آلماندا اوْ گئجه، سحرا یاخین ائودن چیٛخیب قاپینی آرخامدان باغلادیغیمدا، دؤنوشومون اوْلمادیغینی آنلادیم. نهیه، هارایا قاییداجاغیمی دا سوْروشمادیم اؤزومدن. اؤنجهکی گئجه ائوه گیرینجه گؤرموشدوم. قادین، ماشینین آچارینی بارین اۆزرینده کی ایچی رنگلی مازی دوْلو بانکانین یانینا تۆنلهدی.
دئمک کی، آغزی-بورنو قان ایچینده کئفلی بیر آدام، یابانجی بیر قادین طرفیندن مئیخانادان قالدیریلیب بیلمهدیگی بیر ائوه گتیریلیرسه، ماشین آچارینین یئرینی گؤزدن ایتیرمزمیش. هم ده اینسان کئفلی ایکن، جاوابلار، باشینداکی سوْرغولاردان اؤنجه گلیرمیش عاغلینا.زامان هانسی یؤنه آخیردی، بیلمیردیم. یاتاقدان هاچان فیٛرلامیشدیم، فیٛرلارکن باغیرمیشدیممی؟ خاطیرلامیرام. خاطیرلادیغیم بو کی، بیٛچاغین امنیتینی اۆزومو یویاندان سوْنرا ائندیردیم، تازادان قاپشوْنومون جیبینه آتدیم. ائوه گلدیگیمیز گئجه چاناقدا اللریمین قانینی، اۆزومون چیرکینی، باشیمین کئفلیلیگینی یویارکن، بارماغینداکی اۆزوکدن قادینین ائولی اوْلدوغونو آنلادیم. تۆپوردوم. اؤن دیشلریم آجیشدی. دئمک یئدیگیم یومروق ساغلام ایمیش! ایشقابدان، اری اوْلاجاق کیشینین کؤینگینی ایلیشدیردی الیمه، اَینیمه کئچیردیم.
سحره یاخین، بانکانین یانیندان آچاری گؤتوردوم، قاپینی چکیب چیٛخدیم.
سن، بیر گئجهده نئچه ایل یاشلانا بیلرسن اوْغلوم؟
دیشلریم قیٛفیللانمیشدی. بالتیک دنیزیندن قالخان یئل ان چوْخ دا قارنیمین آلتینی دئشیب بوروشدوروردو. قدیمدن، چرخه آتیلدیغیم کیمی ایلک اؤنجه اوْرمانا، سوْنرا دا دنیز قیٛراغیندان شهره ائنرکن، بو یئل اۆزومه چیٛرپیلار، ساچلاریمی دارار، ایچیمی شنلندیریردی. ایندی ایسه سادهجه قان و قوسماق قوْخویوردو. آلمانین قوزئیینده، کئفلی آمریکالی دنیزچیلرینی آغیرلایان و دورمادان اسن یئلی ایله کییل[1] شهری، ایندی ایچینه سادهجه ایشهیهجگیم کؤهنه، تنیکه بیر دوْلچا کیمی ایدی. کۆچهیه گیرمهدن زیپیمی آشاغی چکدیم. بالتیک دنیزینی سوْلوما آلاراق دووارا قارشی دوردوم، هیتلرین اس اس افسرلری کیمی چیگین-چیگینه دۆزنله هؤرولموش، قیٛرمیزی کرپیج دووارا ایشهدیم. بیلیردیم ایندی، بو منیم قوزئی شهریندهکی سوْن ایشهمگیم اوْلاجاق. ماشینا مینمهیهجگم. هم، کییل کانالی، ماشینین آچارلارینی دا اوتا بیلردی.
قاتارلارین حرکت ساعاتلارینی گؤسترن پانئله ساری گئتدیم. دوراقداکی یئکه، برقی ساعاتین عقربهسی بیر خانه آتلادی. دوراغین تاوانی بئله یۆکسک ایدیمی، بئله سوْلوق، سوْیوق و مئتالیک ایدیمی؟ سانکی ایلک دفعه گؤروردوم. هر حالدا اوْرادان و آلماندا، اوْنا بنزهین دۆجونله قاتار دوراغیندان یۆزلرجه دفعه کئچمیشدیم.
هؤیوشنهیه دۆشن بیر قاتیل، قاتیل ساییلماز.
بونو بیلیردیم؛ دۆنن گئجه اۆچ قاتیل، اۆچ جینایت ائلهدی. قاتیللردن بیری کئفلی ایدی، بیری سفئه ایدی، اوْ بیریسی ده هؤیوشنهیه دۆشمهدی. هؤیوشنهیه دۆشمهیهنین گؤزلری ایندی، قاتارلارین قالخیش و گلیش ساعاتلارینی گؤسترن پانئله باخیردی. سیغارینی یاندیردیغیندا، دوراغین یئکه ساعاتینین عقربهسی سارسیلدی و هامینی، سحر ساعات بئش قیٛرخ اۆچده قالخاجاق اوْلان قاتارا مینمک اۆچون تام بیر ساعات قیٛرخ آلتی دقیقه قالدیغینا ایناندیردی.
من اینانیردیممی؟ سؤیله گؤروم اوْغلوم؟
قاپشوْنومون جیبیندن چیٛخارمادیغیم بو اللرین اؤنجهکی گئجه نه ایشلردن چیٛخدیغینا اینانیردیممی؟ هانی حوریهنین ساچلارینا ال وورورکن تیترهین بو اللرین؟ اؤز-اؤزومه هیرسلهنیب قالیردیم. ایندی گئجهنین بو ایت اوْیانماز واختیندا، بیر زامانلار نازیلرین گئشتاپوْداکی کیشیلرینین اینسانلاری اوْولادیغی بو دوراقدا، قاتار مأمورلارینین دۆدوک سسلریندن و سۆموکلرینین ایلیگینده دویدوغون بو سوْیوقدان باشقا نه وار؟ قوساجاقسان قوس دا! قوس! دمیر یوْللارینا، سککیلره، نیمکتلره، پانئللره، ساعاتلارا! بیر ده بو دوراقدا قاچماق اۆچون گؤزلهین یا دا ساخلانان اینسانلارین اۆرگینی تیترهدن نازی دۆدوکلرینه قوس! کیمسه سنه بو شهرده، آمریکالی دنیزچیلرینین گیریب چیٛخدیغی کۆچهلره گیرمه دئمهدیمی اوْغلوم؟
گیردیم. آلمانین یاغیش سوْنراسی ایکی شئیینی سئودیم و قوسدوم ایچینه. بیری بنزین دوراقلارینداکی بنزین قوْخوسو، اوْ بیریسی خیابانلارین پاریلدایان دۆزمه داشلاری. گئجه یاغیش چیلهمیش دورموش، رنگبهرنگ ایٛشیقلار کۆچهنین دۆزمه داشلاریندا پارلاییردی. داها دار بیر کۆچهیه چؤندوگومده، کۆچهنین جیٛویلتیسینی دا اؤزومله سۆروکلهدیم. قیٛرمیزی قاپیلار، ویترینلر، چیٛلپاق دۆشلر و بودلار… بورا لندنین «سوْهو»سونا بنزهمز. هامبورگون سنت پائولیسینه و ده سیٛنیرلارینی قاتولیکلردن سوْنرا نازیلرین ده جیٛزدیغی اوْ بؤیوک، هر جۆره چۆروموشلوگون چوْخلو آخدیغی اؤزگورلوک محلّهسی گروسه فرایهایتا[2] دا بنزهمز. آمستردامداکی قیٛرمیزی فنر محلّهسینین کیچیک ویترینلی ائولرین دۆزۆلو اوْلدوغو کۆچهلرینه ده… بورا داها آز طنطنهلیدیر، داها چوْخ یوْخسول! فرانکفورتدا، دوراغا یاخین کۆچهلرده، کلوپ قاپیلاریندا دوران و گۆندوز گؤزو اوْلسا دا، تۆرک ایشچیلرینه، یگوسلاو، ینان؛ هر جۆردن آجلارا و سفیللره قادین بازارلایان قورومساقلار دا یوْخ ایدی بورادا. آما اوْنلارین تۆرکجه باغیردیقلاری کیمی، صحنهده دۆزوشمه وار ایدی مۆطلقاً. یوْخسا، آمریکالی دنیزچیلری نه دئیه اللرینده ویسکی شۆشهلری دوْلانیب دوراردی کی! دنیزچیلر گلیب اوْتورورلار موْبللارا. اوْتورار-اوْتورماز بیر جۆت قادین، بیری ساغیندا بیری سوْلوندا سینهلرینی دایار قوْللارینا. ایچگیلرینی قورتوملارلار. سوْنرا چیٛلپاق بیر کیشی و چیٛلپاق بیر قادین صحنهیه چیٛخار؛ فرانکفورت کلوپ قاپیلارینداکی چیٛغیرتقان آدامین دئدیکلرینی عیناً دوْغرولار، اویغولارلار. قادینین الی، صحنهنی سئیر ائدن دنیزچینین قاباران شالوارین زیپی اۆزرینده گزینیر و زیپ آچیلمادان بیر ایچگی داها ایٛسمارلانیر.
