Nov 12, 2016

اورمو درياسينا

مفتون امینی

گئنيش گؤيدن بير پارچادور، آسلانوبدور يئر اوزونه
اوزاقدان دا وقارلودور، اورميه درياسى
اؤلکه‌ميزين سيما سيندا عزيز بير ماوى گؤزدور
قميشلردن کيپريکلرى، چمنلردن سورمه‌سى

اوزاقلارا گؤز تيکنده، بؤيوک اوفوق آلتيندا
دوماندا ايتميش داغلارى، رؤيا کيمين گيزلنير
يئددى منزل فاصيله‌دن بو شؤوکتى گؤرنده
البرز اونون قاباغيندا کروان کيمى ديزلنير

دريا ايچره، هر طرفدن جلال ايله گؤرسنن
اوجا داغلى، شيرين سولو، ياشيل بير جزيره وار
او يوردون قلبينده بيزيم يالان دونيادان اوزاق
بابک دؤوروندن ياشايان، دوزگون بير عشيره وار

بو دريانين منظره‌سى غروب لحظه‌لرينده
جمال سئون روحلار اوچون بوللو صفاسى واردير
آب­ حيات افسانه‌سين دوغرو ائدن درياميز
خسته قالان جانلار اوچون کسگين شفاسى واردير

گؤى سولاردا نازيک قيزلار قامتلرين اگرکن
دئيرسن کى جئيرانلاردير سونبول اوتلور اکينده
اونلارى گؤرجک آغلارام اورک ايچره کئچميشه
نه آرزيلار قويلانميشدير بو دريانين تکينده

يايين ايستى گونلرينده، گونش آلاو تؤکنده
دريانين يانميش جانينداا گؤز ياشى‌سى دوز باغلار
قيش گونونده سويوق يئللر سيزيلتى ايله اسنده
مايوس قالان اورکلر تک دؤرد بير يانى بوز باغلار

چتينليگى آسانليغا چؤندرن دريا اؤلمه
دمير يولا سون قويارکن سودان بير يول آچيرسان
اويان کؤرپو، بويان کؤرپو، دوزگون گؤزله باخاندا
يولدا گلن سفرچى‌يه اوزون بير قول آچيرسان

يوردوموزون هر يانيندا بير نيشان وار قوينوندا
هر اؤلکه‌دن بير سو گليب سئوينک آخير سينه‌وه
چايلار سنه قاريشارکن گؤزل کؤپوکلر بيتير
دئيرسن کى ائلچى گليب آغ گول تاخير سينه‌وه

اؤلک‌ميزده بؤيوک شانلى دريا! سنين سولارين
اورگينده دوشمن اوچون آجه زهه‌ر بسله‌يير
دالغالارين آچيق قوللو هر بير يانا آخاندا
زنجيرده قالميش داغلارى آزادليغا سسله‌يير...

No comments: