قهرمان قنبرى
اوختايين آدينى دوستاق بلندگوسوندان چاغيرديلار،سون محكمه واريدير دئديلر، سويوخ قانلى پالتارلارين گئيب و قاپيدا گوزله ديغى مامورلا يولا دوشدو، آستانادان ديشارى يا چيخينجا بير دوروخدو و گونشه باخيب و سونرا باشين آشاغى يا ساليب يولا دوشدوب آرابايا مينيب محكمه يه سارى يولا دوشدولر.
يولدا مامور سورجويه دئردى بو سون محكمه سى دير، سانيرام دا بونون دا شريندن قورتولاريق بو تئزليخدا. شوفر دئدى يانى بو دا حاجى يولچودور؟ مامور برَكدن قهقه چكيب و اَللرين ديزلرينه چالاراق دئدى:
حاجى بيز چوخلارين يولا سالميشيق گئديب، بودا بيرى.
شوفر او حالدا كى آرابانين داليندا هوبانيب توشوردو اوزون مأمورا سارى توتوب دئدى: محبت ائليه م بيله سينه، چاى وئرم يازيخ دير، نه اولورسا اينسان خوش خاطيره لرله آيريلسا ياخچى دير. بير ده بلكه وصيت زاد ائلدى و بير ايشى زادى اولسا تاپشيردى بيله ميزه اونودا گوره ريخ، نه اولسا قولون سينيغى بوينونون دور. مثلاً گوزل خانيمى وار ائشيتميشم و يا گوزل بالاجا قيزى وار كى بويودوغو زامان بيزه يئتيشه بيلر!
اوختاى هئچ سانكى بو دونيادا دئيل دى، او قيزى گونايى دوشونوردو، اونون ايندى ٦ ياشى اولاردى و ايندى ٣ ايلدير كى او حبسيخانلاردا سورغو – سوال آلتيندا اولانان برى اوندان آيرى ياشايير و اونو قوجاخلايب اوپمويوب. اوچ دورد سرى بيله سينه گوروشمه حاقى وريبلر شيشه داليندان، اما اورمودان – تهرانا گئتمَك ده چتين ايش دير، بيرده اوختاى دا راضى اولموردو كى اونلارا بو اوزاق يولو بو يوخسولوق چاغلاريندا اونلارا تحميل ائله سين، آخى توتولانان سونرا اوختايين حقوقو اوتوماتيك اولاراق قطع اولدو و ناهيدى دى ده معليم چيليغ ايشيندن چيخارديلار، اودا ايندى هم خصوصى اولاراق بعضى اويرنجى لره درس دئير، بيرده تورشو زاد قويوب ساتير و اونان گوناي يين و اوز باشين دولانديرير. پرده نين آرخاسيندان گويلره باخيب و بير ناهيدن- گونايى دوشونور و بيرده گوى ده اوچان آزاد قوشلارى. بوحالدا مامور بيله سين تَكمه ليه رك سوروشدو : هوى اوختاى وصيت زادين يوخدور بو آقاى شوفر ياخچى آدام دير يئرينه يئتيرَر! اوختاى دينمه دى ، بو حالدا شوفر مأمورا دئدى بير چاى وئر بيله سينه بلكه ديلى آچيلدى، مامور فلاسك دان بير بارداق چاي توكوب و اوختايا سارى توتدو، اوختاى باشين توولادى و اوزون او بيرى طرفه چئويردى. بو حالدا مامور ايستى چاى تام اوختايين اوزونه سپيب و تام گوجوله او حالدا كى اوختايين اَلى و آياقلارين قاندالدان باغلاييب لار اونون بورنو- باشين يوموراق لارينين آلتينا آليب و باغيرا – باغيرا دئدى: بو گون آخير گونون دور و داها گوزل آروادينى و قيزينى گورمويه جخسن، آروادين و قيزين صاحيب سيز قالاجاخ، او حالدا كى اوختايين ياخاسيندان توتموشدو و پيس نفسين آوختايين اوزونه ووروردو باغيريردى: بيليرسن دئديخلريم يانى نه ؟ يانى بو رحم سيز توپلوم دا قيزين و آروادين بيزيم اَللرده قالاجاخ! يانى بير توپ كيمى من پاس وئره جه يم شوفيره، او آيرى بيرينه و او بيرى ده اوبيرسينه! بو حالدا شوفير آرابانى دوردوردو و يواشجا مأمورا دئدى : آى قارداش بيراز ياواش ياخين گلجك ده او بيزيم قوهوم اولاجاخ، نه اولسا آروادى و قيزى بيزم أللرده اولاجاخ، بيراز قايين آتا و آروادين اسكى اَرينين احترامين ساخلا!
اوختاى باشين قوزادى و او حالدا كى بورنونان قان آخيردى ايسته دى بير شى دييه، اما شوفريين و مأمورون اوزون گوردوخجه اونلارا يازيغى گلدى، فقط مأمورا ياواشجا دئدى لطفاً فاصيله لى دانيشين آغزين مستراب كيمى قوخور.
شوفرده مأمورون يارديمينا گلدى و بو سرى ايكى يانا اوختايى دويوب يامان – يؤوز دئيرديلر، شوفر دئيردى سنين غيرتين اولسايدى او گوزليخ دا آروادى بى صاحاب قويوب و اوچ – دورد صفحه دَيَرسيز يازى يا گوره اوزونو اولومه وئرمزدين. سن بى غيرت سن، حتى بو توپلوم و جامعه ده قارداش – قارداشا رحم ائله مير و سن عاقلسيز اوز حياتينى بو توپلومون ايصلاحينا گوره خطره ساليرسان! او حالدا كى اونلار ايكى جاميش گيبى اوختايى دويوردولر، اوختاى ايستيردى بير سوز دييه اما دوشونوردو كى بونلار اورگنيبلر كى قولاق آسمايالار، او دوشونوردو كى بونلار او دئديغى سوزى هيچ آنلامازلار، او جيسمى و اورگَى آغريسادا روحى دينج دير، او حتى بو اينسانلارى سعادتى ايچون جانين خطره سالميش و ايندى بونلاردا انون اؤرگينه يارا ووروب و جسمين اَزيلر. اوختايين گوزونون قاباغين قان توتوب و اونو الى باغلى اولدوغو ايچون سله بيلمير، او دوشونور كى دوشمنى اولدوغو حكومت بويوك ظلوملرى اينسانلارى توتوب و آزيب و اونلارين مال لارينا اَل اوزادمالارى دئيل. او اينانير كى بو حكومتين بويوك سوچو اينسالارى اينسانليغ توره لريندن آييرماسيدير، او حالدا كى حاكيم لر ايدعا ائليرلر اينسانلار اشرف مخلوقات ديلار، انسانلارى حيوانلاردان اسكيك مقاما نزول وئرمه لرى دير. اصيل يارا اونون جسمين ده دئيل اونون اورگينده دير، اونون هر زامان اورگَى آغريير، بونا گوره كى هر زامان اينسانلار آكتيو اولاراق اوز اينسانليغ لارين بئش قوروش پارا، شهرت و شهوت ايچون اوز گونولريله قوربانليق وئريلر. بو حالدا شوفردن- مامور يورولوب و محكمه زامانين الدن وئرمه سينلر دئين يولا دوام وئرسينلر دئيه اوز يئرلرينه دونوب و اونو اوز حالينا بوراخيلار. او باغلى قولارينان اوزونده كى قان لخته لرين سيلير و چابا گوسترير كى جيسمينده كى آغرييا فيكير وئرمه سين، آرتيق محكمه قاباغينداديلار، آرابا ساخلادى و مامور باغيردى توش آشاغيا. اوختاى سينه سين قاباغا وئريب و آغرينى حيس ائتمير گيبى آرابادان آشاغى إنيب و ديشاريدا بير تميز هاوادان بير نفس چكيب وآياقلارينين قاندالاريلا محكمه يه سارى يولا دوشدو.
داليندا كى مامؤر بيله سينه بير تَكمه وُردو و غضب دن دئدى:
نه اولوب يا سكوتا جوموبسان و يا گويلره باخيرسان، دَلى.
دونوب و بير اوزونه باخيب گولومسه نيب اونون صيفتينده يازيق ليغى و بدبختليغى گوروب و تيكرار باشيينى آشاغى يا ساليب، يولونا دوام ائتدي.
محكمه يه گيريب و حاكمين قارشيسينا چيخدي.
حاكيم او حالدا كى اوزونه چوخ گؤونيردى دئدى: سنه اورگدمييبلر كى ايچرى گيردين و يا اوزونن بويوكلرين محضرينه گئتيغين زامان سلام وئرلر.
اوختاى گوزلرين زيله دى حاكمين گوزونه و جواب وئردى: بويوكلوخ عيارلارى فرقلى دير، چوخ زامان دَوه و جاميش البته مندن بويوكدور و اونلارى طويله ده گورنده سلام وئره رديك و البته اونلاردا جواب وئرمزديلر و بعضى زامان بوينوزلارديلار سلام وئره نى. اونان سورا اورگنديخ كى ديل بيلميَن جانلى لارا سلام وئرمك هدردير و اوندان سونرا ديل بيلمين جانلى لارا سالام وئرمه نيخ حتى اگر فيل دن ده بويوك اولسالار .
حاكيم او حالدا ائله جاميش گيبى بوينوز تولويوردو اونا خطاب دئدى: گورورم كى هله ادام اولمويوبسان و هله ديلين بى باردان آجى دير، صيفتين بونو گورسه دير كى مامورلاريميز ياخچى قوناق پرورليغ لرى وار. ايندى أوتور و ايتهاملارينا قولاق آس:
شعر يازماق، حاكميته قارشى اورگوت قورماق، عصيان دوشونجه سينده اولماق سؤچلامالارين قبول ائديرسن يا يوخ؟ اوختاى جواب وئرمه دي و سكوتا جومدو. حاكيم او حالدا كى قيپ قيرميزى قيزارميشدى، باغيرا باغيرا تيكرار سوردو سؤچلامالارى قبول ائليرسن يا يوخ، اولمويا قورخورسان؟
اوختاى گولومسه دى و اوزون پنجره دن حاكيمه سارى توتوب دئدى : سن هر نجور دوشونه بيلرسن!
حاكيم ماساسيندان آياغا قالخيب و قاباغا گليب اوختايين ياخاسيندان ياپيشيب و آغزينين پيس قوخوسون و توپورجَخ لرين اونون اوزونه وورودو اوختاى او پيس نفسى اوزونده حيس ائديردى، عينى حالدا حاكيم جاميش كيمى يئرينده اويناخ ليب و باغيريردى:
- هه يه يا يوخ.
- اختاى گولومسه سيب و يواش جا دئدي: سيز نيه دانيشاندا آغزينيزين توپورجَخلرينه حاكيم اولانميرسيز و هامينيزين آغزينيز پيس قوخور؟ اولمويا دوشونجه لرينيزين قوخسودور كى آغزينيزدان ديشارى چيخير؟ اگر آغزينيز پيس قوخور و توپورجَخلرينه حاكيم اولانميرسان فاصيله لى دانيش. قالدى كى من سكوت حاقيمى قولانيرام.
حاكيم او حالدا كى آياق لارين يئره چيرپردى باغيردى و دئدى سوكوت حاقينى قولارنيرسان؟
او حالدا كى اوختاى آياقلارين ئيرده بركيديردى ياوشجادان دئدي: هه يه سوكوت حاقينى قولانيرام افندى!
حاكيم يارديمجى سى نين اوزونه باخيب و قيزغين بير حالدا دئدي: سكوت حاقين قولانيرميش، سوچلاماغين دئييش و ياز سكوت حاقين ساوونماق ايچون اونا اَن يوكسك جزا ايسته نير!
يارديمجى قورخولو حالدا او حالدا كى ايستيردى يواش دانيشدسين تا كيمسه دويماسين، دئدى: عالى جناب قانون دا اويله بير سوچلاما يوخدور و آرتيق سكوت حاقى قولانماق يأسادا تصديق اولونموشدور.
حاكيم او حالدا كى اوز ساكين ليغين قورماغا چاليشيردى دئدى: سكوت حاقى يانى دوشونمه، يانى سوال ائتمك، يانى شبهه ائتمك، يانى بيزه و منصوب اولدوغوموز حكومته گؤونمه مَك. بو اولكه ده خالق لازيم دئيل دوشونسون، بيز و حكومت اونا دوشونوروخ و لازيم اولان تدبيرلرى گؤروروخ، خالق راحات حايات ياشيب و خوشلوخ لاردان كئف آلابيلر او حالدا كى بيز هر زحمتلرى بوينوموزا آليريخ و گئجه گوندوز دوشونوروخ. آيا بو نانكورلوخ دئيل كى ايندى بير انسان بيزيم قاباغيميزدا دوشنمك سئوداسيندا دير؟ هر سورغويا جواب وئرديغيميز حالدا، دونيا سورغولارين بيرجه كيتابدا يغيب يايديغيميز حالدا، سورغو سورماغا گَرَك وارمى؟ بيز سو كيمى دُورو و تميز اؤلدوغوموز حالدا بيزه شبهه ائلمه غين نه آنلامى وار؟ اولورمو بير نفر انديشه ايچون اوزونه جوموب و گله جكى دوشونه؟ يعنى او بيزه گؤونمير، يعنى او بيزيم اوزوموزده گوونَجَك بير صيفت و سيستم گورمور. بير اينسانين دوشنمه سى بير عصيان دير كى او بيرى اينسانلارا اولگو اولا بيلر، نه اولار كى بو اينسانلار دوشونوب و بيرله شه لر و او زامان بيز شالوارلاريميزى بئليميزده ساخلايامانيق. دوشونمك اَن بويوك سوچدور معاون، بيزيم اولكه ده دوشونمك ياساق دير، هر كس كئف سورسون و يئسين –ايچسين و دونيادان ذَوكين آلسين، اما دوشونمك يوخ.
معاوين كى مات و مبهوت قالميشدى و سسى چيخميردى بير نازيك سسله دئدى: عاليجناب سيز بويوردوغونوز سوزلر دوغرودور و من اونا تماميله قاتيليرام و حتى بو ملعونو اوزوم اولدورمه غه قرارسيزام، بو كى اوز سس سيز ليغيله بيزى ناراحات ائدير و اوزونو بير شى ظن ائديب دوشونمك ايستير، ليجيمينه باخينيز هيچ بيزه قولاق آسمير، سانكى دوشونور ده اما او قدر يوخ كى اونون حياتى بيزيم الليميزده دير و اولا بيلر كى سون ساعات لارى اولسون كى دوشونه بيلير. معاوين كى چوخلو حاكمين تعريفين ائتدى و بيراز جراتلى اولدو سونوندا دوام ائتدى كى اما حورمتلى حاكيم ياسالاردا سكوت ايچون بير ماده يوخدور تا كى شبهه لى نى او اساسدا سورغويا چكيب و جزاسين وئرَك.
حاكيم بيراز گولومسه يب و اللرين قارنينا سورتوب و يوخارى سسله دئدى:
- معاون ميغايات و ديقتلى اول، شبهه لى دئيل او قاشيندا اوتوران سوچلودور، سن بحث ائتيغين اينسان محكوم دور. اوگونَن كى او دوشونمك له مشغول اولوب او محكومدور و اونون سكوت حاقى قولانديغى زامان او اوز سوچونا اعتراف ائتدير. قانون لارى بيز يازيرق و چوخ ياسا واركى يازيلماميش يأسا دئيرلر اونلارا. گؤرونمه ميش قانون لار داها گوجلودور، مثلاً تانرى گورسنمير و اونون حتى اولوب و اولدوغونادا كيمسه آرخايين دئيل و هيچ كيمسه اونو گورمويوب، اما تانرى دا اولان گوج كيمسه ده وار مى ؟ يا مثلاً إلكتريسيته گورونمور اما اونون گؤرونمه مه غى اونون گوجسوز اولدوغونو ثبوت ائلمير، بلكه عكسينه إلكتريسيته داها گوجلودور، او حالدا كى اونون گوجو گورسه نمير. بونا گوره يأسادا سكوت ايچون بير يازيلميش ماده يوخدور، اما يازيلماميش يأسا وار كى اونو داها بيز سيخ و جدى يه توتوب و لازيم اولان جزالارى وئره ريك. يازيلماميش ياسالاردا يازيلان ياسالار گيبى بيز تعيين ائليريخ و اونلارى قوتسالاشما پروسه سينده قوتسالاشديريريخ نجور كى گورونمه ين و كيمسه وجودونان امين اولمويان تانرى قوتسالاشما پروسه سينده قوتسالاشيب و تابو حالينا چئوريليب . قانون يازيليب يازيلماماغى اونملى دئيل، قانون حاكيملرين منفعتين قورونما ايچون يارانير و لازيم اولورسا بير گونده نئچه سرى دئيشيلير. ائله اونا گوره ده حاكيم لرين اوتوريته سين تهلكه يه سالان هر ايشه قارشى لازيم اولان جزا لارى وئره ريخ . قاضى بو حالدا اوختايين اوزونه باخيب و دئدى:
- محكوم بير سوزون وار؟
- اوختاى او حالدا كى گويه باخيردى سانكى بير شى ائشيدميب گيبى گوزوكور، بو حالدا معاون قورخا- قورخا دئدى:
- حاكيم بى بو اينسان يا ده لى دير و يا بيزى كارخانايا قويوب، بونون همن اَغير جزا كسيب و يا دلى خانايا تداوى ائله مه سينه گوندرك.
