تبریز

حکیمه خانم بلوری

قول‌لاریم دولانار بوینونا  بیر گون
یئنه باش قویارا م دیزینه تبریز!
حسرتدن، هیجراندان جانا دویموشام
دویونجا باخارام گؤزونه  تبریز!

بولانلیق سولارین آخسین دورولسون
تزه گوللریندن بوساط قورولسون

سهند جمالینا  بیرده  وورولسون
بیر قوبار قونماسین اوزونه  تبریز!

گولستان باغی‌نین سئیرینه  گلیم
لاله یاماجیندا بیرده  دینجه‌لیم
اؤتن  گونلریمه  یئتیشمز الیم
دوشوم هیچ اولماسا ایزینه تبریز!

آنا تبسمون آی ایشیغی‌دیر
قولوم قامتی‌نین سارماشیغی‌دیر
شعرین بو دونیانین یاراشیغی‌دیر
اینجیسی توکنمز خزینه، تبریز!

سن شاعر عؤمرومه وقار وئریبسن
سولوب سارالمایان گولزار وئریبسن
اعتبار وئریبسن، ایلقار وئریبسن
هر ایگید اوغلونا، قیزینا تبریز!