May 21, 2018

آنتی آذربایجان، ایرانپرست تورانچیلار: مئهران باهارلی و علی تبریزی

محمد آزادگر

مئهران باهارلی اؤز فیسبوکوندا علی تبریزی‌نین بیر نئچه یازیسیندان پارچالارسئچیپ وبیربیرینه قوراشدیریب «علي تبريزي ايستالينيست آزه‌ربايجانچي و پان ايرانيست آزه‌ريچيله‌رين ايچ اوزونو ايفشا ائدير» باشلیغی آلتیندا پایلاشیب. *
من 1348-1349 - جو ایللرده تهراندا علی تبریزی ایله گوروشموشم. من او زامان علی تبریزینی یاخیندان تانیمازدیم. آنجاق یازیلاری وباخیشلاری ایله تانیش ایدیم. اوتهراندا تانینمیش تورانچی وپان تورکیست ایدی. منی اونلا تانیش ائدن حسین محمد زاده صدیق اولدی.
اوایللرده من محصیل ایدیم وصدیق تبریزدانیشگاهیندا دانشجو(طلبه ) ایدی. بو منيم ايکينجى دفعه تهران گئتمگيم ايدى. صدیق علی تبریزی‌نی یاخشی تانیردی. علی تبریزی سنگلج پارکی‌نین (پارک شهرین) قاباغیندا بیربالاجا دکه ده کیتاب ساتاردی (آتروپات کیتاب ائوی). او کیتابلارینی خیابانین قيراغيندا سکى‌ده دؤشردی.
علی تبریزی بیرتورانچی ایدی، کیمسه اونو جیدی توتمازدی. چونکو او دؤنمده آذربایجان توپلوموندا، ایندیکی کیمی بئله باخیشلارا یئر یوخ ایدی. اوسته لیک، او دؤنمده آذربایجان ضییالیلارینین وسیاسی فعاللارینین ایچینده سولا قارشی هیستئریک دوشمنچیلیک یوخ درجه‌سينده ایدی.
رضا هیئت  دوکتورجواد هیئت ین دیلیندن بئله یازیر: «دکترهیئت دئیردی کی، تورکچولوکده اومندن اؤنده دیر.چونکو او تورانچی دیر» و ارسان ارل، مئهران باهارلی نین فیکیرداشی یازیر: «استاد تبریزلی علی، بوتون یاشامینی تورکچولویه آدامیش، تورک قیریملاریلا سارسیلمادان ساواشمیشدیر. او، بیرباشینا بیر تورک یوردو، تورک عسکری، تورک عسکرینین باش کوموتانیایدی. اونون یانیندا اینسانین تورکلوک دوروشو یوکسکلرده اولوردی»
بوگون، مئهران بهارلی اونون اوتوز- قیرخ نئچه ایل اؤنجه‌کى تورانچیلیق یازیلارینی وباخیشلارینی تبلیغ ائدیر! مئهران باهارلی سورگونده گؤنئی آذربایجان (ایران) قلم انجمنی‌نی تاپدالاماق وداغیتماق اوچون علی تبریزی یه پناه گتیریر. مئهران باهارلی علی تبریزی‌نین بیر نئچه یازیسیندان پارچالار سئچیب ویان یانا دوزمکله چاليشير آنتی آذربایجان وتورانچیلیق دؤشؤنجه لرینى آذربایجانین میلی – دموکراتیک حرکتینه سيريسين . مئهران باهارلی فیسبوکدا  یازیر: «منجه بویازی تام دا سؤزده انجومنی قلمی آذربایجان جنوبی واونو قورانلار حاققیندا یازیلمیشدیر.»
مئهران باهارلی  آنتی آدربایجان دؤشونجه لرینى آذربایجان میلی حرکتينه تحميل ائتمک اوچون علی تبریزیدن آشاغيداکى سيتاتى گتیریر:
«ايران توركله‌ريني يالنيز آزه‌ربايجان آدلي قفه‌سده دوستاق ائده‌نله‌رين حييله‌سيني هله‌ليك بوتون ايراندا اولان تورك قارداشلاريميز آيدينجا گؤز ائوينه آلماييپلار و بوگون روسييه`ده، آوروپادا، ايراندا بيزه تورك يئرينه آزه‌ربايجانلي آديني گوج و سماجت ايله تحميل ائده‌نله‌رين هده‌في بودور كي بيزه تلقين ائتسينلر كي تورك فقط آزه‌ربايجاندا اولابيله‌ر. او يئرده اولان زاماندا، هله تورك يوخ، بلكه "آذري" آديني آلابيله‌ر. بس گؤرونور كي آزه‌ربايجان و آزه‌ري كليمه‌له‌ريني نه اوچون سماجت و گوج ايله ايشله‌ديرلر»**
علی تبریزی «ایران تورکلرین» آذربایجان آدلی قفسده  دوستاق گورور! اودور کی آذربایجان وآذری تئرمینلرینه حساسیت گؤستریر وبو تئرمینلر ایله دوشمنچیلیک ائدیر! بو او حساسیت دیر کی مئهران باهارلی واونون کیمی تورانچیلاردا جیدی شکیلده گؤزه چارپیر.
