ینی ایلینیز اوغورلو اولسون


Jan 10, 2015

پاريسين "شارلی ابدو" مجله سينده اوز وئره ن جنايتى محكوم ائديريك.

گونئى آذربايجان (ايران) قلم انجمنى 
چرشنبه ژانويه آيينين ٧ سينده، جنايت و ترور دهشتلى شكيلده، يئنه پاريس شهرينين سماسينى بورودو. بو كز بئينى بوش و افراطى اسلامچى شخصلرين واسطه سيله آتيلان گولله لر، پاريسين "شارلى ابدو" مجله. سينين، كاريكاتوريست و ژورناليستلرينين دؤيونن قلبينى نشانه گئتدى و بيزيم بو قات - قاريشيق دونياميزى داهادا قاريشديردى. بو جنايت ١٢ نفرين اؤلومونه سبب اولدو. اونلارين ايچينده ژورنالين باش رداكتوروندان باشقا، فرانسه نين ٣ بؤيوك و دونيا شهرتلى كاريكاتوريستى و ٢ نفرده پوليس واردير. جنايت هر هانسى دينى اورگانين طرفيندن اولورسا، هر هانسى بهانه يه دايانيرسا، هر هانسى هدفى گؤز اؤنونه آليرسا، نتيجه سى چوخ آيدين شكيلده بللى دير: "دموكراسى يا دوشمنليك" و "قلم آزادايغينا قارشيليك!" معلومدير كى بئله ايرگنج جنايتلر هر شئى دن اول فرانسه و داها دوغروسى آوروپا اؤلكه لرينده، آرانى قاريشديرماغدا، اولترا ساغ و فاشيستى قروپلارين الينه بهانا وئرمكده چوخ بؤيوك رول اوينايير. "گونئى آذربايجان (ايران) قلم انجمنى" آديندان بو بشريته ضد جنايتى و بو قلمه قارشى دهشتلى فاجعه نى محكوم ائده رك، آرزو ائديريك كى قلمه، ادبى - بديعى ياراديجيليغا و هابئله ادبى كريتيكه حرمت قوياراق، بير چئشيدلى  دونيانين يارانما امكانى بوتون توپلوملاردا و داها دوغروسو بوتون اوره گلرده و بئيين لرده گونو گوندن آرتيب و چوخالسين!
"گونئى آذربايجان (ايران) قلم انجمنى" 

No comments:

Post a Comment