آغزینا تۆپوردوگومون بو دۆزنینی کیم دۆزهجک؟
عؤمَر می دییشدیرهجک بو دۆزنی؟ عؤمَره تایلار می؟ عایشه ایله بیرلیکده زینداندان چیٛخدی دا نئیلهدی عؤمَر؟ هن؟ ائلهمه گؤزونه قوربان اوْلدوغوم! سنجه کؤلندن[3] قاچماغیمین نهدنی نه ایدی، هن؟
قهوهده کیم وار ایدی عؤمَر بیگ؟ ایشچیلر! بلی… اوشاغینی ختنه سی اۆچون توْپلانمیشدیلار، اوْلسون. بیر هفته ایت کیمی چالیشیب اینسان کیمی ایشلهیندن سوْنرا ایندی بیر بازار گۆنو ختنه توْیوندا ساز چالیب ماهنی چالیرلارسا نه اوْلوب یانی؟ نئچه مین کیلومتره یئتیشدی آناطوْلوداکی کندلری ایله بو قهوهخانا آراسیندا؟ نئچه عصیر، هن؟ سنین، بیلدیریلری داغیتماغینی تاماشا ائتمگه، یا دا آتدیغین نوطقلاری دینلهمگه بو قدری ده گلمیر دئییل می عؤمَر بیگ؟ سنی کیم دینلهییر؟ یوْخسا اوْ گۆنلری بیلهرک می گئریده بوراخماق ایستهییرسن؟ هاردان قاچیرسان، کیمدن قاچیرسان عؤمَر بیگ؟ بورادا، بؤیوک دوْیچلندین[4] زیندانیندان قورتاریلینجا می قرار وئردین اؤزوندن قاچماغا؟ بلکه ده اؤزونه دؤنمگه قرار وئریبسن؟ آما «سنی قورتارانلارا باخ!» دئین عایشهیه نییه داشلانیرسان؟ قادینا آتیلان دایاغین حظّینی می یاشیرسان؟ ازمهنین دادینی نه اۆچون دادماق ایستهییرسن؟ یوبانمیسان، یوبانمیساااااان! آما اونودما، ازمهنین دادی سوْنسوزدور عؤمَر! سوْنو یوْخ! اویوشدوروجو باغیملیلیغی[5] کیمی بیر شئیدیر ازمک ایستگی. دایاغین دوْزونو هر گۆن آرتیرمالیسان! یوْخسا حظّ وئرمز! «هامینیز هیتلرین نوهلریسینیز!» دئمهمیشدینمی؟ دئمیشدین. دئدین. آداملار، سنین چوْخ باش قوْشمادیغین اوشاقلارین آجلیق اعتیصابینا دستک اۆچون گلمیشدیلر. ایرانلی اؤیرنجیلردن دانیشیرام. هانی، سن دوْیچلند زیندانیندان قورتول دئیه «هوْخ دی اینترناسیوناله زوْلیداریتت»[6] دئیه باغیران اوشاقلاردان! بیژن جزنینین اعدامینا قارشی دورماق اۆچون آجلیق اعتیصابی باشلاتمیشدیلار... خاطیرلادینمی؟ اوْ آجلیق اعتیصابی هئچ بیر درده دَیمهدی آنجاق! بیژن و سکگیز یولداشی، تهراندا ائوین درهسینده قورشونا دۆزولدولر. اوْ گۆن، اوْ تانیدیغین قارداش حیزبدن تمثیلچیلری ده گلمیشدیلر کؤلنـه، باخمر شتراسه دهکی[7] اؤیرنجی یوردونا. آلت مرتبه ده. چئویرمن سوسموش... سن باغیرمیشدین، «ترجومه ائت دیدی! عیناً!» دئیه… اوْ دا عیناً ترجومه ائتمیشدی: «هامینیز هیتلرین نوهلریسینیز!» سنین آلمانجان دا یوْخ ایدی، مگر یوْخ؟ هاردا قالمیشدی ایشچیلره وئردیگین اؤیوتلر؟ «یاشادیغیز یئرین دیلینی اؤیرنین یوْلداشلار»، دئدیگین! ایشچیلرین زامانی یوْخ ایدی، ایمکانلاری یوْخ ایدی، ایلیکلرینده حیسّ ائدهجکلری بیر احتیاج دا یوْخ ایدی… یا سن؟ عیناً چئویرینجه، قارداش پارتینین آداملارینین اۆزو قابیق-قابیق اوْلوب، چئویرمن سوسموشدو. اوْنلار گئتمیش، بیز قالخیب بو قهوهیه گلمیشدیک. نهدن؟ بیرا شۆشهسینی دوواردا پاتلاتماغا تاماشا ائتمک اۆچون مو، هن؟ مۆلهایما[8] می، یوْخسا ماینزا[9] می یاخین بیر ماشین کارخاناسیندا چالیشان ایشچی، بارماقلارینی سازین تئللریندن چکمیشدی، یومروق ائدیب اوزاتمیشدی سنه دوْغرو، باسمیشدی یامانی اۆزونه: «سیکدیر گئت بورادان!» اوْ هایقیریش، سنین گؤزلهمهدیگین بیر آندا می چیٛرپیلمیشدی صۆفتینه عؤمَر بیگ؟ تاخمامیشدی سنی. «سیکدیر گئت گده بورادان!» دئیینجه، سن ده منیم دۆنن گئجه آختاردیغیم کیمی امنیتی یئنمیش بیر ضامینلی پیٛچاق می آختارمیشدین جیبینده؟ اوْنلار اینقیلابچی ایشچیلر ایدی عؤمَر بیگ! ایلیگینه قدر.
قاتار دوراغیندا بیر سیغار داها یاندیردیم. بو حیکایهنی ائشیدنلردن بیری بونو حوقوق کیتابلارینا آرتیرسین؛ سوْیوققانلی دئییلسه قاتیل، قاتیل ساییلماز. دفاعیهنین کارینا گلر.
چاخیر شۆشهم یانیمدا اوْلسا، داها دا امنیتده اوْلاجاغیمی بیلیردیم. کوپهمده کیمسه یوْخ ایدی. گؤی اۆزو موْسموْر ایدی. آز سوْنرا آغاراجاق ایدی. اوْ قاتار هامبورگا قدر گئدیرمیش. سریعالسیر ایدی. هامبورگدا یئنرکن ایچیمده باغیریرام: بیلیط کوْنترولو اوْلمادان یئنیرم سنه هامبورگ! نئچه دوْیچه مارک کئچیردیم سنه، هن؟ آآآآآه ای «بؤیوک آزادلیق»ی قوزبئلینده داشییان هامبورگ!