حاكيم آياغا قارخيب و اوختايين سينه سيندن ياپيشيب جاميش كيمى كيچلارين يئره سورتوب و باغيردى:
- محكوم سنين سكوت حاقى قولانديغين و بيزى تحقير ائلمك جهدى گوسترديغين ايچون إعداما محكوم ائليرم. ايندى سن اولوم طرزين اوزون سئچمه ليسَن. آنلادين ؟
اوختاى بير يومشاق سسله دئدى : بوردا كار آدام يوخدو، بو سوزلرى يواش جاسينا دا دئسن عمل ساحه سينده عينى نتيجه نى باغيشلايير. قالدى كى وئرديغين حكم ده ، سن دييَن اولسون قوى قان ياتسين. بيرده عرض ائلديم ايلك اولده ديل بيلمه ين جانلى لارا من نجور جواب وئريم؟ من حضرت سليمان دئيلم كى هر كسين ديلين بيلم،اونسوزدا اينسان او زامان دانيشار كى دانيشيغى ايشه گلسين و يا ديقتله قولاق آسيلا، اما سيز حوكمو اوچ ايل بوندان قاباق وئريبسيز و اوندان سونرادا سيزلر ائشيدن كارلارسيز، سيزه جواب وئرمك بوشونا زامان هدر وئرمك دير.
حاكمين بورنونان توستو چيخديغى كيمى اويوز بويوزا اوزون چيرپيردى و باغيرا باغيرا دئدى: ايندى اوزون اولوم طرزى نى سئچمه لى سَن، بيز هيچ زامان محبتيميزى كيمسه دن اسيرگه ميريخ و هر زامان خالقيميزا محبت و سئوگى له ياناشيريق و اونا گوره ده اولوم طرزين سئچيم حاقى نى سوچلويا بوراخيريق.
اوختاى او حالدا كى گولومسه يردى دئدى: او زامان بس اولؤنن سونرا سيزدن تشكور ائليه بيلمه مه غيم ايچون تاسف ائليه بيلم.
حاكيم او حالدا كى اوزون موتلو گوستريردى دئدى: البته هامى اؤلمه ميش دن قاباخ بيزدن تشكور ائلير و بيزده اورگيميز اينجه اولوب و دايانماديغى ايچون گوز ياشلاريميزا حاكيم اولا بيلميريخ و برابر آغلاشاريق، اوميديم وار سنده بيزدن تشكور ائليَسن اؤلمه ميش دن قاباق.
اوختاى او حالدا كى كبيرلى، كيرلى پنجره دن ائشيه باخيردى اوزونو دوندَر مه دن دئدى: بو آرزونو گورا آپارار سان و جهنمه كيمى يولون آچيق اولسون.
حاكيم او حالدا كى اوز سويوخ قانلى اولدوغون قؤروماغا چاليشيردى دئدى: هله بير گون وقتينيز وار و ايندى اولومه نجور پيشواز گئديغينى سويله؟ آسيلماق ايستيرسن و يا گوله له نمك؟ حتى سئچيم حاقين وار كى گوله لر اورگينين اوستوندن وورولسون و يا كافاندان! اوختاى سكوتا جوموب و اورگينين يارا اولدوغون دوشونور، او دوشونور كى اورگيم يارادير و حياتيم بويونجا يوزلرجه يارا دئيب اونا، ياخچى دير كى كافامدان گوله له نمگى و يا آسيلماغى سئچيم و اورگيمه بوندان آرتيق يارا ديمه سين، اما غرورلو اولدوغو ايچون ايستميردى كى او جاميش گيبى اولان حاكيم له آغيز- آغيزا وئرسين. اونا گوره گوى ده كى قوشولارا باخا – باخا دئدى: فرق ائتمير.
نجور فرق ائتمير، فرق ائدير و سن اونو سئچمه ليسَن، يوخسا اونو سئچمه ديغين حالدا بو اوتاقدان ديشارى چيخميب و مجبور سان كى منن آغير به آغيزا وئريب و سونوندا بير يول سئچه سن.
اوختاى فيكيره جومدو و بيردن دئدى : گوله لنمه غى سئچيرم، بيرده اورگيمين اوستوندن!
حاكيم بير اونون اوزونه باخدى و بير منشى نين اوزونه دئدى: وصيت ائلمك ايسته ميرسن؟ يا بير اوزل ايستك يوخوندو كى اونو بيز يئرينه گتيرَك؟
اوختاى همن جواب وئردى : يوخ، ساده جه بوردان گئديب و حكوم ايجرا اولونجاق تك اولماق ايستيرم، بيرده اولورسا بئش- اون دقيقه آزاد هاوادا اولوب و گوى لره باخماق ايسترم!
عائله نى گوروب ويداعلاشماق ايسته ميرسن؟ حاكيم اونا باخا باخا سوردو.
اوختاى جواب وئردى يوخ، اونلاردان چوخ دان ويداعلاشميشام، اورگيم اونلارين يانيندا.
قاضى تعجوبلا سوردو بس نَدَن اؤرگينه گوله ديسين ايستيرسن او حالدا كى اورگين اونلارين يانيندا!
اوختاى گولومسه يه رك دئدى: قلبيم ده كى فراقين دردين بير گوله ياراسى درمان ائدر.
حاكيم او حالدا كى اوزون ميهربان گورسه دير اوزون اوختايا سارى توتوب دئدى:
او زامان سن اگر بو حياتى او قدر سئورسَن ندن بيزه يالواريب و باغيش دئله ميرسن، نَدَن آغلاييب و اؤلوم جزاسين سينديرمامى ايسته ميرسن؟ پس بيزيم حاكميته سالماغا دوشندوغون زامان بو آنلارى نَدَن دوشونمه دين؟
اوختاى آياغا قالخيب و او حالدا كى سان كى بير سَركرده دير اونا قارشى جواب وئردى: بونا گوره كى حياتى سئويرم، بونا گوره كى هر ياشاديغيم بير ثانيه دن لذت آلماق ايستيرم، حيات سئوداسى وارليغينا گوره قول و قاندالدا ياشاماق ايستميرم. حيات منيم ايچون لذت آپارماق دير، گوزليخ دير، سئودا و آزادليخ دير. خياليمدا اولسادا عدالت باخچاسى دير، ائله صيرف اونا گوره من سيزين دوشمان نيزام، سيز و من آيرى دونيادانيخ. من قاندالدا ياشاماق ايچون يالوارمام، من آزادليق و عدالت ايچون اؤلومه ميدان اوخويارام. حياتيما بير دقيقه ده قالسا اوندان لذت آلارام و اولومه ميدان اوخويارام، بو آرزونو جهنمه آپارارسان كى من قاندالدا اوچ گون فاضلا ياشاماق ايچون سيزه يالوارام.
حاكيم او حالدا كى قيزارميشدى منشى يه طرف باخدى و اونا بير گوز وؤراراق دئدى: سوچلونو آپار سون آرزوسونا چاتسين و ايسته ديغى قدر دال حياط دا آزاد هاوادان لذت آپارسين.
منشى اوزون اوختايا سارى توتوب و اونا دئدى قالخ آياغا و يولا توش. اوختاى آياقا قالخيب و گيرديغى قاپى دان يولا دوشمك ايسته دى كى منشى بيردن دئدى: او قاپى دان دئيل، او گيرش قاپى دير و چيخيش قاپى او بيرسى دير، اونسوزدا بير چيخيش قاپيدان خلوت حياطا يول وار كى اوردا آچيق هاوادان ايستيفاده ائليسن!
اوختاى يولون چئويريب و منشى گورسديغي قاپى دان ديشارى چيخدى، داليسجا منشى چيخدى و قاپينى برَكدن قاپادى. حاكيم دايانيب و سايدى، بير، ايكى، اوچ. بير رگبار گوله سسى گلدى. حاكيم اَللرين بير- بيرينه سورتدو و اوجا سَسدَن اوز- اوزونه دئدى: بودا گئتدى، بو حالدا منشى قاپينى آچيب و ايچرى گيردى. حاكيم اوزون او طرفه چئويردى و دئدى: ايشين قوتارديز؟ منشى او حالداكى اوستونده كى قان لكه لرين گورسه ديردى دئدى: به اوستومده كى قان لكه لرين گورموسَن؟ حاكيم بير اونا باخدى و دئدى؟ او كى قان لكه لرى هر زامان اوستونده و اَلينده وار تازا بير شى دئيل. سون آرزوسونا يئتيردى سوچلو؟ منشى او حالدا كى اوستونه و اَللرينه باخيردى دئدى: البته كى يوخ، هئچ قويماديم قاپى آستاناسيندان ديشارى چيخا، دالدان بير رگبار گوله دولدوردوم بدنينه، حتى بئله خبر وئرمه ديم.
حاكيم او حالدا كى منشى يه باخيردى ياواشجا دئدى: قورخاق هيچ زامان گوزون- گوزونه زيله ييب و كيمسه نى اؤلدوره مز.
منشى دوروخدو و سوردو نه حاكيم بى؟
حاكيم بو كره يوخارى سسله دئدى: دئيرم كى اول پرده نى باشاريلا ايجرا ائلديخ و سوچلو آرزوسونا چاتمادان اولدوردوخ، ايندى زامانى دير كى سوچلونون گوزل آروادين اَله گتيرَك، هر نه جور اولورسا بيز مجاهيديخ و دوشمنله ساواش داييخ، ساواشدا دا سوچلونون مالى و ناموسو حالال دير بيزه. حاكيم او حالدا كى اَللرين ساققالينا چكيردى ايدامه وئردى: ايندى او بيرى نمايش پرده لرين اويناماق زامانين دير، گوروخ بو ايشى نجور يئرينه قوياجاخسان.
منشى ماساسيندان بير حب چيخارديب و بير ليوان سودان آتاراق دئدى: بيرازدان زنگ ائده جه يم دوستاغا و اونلارا دئيرم كى اؤلن سوچلونون آروادي تلفن آچاندا اونان ايسته سينلر كى صاباحى بورا گلسين و قوجاسى باره ده دانيشيخ آپارسين، قوى بيراز ساكين له شيم و اونان سونرا دوستاغا لازيم اولان تعليماتى وئريم.
حاكيم اَلينده كى تسبيحى تولاداراق دئدى: البته هله اوزو بيلمير دولدو و بلكه ده بو تئزليخدا بيلميه كى دولدو.
منشى جواب وئردى: البته بو سيزين إيراده نيزه و بيزيم إيراده ميزه قاليب كى نه زامان بيله دولدو يا يوخ، اونسوز دا بلكه ده چوخ دول قالميا.
حاكيم او حالدا كى عماماسين اويانديردى، قهقه نن گولدو و دئدى: آى تولكو شيطانين اَلين دالدان باغلارسان.
منشى او حالدا كى اوزون ممنون گورسه ديردى بو تعريف دن جواب وئردى: شيكسته نفسى ائليرسيز،بيز اوستادين كيچيك شاگيردلريندنيخ.
ايكينجى بولوم
ناهيد صاباح يوخودان دَديرگين و كدرلى قالخدى، گونايى يوخودان اوياديب اونون صاباح يئمَگين وئريب اوخولا آپارماغا حاضيرلاندى . موبايل لينا باخدى گنه اوچ – دورد دنه عاشيقانه اس ام اس گليب. اوچ آى دير كى گونده بئش- اون ده نه بو مسيج لردن آلير. يواش – يواش قورخو اوتورور اورگينده، آخى گونايى آپاريب گتيرمه ده حيس ائدير كى بير ماشين داليسيجاخ دولانير. البته بو ايش كى كيشى لر نورمالدا آروادلارين دالينا توشوب و اونلارلا ايليشگى قورماق ايستيرلر، ناهيد بيلير كى ياشاديغى توپلوم دا بو ايشلر غيرنورمال دئيل، آرتيق دينى و عرفى دَيَرلرده ده وار كى اركك لر تنوع طلب ديلر و جنسى باخيم دان دورد خانيم لا ائوله نيب و ايسته ديخلرى قدر صيغه ائده بيلرلر. ناهيد اولده مسيج لر گلنده بير سوره باش قوشمادى ، اما سونرا دوشوندو كى بلكه ناهيدى قيز و يا دول سانيب و اونان ايستكلى اولماق ايستيرلر و اونا گوره مسئجين جوابيندا يازدى كى من ائولى يم، لوطفاً موزاحيم اولمايين. ائله اونان سونرا عكسينه داها چوخ عاشيقانه مسيج گلدى و هر زامان گونايى اوخولا آپاراندا گوردو كى دالينا بير ادام دوشور. گون به گون حيات اونون ايچون چَتينله شير، او بولوتلو هاوايا باخيب و ايچرى دن بير آه چكيب و اوختايى يادا سالير و اوز قلبينده دئير كى منى تك بو وحشى توپلوم دا قويدون هارا گئدين؟ مادى چتينليخ لر بير طرفدن هر گون فيشار گتيرير و او بيرى طرفدن ده هر گون بير نفر كى بيلير حيات يولداشى دوستاق دا دير، دالينا توشوب و اونان ايستير كى جينسى ايليشگى قويسونلار. سانكى كيمسه ده اينسانليغ قالمايب، او حالدا كى اوره گى سيخيلب و گوزونون گوشه سيندن بير دامجى ياش توكولوردو، گونايى يين اَليندن ياپيشيب و اونو اوخولا سارى آپاردى. گوناى يولدا دئيردى كى صينيف آركادشلارى آتالارينان اوخولا گليرلر، پس منيم آتام نيه گليب منى اوخولا آپارمير؟ ناهيد او حالدا كى اوره گى توتولموشدو و بيلميردى بو گونده كى سورغويا بو گون نه جواب ورسين، سوزو چئوريب و گوناى دان سوروشدو كى بو گون نه ايش گوره جخسيز اوخولدا؟ بو حالدا گوناى دئدى آنا بو عمو آرابانى بيزه ساخليب! ناهيد كى تعجب ائليردى دئدى هانچى عمو؟ گوناى بير آغ پرايدى گورسدى و ايدامه وئردى كى اوچ – دورد سرى بو عمو منه بستنى و شكلات آليب گتيريب وئريب منه اوخولدا، بونو دئينجك ناهيدين باشينا سانكى بير قازان قاينار سو تؤكدون و او حالدا كى قيپ- قيرميزى قيزارميشدى آرابايا سارى طرف گئتدى. آرابانين ايچينده بير قيرخ ياشيندا كيشى كى آغ كوينك گئيب و اوزونده بيراز ساققال واريدى اوتورموشدو. ناهيد يوموراق دا آرابانين شيشه سينه وروب و دئيردى: بى شرف منيم جانيم دان نه ايستيرسن؟ نيه مندن اَل چكميرسن؟ نه حق دن منيم قيزيما بستنى- شكلات آليبسان؟ آرابا سوروجوسو شيشه نى آشاغى يا گتيريب و او حالدا كى آياغين گازا باسيردى دئدى: ايندى دانيشماغ اولماز سندن، آخشام ائوينيزه زنگ ووراجايام، قطع ائله مه! سوروجو بونو دئدى و آرابانى باسدى گازا و گئتدى. ناهيد او حالدا كى گوزلرينين ياشينا حاكيم اولابيلميردى گونايين ساچلاريندان ئاپيشدى و او حالدا كى اونون اوزوندَن سيله نن ووردو باغيريب و دئيردى: به سنه دئمه ميشم مگر غريبه لردن دانيشما، مگر دئمه ميشم كيمسه دن بير شى آليب يئمه؟ ندن منيم سوزلريمه قولاق آسيرميرسان؟ گوناى او حالدا كى كوچوك اللريله گوزلرينين ياشين سيليردى و اَللرين اوزونه توتوردو كى اوزون مودافيعه ائتسين، آغلاييب و يالواريردى كى : آنا نه اولور بو سرى باغيشلا منى، داها عمودان شكلات آلمانام، نه اولور بسدى داها. او طرفدن بير كيشى گليب و اوزون ناهيده سارى توتوب دئدى: خانيم نَدَن اوشاغى وُرورسان؟ اوشاق دان بويله داورانمازلار؟ ناهيد سانكى كى بير نفر آختاريردى كى اوفكسين اونون اوستونده بوشالدسين، اوزون غريبه كيشى يه سارى توتوب و سينيرلى سَسدن دئدى: سنى ايلگيلنديرمز شى يه باشينى ندن اوزلديرسان؟ ميلت لازيم اولان شى لره ايلگيلنمز، اما اونا مربوط اولمويان شى لره و خصوصى لى ميلتين اوزل حياتينا باش اوزالديب و فضولوغ ائلير. غريبه كيشى او حالدا كى اللي له قهوه رنگلى كت دوزلديردى جواب وئردى: منه بلكه ربطى اولمويا بيله، اما سيز بير شخصيت لى و ويقارلى خانيم سيز و سيزه بو رفتار و دانيشق لار ياراشمأز. ناهيد او حالدا كى گونايين اليندن محكم ياپيشميشدى غريبه كيشى نين اوزونه باخيب و اونا سرت اولاراق جواب وئردى: هاردان بيلرسن من ويقارلى و شخصيت لى يم؟ اما من سنين كيمى لرين اوزاخدان بيليرم كى عياش و شخصيت سيز و اسكيك صيفت بيرى سن كى آنانا رحم ائتميب و آنانين امجگين كسن ارككلردن سن كى موندار ذهنينده آرواد بازليغ دان سونرا بير شى يوخدور و اوز هرزه ليغينى ساققال و پيس قوخونو گلاب دان اورتمه غه چاليشيرسان. لازيم دير كى جهنم اولوب و گئدسن، بوردا إششك داغليريلار. غريبه كيشى كى اوخو داشا دئميشدى، اللرين ساققالارينا چكيب و دئدى: بو گوزليخ ده خانيم بو قدر پيس دانيشماسين هئچ آنلاميرام، بيز ياخچى دا آنلاشيب و لذتلى دانيشيب و ايلگيلنه بيلريخ .
بو حالدا كى گوناى گوز ياشلارى قوروموشدو اوزون توتوب غريبه كيشى يى سارى دئدى: اوز آنام دير، سنه نه كى منى دويوب اوستومه باغيرير. حتماً بير يالنيش ايش گورموشم . بو حالدا اوزون ناهيده سارى دوندردى و دئدى: آنا منى نه قدر دويوب ورورسان سنى دونيالارجاق سئويرم.
ناهيد بونو ائشيدن كيمى، سانكى غريبه كيشى و يا يولدا كيمسه يوخدور، اوتوروب و گونايى باسيب باغرينا و اونون قوجاغينا سيخاراق آغليا – آغليا اونو اوپوب. گوناى دا كوچوك اللريله اونون گوز ياشلارين سيليب و كوچوك اللرين اونون بوينونا دولاييب و اونا خطاب دئير، آنا نه الور آغلاما بير داها سنى قيزديرمام، سوزلرينه داها قولاق آسارام، داها قول وئريرم كى ياخچى قيز اولام. غريبه كيشى گئتميشدى و خياباندا آنا- قيز بير- بيرلرين باغرينا باسيب و زمانه نين كدرلرينه آغلاشايب و بير-بيرلرين نه قدر تك و چاره سيز گورسه لرده، بير-بيرلرينه اولان سئوگى لرى اونلارى حياتين آجيسيندا لذت باغيشلايير. ناهيد آياغا قالخيب و گونايين اَليندن ياپيشاراق خياباندا اولان اداملارين تعجوبلا باخيشلارينين ايچينده ائوه سارى يولانيرلار. گوناى ماراغلا اوزون آناسينا سارى توتوب و سوروشور: آنا بو يول ائوه دونور، اوخول يولو اويوزدان دئيل؟ ناهيد گونايين اَللرين سيخاراق دئدى : بوگون ائوده درس اوخوياريق، بو گون برابر اولاق، اونسوز دا چاليشاريب آتانا تلفن آچاجايام بلكه باشاريلى اولدو و برابر دانيشديق، بوراخ اوخولو بو گون، اويرتمنَ زنگ آچارام و ايجازه نى آلام. گوناى سئوينجك اولاراق اوزون آناسينا سارى توتدو دئدى: پس اوندا قوجاغينا آل منى. ناهيد گونايين اوزونه محبتلى باخيب دئدى : لوس اولما يئكه دَوه اولوبسان، دا من سنى قوجاغيما آلابيلمه م. گوناى كى اوزونون بويوك اولدوغونان غرور دويوردو دئدى: اما آتام گوجلودور و او منى قوجاغينا آلا بيلر. هه يه آلابيلر آتان سنى ، ناهيد دئدى . او حالدا كى دوشونوردو تام اوچ ايل اولدو كى آيريلالى، سانكى اوچ يوز ايلدير. هر شى او توتولانان سونرا چتين اولدو، ايشيندن چيخارديلار بيلسين، هر يولدان يئتيرن هرزه كيشى اونا ايليشگى قورماق اويارى سى وئرير. اوچ ايل اولدو كى هر گون آزادليق خبرين گوزلويور بو چتين ليق لرده، ذاتاً اوچ -دورد سرى گئدى مولاقاتينا، سونرادا يولون اوزاق اولدوغو ايچون ،بيرده ملاقات سالونوندا ناهيده و اوختاى زندانبان طرفيندن سايغى سيزليغ داورانيش ايچون قرارلاشديلار تلفن گوروشمه قرارينا گلديلر. ناهيد دوشونور كى ياخچى اولار بو گون ائليه بيلسين كى اوختاى دان دانيشا بيلسين، نه اولورسا بو قدر آيريليق و گونده ليق چتينليخ لردن سونرا يئنه ده بير بئش اون دقيقه برابر اولسالار چكيلن آغريلارينا بير مرهم اولا بيلر. اونلار اَل- اَله بو فيكيرلرده ديلر كى كوچه يه گيرديخلرينده ناهيدى سانكى برق توتدو، گنه صاباح كى موزاحيم ، بو سرى ماشينى ساخلاييب ائوين قاباغيندا و اوزو ديشارى دا ماشينين شيشه لرين سيلير. ساققالى كيشى كى كوينه يين شالوارينين اوستونه سالميشدى ناهيدن- گونايى گورونجه بير سيرتيلب و اَللرين باشينا چكرك آرابايا سرعت له آتيليب ميندى و گازا باسيب گئدى. ناهيدين كى رنگى قيپ – قيرميزى قيزارميشدى و اورگَى تيتريب – اللرى اَسيردى، گونايين اليندن محكم ياپيشيب و اونون كوچوك اللريندن گوج آلماق ايستيردى. گوناى كى ساققالى كيشى نى و آناسين حالين گوردو آناسيندان معصوم اوزله سوردو: آنا بو عمى نه ايستير؟ نَدَن اونو گوردوغونده رنگين سولودو؟ اويرتمن ميز دئير كى بير نفر موزاحيم اولسا پليس لره خبر وئرين ، ندن كى پليس لر ميلتين يولداشى دير و اونلارا گوَنج وئرمَكده اللريندن گلن لرى اسيرگه ميلر. ناهيد او حالدا كى سسى تيتره دى گونايين اوزونه باخيب جواب وئردى:
-« او بير هرزه و خسته كيشى دير كى چوخلارى كيمى بدبختليغى نين اوزون اورتمه ايچون و يا چاره سيزليغ لريندن قاچما ايچون آرواد بازليغا اَل اوزاديلار، او يازيغ روحى خسته دير، اما اونون يازيخليغينا باخمياراق چوخ تهله كلى و ضررلى بيريسى دير. آداملارين نه قدر يازيقليق لارى و چاره سيزليخ لرى بويوك و درين اولسا اونون اوستون باستيرماق ايچون بويوك جنايت لر و اسكيك لره ال اوزاديلار، اونا گوره بو اينسانلاردان گره ك مقايات اولاسان كى بيله ين ضرر وورمويالار . اينسانلار تاريخ بويو ازيليب و تحقير اولوب و حاقلارى تاپدالانيب، ائله اونا گوره ده اونلار هر زامان بو دوروم نان قورتولماق ايچون هر ايپه اَل اوزادلار. دونيا رحم سيز زمانه دير قيزيم، ايله اونا گوره سنه دئيرم بو آداملاردان اوزونو محافيظت ائت. آتان دا بو دورمو ايصلاح ائتسين دئه بيزدن آيرى دوشوب و اونون جزاسين چكير».
گوناى كى بو سوزلرين چوخونو آنلاميردى، اما اوزونون و آناسينين گوونَجَده اولماماغين احساس ائليريردى، آناسينين اوزونه باخاراق دئدى: اما پيس آداملار پليس دن قورخورلار، پليس خبر وئرَك آنا. آناسى گونايين اوزونه باخاراق ايچريدن بير آه چكرك دئدى: بو اولكه ده پليس بونلاردان قورخمالى دير، بونو پليسه خبر وئرسك بوندان قورتولوب بو سرى پليسه ايليشَريك، پليس لرى گوره نده اينسانا ايلك اول قورخو و سونرا امنيت سيزليغ و گونجه سيزليغ دويغوسو اَل وئرير هر كسه. قورخما اولماسا دائي نا دئيرم كى بير نئچه گون گلر بيزده ياتار و يادا بيز گئديب بير نئچه گون اوردا ياتاريخ. گوناى بونلارى آناسيندان ائشيدرك سئوينيب و نئشه سى سين اَله گتيردى، اما ناهيدين اورگه نيده فيرتانا قوپوردو، ندن كى همى بوگون گرك دوستاغا تيلفن آچيب و اوختاى دان دانيشمالى دير كى بودا اوزو بير اوزون پروسه دير، آخى گرك تلفن آچيب و نئچه يئردن هماهنگ ائليندن سونرا، بيله سينه بير ساعات دئيلر كى او ساعات دا اوختاى تلفن باشيندا اولوب و اونو گوزلويور. بو پروسه هردن بئش يا آلتى ساعات سورور و هردن ده گورورسن كى تلفن آچديغين زامان بير اويون بيزيب و تيلفن گوروشمه سين كنسيل ائليرلر. بيرده ايشين ايلگينجى بوردا كى قارداشى و عائله سينه دئسه كى موازحيم اولورلار بيله سينه اونلاردا ناهيدى سوچلو بيليب و اونو دانلاياجاقلار كى حتماً او آچيق دولانيب و يا بير آلارام وئريب كى ايندى اونون دالينا دوشورلر، بيرده گينه ده دانلاماق باشلاياجاق كى نَدَن اوختاى دان ائلولندين و يا ندن ايندى اونان بوشانميرسان كى اوزونو دردسر و باش آغرى دان قورتاراسان. ائله هردن بو سوزلر باعيث اولور كى او اوز عائله و يا اوختايين عائله سيندن ده اوزاق دورسون. ائله ناهيد بو فيكيرلرده دى كى گوناى دان ائوه گيريب و ديشارى پالتارلاردان ياتاق اوتاقينا گيريب و اويله اوزاندى تا بير دينجَلسين. گوناى دا اويله اونون يانيندا اوزاندى و ايكى آنا و قيز بير- بيرين قوجاغيندا محبت لنيب و گوزلرين يوم دولار . ناهيد بيرآزجا گوزلرى قيزاندان سونرا ايضطرابدان ياتماييب و او حالدا كى سانكى بير شى داليجاخ دير آياغا قالخيب و كوچك هال دا قدم وورماغا باشلادى، اونا بير بوغولماق حيسى گليب و احساس ائلدى كى هاوا چوخ ايستيدى او حال دا كى قيشدير و توپورورسن گوى ده دونور. او بالكنا چيخيب و اوردا بير درين نفس چكرك هاواسين تزه ليب و ايكى- اوچ دقيقه اوردا داياندى، ساعات اون جواريندا و او بويله دوشوندو كى يواش – يواش باشلاسين زيندانا زنگ وُروب تا زمان عيارلاسين اوختاى دان دانيشماغا. بيرده ايسته دى قارداشى ممدعلى تلفن آچيب و اوندان ايسته سين كى تا بير ايكى گون گلسين بونلاردا قالسين و اونلا برابر ائشيه چيخيب و گلسين تا كى بو تزه موزاحيم بلكه اونو گوروب باشدان اولا.
ناهيد تيلفن باشيندا اوتوردو و دفترچه نى چيخارداراق كى بير طرفينده اوختايين اوزِتلرين ( مشخصاتين) و او بيرى طرفده دوستاق خانانين شماره سين يازميشدى چيخاردى تا كى تيلفن آچيب و يواش – يواش دانيشما زامانين عيارلاسين. آخى نه اولسا بو ايشلر زامان آپارير و يوزلرجه اوختاى كيمى اينسان دوستاق دادير كى عايله لرى ايستير اونلاردان گوروشسوب دانيشيب و خبر آلسينلار. بو ايشده سبب اولور كى تلفن خط لرى هر زامان شلوغ اولسون و بعضى زامان بير ساعات گره ك دال با دال زنگ ووروسان كى ائليه بيلسن بير نفردن دانيشاسان. او تلفن نومره سين توتدو و اينتظار چكدى، نئچه سرى بو ايشى تيكرارلاردى و نئچه فرقلى نمره ايمتحان ائلدى. سونوندا ياريم ساعات سونرا بيرى جواب وئردى، ناهيد سؤوُنَرك سلام وئريب و دوستاقدا حيات يولداشى اولدوغون و اونان دانيشماغ ايسته ديغين بيلديردى. تلفن داليندا اولان حبيس ده اولانين اوزِتلرين آلايب و تكرار اونان ايستدى كى بير ساعات دان سونرا تلفن ائليب و اونا دقيق ساعات نئچه ده محبوس دان دانيشا بيله جه غينه بيلگى وئرسين. ناهيد خدافيظ لشيب و تلفنو قطع ائلدى، ساعاتا باخدى ساعات اون ياريم دير و ساعات اون بير ياريم دا زنگ وورماغين حسابلادى. او دوشوندو كى ياخچى دى ممدعلى يه زنگ آچا و اونا پروبلمى آنلادا، نه اولسا بو ساعات بئكار دير و جانى دا سيخيلير بو مسله دن اوتورو.
ممدعلى نين تلفن نمره سين توتدو و داياندى تا ممدعلى تلفنى گوتورسون، ممدعلى تلفنى گوتوردو . ناهيد كى بيراز سسى تيتريدى صحبته باشلادى و دئدى:
- سلام داداش منم ناهيد، نه وار نه يوخ ؟
- سلام ساغولاسيز، سيز نئنيرسيز؟
- بيزده واريخ، ساغولاسيز . بير پروبلم قاباغا گليب داداش.
ممدعلى پروبلم سسى ائشديغينده، بللى اولدو كى آمپرى قالخدى گويه و بير عصبى سَسدن دئدى : نه اولوب؟ ناهيد تئز دئدى هئچ زاد بابا، بير نفر نئچه گوندور احساس ائليرم كى داليما دوشور، دئديم سنه دئييم گل اوچ – دورد گون بيزده قال. ممدعلى يه سانكى اود قويوبسان، سسين يوغوناداراق و سَسيندن تيترمه بليرلى اولوركن دئدى: سنه دئديم كى آچيخ دولانما، قارا چادرا اورت. آروادين كى باشيندا كيشى اولماسا بوجور اولار، ائوى بوشالدين گلين بيزيم ائوين بير اوتاقيندا قالين. هله بو كوپك اوغلو كيمدير كى مزاحيم اولور، اونو بيلسم- بيلم اونا نئنرم، باشينا بير توى توتارام كى آدين نه تاريخ كيتابلاريندا بلكه جغرافيا كيتابلاريندا يازارلار. ناهيد كى اوزون داها چاره سيز حيس ائديردى گوزلرين دن يواشجا بير دامجى ياش آخدى و سسى تيتره يه – تيتره يه دئدى: جينى بازليغ چيخارديب آدامى سوز دئديغينه پئشمان ائلمه، بير نفر موزاحيم اولور خانيمينى گوتور گَل بير ايكى گُون بيزده قال گوى بو قال ساكيتجه ياتسين، آز باش آغرى يوخوموزدور كى سنده بيرين ايضافه لنديره سن. اگر جينى بازليغ و دلى ليغ ائلمك ايستيرسن گلمه اوختايين قارداشينا دئيرم. ممدعلى كى يئتيرينجه عصبى اولموش دور باغيردى كى خير لازيم ائلميب، ايندى مارالى دا گوتوروب گلم سيزه. كيمسه يه دئمغين لازيم دئيل! ناهيد دئدى بابا آخشام گَل، هئچ زاد يوخدو عجب ايشتيباه ائله ديم سنه سوز دئديم. ممدعلى او حالدا كى سسى تيتره دى جواب وئردى: يوخ لازيم ائلميب، ايشيم يوخدو، ايندى گليرم، خدافيظ.
ناهيد كى گوز ياشلارينا حاكيم اولا بيلميردى اوز چاره سيزليغيندن جانى سيخيلب و اورگَى نه اوخولا پارچالاماق ايستيردى، بو حالدا گوناى آناسينين آغلاماق و هوركولاماق سسى له يوخودان دوردو و هئچ سسبَبين بيلمه يه رك اونودا آغلاماق باسدى. ناهيد دوشونور كى بو اولكه ده آرواد اولماق هر شى دن چتين دير، ندن كى حاكميت اينسانلارين باشين قاتسين ديه هر كسين جينسى ماراقلارينان باشين قاتير و بو آرادا آروادلار ايلك قوربانليق ديلار اينسانليغ دان بوشالميش اركك لرين قارشيسيندا. هر زامان اوختايين بو سوزو يادينداير كى بو مسله نين تاريخى كوكو وار آسيادا و شرقى اولكه لرده، ندن كى باتى دا و باتى لاشميش مسيحيت دينين ده و حتى اسكى روم و يونان دا اركك لر بير قادينلا ائولنيرديلر و ايكى و يا اوچ قادينلا ائولنمك توپلومدا يانليش بير عمل سايليردى. او حالدا كى اسلام، يهوديت و يا باشقا شرق اولكه لرينده حرمسرا قورماق نورمال عمل سايلير اگر مادى گوجون اولسا، اونا گوره اوختاى هر زامان دئيردى كى بو تاريخى كوك بو كيشلرى ذهنيت اولاراق هرزه و خاراب يئتيريب و اونلار عمر بويو دونيانى ساده جه هرزه ليق ده و عياش چيليغ دا گورولر. ائله بونا گوره ده اوختاى دوشونوردو كى بو مسله نى دوزلدمك ايسته ديغين ده ايلك اول گرك تاريخى يالنيشليخ لارى دوزلتسن، اوختاى دا ايستيردى كى " رضا براهنى" مذكر تاريخى آدلى كيتابينين اوستونده داها چوخ ايشدييب و لازم اولورسا بو مسله نى داها چوخ آچيب و اوستونده آراشديرما آپارسين كى سونوندا بو مسله نين اوستونده ايندى اوچ ايلدير ساليب لار بارماقليقلار دالينا بيلسين. ناهيد دوشونوركن گونايى قوجاغينا باسيب تا اونا أورَك گونجه سى يارادسين. ائله بو حالدا دى كى ساعات اون بير ياريمى گوستردى، ناهيد تلَسيك آياغا قالخيب و همن تلفن سارى گئدير، نَدَن كى بهانه اولماسين دئيلر بى واخت زنگ آچايب سان. او همن شماره نى توتور و بير-ايكى سرى ايشكال ووراندان سونرا تلفن آزاد زنگ چالير و ناهيد گوزلويور كى جواب وئرسينلر، بير نفر اويوزدان دئير بويورون. ناهيد اوختايين آدين وئرير و دئير كى من اوختايين حيات يولداشى يام و بير ساعات بوندان قاباق دئدينيز كى اون بير ياريم دا زنگ آچين تا ساعات نئچه ده اوختاى دان دانيشا بيلمه مى دييه سيز. بير نكره سس كى ايستير اوزون اينجه سسلى گوستره سوروشور؛ آدينيز ندير؟ ناهيد جواب وئرير : ناهيد. بو حالدا تلفن داليندا آدام جواب وئرير كى آدينيز و سَسينيز نه گوزل دير حتماً اوزونوز ده گوزل سينيز؟ ناهيد كى بيلمير نه جواب وئرسين، ندن كى بو آداملار اوتوردوخلارى صندل دن سوى ايستيفاده ائليب و چون بيليرلر كى دوستاق دا اولانين عائله لرى مجبوردولار بونلارى تحمل ائلسينلر. هر طورلو اسكيك ليغه اَل اوزاديلار. ناهيدَ ايچرى ده اوزون يئييردى اما مجبور سكوت ائله دى و جواب وئرمه دى، آلو آلو دوستاقين تيلفن نا جواب وئرن باغيريردى. ناهيد تكرار ايستكين تكرارلاييب و اوزون بيلمه مه زديغه ووردو، تكرار تلفنچى سوردو كى آدينيز نمه نه دير؟ ناهيد بو سرى جواب وئردى ناهيد اوختايين حيات يولداشى! تلفنچى سسين اينجه ليَرك جواب وئردى: موباركدى اوختايين حيات يولداشى، هم آدين گوزلدير و هم اوزون. ناهيد گنه سكوتا جومدو و ايسته دى تيلفن قطع ائله سين و اوختاى دان دانيشماغين بوگون خيريندن كچسين، سونرا دوشوندو كى بو هر زامان كى ايشدير و بوگون ده احتياجى وار اوختاى دان دانشسين، اونسوزدا گونايادا قول وئريب كى بو گون آتاسيلا دانيشاجاق. ائله بونلارا گوره گنه سكوت ائله دى تا كى تلفنچى اوزو بئزيب و ايشين دالين بوراخيب و اونلارين دانيشماغ وقتينين وئرسين. بو حالدا تلفنچى دئدى؛ ناهيد جان اسكى دن دئيب لر " اَل اَلى يويار، اَل ده دونوب اوزو يويار" ايندى سنده بيزدن بيراز خوش دانيشرسان ايشين تئز حل اولار ، البته بيز هر زامان خالقين ايشين قويامانيخ يئرده قالا اما هر شئين يول – يولاجاغى وار، سيزى آنلايان و شخصيتلى خانيم سيز. ناهيد كى اوزون زور توتوردو و ذاتاً ده بئزميشدى بو كيشى لردن و جاني بوغازينا يئتيريب بو اداملارين اَليندن كى هر نمنه نى قادينين جينسى اورگانلارينا يورولار، اوزون توتاراق جواب وئردى: لوطف بويورون نه زامان اولدوغونو بويورون دئين و يادان چيخارتمايين كى منيم حيات يولداشيم وار و اونو دونيالارجاق سئويرم. تلفنچى اوزون بورجلو گوستره رك يوغون سسله دئدى نهاردان سونرا ساعات ٤ زنگ وورو، زندانى ساعات ٤ بوردا اولاجاق، بونو دئدى و قطع ائلدى. ناهيد گوشى نى يئره قويدو و گونايين يانيندا اوتوردو، گوناى اوزون توتوب و اونان بوگون آتالا دانيشاجايخ سوردو، ناهيد او حالدا كى ذهنى و روحو خسته دى جواب وئردى، هه قيزيم بوگون آتاى لا دانيشاجايخ . گوناى سوينجك اولاراق يئرينده هوپانيب توشدو و اوز- اوزونه گولرَك دئيردى كى آخ جون آتاي لا دانيشاجايخ. ناهيد گونايين موتلولوغون گورونجه نئشه لندى و بير آن اولسون دردى و كدرى اونوتدو و باشلادى گوناى دان گولوُب اويناشماغا.
ساعات اون ايكى دير و ناهيد بير شى ناهارا پيشيرمه نى دوشونوردو كى قاپى نين زنگى چاليندى، آيفونا جواب وئرديغينده باخدى كى ممدعلى نن- مارال دير. دئميشدى ايندى گليرم، اما ناهيد ظن ائديردى كى ناهاردان سونرا گله لر. مارال ايچرى گلديخده ناهيد دن اوپوشوپ و چادراسين يئره قوياراق گونايين طرفينه گئديب و گونايى باسيب باغرينا و اوپدو. داليسجا ممدعلى گليب و سويوخ و بير عصبى حالدا سلام وئره رك يئرينه اوتوروب. گوناى او حالدا كى مارال دان – ممدعلى نين آراسيندا اوتوروب ، ممدعلى نين اوزونه باخيب و اونا دئدى: دايى جان تزه چكدييغيم رسيم لرى گوستريم سنه؟ ممدعلى بير تيتره ين و يوغون سسيله جواب وئردى: يوخ دايى سونرا گوستررسين. مارال اوزون گوناى سارى توتدو دئدى: منه گوسترميرسن جيران؟ ممدعلى ده پرت- پرت دئدى زن دايى نا گوستر . گوناى تله سيك قاچيب دفترى گتيردى بو حالدا مارال اوزون توتوب ممدعلى يه سارى دئدى: بير شى اولمويوب، نَدَن بو قدر اوزونو حساس گوستريرسن؟ بير نفر موزاحيم اولوب، يا گورر كى ائوده كيشى وار بيرده موزاحيم اولماز و يادا آدام كيمى ايكى كلمه دانيشيرسيز و ايشينين يانليش اولدوغون خاطيرلارسان شرين كَسَر. ممدعلى كى بللى دير چوخ سينيرلى دئدى: عابيريميز گئدَجخ، ميلتين آغزيندا سوز اولاجاييخ، بو شهرده هيچ زاد ائوده بير دول آروادين بى آبيرچى ليغيندان پيس دئيل. بو حالدا كى ناهيد بو سوزلرى ائشيديردى گوزلرينين ياشينا حاكيم اولابيلمه دى و يواش – يواش آغلادى. عينى حالدا گوناى دفترلريله گلدى، مارال تئز-تئز دفترى وراقلايب و گونايين نه قدر گوزل رسيم چكديغين تعريف ليردى، گوناى دا دواملى دئيردى هله او بير صفحه يه باخ، مارال گونايى قوجاخلايب اوپورَك اونا محبتلى دئدى: ايندى زن دايى يا بير تزه رسيم چك باخيم گوروم نجور چكيرسن. گوناى اوزون اونا سارى توتدو و دئدى: گئده ك ايكيميز برابر چيزَغ. مارال اونون باشينا اًلين چكرك جواب وئردى: سن گئد باشلا منده گلرم. گوناى اوتاقا سارى يولاندى و هال دا مارال ، ناهيد و ممدعلى تك قالديلار، ناهيدين گوزلريندن يواشجا ياش گليردى و ممدعلى گوزلريندن قان ياغيردى. مارال او حالدا كى ناهيدين يانينا كئچدى اوزون ممدعلى يه سارى توتدو و دئدى: سنى چاغيريب يارديم ايچون، نه اينكى گلَسن بوردا دا دردلره درد قاتاسان! عوض بوجور جينى بازليغ بيراز ساكين اول و سعى ائله منطقى داوران، اونسوزدا بو ادام بير سوچ ايش گورمويوب كى سن اونا سوچلو كيمى داورانيرسان، اوزون ده ياخچى بيليرسن كى جانى خيدهَ ينه ييغيشيب كى مجبور اولوب سندن يارديم ايسته سين يوخسا سيز كيشيلره يارديم ايستمه لى آدام دئلسيز. سيزه بوش و معنى سى بللى اولمويان غيرت هر شى دن اونملى دير. ممدعلى كى زور اوزون توتوردو جواب وئردى: سيز نه بيليرسيز غيرت نه دير، بو اولكه ده نه بيليرسيز كى ميلتينين دالينجا و يا اوزونده سنى بى غيرت آدلانديرديغى نه دير؟ اونسوز اسكى دن دئيب لر كى هر زامان خاطا اؤلنده اولار، بوردا دا خطا ناهيده كى حتماً دوروشوق يا گئييشيغينده بير يانليش ليغ اولوب كى بيرين تحريك ائليب كى اونا موزاحيم اولسون لار. ناهيد اول گرَك اوز رفتارين دوزلدهَ و البته بوگون ده اوزو ايسته مه سه من اونا رفتارلارين دوزلته جه يم! ناهيد كى بو حالا كيمى دينمه ميشدى، گوز ياشلارين سيليب و او حالدا كى دانيشماغا چاليشيردى زوردان سوروشدو : مثلاً منيم نه يانليش ليك لاريم اولوب و نه پيس ايشلريمى ايصلاح ائله مه ليم؟ ممدعلى جواب وئردى: مثلاً مانتو عوضينه چادرا اورته جكسن و چادرانى تام اوزونه چكه جخسن، آغاردان – قيزلاردان وورمويوب و قاشلارينى آلماياجاخسان، بازارا چيخاندا تك دئيل مندن برابر چيخاجاخسان، ايشله ميه جخسن و گليب بيزيم بير اوتاق دا ياشياجاخسان حيات يولداشين دوستاق دان چيخينجاق! بو ايشلر بئله دير، قالدى كى موزاحيم اولانى دا اوزوم بيلم نئنَرَم. ناهيد كى ناف اوزون چاره سيز گوروردو بير يواش سسله دئدى: دئديم كى اگر قراردى بوجور جينى بازارى چيخارداسان، قاينيم گيل دن يارديم ايسترم و سن ائله باغيشلا و نجور گليبسن اوجورده زحمت چكيب گئتگينن، خاطا منده كى سنه سوزومو دئديم، سن بير جور ده لى سن كى گوزلرينى يوموب دانيشيرسان، منيم ٣٥ ياشيم وار و بير اوشاق دان سيزين ائوده بير اوتاق دا نجور كئچينيم؟ سنين ده حياتين و حيات يولداشين وار! قالدى كى گئشيخ و دولاشيغا كى اوزونده بيليرسن يخچال كارتونونا دا گيريب دولانسان بو پروبلم لردن اوز به اوز اولا بيلرسن. ممدعلى كى سانكى ائشيدميردى يومورغون ميزه ووردو و باغيردى: يوخ من دئديغيم اولاجاخ و بو مسله بوردا قورتولاجاخ، يوخسا سنى ده اؤلدورم سونرادا اوزومو اؤلدورم و مسله نى قورتاريب ايكيميزين ده جانين راحات ائلرم. مارال كى اينديه كيمى قولاق آسيردى سسى توتولا- توتولا ممدعلى يه سارى دئدى: نه خبرين دى؟ آدام سنه سوزون دئمه غه حسرت قالير، سنه سوز دئديغى زامان آدام بو سرى اصلى مسله نى اونودوب سنه ايليشير. بيراز اوزونو كنترل ائله، بئچارا ناهيدين دردى آزدير سنده اضافه لن! بو حالدا ممدعلى مارالين سوزون كسيب و يوغون سسله باغيريب: سَسينى كسَ، سيزين هامينيزين جينسى خارابدير، سيزين باشينيزين اوستونده بير نفر آغاج دان دورماسا، سيزى كنترول ائله مك اولماز. ائله من دئديغيم اولاجاق، بو مسله بوردا بيته جخ، بوندان آرتيق منيم آبير و حيامدان اوينوياماسيز. ناهيد بو حالدا اوزون ساخلاياميب و او حالدا كى آغلاييردى آياغا قالخيب و ممدعلى يه سارى اوزون توتوب دئدى: ممدعلى سن الله چيخ گئت و بوندان آرتيق منيم جانيمى سيخما، منده اوزم بيلم اوز پروبلملريمى نجور حل ائليم، لوطفاً منى بوراخ قوى اوز درديمه يانيم. ممدعلى كى آياغا قالخميشدى و رنگى قيپ- قيرميزى قيزارميشدى ناهيده طرف گئتدى و اونون قارشى سينده دوراراق دئدى: سن بيليرسن هيچ غيرت نه دير؟ بيليرسن جماعتين آدامين داليندا پيس باخيش لارى نه دير؟ دئديغيم كيمى بو مسله نى بو گون من حل ائليه جه غم و لازيم اولسا ساچلاريندان توتوب و چكيب و أئوه آپاراجايام. بو مسله ناموس مسله سيدير و ناموس تميز ساخلاماخ دان اوترو لازيم اولسا دونيانى داغيدارام، ناموس مسله سيدير كى اونا خاطير اوزومو اؤلدورم، اودا قال سن، مارال يا گوناى! او حالدا اوزون ياخينلاشيديرردى ناهيدين اوزونه سارى برَكدن باغيردى: آنلاييرسان بو مسله ناموس مسله سيدير ناموس.
ناهيد او حالدا كى گوزلرينين ياشينا حاكيم اولا بيلميردى اوزون مارالا سارى توتدو و دئدى: دور بونو آپار سن آلله، جانيما غنيم ايسته ميرم، منى بوراخين اوز پروبلم لريمله، ايسته ميرم سن منه يارديم ائدسَن، دور چيخ گئت سن آلله. مارال كى آرادا قالميشدى و بيلميردى نجور ممدعلى نين شَرين سُوسون اوزون ممدعلى يه سارى توتدو و بير يالواران سسله دئدى: ممدعلى قورتار سن آلله، بيراز ساكين اول، اوشاق اوتاق دا وار. گئت ائشيهده بير دولان بير ائنين آچيلسين سونرا گَل. ممدعلى كى سانكى جوجووه يئميشدي و يئرينده اوتوراميردى مارالا طرف غضب دن باخدى و دئدى: دئديم كى سن سَسينى كس و قاريشما، بو مسله نى قورتاراجايام من بو گون، خيرخيراماجاخ يئتيريب، خاطالارين چوخو اوز بى ناموس لوغوندادير كى باعيث اولور بى ناموس آداملاردا گليب بونو تاپيرلار، اسكى دن دئيرلر كى " چولمح ديغيرلانار قاپاغين تاپار" بو مسله نى حل ائتمك ايچون اول گرَك ناهيدين يانليش و تحريك ائليَن رفتارلارين ايصلاح ائليَك. بو مسله ناموس مسله سيدير، كيشينين ناموسو اولماماسا- ياشاماغى نمه نه يه لازيم دير؟ ممدعلى او حالدا كى ناهيدين اوزونه ياخينلاشيردى باغيريردى : ناموسوزلوغو فقط قان تميزلر و من بو ايشدَن هئچ چكينميرم ، آنلادين يا يوخ؟ ناهيدَ جواب وئردى: سنه دئديم كى گلديغين يئردن چيخ گئت و من اوز ايشتباهيم ايچون عذور ايستيرم كى سوزومو و درديمه ايسته ديم قارداشيما ديئم، لوطفاً فقط چيخ گئت و بوندان ارتيق جانيمى سيخما. ممدعلى جواب وئردى كى دئديغيم گيبى ساچلاريندان ياپيشيب و مجبور اولسام سنى دويه- دويه ائودن ديشارى چيخارديب و رفتارلارينى ايصلاح ائليه جه يم. ناهيد كى داها بو قدر سايغى سيزليغيلا دوزَميردى و پئشمان اولموشدو كى دردين ممدعلى يه دئديغينه، اوزون ممدعلى يه سارى توتدو و دئدى: سن ايشتيباه ائليرسن كى بو قدر اوزونه ايجازه وئريرسن كى منيم اوزل مسله لريمه قاتيشيب و منى راحات سيز ائليسن، ايندى ده چيخ گئت و اوز مريض رفتارلارينى ايصلاح ائله. ممدعلى كى قيپ قيرميزى قيزارميشدى و اَل و آياقى تيتره يدى ناهيدين اوزَرينه هجوم آپاريب و او حالدا كى يومروق دان ناهيدين اوز و باشيندان وُروردو باغيريردى: بيزيم آبيرى سن آپاردين، سنه نئچه سرى اويارى وئرديم كى موغايات اول بيزيم ناموسلا اويناما! او حالدا كى ممدعلى نين آغزينين توپورجَخلرينه ماليك اولا بيلميردى باغيردى: آنلادين بى ناموس؟ ناهيد كى بورنو و آغزى قانلا دولموشدو و اوز باشى يوموراق يئرلريندن قاراليب – قيزارميشدى اوزونو مودافيعه ائتمه غه چاليشيركن بير حَزين و توتولموش سسله دئدى: منيم جانيم دان نه ايستيرسن؟ اَل چك منيم جانيمدان اوز دردلريمله تك جانيما بوراخ منى. بو حالدا مارال كى اينديه كيمى ممدعلى نين قورخوسوندان قاريشماميشدى ممدعلى له - ناهيده سارى گئتدى و اوزون اونلارين آراسينا آتاراق ممدعلى يه اوزون توتوب و دئدى: بوراخ، اولدوردون! نه وئريبسن آلابيلميرسن؟ سنين به شرفين يوخدو كى بير نفر سندن يارديم ايستيب اونون اوستونه اَل اوزاديرسان؟ ممدعلى او حالدا كى يومروقون مارالا سارى آتيردى باغيردى: هامينيز بير بئزين قيراغى سيز، سيزين اوسته آغاج اولماسا آدام اولماسيز . او حالدا كى ممدعلى مارالدان – ناهيدى ديويوردو گوناى اونلارى چيغير- باغير سَسلرين ائشيديب و گليب اونلارين كناريندا دوروب و تيتره يه – تيتره يه باغيريب و آغلاييردى. اونون دئديغى بللى دئيلدى و بويوك احتيمالا ديلى توتولموشدو و ساده جه آياقلارين يئره چاليب و اللرين گوزلرينه قويوب و جيغريلرتى سسى گليردى. ناهيد كى مارال اوزون اونون قاباغينا آتميشدى بو حالدا گونايى گوردو و اوزون آتدى اونا طرف و اونو باسدى باغرينا و بو حالدا كى آغزى – بورنونان قان گليردى گونايى اوخشاراق اونا سارى دئدى: قورخما بالام، هئچ زاد ديئل، قادان آلارديم. مارالين گوزلرى ناهيدن – گونايا ساتاشدى و گونايين او حالين گورونجه بوغازيندا نه گوجو وار ممدعلى يه سارى دئدى: بسدير دا، اوشاغين باغرى چاتلادى! ممدعلى بو حالى گورونجه بيراز ياواشلادى و او حالدا كى دئيردى بو ناموس مسله سيدير و ناموس مسله سينده لازيم اولدوغو زامان پيسليغى فقط قان يويار و من اوزومو ميلتين گوزونده بى ناموس و بى غيرت گورستره بيلمم! سيز هئچ بيليرسيز ميلتين باخيشى بى غيرت آداملارا نجوردو، نجور باخديلاريندا گولورلر، نجور آتماجا آتيرلار، نجور دالينجا سوز دانيشيرلار! سيز بونلارى نه بيلرسيز؟ بونلارى بيلمه غه كيشى اولماق لازيم دير! بى غيرت كيشى بيزيم توپلومدا سانكى طاعونو اولموش بير اينسان دير كى هامى اونونان قاچير و اونو نشانه لير، هامى اونو تانيير، حتى اوشاقلار اونو مسخره يه قويولار ، سيز نه بيليرسيز بير كيشى نى مسخره يه قوياندا نه حيس اونا اَل وئرير؟ مارال او حالدا كى ناهيدن – گوناى اوتاقا سارى آپارماق ايستيردى اوزون توتدو ممدعلى يه سارى دئدى: سنين ناموسونودا، غيرتيني ده! ناموس سنين كيمى بى غيرت كيشى لره ده گليب كى اوز آلچاق ليغينى بير قادينى دويمكله گيزلتمك ايستيرسن. او آدين چكديغين توپلوم دا ائله همن او كيشى لر دير كى دالدادا هر طورلو ايشه باخيب و حتى زورونو اولسون قادين لا ايليشگى قورماق ايستيرلر، ائله همن بو ذاتى خراب اولدوقلارى ايچون اوز قادين و قيزلارينا قيسقانيلار و دوشونورلر بلكه قادين لارى دا اوزلرى كيمى ذاتى خاراب ديلار. سيز كيشى لر اوز بيناموسوزلوغونوزون قاباغينيزى آلين ايلك اول، بلكه او زامان اوزونوز ايسته دديغينيز گيبى بو مسله حل اولا. اونلار بو حالدا كى اوز-گوزلريندن قان گليردى اوتاقا گيرديلر و اوتاقين قاپيسين دالدان باغلاديلار، اما گوناى هله تيتريدى و ديلى توتولموش لار گيبى دانيشا بيلميردى، ناهيد اونو اوخشايير و اوزونو نورمال گوستره رك گونايى ساكيت لشديرمخ و اونو نورمال حاله گتيرمه ايستيردى. گوناى دا او حالدا كى تيتريدى و جيغيرتى سسى گليردى ناهيدين اوزونون قانلارين كوينكينين قولانان سيلمه غه چاليشيردى. مارال بونو گورونجه هم اوره گى دولدو و هم آنلادى كى اونلارين اوزرينده اولان قان گونايى داها چوخ قورخوسونا سبب اولوب. مارال همن بير نئچه دستمال گوتورورب و ناهيده سارى توتوب دئدى: اوزونون قانلارين سيل، أوشاق قانلاري گوروب جانينا خوف اوتوروب. ناهيد او حالدا كى اؤزونون قانلارين سيليردى مارالا دئدى: منيم سوچوم نه، ساده جه من اونان قارداشيم اولدوغو ايچون يارديم ايسته ديم! ندن او يارديم عوضينه منى دويوب و تحقير ائلير؟
مارال او حالدا كى سَسى توتولموشدو ناهيده جواب وئردى: كيشى لر اوز اسكيك ليك لرين و نقصان لارينين اوستون اورتمك ايچون قادينى دويوب و اَزَرلر، اونلار قادينلارى تحقير ائلمك دن اوزلرينين چكديخلري گوندليخ تحقيرلرين اونوتماق ايستيرلر، اونلار اوزلرى گئنليخده قادينلارا بير جينسى پرسپكتيوده باخديخ لارى ايچون، اوزلرين بو جينسى پرسپكتيوده اسير گورولر و چونكى بو باخيش دان ياخالارين قورتارا بيلميرلر و اوز ذهنيتلرين ايصلاح ائليه بيلمه ديخلرى ايچون قادينلارى اوزلرينين بودروملارى ايچون سوچلو گورولر. قادين تاريخ بويو اوزو دوشوندوغو گيبى دئيل، كيشى لر دوشوندوغو گيبى اوزلرين ابراز ائليرلر!
گوناى بو حالدا اوزون آناسينا سارى توتوب و سوروشدو: انا داييم نيه بيزى دويور؟
ناهيد كى آغلاييردى گونايى قوجاغينا آلدى و باغرى نا باساراق جواب وئردى: بيلميرم قيزيم، آدامى قارا باساندا، هر يئردن بأسير. بودا بيزيم شانسيميزدير، آتان اوردا اسيردى، بيزى بوردا دايين دويور، ديشارى دا چيخيرسان امنيت يوخ.
گوناى بو حالدا جواب وئردى: بس به آتام نان دانيشماياجاييخ بوگون، به دئدين آتاى نان دانيشاجايخ. آتاما دئيرم كى داييم بيزى دويدو، آتام گلر داييم دان حايفين آچار! آتام آخى چوخ گوجلودور.
ناهيد او حالداكى گونايين ساچلارين اوخشاييردى، جواب وئردى: يوخ قيزيم بوگون حاليم يوخدو آتانان دانيشاق قالسين سونرايا. بو وضعيت له آتانلا نه دانيشيم؟ قوى بارى اونون دردلرينه فاضلا درد يوكلنمه سين، قوى بارى هر كس اوز دردين چكسين.
مارال بو حالدا گونايا جواب وئردى: دانيشاجايخ آتانلا، سنده هئچ زاد دئمه گينن، آتانين جانين بونان آرتيق اوزمه. قول وئر كى آتانا بير شى دئمه دايين ندان ، اوندا اوزوم آنانى راضى ائليرم كى آتانلا دانيشين بو گون.
گوناى نازيك و اينجه سسى له جواب وئردى: قول وئريم زن دايى، والله هيچ زاد دئمم آتاما.
ناهيد دئدى : يوخ بوراخ مارال، بوگون حددن ارتيق باسقى وار اورگيمده و قورخورام اوزومو ساخلايامايام، قوى قالسين سونرا دانيشاريخ .
مارال كى آياق اوسته قارخميشدى و پنجره بارماقليقلارى داليندان ائشيه باخيردى جواب وئردى: بوراخ قيز، بيز هر زامان باسقى آلتينداييخ، اونسوزدا اوختاى دا اوردا جانى سيخيلير، اونودا بير دوشون، زنگ ورماسان نيگران اولار و اوردا فيكيرين مين يئره يورار. قالدى كى ايمكانى يوخدو دا بير يئردن سوروشسون . دور هم اوزونون هم ده گونايين اوز- اَلينى يوگونان و حاضيرلاش زنگ آچاق تا كى وقت كئچيب بهانه گتيرمسينلر بى واخت زنگ آچيبسان.
ناهيد جواب وئردى دوز دئرسن قوى دانيشاق، قيسا اولسادا اينتيظاردا قويموياق بيلسين. اما تلفنى گتير هالدان بورا ، ايسته ميرم اوزوم او بى وجدانين اوزونه ساتاشسين. مملكته حتى بير وجدانلى پليس اولسايدى زنگ آچارديم او بى وجدانى بوردان قووارديم. اما نئى نمك كى هر كس بير-بيريندن ويجدان سيز.
مارال بو حالدا جواب وئردى: بوراخ ممدعلى نى، اونون حسابين منه بوراخ، ايندى اونونان اوزوم حيسابلاشارام.
ناهيد جواب وئردى: سنه الله بوراخ اونو، داها بوگونوموزه بسدير، فقط دور تلفنو گتير بورا و اونو بوراخ. باشيم پاتلايير.
مارال او حالدا كى آياقا قالخيب و قاپيدان ائشيگه چيخيردى دئدى: قوى بير چاى دم ليب و بير تيكه پنير چورك گتيريم يئگينَن ، زامان گلنيجه بلكه حالين بيراز اوزونه گلدى. مارال دوروب آياغا قارخيب اوتاق دان ديشارى يا چيخيب تا كى بير چاى دمله ييب و ممدعلى نين شرين سؤوْسون. ممدعلى او حالدا ايلان وؤرموش گيبى بير يئرده اوتوراميردى ايچينده فيرتينا قوپور، او دوشونور كى عمللرى باجيسينا قارشى يانليش دير، او حالدا كى بارماخ لاريلا اوينويور و اورگَى چاليب چيرپينير گوزو مارالا ساتاشير و ايچينده اوتانجينان- نيفرت قاريشيمى بير دويغو يارانير. او مارالا اوتانجينان گوردوغونده تئز باشين آشاغى سالير و سونرا اوزونو گوجسوز و سوچلو گوردوغونده بير نيفرت حيسى له باشين قاوزايب و مارالا بير كين باخيشي لا گوزلرين بوزالدير. مارال دا ممدعلى نى گورونجه سانكى جين دميرى گورموش؛ ايچينده بير نفرت و قورخو دويغوسو بيريكيمى يارانير، او قورخو و نيفرت اونا اصلان گيبى جيسارت باغيشلايير و ممدعلى نين اوستونه گئديرك اونا دئير: نه اولوب، منى اولدورمك ايستيرسن،جانيميزدان نه ايستيرسن اوتانماز؟ اولدورجكسن بير سرى اؤلدور تا جانيميز قورتولسون. ممدعلى كى اللرى سسى كيمى تيتره يير و اوزونونون رنگى قيپ-قيرميزى قيزاريب و ايچينده نيفرت له برابر بير سوچ حيسى وار، مارالا سارى اوزون توتوب و تيتره ك بير سس له دئير: شرف و ناموسومو قوروماق ايچون لازم اولورسا اوزومو، سنى و لازيم اولان هركسى ده اؤلدورم. سن نه بيليرسن بو توپلوم دا آداما بى شرف، بى ناموس و بى غيرت باخيشيلا باخاندا نجور باخيرلار! سن نه بيليرسن كى نجه آدمى آشاغى لاييرلار؛ باخيش لارى لا، گولوش لرى له و دانيشيق لاريلا! سن فيكير ائليرسن كى من سيزى اَزيب- دويمك دن ليذت آپاريرام؟ او زامانكى كى بو توپلوم دا بير بي غيرت كيشى كيمى تاننيدين، سانكى بير پيسديحلى گيبى سن، هر كس سنى آشاغى لاماغا اوزون حاقلى بيلير، هر كس سنه اويله باخير سانكى اوزونه توپورمك ايستير! اصلينده من سيزى حاقلى بيليرم و اوزومو سوچلو، اما بونان بئش-بئترين ياپماغا دا حاضيرام! لازيم اولورسا ناموسوما لكه اوتورماسين دييه دونيانى اودا چكه رم اوزوموده و سئوديغيم هركسى ده اونون ايچينده يانديرام. من بونون بويله اولماغين ايسته ميرم بو منه توپلوم طرفيندن تحميل اولونور. سن نه جور اولورسا بو توپلومدا ياشيرسان و هر نه قدر اوزون ايسته ميب و توپلوم قانونلارين قاباغيندا ديره نيب موقاومت گوسترسنده توپلوم دا اولان كورال و اخلاق لار اوزلرين سنه تحميل ائليْير. سيز اوزونوزو منيم يئريمه قويون و باخين كى سيز منيم يئريمه اولسايديز عينى ايشى گورمزديز؟
مارال كى پيچاق وُرسايدين قانى چيخمازدى او حالدا كى دويغوسال بير حالداييدى اوزون توتدو ممدعلى يه سارى دئدى: دور چيخ گئت سن آللاه، دور گئت بوندان آرتيق جانيميزى سيخما، دور گئت بير- ايكى گون شرينى سُوْ تا گورك هارانين داشين باشيميزا سالاريخ. ايندى گونايين باغرى چاتلار، اوشاق تيتيم- تيتيم تيتريير، ايندى ده اوختايا تلفن آچماق زمانى دير، دور گئت بلكه بيراز ساكين اولوب آختاى دان ايكى دقيقه دوغرو-دوزگون دانيشا بيلديلر. جلاد كيمى بوردا بكله مه، دور گئت سن آلله! ممدعلى كى پيچاق وُرسايدين قانى چيخمازدى، مارالا بوز- بوز باخاراق دانيشمادان آياغا قارخيب و دورب قاپى يا سارى گئتدى، قاپى آغزيندا آغزينين توپورجكى او حالدا كى ديشارى يا آتلاييردى دونوب مارالا سارى دئدى: من گئديرم، اما بيل اوزونوزو ييغيشديرماساز من سيزى ييغيشديرمادا هيچ صبر ائتمَك دوشونجه سينده دئيلم و لازيم اولورسا گرَكديغى ايشى گورَرم. عاقلينيزى باشينيزا يغين و چكيب يئرينيزه اوتورون، منيم آبيريملا اوينامايين! اويناديغينيز حالدا بهاسين اوده يه جكسيز، بونون بهاسى چوخ آغيردى و هاميميزين جانيميز قيمتينه قورتولار. مارالين گوزلريندن ياش گلديغى حالدا اَللرين اوزونه توتوب و يواش ممدعلى جواب وئردى: گئت سن آلله، گئت اَل چَك جانيميزدان! ممدعلى قاپى نى نه گوجو وار بير-بيرينه چالدى و ديشارى چيخدى. ممدعلى كوچه ده گئده-گئده هاوانين سَرين اولدوغونا باخمياراق تَر ايچينده بووغورلوردو، اَلين جئبينه سوخدو تا كى بير دستمال تاپسين تا كى اوزرينده كى ترى اوندان سيل سين، تاپانمايينجا كوينگين گوشه سيله اوزون سيلدى و آديم لارينين هيزين آرتيراراق اوزاخلانماق ايسته دى، جانى چوخ سيخيليردى، بير يئرده سيغينيب آغلاماق ايستيردى! همى سوچ دويغوسو و هم جماعات دن گلن آشاغيلاماق اوندا غريب بير دويغو يارادميشدى، سانكى يوخ اولماق ايستيردى، سانكى دوغولماماق ايستيردى، سانكى كى اوزاقلارا گئديب غيب اولماق بير دويغوسو واريدى ايچينده! اما ايچينده نيفرت ده اونا بير قورد گيبى يئرتيجى دويغو باغيشلاييردى، ناموسو قان يويار، بير سيلاح آليب اولدورَم سونوندا هاميسين و سون قورشونو دا سيخارام اوز كافاما. بو ذيلتى چكه بيلمه رم، فقط بوجوردو كى بو توپلومدا باش اشاغى اولماق دان قورتولا بيلم. فقط بوجوردو كى اوزومنن بير خوش آد بوراخا بيلرم بو توپلومدا، او اوز-اوزونه دئينيردى.
مارالدا او حالدا كى گوزلريندن گوز ياشى دامجى- دامجى داميردى، كترى نى گازين اوستونه قويدو و بوز دولابيندان پنير و چورك چيخاردى كى ناهيدن- گوناى بير تيكه چورك يئسينلر. او حالدا كى گوزلريندن دامجى ليان گوز ياشين سيليردى اوتاقا سارى گئدى و اوتاقين قاپيسين آچاراق او حالدا كى آنا- بالا قوجاخ لاشيب بير گوشه ده اوتورموشدولار اوزون توتوب ناهيده سارى دئدى: دورون گلين بير تيكه چورك دَن پنير يئيب بير چاى ايچين! گوناى باشين قاوزاياراق جواب وئردى؛ يوخ من قورخورام، داييم منى وورار. بو حالدا ناهيد گونايى قوجاخلاراق جواب وئردى: گتير بورا، بوراخ ايسته ميرم گوزوم او بى اينصافين گوزونه ساتاشا. مارال او حالدا كى گونايي ناهيدين قوجاغيندان آلماق ايستيردى جواب وئردى: چيخدى گئتدى ائشيه، دورون بير اَل- اوزونوزو يويون ايندى تلفن آچماق زامانى يئتيشر. گوناى تلفن سسى ائشيديغينده همن آياغا قالخدى او حالدا كى اوتاقدان ديشارى چيخيردى سؤوُنَرَك چيغيردى: آتام لا دانيشاجايام، اتام لا دانيشاجايام. ناهيدَن-مارال دا گونايين سئوينجينى گوروب اورك لرى آچيلدى و اونان برابر اوتاق دان هالا سارى چيخديلار، ناهيد گونايى چاغيريب و اونو گوتوروب لوابادا (روشويى) برابر اَل-اوزلرين يويوب و اوزرينده اولان قانلاري تميزله ديلر، ناهيد آيينادا گوزلرينه باخدى كى قاراليب و آلچا يئكليخده شيشميشدى، اَللرين گوزلرينه چكدى و بير آجى حيس ائتدى. گوناى بونو حيس ائدَرَك سوردو آنا آجيير؟ يوخ بالا بير شى دئيل، ناهيد جواب وئردى. ناهيد گونايين اَليندن ياپيشدى و ايكى سى برابر گليب اوتوردولار موتفاقدا ميز باشيندا. مارال هر كسه بير چاى توكوب و اوزون توتدو ناهيده سارى دئدى: صاباحدان هئچ زاد يئميب سن، بير تيكه چورك يييب اوستوندن بير چاى ايچ جانلانيب همن دوستاغا زنگ آچ، يواش – يواش زامانى گلير. ناهيد چاى قاباغينا چكيب و جواب وئردى: بير چاى ايچيم و دوستاغا زنگ آچيم ايندى جانيم ايسته مير و سونرا بير تيكه چورك ييه رم، ناهيد بونو دئيب و چاى باشينا چكدى و قورتولاندان سونرا تلفن سارى گئتدى. نئچه سرى تيلفن توتدو اما ايشغال چالدى اما سونوندا توتدو و گوزله دي كى بير نفر تيلفنو آچسين، تلفن قولاخ ليغيندان بير سس گلدى؛ بويورون بورا اوين زيندانى! ناهيد اونا آنلاتدى كى ساعت دوردَ اوختاى دان دانيشما زامانى وار، تيلفن دالينداكى كيشى دئدى بير دقيقه صبر ائت باخيم دئيم. دئدين كى اوختاي دير حيات يولداشينين آدى؟ دوستاق مأمورو سوردو، ناهيد جواب وئردى بلى . بيردن بير نَكره سس دن جواب وئردى: يارين صاباح اوختايين سون مولاقاتينا گله بيلرسن، حاكيم اونا اعدام جزاسى وئريب و مندن ائشيدمه ميش اولگونان كى بلكه ده يارين گليب حاكيمه يالواريب گونلون اَله گتيرسن بلكه ده اؤلوم دن قورتارسان حيات يولداشينى. ناهيدين آغزيندا توپورجكى قورودو و او حالدا كى دانيشماغا گوجو چاتميردى بير ضعيف سسله دئدى: به نه تئز، به قراريدى بو گون ساعات دوردَ دانيشاخ آخى؟ مامور او حالدا كى تلسيردى جواد وئردى: من بيلميرم خانيم، من بيز بالاجا مامورام و منه دئديخلرينى سيزه دئيرم، قالدى كى دولت هر كس دن وئرديغى قرارى يئرينه گتيرمه غين بكله سه ده بو اوز حالينا شاميل اولمور و او هر زامان وئرديغى قرارلارى پوزا بيلر. ايندى سيزده اوزونوز بيلرسيز، صاباح سحر چاغى بوردا اولون و حاكيم بى دن وئرديغى قرار لارى سوروشون دئدى و قطع ائلدى. ناهيد بونو ائشيديغينده همن تلفن داليندا اوزوندَن گئتدى، گوناى بونو گوردوغونده همن باغيردى آنا و ناهيدى باغرينا باسماغا چاليشدى، مارال همن ناهيدين باشينين اوستونه گلدى و ليواندا اولان سودان اوچ – دورد دامجى ناهيدين اوزونه سپدى، نه اولوب نه دئديلر آى قيز؟ ناهيد او حالدا كى سسى چيخميردى جواب وئردى: دئيلر اؤلوم جزاسى وئريبلر و صاباح گَل سون گوروشونه اوختايين. گوناى او حالدا كى آناسين باغريندايدى سوردو به نه اولدو آتام لا دانيشاجايديخ؟ ناهيد گوز ياشلارينا حاكيم اولامادى و آغلايا-آغلايا جواب وئردى دانيشاجاييخ، صاباح آتانى گوره جه ييخ. مارال دا ناهيدن حالين اويله گورونجه آغلاماغا باشلادى و هر اوچلو او حالدا كى يئرده اوتوربلار اوز قارا آلين يازيلاينا برابر گوز ياشى توكورلر. بير نئچه دقيقه كچيب و گوزياشلارى يواش لياندان سونرا مارال سوردو: نه دئديلر آخى، نه اولدو؟ ناهيد هيقيليا هيقيليا جواب وئردى: دئدى كى اوختايى اولوم جزاسينا چارپيبلار و صاباح سورن گوروش اولاراق گليب گوره بيلرسيز و آرتيردى كى بلكه ده حاكيمين گونلون آليب و اولوم جزاسين دا سينديرا بيلدين. نه بيليم صاباح گئديب حاكيمين آياقلارينا دوشوب و اوختايين قورتولماغين ايسترم، بلكه اينسان اولدو و اورگَى رحمه گليب و جزاسين سينديردى. زنگ وور آژانسا بير بليط آل سنه زحمت آخشام يولا توشوب صاباح اوردا اولوم، ايندى ده آخشام دى بليط زاد قالماز. مارال او حالدا كى دوروخموش حالدايْدى بير آن دايان دى و دئدى: دئرم هاميميز برابر گئدخ سن،من،گوناى و ممدعلى.
ناهيد جواب وئردى:
- آدين دا چكمه گوناى دان گئديرم.
= او زامان منده سيزدن برابر گلرم، اوچوموز بير گئدخ.
-ممدعلى گليب سونرا سنيله هالا-معركه سالار، ساغول اوزوم تك گئديرم . سن اوزونو باش آغرييا سالما.
= يوخ نه باش آغريسى، بوراخ ممدعلى نى، بيلسينه بير مسيج گوندريخ كى گئديخ و سونرا گلندَن سونرا بير هابيليب دوشر و سونرا دا قورتولار. ذاتاً سيزينله گلمه سم و اورگنسه تك گئديبسيز داها ده لى بازارى چيخاردار. هر نه اولسا بو توپلوم دا بير دول قادين ديشارى چيخاندا داها پروبلم يارانير بيله سينه، حتى بئله اونا گئجه ياتماغا هتل ده اوتاق دا وئرميرلر.
ناهيد او حالدا كى ديقتلى قولاغ آسيردى مارالا سارى دئدى: منجه سن اوزونو زحمته سالما، اما اگر ايسترسن گَل گينَن.
مارال او حالدا كى تلفن اَلينه آليب و زنگ آچيردى جواب وئردى هه ايستيرم لازيم دير. تلفن جواب وئردى ايران پيما كامپانى سى بويورون! سلام من تهرانا اوچ بليط ايستيرم بو گون آخشاما. آرواد يا كيشى تيلفن چى جواب وئردى. مارال دئدى: آرواد. قوى باخيم گوروم آروادا يئر قاليب. مارال تعجب له سوردو كى نه فرقى وار كى؟ فرقى وار خانيم، همى نيروى انتظامى گير وئرير و همى ده بو توپلومون كيشى لرى بيراز نااهل ديلر و گوردون يانيندا اوتوران آروادى راحت سيز ائلدى و اتوبوس دا هالامعركه چيخاردى! اولسون قارداش باخين، مارال جواب وئردى. تيلفون چو جواب وئردى بلى يئر وار اما بير ساعاتا بوردا اولمانيز لازيمدير. مارال جواب وئردى اولسون قارداش بير ساعاتا اوردايخ آلله سنى بيزه چوخ گورمه سين. مارال گوشى نى يئره قويدو و ناهيده دئدى: همن حاضيرلاشين و منده بو آرادا بير تاكسى يا زنگ آچيم اوتوبوس بير ساعات سونرا حركت ائده جك. ناهيد او حالدا كى گونايى يين پالتارلارين گئيديريردى جواب وئردى: گنه من دئيرم سن اوزونو دردسره سالما، ممدعلى نن حالا-معركه يه قارالارسان. مارال او حالدا كى تاكسى تلفنى يا زنگ آچيردى دئدى: بوراخ اونو، اوتوبوس دا مسيج آتارام كى سنله تهرانا گئديرم، دئينيب-دئينيب سونرا سوسار. بير نئچه دقيقه چكمدى تاكسى گلدى و اوچ يانا مينيب و ترمينالا سارى گئتدئلر. ترمينالا يئتيرديخلرى زامان يولچولارين چوخو گليب و اوتوبوس دولماق حالينداي دى. اونلاردا اوتوبوسا مينيب و گوناى دان ناهيد بير قولتوق دا و مارال دا بير ياشلى خانيم لا بير قولتوق دا اوتوردولار. ممدعلى دورمادان مارالاين موبايلينا زنگ ورور، اما مارال جواب وئرمير، ناهيده تلفن آچير ناهيده گوشى نى مارالا گورسه دير. مارال گوشى نى آلير و بو سرى جواب وئرير: ممدعلى بير ايكى ساعات سونرا اوزوم زنگ وورارام، ايندى دانيشماغا موساعيد دئيلم دئير و تلفنو قاپادير. مارال تلفنى ناهيده قايتاراراق اونا دئير: جواب وئرمه، ايندى شاما ساخلاياندا اوزوم زنگ وورام بيله سينه. ناهيد تلفنى سايلنته قويوب و چانتاسينا قويور. زنجاندا شاما ساخلايير سوروجو، هر كس آشاغى ائنير و آز آدام رستورانا گئدير، ندن كى بو رستوران لار چوخونوخدا كيفيت سيز يئمك لر ساتيرلار و سوروجولردن ال بير اولوب اونلارا كمسيون وئريلر تا كى سوروجولر اونلارين قاباغيندا ساخلاسين لار. هر كس آديم آتيب و بعضى لرى ده اوزلرى ائودن شام گتيريب لر و بير طرفده دوروب اوز شاملارين يئرلر. ناهيده ائودن بير بيسكويت گوتوروب و اونو آچاراق گوناى يا وئرير، بيسكويتين بيرينده مارالا سارى توتور و دئير: ايستيرسن گئدخ رستورانا، اما نورمالدا بيليرسن آدام گؤونمير. مارال جواب وئرير هه اوجوردو، بو گورور، اونسوزدا قوى اول ممدعلى يه بير تلفن آچيم، بالادان چيخدى! مارال تيلفونو الينه آلير و ممدعلى نين تلفون نمره سين توتور. ممدعلى بير تلفنو گوتوروب و بير عصبى سسله دانيشماغا باشلير: به سيز هانچى جهنم دره ده سيز، ندن تلفنا جواب وئرميرسيز؟ بوجورده ايش اولار، بيليرسن ساعات نئچه دير؟ بو ساعاتاجاخ هارداسيز؟
- ممدعلى آخشام ناهيد اوختايا تلفن آچدى و دئديلر كى گلين حضورى مولاقاتينا و بيزده ايندى تهران يولونداييخ.
- سيز مگر بى صاحاب سيز كى اوز باشينيزا هارا گونلونوز ايسته دى گئده سيز، مگر مندن ايجازه آلديز كى اوز باشينيزا تهرانا گئديرسيز؟ مگر من اؤلموشم كى سيز بى صاحاب آروادلار گيبى قاپيلارا دوشه سيز. هارداسيز دورن اوردا و من همن گليرم و اوز تكليفيمى سيزدن آيدين ائليَم.
- ممدعلى ده لى بازليغ چيخاردما، گونوز او اده لرى باشيميزا گتيردين و باجين ايسته ميردى سندن مصلحت له شه و يا يولچولوخ ائليه او قدر اويون دان سونرا. بيراز درك ين اولسون، بيراز آدام اول.
- نجور كى دئديم يئرينيزدن ترپنمه يين و ايندى همن يولا توشوب گليب اوردا بيلَم سيزه نئنه رم. او هرزه باجيم سنى ده يولدان چيخاردى، هرزه آدامى آلاخ كيمى آلاخ لاماق لازيم دير. بو خينا او بيرى خينالارا بنزه مز و بو سرى بو ايشى بيلم نئجه حل ائدم.
- هرزه سنين دوشونجه ندى، ايندى ده جهنم اول نه ايش گوره جخسن گور، اما بيزدا سنين او مريض دوشونجه نه كوله دئيليخ و اوز يولوموزا گئديريخ. اگر اؤلدوره جخسن ده اؤلدور، سانكى سن اؤلدوردون ده بيز اؤلمه ديخ، دئدى و تلفنو قاپادى مارال.
ناهيد اونلارين دئيشمه سين گوروب و نيگران اولاراق سوردو: نه دئدى، من دئديم سن اوزونو باش آغرييا سالما. بير طرفدن اوختايين گيرفتارليغى، او بيرى طرفدن بو توپلومون باسقى سى و بوردان بو ممدعلى نين بو قلبى قاراليغى ناف زامانينا دوشوب و بئليميزى بوكوب. آدام بيلمير نئنه سين، دردينى قارداشينا دئرسن تا كى بيلندن آرخا چيخسين اودا ناف ايشى قاتيب و آدامى پئشمان ائدير كى بير نفردن يارديم ايسته ديغينده. هيچ زامان بو قدر اومودسوز دئيليديم ياشاماغا و اينسانليغا!
مارال او حالدا كى ناهيدن اليندن ياپيشير جواب وئرير: هر شى حل دوزه له جك، هر شى يولونا گئده جك. قادين اولماق هر زامان چتين دير خوصوصيله بيزيم اولكه لرده داها بو مسله چتين دير. بوراخ صاباحى دوشون، اينشالاه كى اوختايى گورورسن و او چيخيب و بو مسله لرين هاميسى بيتَر. ممدعلى نى ده بوراخ، يول دا گله- گله يومشالار . بو حالدا سوروجو يولچولارى چاغيريب و اوتوبوسون بير نئچه دقيقه ده حركت ائتيغين باغيرير. اوتوبوسا مينه –مينه ناهيد موبايلينا باخدى و گوردو كى بير نئچه ده نه چالديرى و مسيج وار كى هاميسى ممدعلى دن دير. ناهيد مسيج لره باخدى كى ممدعلى يازيب هارداسيز حركت ائتمين و يئرينزده دورون و آدرسينيزى گوندرين، يوخسا دونيانين باشينا گئدسزده گليب تاپيب هم سيزى اولدورم و هم اوزومو! مسيج لرى مارالا گوستردى ناهيد او حالدا اورگَى هيزلا چيرپينيردى و رنگى آتميشدى، مارال دئدى سوندور و دينله گئجه نى اونا باش وئرمه. ناهيد او حالدا كى اَليندن بير باشقا ايش ده گلميردى و اوزونوده چاره سيز حيس ائديردى موبايلين سوندوروب و قولتوغوندا اوتوردو و يورقون اولدوغو ايچون ده يوخويا جومدو.
اوچونجو بولوم.
صاباح ساعات سگيزده محكمه قاباغينداديلار و محكمه آچيلديخدان ايچرى كئچيب و حاكيمين اوتاقينين قاباغيندا گوزله مه غه باشلاديلار. ناهيد گئديب حاكيمين اوتاقينين قاپيسين چالدى، بير سرباز چيخدى و بير پَرت قيافه له دئدى : هه نه اولوب صاباحين چاغى ؟ ناهيد جواب وئردى: من اوختايين حيات يولداشى يام، دونن دوستاق دان دئديلرحاكيم بى دن و حيات يولداشيم لا بو گون بوردا گوروشه بيلرم. سرباز بير ادبسيز سسله دئدى: گئت اوتور يئرينده، دييرم سيز گلديغينيزى و زامانى گلسه سَسلرلر بيله نيزى، دئدى و قاپى نى قاپادى. ناهيد دونوب گليب يئرينده اوتوروب و گونايى قوجاغينا آلدى. او حالدا كى گوناى ناهيدين قوجاغيندا اوتوروب و ناهيدن- مارال استرس دن و اوركلرينده اولان چيرپينتي دان بير- بيره باخيب اما ديللرى توتمور دانيشيلار، حتى سانكى گوناى دا بويوك بير آدام دير و اوردا اولان قورخو و ايضطراب اونا ائتكى بوراخيب و اودا هئچ دانيشمير و هر زامانكى قرارسيزليغينين ترسينه سسيز اوردا اولان اداملارا باخير، اونلاردا ساكين او حالدا كى ايچينده فيرتينا وار ديوارلارا باخيرلار. مارال اوزون توتوب ناهيده سارى دئير: گوى گئديم بيرده سوروشوم و خبر آليم به نه زامان بيزى چاغيراجاخلار! ناهيد او حالدا كى باشين قاوزايب جواب وئيرير كى ايت كيمى قاپيلار آدامى گئتمه بيراز دؤوزگونن ايسترسن. ناهيد او حالداكى آياغا قالخير و محكمه اوتاقينين قاباغينا گئدير جواب وئرير كى بونلارا باش وئرمه، بونلارين ايشى قاپماخ دير، قاباخ لاريندا گرك داياناسان، ظن ائتسه لر كى جانينا قورخو اوتوروب دا ايشين قورتولور: سياست لرى بودور كى قيلينجى بوغازينين آلتينا قويولار و باشيندان فيشار گتيريلر آشاغى يا سارى، اگر قاباخ لاريندا دايانميب و مقاومت گوسترميب و قيلينجين اوجو باتسا دا هاميسين باتيراجاخلار بوغازينا، اونا گوره ايلك اولدن موقاومت گوستره جخسن! مارال بونلارى دئدى و او حالدا كى ناهيدين سسى چيخميردى و ساكيت مارالا سارى باخيردى اوتاغا سارى گئتدى. قاپى چالدى اما جواب گلمَدى، تكرار قاپى نى چالاراق اونو آچدى و قاپو نين استاناسيندا دوردو و ايچرى باخدى ايكى ساققالى كيشى ميز ارخاسيندا اوتوروب و هيچ باشلارين قاوزايب اونا سارى باخماديلار و بير سرباز قاپينين استاناسيندا دورب اونا سارى هجوم گتيررك بير پرت و يوغون سسله سوروشدو نه ايستيرسن؟ باش گتيرميبسن كى، ايجازه سيز ندن ايچرى گيردين؟ مارال كى بير ياندان بونلاردان حايف آچماق ايستيردى و بيرى ياندان بيراز قورخموشمودو اوزونو كنترول ائلمه غه چاليشدى و جواب وئردى: سركار بير ايكى ساعات دير كى بوردا اتورموشوق و گوزلويوروق كى آديميزى چاغيرالار و هله آديميزى چاغيران يوخدور. سرباز بير يوغون و عصبى سسله او حالدا كى آغزينين توپورجَخلرى ديشارى چيخيردى باغيردى: گئت اوتور يئرينده و بيرده ايجازه آلماميش ايچرى گيرمه، لازيم گورونجه سيزى گليب چاغيريب و ايچرى آلارلار! ايندى ايت گئت اوتور اوتدوغون يئرده يوخسا نه گورسن اوز گوزونده ن گورمه ليسن. ناهيد قيپ قيرميزى قيزارميشدى و تيتيم- تيتيم تيتره يردى دونوب گليب يئرينه اوتوردو. مارال اونون اللرين الينه آليب و برَكدن سيخدى، هيچ بيرينين سسى چيخميردى، حتى بير- بيرلرينين اوزونه ده باخا بيلميرديلر. سانكى اوزاخداكى بير يئره بأخيرديلار، حتى گوناى دا ساكيت قاليب و سسى- سيميرى چيخميردى. بير نئچه دقيقه بويله سوكوتدا كئچدى، بو حالدا گوناى ناهيدين قوجاغيندا بير ترپه نرك سوردو: آنا بوراسي ندن بوجوردو؟ سانكى ديوارالاردان قورخو ياغير، كيمسه گولمور، كيمسه دانيشمير، هر كس بير- بيرينين اوزونه باخير او حالدا كى گوزونه باخا بيلمير. ناهيد گوناى يا قولاق آسديغى حالدا مارالا باخير كى گوزلرينين ياش دامجى سى توكولور و ايچريدن بير آه چكرك جواب وئرير: نه بيليم قيزيم هر كس بوردا بير پروبلمى وار، كيمسه بوردا اوميدى يوخ، هر كسين ايشى بو اينصاف سيزلارين اَلينه دوشوب كى ذره جه اينصاف لارى يوخ. بو حالدا بيرى يوغون سسله باغيردى: اوختايين عائله سى. ناهيدى سانكى ائلديريم وُردو، آياغا قالخماغا قيچلارى اوزوله گلميردى، نه قدر اوزونه زور وئريردى آياغا قالخا آياغا قالخا بيلميردى. همن عسگر ايكينجى كره بير يوغون سسله تيكرار لأدى : اوختايين عائله سى. مارال گونايي ناهيدين قوجاغيندان ائنديريب و ناهيدين قولتوغوندان ياپيشيب و اونو آياغا قالديرماغيدا يارديمجى اولوب دئدى: گوجلو اول هر شى ياخچى اولاجاخ، پيس گونون عومرو آز اولار.
ناهيد پيس كوهده آياقلارين يئرده سورودويه- سورودويه آياغا قالخيب و محكمه اوتاغينا سارى يولا دوشدو. قاپى آغزينا يئتيرديخلرى زامان قاپى آغزيندا كى بَكجى باغيردى فقط اوختايين حيات يولداشى ايچرى گيره بيلر. ناهيد سسيز-سيميرسيز بَكجى نين اوزونه باخيردى، مارال اونا سارى دئدى: اَن آزى گوى اوشاغى اونان برابر اولسون، اوزون يولدان گليبلر و اوزوده گورمورسن كى شوك اولوب و نورمال دورمو يوخدور. بَكجى مارالين اوزونه باخاراق جواب وئردى: بوردا سوز بيرده نه اولار و هر سوزو بير سفر ديَيلر، فقط اوختايين حيات يولداشى، لازيم اولسا باشقالارين ايچرى آلسينلار اوندا خبر وئريلر. بوردا ايسته دديغينيز گيبى دئيل، ايسته ديغيميز گيبى ترپه نه جخسيز: يوخسا محبوس دا كى گيبى باش آغرييا توشه بيلرسيز. ناهيد او حالدا كى چاره سيز مارالا باخدى قاپيدان ايچرى كچدى، گوناي مارالين قوجاغيندا گوزياشلارى توكوله-توكوله بير نازيك سَسدن باغيردى: آنا منده گلمك ايسترم، من آناما گئتمَك ايسترم، آنا به دئميشدين منده آتاملا گوروشه جه يم، ناهيد چونوب آرخاسينا بير آن دايانيب و گونايين گوزلرينه باخدى و باشين چوندريب و ايچرى گيردى. بَكجى قاپينى قاپادى و قيرجانا-قيرجانا مارالين اوزونه باخدى، گوناى مارالين قوجاغيندا ضولوم-ضولوم آغلاييردى. مارالين ايچينده بير فيرتينا قوپوردو، او بيليردى بو باخيش و قيرجانما نه باخيشدير اما اوزون چاره سيز حيس ائديردى، او دوشونوردو كى بو حياسيز و اوتانماز باخيش و قيرجانماغا بير تَپكى گوسترسه ناهيدين و اوختايين ايشين خاراب ائلر. او همن چونوب و يئرينده اوتوروب و گونايى ساكينلشديرمه غه چاليشدى و اونون ساچلارين اوخشاراق گوزلرين پنجره دن ديشارى تيكدى.
ناهيد ايچرى گيريب يواشجا بير سلام وئردى. قارانليق اوتاقدا اوچ ماسا واردى كى ايكى يوغون و ساققالى كيشى كه قارا كوينك گئيب بر و آنيلاريندا بير قارا موهور يئرى وار اونلارين آرخاسيندا اوتورموشلار، سلامينا كيمسه جواب وئرمه دى. ناهيد اوجور آياق اوستونده اونلارين قاباغيندا بكلدى. بيراز كئچديخدن سونرا منشى باشين قاوزايب و سوردو: هه، نه ايشين وار؟ ناهيد جواب وئردى: اوختايين حيات يولداشى يام، دونن تلفن آچديم دوستاغا دئديلر كى بو گون گلين محكمه ده گوروشون. حاكيم بو حالدا باغيردى: اوختايين حيات يولداشى سان؟ ناهيد جواب وئردى: بلى. حاكيم بير جاميش كيمى آياغا قالخيب و باغيردى: اونا توپلوموموز، اولوسومز و دينيميزه دوشمان ائلديغي ايچون اؤلوم جزاسى وئرديم. ندن گليبسن اؤلموش حسابيندا بو آندان و ايكى گون ايچينده جزاسينا يئتيره بيلر. حاكيم ناهيده ياخينلاشاراق او حالدا كى آغزينين پيس قوخوسون ناهيد اوزونده حيس ائديردى تكرار باغيريب و دئدى: اصيل سنى موحاكمه ائتمه لييْق، سن بو گوزليخده آرواد اونون باشين قاتيب و اونو راضى ائده بيلسه دين ائوده، او بوجور ايشلره بلكه هيچ قاتيلمازدى! اوختايين اؤلومونه ده بلكه سن باعيث اولورسان، آروادين وظيفه سى كيشى نى ائوده مشغول ائليب راضى ساخلاماق دير كى چيخيب ائشيهده بوجور اوز باشينا بالا آچماسين. ايندى نييه گليبسن كى چوخ بى واخت دير؟حاكيم او حالدا كى او قدر ناهيده ياخينلاشميشدى كى بدنى ناهيدين بدنينيه سورتونوردو باغيردى: اصيل سوچلو سن سن! ناهيدين بدنى تيتره ييدى، اؤرگينه ده بير آغير فيشار واركى سانكى، گوزلرى كافاسينا چيخيب و پاتلاماق ايستير! ايچريسينده كى آغرى پاتلاماق ايستير و اوزونن برابر بو اسكيك آداملارى داغيدماخ ايستير. اما اوزون ده گوجسوز حيس ائدير، ساده جه اوزون داليا چكير تا آراسى حاكيم له چوخالسين و حاكيمين قوخان بدنيندن اوزاقلاشسين. حاكيم قايديب قولوتوقوندا اوتوروب و تكرار باغريراراق ايدامه وئرير: اوختايين اؤلوم جزاسى ايكى گون ايچينده ايجرا اولاجاق و سنده لازيم دئيل اونو گوره سن، بودا سنين جزاندير، اونو كنترول ائده بيلمه ديغين ايچين.
ناهيد او حالدا كى گوزلريندن ياش گَليردى حاكيمه سارى دئدى: آخى بيزيم گناهيميز نه؟ ندن بيردن بيره اؤلوم جزاسى آلدى اوختاى؟ بو محكمه نين قرارى ندن بو قدر عيدالت سيزدير؟ بيزه سن او تانرى رحم ائدين، قويمايين بيزيم يوواميز داغيلسين، اَل- آياق لارينيزدان اوپورم . حاكيم آياغا قالخيب و او حالدا كى اوتاخ دان ديشارى چيخير جواب وئردى: بير وئرديغيميز جزالارا دليل وئرمه نيك، بو بيزيم ايلك اول پرنسيبيميزدير: قالدى كى خالق و دين و دولت دوشمانلارين قانون اساسيندا هر زامان اؤلدوره بيله ريك. يادينيزدان چيخماسين كى بورا هارادير، دئدى و ديشارى يا چيخدى. ناهيددن منشى اوتاق دا تك قالدى، ناهيد او حالدا كى آغلاييردى منشى يه دئدى: يانى هيچ بير يولو يوخدور، به اوزونوز دئديز كى گلين اوختايين سون مالاقاتينا، بلكه ايشى جوره ندى! نَدَن به ايندى بوجور ائليرسيز؟ منشى او حالدا كى تسبيح هين ألينده توولويور و بير ألى قارنينين اوستونده يومشاق و مهربان سسله جواب وئردى: بورا ايران دير منيم باجيم، قانون لار هر دقيقه دن بير عوض اولا بيلر، نَدَن كى قانون حاكيم و حكومت دير، صاباح نجور يوخودان قالخديقلارينا قاليب، هر نجور كئفلرى چكسه اوجور داورانيلار . بيزيم حاكيم ده اونلارين بيرى، مثلاً اوختايا اولوم جزاسى وئريب ،اما ايسته سه ايندى اوختايى آزاد ائليه بيلر. فقط اوز كئفينه قاليب، نجور كى اؤلوم جزاسينى ايجرا ائتمك ده اونون كئفينه باغلى دير و هر زامان ايسته ديغى آدامى اعدام و يا اعدام دان قورتارا بيلر. ناهيد بيراز ياخينلاشيركن سوردو به من نجور ائليم ايندى؟ سيزين ظنينزجه من نه ايش گوروم؟ سيزده منيم بيز قارداشيم. منشى آياغا قالخيب و او حالدا ناهيده ياخينلاشيردى جواب وئردى: والله ايش بيراز چتين دير و قاضى ده بيراز سرت آدام دير، اما بلكه اورگَى يومشالدى، هر نه اونون اورگينين يومشادماغينا قاليب و بوكى سن نجور باجاراسان اونون اورگين اله گتيره سن! ناهيد بير يالواران سسله جواب وئردى: آخى من اونون اورگين نجور اَله گتيريم؟ هيچ او منيم سوزومه قولاق آسير كى، اونسوزدا اونا يالوارديم دا كى آياقلارينا دوشوم و قيچلاريندان اوپوم، نه ايش گورمه لئيم آخى من داها؟ ناهيدين گوزلرين ياش آخيردى سوزلرين قورتولدوغو زامان.
منشى او حالدا كى ناهيده ياخينلاشيردى و اونون اَلينه پئچَته وئريردى جواب وئردى: من قول وئريرم كى سنه يارديم ائلييم اما سنده گره ك أليندن گلنى اسيرگه ميه سن! ناهيد گوزلرينين ياشلارين سيله سيله دئدى: والاه اَليمدن نه گلير اونو ائدرم كى اوختايى گوروب و آزاد ائدم. منشى جواب وئردى آليندن هر ايش گلسه گورمه لي سَن، بوجور قاباغا گئدسخ اوختاى دا آزاد اولار ، حتى سن و او ايشينه ده دونه بيلر و سيز بير موتلو حيات ياشايا بيلرسيز. نجور سيز دئيرسيز قارداش، اليم دن نه ايش گلسه گورَرم، ناهيد جواب وئردى. منشى ألينده بير كيچيك كاغيذ پارچاسى لا گلدى و اونو ناهيده سارى توتاراق دئدى: ايندى قولاق آس، اوختايين حياتى و گلجكى سنين اَلينده، سن ايندى فداكارليخ ائتمه لى سَن و اوز ايدعانى ثابيت ائتمه ليسن كى نه قدر اوز ايدعاندا صاديق سن كى اوختايى اؤلوم دن قورتارا سان و حياتينيزا بير چكي دوزَن وئرسن! ايندى گئت بير حماما و آرايشگاها و اوزونه تميز يئتير و ساعات اوچ- دورد آراسى دربست گَل بو آدرسه، حاكيم بى اوردا اولاجاق گجه نى و من او زامانا كيمى حاكيم بى له دانيشيب و سنده گليب اوردا بيرليكده دانيشاريخ و گونلون اَله گتيريخ اگر سن لازيم اولان ايشلرى گوروب و ايش بيرليغيندن اسيرگه ميه سن. فقط ياديندا قالسين تك گَلگينَن، ديشارى دا بالاجا قيز و آيرى بير خانيم دا وار ائله بيلسن، البته اوزونه گوره دئيرم، يوخسا اگر اوزونه پروبلم اولماسا اونلارى دا گتيره بيلرسن.
ناهيدين سانكى باشيندان بير قازان قاينار سو توكدولر، او ديلى توتمور دانيشا، بير طرفدن اوختايى قورتارماق ايستير و او بيرى طرفدن بونون اولماسى ايچون اوندان فرقلى بير شى ايستيرلر. او حالدا كى آغلاييردى منشى يه سارى دئدى: من ائولى ليم سيز بونو ياخچى بيلرسيز، سيزده هامينيز آلله آدامى سيز، سيز بونو مندن نجور ايستيرسيز؟ من نجور بو ايشى گوروم؟ منشى او حالدا كى اَلين دالى چكيردى جواب وئردى: بورا باخين من سيزه فقط يارديم ائتمك ايستيرم، منه بو ايشين بير خيرى يوخدو، قالدى كى سيزدن من يا كيمسه هله بير غير شرعى بير شى ايسته ميب، من عرض ائله ديم كى نهاردان سونرا اوز اوستو- باشينا يئتير و گَل اوتوراق حاكيمين اورگين اله گتيرَك. بو ايشى من الله خاطيرى و سيزين ايچون گورورم و حاكيم بى بيلسه منه باغيشلاماز بو ايشى منه. ايندى سيز منه دئيرسيز كى نجور مندن سن بو ايشى ايستيرسن؟ من سيزدن هيچ زاد ايسته ميرم، سيزه يارديم ائتمك ايسته ديم و اگر اوزونوز ايسته ميرسيز بويورون گئدين ديشارى و منيم اَليمدن بوندان آرتيق بير ايش گلمير. ناهيد ساكيتجه گوز ياشلارين توكوردو، او بير طرفدن اوتاقدان چيخيب و قاچماغ ايستيردى، او بيرى ياندان اوختايين سرنوشتى و اونون ايكى گون ايچينده اؤلوم جزاسى ايجرا اولماسى اونون بئلين بوكموش دور و اونو بير درين ايضطرابين ايچينه سوخموشدو. منشى تكرار اوزونو اونا ياخلاشاراق دئدى: باخ اوختايين حياتى سنين ألينده و بيرده حاكيم بى يين، ايندى قاليب سنه كى حاكيم بى يين گونلون آلاسان يا يوخ! بورانين قانونى بوجوردو، اونسوزدا سونو بير گون زحمته توشه جخسن و اوندان سونرا حيات يولداشينين حياتين قورتاريب و موتلو حيات ياشاياجاخسان. باخ منى ايلگى لنديرمز اما بو معاميله سنه قازانجدير و حاكيم بى او قدر ده بو معاميله يه راضى دئيل و اونو من گره ك پيس كوه ده راضى ائلييم، وقت آزدير، تصميمينى تئزليخدن توتگينان.
سيز نجور بو عملى مندن ايستيرسيز، من سيزين قيزينيز يئرينده يم، سيزين آنلينيزدا موهور يئرى وار و نماز قيلان و اروج توتان آدمسيز نجور بو گناها اوزونوزو باتيريرسيز! ناهيد آغلايا- آغلايا جواب وئردى.
منشى او حالدا كى ناهيدين گوزلرينه بير پيس باخيشا باخيردى جواب وئردى: باخين من سيزدن هيچ بير شى ايسته ميرم، سن بيزدن حيات يولداشينين قورتولماسين ايستيرسن و منده سنه يولون دئيرم. ايندى بونون گناهى و يا هر نَمنه سى اولسا سنى ايلگي لنديرمز و او بيزيم بوينوموزداير، اونا اوزوموز بير يول تاپارايق! ايندى اگر سن ايسته ميرسن، منيم زوروم يوخ، سن مندن بير يول ايسته دين، منده سنه يارديم اولسون تك بير يولو وار و اونو دا دئديم. ايندى اگر قبول ائتميرسن، قالانين اوزون بيلرسن، فقط ياديندان چيخماسين كى ايكى گون زمانين وار و ايكى گون سونرا بير عومور پئشمانليق چكه بيلرسن. ايندى گرك قرار وئره سن، كاغيذى مندن آلايب وئرديغيم آدرسه گليرسن يا يوخ؟ ناهيد درين بير سكوتا گيردى، اونون حيات بويو بو كيشى لردن كى آروادى بير جينسى و سكس اشيا گيبى گورولر نيفرتى واريدى و آرتيق بو آداملاردان كى بير متر ساققال قويوب و دين آدينا و مقام آدينا هر گورودوغو آروادان ياتماق ايسته ين آدملاردان ايرقنيردى! اما اوختايين نجور اولاجاغين دا دوشونوردو! او ساكيت يئرينده دورموشدو، اما گوزلرى كافاسينا چيخميشدى. منشى اونا ياخينلاشاراق آدرسى اونا سارى وئرركن بير هيز سسله سوروشدو نهاردان سونرا گلجك سن يا يوخ جيران؟ ناهيد اَللرى تيتره يه-تيتره يه آدرسى آلدى، اَللرى و بدنى قان ترين ايچينده دى، سانكى بوغولوردو! منشى او حالدا اونا ياخينلاشيردى اونا سارى دئدى: نيگران اولما، حاكيم بى مهريبان و اينجه بير اينسان دير، مقامينا گوره بلكه سرت گورسه نير، اما بو سرت آداملار ياتاقدا چوخ يومشاق اولورلار. آرتيق منده اوردايام و حتماً سنده حاكيم بى يين گونلون آليب، بير قيسا زاماندا حيات يولداشينا قووشوب و موتلو حياتينى باشلايا بيلرسن. منشى بونو دئدى قاپينى دال دان كيلدله دى و گليب ناهيدى محكم دن قوجاخلايب و اوپمه يه باشلادى! ناهيد هيچ بير تپكى وئره بيلميردى، سانكى بير اُوْ- اُوُچو تله سينه دوشموشدو. او فقط بير پيس جمدَح قوخوسو حيس ائديردى و اوزندن درين نيفرت حيسى واريدى و گوزلريندن گوز ياشى كسيلميردى.
منشى آياغا قالخيب ناهيده پيچه ته و بير بارداق سو وئررك اونا دئدى: اوز گوزونو سيل و بو سويو ايچ، هر شى بوجور راحات اولاجاق و فقط اوختايى دوشون! او سنين فداكارليخ سونوجوندا آزادليغا قووشاجاق، گئد بير آرايشگاها دا اوزونه بيراز يئتيش و زامانيندا گل وئرديغيم آدرسه.
ناهيد گوز ياشلارين سيلدى و سويو ايچمه ايسته دى، اما حيس ائتدى سودا جمدَح قوخويور و حالى قاريشماق اَل وئردى. او آياغا قالخيب و ديشارى يا سارى گئتمَك ايسته دى، منشى اونلا برابر گليب قاپى نين قاباغيندا تكرار اونو قوجاخلادى و دئدى: ياديندان چيخماسين، زمانيندا گَل و منده موبايل نمره نى دوسيه دن گوتوروب او ساعاتلار تماس لاشارام بيلندن كى آدرسى تاپاماسان يارديمجى اولام. بونو دئدى و قاپى نى آچدى و دالى چكيلدى.
ناهيد ديشارى چيخدى و و ايشيه سارى گئتدى، مارالدان گوناي اونو گورونجه همن آياغا قالخيب ناهيدين آرخاسيندان گئتدئلر. گوناى ناهيده سارى دئدى: آنا به من آتامى نه زامان گوره جه غم؟ ناهيددن هيچ سس چيخميردى، او فقط ديشارى يا سارى يئيندَن گئديردى! محكمه قاپى سيندان ديشارى چيخديخلاريندا مارال آرخادان اونو توتاراق دئدى: قيز به نه اولدو، ايندى بير ساعات دير ايچريده سن، سنه نه دئديلر؟ ناهيد چوندو و او حالدا كى بدنى تيتيم-تيتيم تيتره يردى باشين قويدو مارالين چئنينه و ظولوم- ظولوم آغلادى. مارالدان – گوناى دا اوندان برابر قاريشيب و اوچ يانا آغلاشديلار. مارال دئدى كورپونون او تايى ندا بير پارك وار گئدك همى اوردا بير هاوا آل و همى نه اولدوغون منه تعريفله. بو آرادا دا منده زنگ ووروم بير ممدعلى نن دانيشيم، اس ام اس – اس ام اس داليجا گوندرير كى هارداسيز من گلميشم تهرانا. ناهيد هيچ بير جواب وئرمه دى، او كورپويه سارى يولا دوشدو و گوناى دان مارال دان اونون آرخاسيندان يولانديلار. هاوا بولوتدوخ و گويده گونش گوروشمور، كورپونون آلتيندا آرابالار حيزلا گئديرلر. كورپونون كناريندان يولانيب پاركا سارى گئديرلر. يارى يولدا ناهيد دونوب مارال دان گوناى يا باخدى، گوزلرى دولدو، قولارين آچدى وگوناى بير قوش كيمى ناهيدين قوجاغينا قوندو. ناهيد گونايى باسدى باغرينا، آشاغي دان آرابالار حيزلا گئديرديلر، بولوتلو هاوايا باخيب و گونايى باغرينا باساراق كورپودَن آشاغى آتيلدى. مارالى سانكى الكتريك چارپدى، او كورپودَن آشاغى باخدى، گوناى دان- ناهيدين بدنى پارام- پارچا يولا داغيلميش. آرابالار ساخلاييب و ازون بير ترافيك قويروغو قورولوب، بولوتلو قوي دن ياغيش ياغير. مارال يخيلب قاليب كورپو كناريندا، اوردان نه قالخا بيلير و نه اوردان آيريلماق ايستير.
حاكيم اوتاخ دا منشى دانيشيردى كى سرباز ايچرى گيردى و منشى يه سارى دئدى: صاباح گلن آروادان- اوشاق محكمه قارشيسيندا اولان كورپودَن اوزلرين آشاغى يا آتيب و اؤلوب لر. حاكيم باشين قاوزايب و جواب وئردى: او كورپودَن چوخلارى اوزلرين آتير و اؤلور اما بو دئديغين بيراز عجله ائلدى و همى ده اوزوله بيرين اؤلومه وئردى. بلى حاكيم بى اوجوردو سرباز دئدى و ديشارى چيخدى. منشى اوزون حاكيمه توتاراق دئدى: بوگونكو سوروموز هيچ اولدو حاكيم بى، اما آيرى بير مورد جورلشديرم نيگران اولمايين. حاكيم او حالدا كى تسبيح چوروب و منشى يه باخيردى جواب وئردى: بيزه سور و خوشگذارنليخ چوخدو، بيزيم خوشگذارنليخ دا قوتسال ايشيميزه باغلى دير. باخ بيز نه سوچلونو و دشمنيميزى، بلكه اونون سئونلرين و يولداش لارين و عائله سين ده مجازات ائليريخ، حيات يولداشين گوله له ديخ، ناموسونان ياتاجايديخ جور گلمدى، اما اونان سونرادا اوزون ائله بوردان آشاغى يا آتاجاييدى. بونلارى اوز خوشلوغوموزا دئيل، دينيميزه و اولكه ميزه خيدمت ايچون گوروروخ. بو ياديندان چيخماسين منشى، بيزيم هدف دين و دولت دوشمانلارين جزالانديرماق دير، البته بو بيزه بير ايش دير و ايشيميزى سئوديغيميز ايچون اونو خوشلوخ اولسون دا بوش زامانيميزدادا گوروروخ. تك بوجوردور كى قورخونو ميلتين اورگينده اوتوردا بيلرسن.
قهرمان قنبرى.
No comments:
Post a Comment