علی تبریزی خاليص ایرانپرست تورانچی دیر: « ایران، بوتون ائللرین و قوملارین وطنی اولدوغو کیمی، بوتون تورک ائللرینین ده دوغما وطنیدر، اوحالدا، آذربایجان آدیندا اولان کیجیک بیر ئولوچی و جیزق، یالنیز بیر نقطه واستان آدیدر که مملکتین اداری تقسیماتی اوچون منظوردادر... بیزیمکی توپراق واوستان دعواسی دگل، آدیمیز توپراق ئولچوسونده وجیزیق اورتاسیندا اولابیلمز، بلکه وگئنیش بیر هویت وفرهنگ دنیاسین دادر.» (دیل وادبیات ص129-130) ***
آذربایجان آدی ایله دوشمنچیلیک وآذری کلمه سینه غئيرعادى حساسیت گؤسترمک وتورکچولوگه وتورانچیلیغا حئیران اولماق هم تبریزی ده وهم باهارلی دا و اونون فیکیرداشلاریندا موشترک دیر.
مئهران باهارلی، علی تبریزی‌نین آذربایجانا وسولا وائله جه ده آذربایجان جمعیت وتشکیلات لارینا اولان نفرتینی تکرارللاییر: «انجمنلرین , و جمعیتلرین ایچینه گیرن سولچولار , قاباقجادان نفوذ ائتمک اوچون تعلیم گوروب و تمرین ائدیبلر و سونرا ملی و هر عنوان ماسقاسین ووراراق میکروب لار کیمی انجمنلرین و جمعیتلرین ایچین چورودوبلر و سونرا اونون لاشه سیندن تغذیه ائتمگه باشلایبلار .»  بو سؤزلر آنجاق بیر روحی خسته لیکه دوچار اولان آدامین سؤزو اولا بیلر!
علی تبریزی ایران پرست تورانچیلیغینا گؤره حتا  آذربایجانلی لارین بیرجه ادبی محفیلینی بئله تحمل ائده بیلمیر! او اؤزو اعتراف ائدیر: « 1336 دا آنا دیلیمیزده ادبیات اوچون محفل قوردوم. بومحفلی بیر پارا موضوعلارا گؤره پوزدوم وسونرا 1338 ده یئنه بیر باشقا مخفل قوردوم و بوندادا چوخوسون سولچی گؤردوگوم اوچون بوراخدیم و...  بومحفل لری هربیر نئچه مدتده  پوزدوم، وسونرا بیر آیری محفل توپلایردیم، ویئنه ده 1342ده بیرمحفل باشلادیم، ولی بوسونکی اولاندان آیریلدیم... » ادبی محفللر(ص115دیل وادبیات)
سلام الله جاوید « دوستلار گؤروشو» - ادبیات اوجاقی – آدلی کیتابیندا او ایللرده یارانان محفیل لر حاقیندا چوخ دیرلی وگؤزل بیلگيلر وئريبدير.
دوکتور فرزانه اؤز خاطراتیندا بئله  یازیر: «1336نجی ایلرینده «حیدربابا محفلی» قورولدو. بو محفله بیر چوخلو ادبیات و معاریف خادیملری او جومله دن کار و لال لار مدرسه سی نین قوروجوسو میرزا جبار باغچه بان (عسگر زاده) ، بیر چوخ تاریخی و بدیعی اثرین یازاری نصرت الله فتحی (آتشباک- آتش بیگلی)، شاعیر و ادیب محمد علی آذری، یازار وعدلیه نین اونلو وکیلی  دکتر حسینقلی کاتبی، ایجتماعی خادیم دکتر سلام الله جاوید، بؤیوک یازار  گنجعلی صباحی و بیرده من و سهند قاتیلمیشدیق. بو سایی گئتدیکجه چوخالیردی و بیر سوره سونرا علی تبریزی، مجید حسن زاده (ساوالان) و سونرالاردا بیر نئچه نفر کی آدلاری سلام الله جاویدین یازدیغی  «دوستلار گؤروشو» کیتابیندا یازیلیبدیر بو جامعه یه قاتیلدیلار. » (اوستاد فرزانه نین خاطیره لری» کیتانیندان- صدیقه عدالتی )علی تبریزی بومحفلی  داغیدا بیلمه دیگی اوچون بو محفیلدن اوزاقلاشیر.
علی تبریزی اونون کيمى دوشونمه‌ين وتورانچى اولمايان هر بير محفيلى داغیتماق ایسته‌ییر.  مئهران باهارلى‌نين دا عمللرى و گؤردوگو ايشلرى اوندان اسکيک دئييل.
مئهران باهارلی نين يازديغينا گؤره، علی تبریزی،  استالینیست  آذربایجانچی لاری افشائ ائدیر! بو سؤز اویدورما دیر. علی تبریزی ‌نین یازیلاری گؤستریر کی، او لنین و استالین دن و ائله جه ده اکتبر اینقلانیندان بیلگیسی یوخدی . اونون بیرطرفدن سولا وسولچولوغا عجیب- غریب کینه ونیفرتی وار و اوبیری طرفدن ده بیر استالینست دیر. او «روسیه ده دیل مسئله سی» عنوانلی یازیسیندا استالین دن بئله یاد ائدیر:
«...بئله بیر اضطراری زمانلاردا میدانا گیرمک ومیدان دولاندیرماق عادتی اولان بویوک استالین، بورادا چیرمالانیب اورتایا گلدی...(ص108 دیل وادبیات) وباشقابیر یئرده «گئچمیشده کیلر وبیز»عنوانلی مقاله سینده استالین حاققیندا بئله یازیر:« استالین، تزار دولتینه تابع گورجی ملتینه باغلی اولدوغو اوچون، ملی ستمین آجی دادین اونوتمامیشدیر وبیلیردی که هربیر ، ملی فرهنگ وملی حقوقوندا مستقل وآزاد اولماینجا، هیچ بیر آلدادیجی(انسانی) شعارلارا ووعده لره اینانماق  دوزگون ویئترلی دگل.» (ص104 دیل وادبیات ) علی تبریزلی بویازیلاردا بیر استالینیست کیمی چیخیش ائدیر.
مئهران باهارلی آذربایجانلا وائله جه ده سول ایله دوشمنچیلیگین «استالینیست آذربایجانچی»، «اوتانجاق پان ایرانیست » و... تؤهمتلر  آلتیندا گیزلدیر.
مئهران باهارلی علی تبریزی نین مشروطیت  نهضتی حاققیندا  تورانچی باخیشینی دا اورتایا آتیر:
«مشروطييه‌ت دؤورونده اؤز اليميز ايله تورك تؤره‌سي اولان قاجاري ييخديق.  » مئهران باهارلی یه خاطیرلاتماق لازیمدی؛ مشروطه انقلابینین اؤنجوللری ائله آذربایجانلیلاروتورکلر اولموشلار.« قاجار سولاله» سینین جیدی مودافیعه چی لری شیخ فضل الله نوری و تهرانین امام جومعه سی و بوکیمی لر  اولموشلار. قاجارلارين تورک اصیلی اولماقلارینا رغمن  تورک میلتینین  قاتى دوشمنی اولموش لار. قاجارلارین درباریندا فاسید تورک و فارس عونصور لری چییین چییینه بوتون ایران اهالیسینین قانینی شوشه يه توتموشلار.
تهرانی باش کند ائدن ائله آقا محمد خان قاجار ایدی. ائله بو آقا محمد خان گورجی لرله ساواشدا سربازلارین تهییجی اوچون فرودسی نین شاهنامه سینی اونلارا اوخوریوردی. قاجارلارین فارس دیلینین ایراندا یاییلماسیندا بویوک رول لاری اولموش دور. فردوسینین شاهنامه سی آقا محمد خان قاجارین «بالینی» کیتابی ایدی.
قاجارشاهلارینین فارس ديلى نين ایراندا یاییلماسیندا و رسمیت تاپماغیندا بویوک روللاری اولموشدور.فتحعلیشاه دا آقامحمد خان کیمی شاهنامه آزار کشی(طرفدار)ایدی. قاجارلارین 150 ایل حاکیمییتی دوورونده فارس دیلی تورک دیلینین یئرینده اوتوردو. فتحعلیشاهین اوغلو جلال الدین میرزا قاجار، ایفراطی فارس ناسیونالیستی و« پارسی سره یا زبان پاک» ی اشاعه و ئرنلردن بیری ایدی.قاجار شاهلاری آذربایجانلیلارا و تورک هوویتینه جیدی ضربه لر ووروبلار.
مئهران باهارلی دوشمنچیلیگین پیشه وری یه، آذربایجان میلی حکومتینه وآذربایجان دموکرات فیرقه سینه علی تبریزی نین دیلیندن بئله نقل ائدیر:
«هابئله فيرقه‌ده ميللي آد ايله اوزه‌ريميزه روس قييافه‌سينده كومونيستله‌ر چيخدي »
بوباخیش وبئله سؤزلرپان ایرانیستلرین، شاهچیلارین وبوتون آذربایجان دوشمنلرینین باخیشی وسؤزو اولوبدور. آذربایجان دموکرات فیرقه سینه وآذربایجانین میلی حکومتینه وپیشه وری یه بوندان بؤیوک اهانت ودوشمنچیلیک نه اولابیلر؟
مئهران باهارلی نین مورشودو واؤنده ری علی تبریزی «گئچمیش ده کی لر وبیز» آدلی یازیسیندا یازیر: «1338 ده واحدی(واحدین غزللرین) دؤزگون اولاراق چاپ ائتدیم که اونی وبیر چوخلی تورکجه کتابلاریمی امنیت اداره سی توتدی وسونرا آرا- سیرا تورکجه کتابلاری چاپ ائتمگه ادامه وئردیم وحتی شهربانی اطلاعلات ماموری محرم علی خانین قورخوسوندان گئجه لر چاپخانادا یاتیردیم» ص106.  دیل وادبیات
بوایلرده هله آذربایجان دموکرات فیرقه سی، ایران توده حیزبی ایله وحدت ائتمه میشدی. حزب توده ایله فیرقه نین وحدتی 1339- جو يلده باش توتور. فیرقه نین عضولری بووحدت دن خبرلری یوخ ایدی. مهاجرت ده ده  فیرقه ایچرینین فعالیتلریندن خبرسیزایدی.آنجاق فیرقه عضولری  وهوادارلاری گیزلی فعالیت ائدیردیلر.ائله 1338- جی ایلده علی تبریزی واحدین غزللرینی چاپ ائدن و چاپخانادا یاتدیغی زامان،  120 فرقه چی تبریزدن وآذربایجانین بوتون شهرلریندن ساواک  طرفیندن حبسه آلینیب وتبریز ین ساواکیندا وتهرانین قیزل قلعه ایشگنجه گاهیندا آغیر ایشگنجه لره معروض قالمیشلار. علی تبریزی محرم خانین قورخوسوندان چاپخانادا یاتان زامان قیزل قلعه ده  شاهین  تهلوکه سیزلیک اورگانی ساواک ، فیرقه چی لرین دریسینی  سویوردو!
آذربایجان خالقینین  فیرقه چی فداییلری دسته – دسته نیظامی دادگاهلاردا (حربى محکمه‌لرده) محاکمه اولوب ، اعداما  وآغیر حبسلره محکوم اولوناندا، علی تبریزی آذربایجانلیلارین ادبی محفیلرینی داغیدیردی!  نیظامی دادگاهلاردا آذربایجانین قهرامان اوغلولاری اعداما وآغیرزیندانلارا محکوم ائدیلنده  و جواد فروغی، ایوب کلانتری، علی عظیم زاده جوادی، خسروجهانبان آذروحسن زهتاب 1339دا تبریزده اعدام اولاندا و اون لارلا فرقه چی ****جوانلیقلارینی شاه رژیمینین زیندانلاریندا چورودنده ، علی تبریزی تورانچیلیق عشقی ایله فرقه چی لره سالدیریردی . ایندی بیزه مئهران باهارلی بیر تورانچی نین قارماقاریشیق یازیلارینی مونتاژ ائتمکله سورگونده گؤنئی آذربایجان  قلم انجمنینی داغیتماق ایسته‌يیر. تاماشالیدیر!