ایرانلی فرشچیلرین آنبارلارینین اوْلدوغو یئرده کیمسهنین دیقّتینی چکمهیهجگیمی نئجه ده عاغیل ائلهدیم! هاوا آچیلمایاجاق ایدی، بللی ایدی. ایچیمی قارالدان اوْ جیٛبیلدیز، بیتمهین، اینجه ایپلیک کیمی یاغان یاغیش یئنه باشلادی. حاجی نسبلی و اوْغوللارینین یئرینه گئتمگه قرار وئردیم. ایندیکی ان بؤیوک اوْغلو نادیری گؤرهجکدیم. نئچه ایل اؤنجه بؤیوک قارداشی ناصیر قاچیریلیب اؤلدورولونجه اوْ ان بؤیوک اوْلدو. ناصیر، «آل گده باجیمی دای، سئویرسن اگر!» دئمیشدی. «سئویرم… آما قوْرخورام... آخی حوریهنی خوْشبخت ائلهینمهسم؟ هر شئیه حاییف اوْلور ناصیر!» دئمیشدیم. یا دا اوْنون کیمی بیر شئی. ناصیر، باشینی توْولامیشدی. باشینی نهدن توْولادیغینی ایندی آنلاییرام! «گده قوش بئیین، نه خوْشبختلیغیندان دانیشیرسان! یاشام بو قدر اوزوندور مگر؟ هر شئی سنین امریندهدیر مگر! دئییرسن به دۆنیا سنین کئفیوه گؤره فیٛرلانیر؟ نه پـوخ یئمگه یئکه-یئکه دانیشیرسان… آل باجیمی… اوْ دا سنی سئویر…» دئمک ایستهمیشدی مۆطلقاً. فقط آتاسی بو سؤزو ائشیتمیش کیمی تلم-تلهسیک وئرمیشدی حوریهنی باشقاسینا. بیر ایل کئچمهدن ناصیر گئجه ائوه گلیرکن، گلنمهدی! اۆچ گۆن سوْنرا دا جنازهسینی، تبریزده، تاختا کؤرپونون آلتیندا، قورو چایدا، تنیکهچیلرین، دمیرچیلرین تؤکدوکلری دمیر، تنیکه خیٛردالارینین، یاغلی قارا دسماللارین، زیبیللرین آراسیندا تاپدیلار. من خبری، ایستانبولدا، بئیازیت مئیدانینا باخان کۆللوکده ائشیتدیم. «ایندی حوریه خوْشبختدی؟» دئیه کئچیردیم ایچیمدن. خوشکابارچی جلالین بوْشقا کیمی قارنینین آلتینا یاتدیغیندا چوْخ بتر خوْشبخت اوْلور؟ اۆزو، اوْنون ترلی، قیٛرمیزی، قالین بوْینونون آلتیندا گیزلهنیرکن، نفسی کسیلیرکن، دیش قیٛجیرتیلارینی، اۆرک بولانماسینی اوتارکن؟ حوریه، اوْ آندا کوپهده یانیمدا اوْلسا، داها امنیتده اوْلوردوم. دئمک قاچان بیر آدامین یانیندا یا سئوگیلیسی یا چاخیر شۆشهسی یا دا ضامینلی پیٛچاغی اوْلمالیدیر. ائتدی اۆچ.
شاید بونون نهدنینی سوْروشاجاق قدر قوش بئیینلیسنسه هم ده سئومهسینی بیلمهمیشسنسه، آچیقلاییم: چۆنکو ضامینلی پیٛچاق دا سئودا دا چاخیر دا عاغلینی باشیندان آلار اینسانین... دۆشونه بیلمزسن، اوْندان! قوْرخو، دۆشونمنین و هئچ زاد آنلایا بیلمهگین محصولودور. آل سنه بیر درس داها!
اۆچ بئش دمیر پیللهنی چیٛخدیم. قاپی آچیق ایدی. تاوانا قدر اۆست اۆسته قاتلاناراق قالانمیش فرشلرین آراسیندا قالان بوْش یئره، چۆروک اریک رنگینه چالان قوْجامان بیر تبریز فرشی سریلی ایدی. نادیر، اوْ بیری اوجدا یئنی بیر فرش آچیردی اوْ بیریلرینین اۆزرینه.
قوْلومو قالدیراراق یۆکسک سسله، سلام نادیر، دئدیم.
«اوْوْوْوْ سلام کریم بیگ! نه خبر؟»
سینه سینهیه چیٛرپیب چیگینلریمیزی شاپپیلداداندان سوْنرا، بؤلمهلری یارییا قدر جام اوْلان بیر اوْتاغا کئچدیک.
«سن بورالاردایدین؟»
«قوللوغوندا!»
«هن بیلیرم، اوْخورسان…»
«اوْخویوردوم.»
«قورتاردی درسین اوْغول؟»
«قورتاردی.»
«وای وای وای…»
دۆگمهنی باسدی: «ةZwei Kaffee bitte!»[10]
قهوهلر گلدی. فینجانی ماسادان گؤتورهرک اییلهدیم، بیر قورتوم ایچیب ماسایا بوراخدیم. بیر سیغار یاندیردیم. قورتارینجا بیر دانا داها.
دوْداقلاری فینجاندا، گؤزلری مندهیدی. باشا دۆشوردوم. بلکه ده گئجهنین ایزلرینی سۆرویوردو اۆزومده: «جانینی سیٛخان بیر شئی می وار؟»
یئگین جاوابلاسام اؤزومو اله وئرهجگیمی باشا دۆشدوم: «یوْوْوْوْ… نییه سیٛخیلسین!» دئدیم.
«چوْخ ایچیرسن!» دئدی.
«ایش آختاریرام.»
«نئجه ده اوْلسا درسین قورتاردی، ایشی راحات تاپارسان.»
«تاپماغینا تاپارام؛ آما بیر مۆدّت…»
«بیر مۆدّت بورادا قالا بیلرسن.»
پول کیفیمی هاردا سالمیشدیم؟
یاغیش یئمیش ایٛشیلتیلی کۆچهدهکی بارا گیرمهدن اؤنجه، شالواریمین آرخا جیبینده پول کیفیمین آغیرلیغینی حیسّ ائدهرک ایچری گیرمیشدیم. احمد، کؤنولدن سیٛنیق-سالخاق اؤیرندیگی تۆرکجه ایله «بورا یاخشیدی. بوْل پۆستهلی قایماقلی قاداییف!» دئمیش گۆلموش، یاناغینداکی زیٛنیخدانی درینلشمیش، ایچری دالمیشدیق. تاخیلدیغیمیز اۆچونجو مئیخانایدی. گئجه، یارینی آشمیشدی. تازادان تۆستو، گورولتو، تر و آلکول قوْخوسونا بوْغولدوق. هامی اؤزونو دورمادان دییشیلن موزیکین ریتمینه بوراخمیشدی. «ویوا اسپانیولا!» باغیرتیلارلا سؤیلهنن ماهنیلار، سالینان کئفلی گؤودهلر، اؤپولن دوْداقلار… آلکولون و تۆتونون سیندیگی دوْداقلار. احمدین فئر قیٛسا ساچلی، تۆستولو باشی قادینین مـه مه لری آراسینا قویلانمیشدی.
عؤمَر بیگ! سن یوْلداشلارین یان-یانا دووارا قارشی سیٛرالانیب قورشونا دۆزولمهسینین نه دئمک اوْلدوغونو بیلیرسنمی؟ آجلیق اعتیصابی دا اوْن شاهییا دَیمز. قوللوغوندا نوْیمارکئتدهکی[11] تظاهراتیمیز دا، قورد کؤپکلرینین یۆگوردوگو باغیرتیلاریمیز دا، آلمان پوْلیسینین تظاهوراتا قاتیلان قیٛزلارین ساچلاریندان توتوب یئرده سۆروتلهمهلری ده دوردورمامیشدی شاهی. هامیسینی دووارا دۆزدولر. نوْیمارکئتده باتوم سینهمه گلدیگینده، صادیقین قیٛزیل کیتابی منه وئردیگی گۆن عاغلیما گلدی. بئیازیت مئیدانیندا، کۆللوکده[12]. قهوهخانا دئییردیلر. چایلاری سؤیلهمیش، بافرا سیغارینی[13] اوزاتمیش دالیسیجا دا قیٛزیل کیتابی[14] وئرمیشدی. سوْنرالاری اوْ کیتابی یازانین طیّاره سینین موْسکووایا دوْغرو اوچارکن هاوادا پاتلادیلاجاغینی، صادیقین یاخیلاجاغینی و ده تابوتونون اۆنیوئرسیتهنین اؤنوندن بئیازیتدا اؤیرنجیلر طرفیندن داشینماسینین یاساقلاناجاغینی بیلمیردیم داها. اوْ ایللر، اینانماق اۆچون ماهانا پئشیندهیدیک… دئییلدیکمی یوْخسا عؤمَر بیگ؟ آلمان پوْلیسینین ایکینجی باتوم ضربهسی باشیما یئنمیشدی. مینا، یئرده سۆروتلنهرک گؤتورولورکن باغیریر، فاشیزمی قارقیشلاییردی. هیتلرین نوهلری ها؟ کوْمونیست یوْلداشلارینا دئییردین بونو ها؟ اوْرا باخ!
احمدین، قان ایچیندهکی آغزینی بورنونو داشییانمایان سرسم گؤودهسی قوْلوما چیٛرپیلیب، ایچینده کیچیک ووْدکا بارداغی اوْلان بیرا بارداغیم الیمدن فیٛرلایینجا، اۆزومون اوْرتاسینا بیر یومروق ائندی. مۆزیک، عینی سۆرعتله داوام ائدیردی. عینی کاوبوی فیلملریندهکی کیمی ایدی. هامی هامینی یومروقلاییر، آجی وئرمکدن و آجی چکمکدن حظ آلیردی سانکی. احمد، یئرده قیٛورانیرکن آلمانلارا و آمریکالیلارا، آذربایجان تۆرکجهسی ایله، اؤز آنادیلی ایله سؤیوردو. دئمک سؤیوشلرین دادی، آنادیلین سیٛرریندا گیزلیدیر. سؤیمهنین، سؤیوشون کؤکو، ان جانلی گئنیمیزده گیزلیدیر دئمک. سؤیمک ده سئویشمک کیمی بیر شئیدیر. آنادیلینده اوْلمالیدیر. یوْخسا دادی اوْلماز!
قیٛرمیزی ایٛشیقلارین دوستاق آلدیغی هاوادا، احمدین الیندهکی ضامینلی پیٛچاغین پاریلتیسی دَیدی گؤزومه. کیشینین ساغ بؤیرونه گیریب چیٛخدی. گیریب چیٛخدی. یانیندا اوزانان کئفلی کیشی قیٛمیلدامادی دا. کیمسه متوجه اوْلمادی. ضامینلی پیٛچاغی الیندن قاپدیغیم کیمی جیبیمه آتدیم. قادین، احمدی قوْلوندان توتاراق قالدیردی: «راوس! راوس[15]!» دیٛشاری، البته! گؤرمهمیشدی مۆطلقاً. گؤرسه، بئله گیرردیمی احمدین قوْلونا! گیرردی. تام زامانی ایدی چۆنکو. بونو دا ایندی سیزه آنلادیرکن آنلاییرام. پهو!
پول کیفیم اوْرادا دۆشموش اوْلا بیلر. یا دا قادین ایکیمیزی ده سوْیوب یاتاغینا یاتیریرکن، شالواریمی سیٛییریب فیٛرلاتدیغی یئرده. اوْ آغ، اوزون تۆکلو یوموشاق درینین اۆزرینه دۆشموش اوْلا بیلر.
[1] . Kiel
[2] Grosse Freiheit
[3] Cologne
[4] Deutschland
[5] . مخدّر مادّهلره اعتیاد
[6] Hoh di internasiyonale zolidaritet
[7] Bahemer Ştrase
[8] Mülhaym
[9] Maynz
[10] . آلمانجا: ایکی قهوه لۆطفاً
[11] . Neumarket: آلمانین کؤلن شهرینده شهر مرکزینده بیر محله آدیدیر.
[12] . کۆللوک چوْخ مشهور قهوهخانا آدیدیر. ایستانبول بایازید مئیدانیندا ایستانبول اۆنیوئرسیتهسینین و صاحافلار چارشیسینین (کؤهنه کیتاب بازارینین) قارشیسیندا اوْلاردی.
[13] . بیر زامانلار تۆرکیهده یایغین اوْلان اوجوز سیغار آدیدیر.
[14] . «قیٛزیل کیتاب» مائو تسه تونگون کیتابیدیر. اوْ ایللر چین کۆلتور اینقیلابیندان سوْنرا چوْخلو گنج مکتبلی اینسان اوْخویاردی.
[15] Raus, raus!
ایکینجی بؤلوم اؤلومو گؤزلریندن گؤردوم - (روْمان – ایکینجی بؤلوم)
No comments:
Post a Comment