلاریمین معین تاثراتی کیمی قلمه آلینمیشدیلار.
یازیلارین چوخونلوغو, آنا دیلیمیز آذربایجان تورکجه سینده یازیلمیشدیلار. لاکن استثنا اولاراق و وضعیتده ن آسیلی, بعضا فارس دیلینده ده یازماق مجبوریتینده قالمیشام.
یازیلارین بیر چوخو, اوجادان دوشونر کیمی, اؤزوم- اؤزومه و یا یاخین بیر دوستا یازیلدیقلاری اوچون, اوخوجولارا تقدیم ائتدیکده, اونلاردا کیچیک دئییشیکلر آپارمیشام.
(1)
آرابسک

نووامبر 2015

فرقلرینه بیر آز گؤز یومماق شرطی ایله, تورکیه ده " آرابسک" و شمال آذریایجاندا ایسه "میخانا " آدلانان ترانه لره, بیزیم طرفلرده, کوچه - بازار تصنیفی دئییلیر. دئدییم کیمی, آرابسک و میخانا ترانه لری, بیر- بیرلریله فرقلی اولدوغو حالدا, بیزیم کوچه بازار اوخوماغی ایله ده, معین فرقلری واردیر. آمما هر اوچ اوخوماق طرزی, عین زاماندا, آذربایجان کلاسیک موغام موسیقی سی و تورک صنعت موسیقی ایله ده فرقلنیرلر. منجه بو اوچ نوع ترانه طرزینه, "میخانا " آدی داهادا اویغون دور. چونکی بو نوع ترانه لر, اساسدا میخانالاردا و عرق ایچمک مجلسلرینده اوخونورلار.
بیزیم آذریایجاندا دا بو نوع اوخوماقلار چوخ یایقین دیر. شاه دؤرونده جنوبی آذربایجانین بیر چوخ شهرلری کیمی, تبریزده ده دوره گرد خواننده لر بو اوخوماقلاری شاهگلی ده و یا جماعتین پیک نیک یئرلرینده - او جمله ده ن یای فصلینده جمعه گونلری سیداوا چمن ینده- اوخویاردیلار. بو نوع تصنیف لرین سؤزلری, خالقین دیلینده ازبر اولان شعرلرده ن آلیندیغی اوچون، اونلاری کیم قوشدوغونو و یا کیم یازدیغینی, چوخ زامانلار معلوم ائتمک ممکن دئییل. بعضا ده, سؤزلری قوشان, موسیقی نی بسته له ین و خواننده, عین شخص دیر.
بیریلری زحمت چکیب و یاواش- یاواش بو تصنیف لری ییغماغا چالیشیب و عمومون استفاده سی اوچون انترنته قویموشدولار. بو ایش اؤزلویونده بویوک بیر آددیم دیر. هر حالدا بو نوع موسیقی, ایستر-ایسته مز بیر خالقین فولکلور و مدنیت خزینه سینه عاید دیر.
گنج چاغلاریمدا بو نوع موسیقینی خوشلامادیغیم اوچون، من بو موسیقی ایله ایلگیلنمیردیم.
بو اوخوماقلاردان بیر نئچه سی, نئچه مدت بوندان اول بیر دوستومون واسیطه سیله الیمه چاتمیشدی. من اونلارین بعضی سینه قولاق آسدیم. البته ایندی بو نوع موسیقی یه باشقا گؤز ایله باخدیغیم اوچون، بو تصنیف لرین بعضی سینین سؤزلرینه داهادا دقت ائله دیم. ایندی گؤروره م کی بو نوع ترانه لر, بیر فولکلور آراشدیرماچی سی اوچون، خالقین یاشاییش طرزی، آرزولاری و دونیایا نئجه باخدیغینا یاخشی قایناق اولا بیلرلر.
من بو اوخوماقلارین بیرینین سؤزلرینی کؤچورمه یه چالیشیب و سیزلره تقدیم ائدیره م.
خواننده نین سسینه گؤره, منه ائله گلیردی کی، بو ترانه شاه دؤرونده تبریزین خورشید کاباره سینده صحنه یه چیخان کوچه- بازار خواننده لرینده ن بیری اولان، عالیه خانیما منسوب دیر. لاکن تصنیفی انترنته قویان حؤرمتلی وطنداشیمیز، خواننده نین آدینی " نوبار اسدی" خانیم وئرمیشدی. بو ضربی ترانه نین سؤزلری، البته تبریزلیلر اوچون داهادا تانیش و دوغما دیر.
اوخوماق، آشاغی کیفیت ده ضبط اولدوغو اوچون، سؤزلری باشا دوشمکده بعضا چتینلیک چکدیم.
هر حالدا بو سیز و بو " الینده شاللاق، ویرما سن آللاه" تصنیفی:

تهرانا گئدیرسیز، داغلارا باخین
آچین اوره گیمی، یاراما باخین
قیزلار آلوده یم، آللاها باخین
الینده شاللاق، ویرما سن آللاه
امیدیم سن سن، پناهیم آللاه
تهرانین یولونا سو باغلامیشام
آلوده م یوخلویوب، من آغلامیشام
او منی آتیبدی، من آتمامیشام
الینده شاللاق، ویرما سن آللاه
امیدیم سن سن، پناهیم آللاه
گلستان باغی نین دؤره سی سیمدیر
دوشرسن دالیمجا، دئییللر کیمدیر
گلستان باغی نین دؤره سی سیمدیر
گئدیرسن، گلیرسن دئییللر کیمدیر
قورخورام آنامدان دئیم سن کیمدیر
قورخورام ننه مده ن دئیم سن کیمدیر
الینده شاللاق، ویرما سن آللاه
امیدیم سن سن، پناهیم آللاه
آخشام تیر دیبینده گؤزله یه جاغام
سئوگیلیم عکسینی وئریب، بؤیوده جاغام
سئوگیلیم گلنده گؤزله یه جاغام
آلوده م گلنده گؤزله یه جاغام
الینده شاللاق، ویرما سن آللاه
امیدیم سن سن، پناهیم آللاه
سئوگیلیم منی گؤردو، چرخی دؤنده ردی
گئتدی پستخانایا، نامه گؤنده ردی
نامه اوره گیمی قانا دؤنده ردی
الینده شاللاق، ویرما سن آللاه
امیدیم سن سن، پناهیم آللاه

No comments: