آذربایجاندا بو مکتب پالتاری ماجراسی نه اولور اولسون، منجه اوولده آذربایجان دؤولتی اردوغان‌ین مشاوری جناب اوکتای سارال‌ین آغزینین پایینی وئرمه‌لی و اونون آغزیندان وورمالیدی کی بیر داها آذربایجان حاققیندا آغزینا گلن‌لری دانیشماسین و آغلینا مراجعه ائدیب، دؤولت مقامی اولاراق باشقا دؤولتلر حاقدا دانیشماغی اؤیرنسین.
اوکتای سارال توییترده یازیب:
آذربایجاندا
حجابلی شاگیردلرین تحصیل حقوقونون محدودلاشدیریلماسی قبول ائدیلمزدیر. اینانجینا
گؤره باشینی اؤرتن بیر شاگیردی مکتب قاپیسیندا ساخلاماق هانسی ویجدانا، هانسی
عدالته سیغیر؟ حجاب مانع دئییل، اینانجین افاده‌سیدیر. تحصیل حقوقو هئچ بیر
ایدئولوژی یاناشمانین قوربانینا چئوریلمه‌مه‌لیدیر. آذربایجانین بو یانلیش
یاناشمادان ان قیسا زاماندا دؤنمه‌سینی گؤزله‌ییریک. گنج‌لرین گله‌جه‌یینه مانع‌لر
یاراتماق دئییل، اونلارین قارشی‌سینداکی یوللاری آچماق لازیمدیر. بو دؤورده بئله
بیر یاناشمایا اصلا یول وئریلمه‌مه‌لیدیر.
گؤردویونوز
کیمی جناب مشاور چوخ یئکه یئکه دانیشیب و آذربایجان دؤولتینه «قبول ائدیلمزدیر و
دؤنمه‌سینی گؤزله‌ییریک» کیمی دستورلو افاده‌لر ایشله‌دیبدیر. بو لئچک مسئله‌سینین
سونو نه اولور اولسون، آذربایجان بئله آداملارا حدلرینی بیلدیرمه‌لیدیر و بیز
ایندی بو خرافه و جهالت ایچینده بوغولموش ذهندن چیخان سؤزلری آزجا چالخالاییریق:
اوولده دئییر
کی حجاب مانع دئییل و آنلامیر کی ائله حجاب و حجب لغتلری گیزلتمک، مانع اولماق و
دوخول‌دان منع ائتمک معناسیندا و اصلینده مانع‌دیر و قادینی حجابا سوخان آدام
هرنه‌دن اوول بوتون کیشی‌لری حیوان کیمی فقط سوخوشدورماق فیکرینده اولان بیر موجود
تقدیم ائدیر و اؤز قارا دونیاسیندا حجاب واسیطه‌سیله اونلارین دوخول ائتمه‌سینه
مانع اولور.
سونرا دئییر،
حجاب اینانجین افاده‌سیدیر و بیزجه دقیق بونا گؤره، او اینانج افاده‌سی مکتبه
گیرمه‌مه‌لیدیر. چونکو مکتب اینانج افاده‌سی و خرافه تبلیغاتی یئری دئییل، تحصیل
یئریدیر.
آردیجا دئییر،
تحصیل حقوقو هئچ بیر ایدئولوژی یاناشمانین قوربانینا چئوریلمه‌مه‌لی و یئنه ده
دقیق بونا گؤره حجاب واسیطه‌سیله مکتبده ایدئولوژیک تبلیغ ائدنلره مانع اولماق
لازیم‌دی و آذربایجان دؤولتی او قارا ایدئولوژی‌لرین مکتبه گیرمه‌سینه اجازه وئرمه‌مه‌لی
و اوشاقلاری هله کیچیک یاشلاریندان زهرلنمه‌لریندن قورومالیدی.
No comments:
Post a Comment