علی تبریزلی بولود قاراچورلو- سهند حاققیندا بئله یازیر: « انقلابدان سونرا، الکل ومشروب اثرینده سکته ائدیب اؤلن شاعرجیک ، باصطلاح سهند، اوچون هربیر نئچه مدتده، جواد نامه( وارلیق) ده یازیلان اوزاندیرمالار، ملی مسئله نی، بیر خانوادگی حدینه کیمی آشاغی سالماقدان باشقا نه اولا بیلر؟»ص122 دیل وادبیات
استاد محمد علی فرزانه «دده مین کیتابی» نین مقدمه سینده یازیر:
قانا بویانمیش آذربایجاندا کؤزرن اوجاق سؤنمه دی. بو آغیر ایللرده بولود- ب.ق.سهند- ده بیر چوخلاری کیمی، میلی-اجتماعی فعالیتلر نتیجه سینده ایکی دؤنه توتولوب محکمه یه وئریلیر. زیندان شرایطی و دیدرگینلیک اوندا گونو- گوندن میلی شعورون داها دا جانلانماسینا سبب اولور.او 53-1951 ایللرینده زینداندا ایکی بؤیوک منظومه، بیریسی «آراز» و او بیریسی«خاطیره » نی یازدی. بو منظومه لرده او اورک آغریسی ایله آرزولارین هئچه چیخدیعیندان خلقین آجیناجاقلی و دؤزولمز حیاتیندان، آذربایجاندا حاکیم کسیلمیش دره بگلیگ و اؤز باشینالیقلاردان، یوردون تاریخین شوم طالعی نتیجه سینده ایکییه بؤلوندوگوندن، بیر خلقین اؤز آنا دیلینده یازیب اوخوماق اوچون بلالارا توش اولماسیندان سؤز آچمیشدیر.(ص. 6 دده مین کیتابی)
1953-جو ایلده باش وئرن کودتادان سونرا عؤمرونون اساس حیصه سینی تهراندا یاشاماغا مجبور قالان سهند، یالنیز خلقیمیزین ابدی حماسه سی ساییلان دده قورقود داستانلاریندان شعر هئیکلی یاراتماغا کیفایتلنمه میش بلکه او بو ایللری اؤز یارادیجیلیغی نین ان ثمره لی ایللرینه چئویرمیشدیر. بو آغیر ایللرده او بیر طرفدن بیر میللی شاعیر کیمی دیلینی دانانلارا، میلی- تاریخی وارلیغینا خور باخانلارا آمانسیز آتش آچدیغی حالده، او بیری طرفدن بیر اینسانلیق و حقیقت جارچیسی کیمی دونیادا، ویتنامدان توتموش اسپانیایا و کوبایا قدر خلقلرین آزادلیق و قورتولوش اوغروندا موباریزه لرینی آلقیشلامیش و بو آزادلیق و قورتولوشو قانا چکنلره نفرت یاغدیرمیشدیر.او حتی وقتییله چوخ حؤرمت بسله دیگی شورالار بیرلیگینده اولان یارامازلیقلارا و چاتیشمازلیقلارا توخونماقدان چکینمه میشدیر.(ص15دده مین کیتابی)
شهریارین حیدر بابا یا سلام وسهندیه  وباشقا شعرلری ، یا سهندین شعرلری ومحمد علی فرزانه نین وحسین محمد زاده صدیق ین ومحمد تقی ذهتابی نین ورحیم رئيس نیا نین وبهزاد بهزادی لارین و ... ایشلری ویاراددیقلاری اثرلربؤیوک میقیاسدا آذربایجا نلی لارین مدرن میلت لشمه سینده و یوکسک میلی شعورا صاحیب اولمالاریندا جیدی تاثیرلری اولوب! علی تبریزلی نین  ومئهران باهارلی نین آذربایجانین میلی – دموکراتیک حرکتینده  ویاخود آذربایجانین تانیتیمیندا ویا میلی ادبیاتینین دیرچلیشینده هئچ مثبت تاثیرلری اولماییب!  مئهران باهارلی نین سورگونده گؤنئی آذربایجان (ایران) قلم انجمن نین علیهینه توطئه لری، تؤهمتلری وسالدیرمالاری اونون ضد آذربایجان وایران پرست تورانچیلیغینی آچیق - آیدین گؤستریر!


** مئهران باهارلی دان سیتات لار اونون فیسبوکدا پایلاشمیش یازیسیندان دیر. اونون یازی شکلین ديیشمه میشم.
*** علی تبریزی دن گتيريلن سیتات لار اونون دیل وادبیات آدلی کیتابینین 1360 نجی ایل آتروپات کیتاب ائوی نشریندن دیر.من اونون املا شکلینی ساخلامیشام
**** نمونه اولاراق عزیزیمیز مجید امین مؤید 1338 - جی ایلدن 1356 - جی ایله دک  آذربایجان دموکرات فیرقه سینه  باغلیلیغی اوچون شاه رژیمینین زیندانلاریندا ساخلانیلیب. او اول اعداما محکوم اولموشدو، سونرالارا اعدامی، ابد  زیندانینا دؤشورولدو ( من ائله بورادا اونا جان ساغلیغی واوزون عؤمور آرزو ائدیرم. ) من هله بورادا صفرخان واحمد آهنگران‌دان کی اوتوزایلدن چوخ شاهین زیندانلاریندا عؤمورچوروتموشلر، سؤز آچمیرام! ( بو یازی یازیلان زامان مجید امین مؤید وفات ائتمه میشدی)


No comments: