Sep 8, 2015

«خاوران»

احد واحدی


گئجه گئچمیش یاریدان،
بوتون تهران یوخودا...
خیاوانلار بوم ـ بوشدی،
میدانلارین چوخودا!
ایشیق گلمیر هئچ یئردن
قارانلیقدیر هر طرف،
دومان چؤکموش ائله بیل
بورانلیقدیر هر طرف.
«گوهر دشت» دن، «اوین» دن گلیر ماشینلار گلیر؛
ایشقلاری اونلارین
گاه ائنیر، گاه یوکسه لیر.
قارا چرشاب بورونموش
گئجه نین سکوتونو
بیر قیشقیریق تک دلیر.
اونلار سس سیز سمیرسیز،
ساعاتلاردیر بو گئجه،
قهرمان ایگیت لرین
دسته ـ دسته اؤلوسون
خاوران مقصدینه،
داشییرلار گیزلیجه!
یایین اورتا آیی دیر
هاوا ایستی، بورکولو.
خاوران چوخ غصه لی
دوروب بوینو بوکولو.
بیر شئی ائده بیلمه ییر او چاتسادا قاشینی؛
اوتانیر، اوتانجیندان یئره دیکمیش باشینی.
بیر اوشوتمه بورویور
مزارلارین داشینی!
خاوران قبریستانی قاپاتمیش مین حزن ایله
اللریله اوزونو،
آچانماییر گؤزونو
گؤردوگو واقعه نی
اینانماق ایسته مه ییر.
بو دردین آغیرلیغی اونون بئلینی اییر.
گلیر ماشینلار گلیر
گئجه نین سکوتونو
بیر قیشقیریق تک دلیر!
بیر قیشقیریق، بیر فریاد،
بیر آه، بیر ناله کیمی!
وطن بویدا آچیلمیش قیرمزی لاله کیمی!
زَققوم دولی، قان دولی
بؤیوک پیاله کیمی!
آهای...
بو نه بیچیم یوک؟
هامیسی:
«ات»، «قان»، «سوموک»
سانکی جنگ میدانینی،
سوپوروب گؤز اؤنوندن
ییغیبلار ماشینلارا!
هارا باخیرسان، هارا،
قانی سوزولن یارا!
هارا باخیرسان هارا
قان ایشیلدیر «شَوَه» تک!
باخانمیرسا گؤز اونا،
بس نئجه دوزسون اوره گ؟
قان بوروموش هر یانی
تر قوخویور هر بیر شئی
حزین بیر آهنگله
آغی دئییر گئجه ای ی ی ی:
«آغلارام آغلار کیمی
ساراللام باغلار کیمی
وورموشلار ایگیتلریم
دردیم وار داغلار کیمی!...»
بوشالدیرلار ماشینلار گتیردیگی یوکلری
اَتیله، سوموکلری!..
گئجه یاریدان آشمیش
اویویان انسانلارین سانکی یوخوسو قاچمیش!
او ساعات هانسی «آنا» یوخوسونو آلیز گؤرموش؟
او ساعات هانسی «باجی»
گؤردوگو کابوسوندا
«قارداش»ینین اطرافین
قانلی بیر دنیز گؤرموش؟
او ساعات نئچه «آتا» یوخوسوندان داشلانمیش؟
نئچه یئنی محبوسون
نئچه دقیقه سوره ن
محکمه سی باشلانمیش؟
گؤره ن نئچه اوشاغین، گولوشو ـ تبسمی
دوداقلاریندا دونموش؟
اؤلوم بیر نحس قوش کیمی
نئچه ایگیت انسانین
چگین لرینه قونموش؟
بو دهشتلی فاجعه بیز ـ بیز ائدیرسه اگر
انسانلارین توکلرین!
بیر قازیلمیش گودالا
کمپرس ائدیر اونلار
گتیردیگی یوکلرین!
«یوک» دئمه! او جانلاری، آتش ایله یوغرولموش،
دؤیوشکن انسانلارا!
«یوک» دئمه! او وقارلی
قهرمان تک دایانان
قیزلارا، اوغلانلارا!
بو نئجه یوکدور آخی؟
اونلارین کی ایسته گی
قارا قیشین اؤنونده
گوللی ـ چیچکلی یازدیر!
«عشقین اوجا ذیروه سی
«عدالتین گور سسی
اونلارا دئسن آزدیر.
بو دهشتلی فاجعه بیز ـ بیز ائدیرسه اگر
انسانلارین توکونی،
بیر قازیلمیش گودالا
گئجه گلن ماشینلار
آغنادیرلار یوکونی!
شریف جانلار توکولوب، تورپاق اوسته، داش اوسته!
قولو دوشوب کیمینین
یولداشینین باش اوسته.
کیمی سینین آیاغی باشقاسینین قارنیندا!
قاتیللرین آجیسی هامیسی نین جانیندا!
کیمی نین چهره سینده
ملاحتلی بیر گولوش
بیر تبسم یئر آلمیش.
کیمی سی سون باخیشین
اوزاقلاردا پارلایان
انگین  افقه سالمیش!
ساققال باسمیش کیمی نی
ساققال سیزدیر کیمی سی.
قارشیسیندا اؤلومون
دایانمیشلار!
هامیسی!
معصوملوغی کیمی نین،  سانکی دونموش اوزونده.
غرور دولو باخیشی
جانلی قالمیش گؤزونده!
«اؤلوم اولسون جلادا
سؤزلری تام بیتمه میش
دوداغیندا کیمی نین؛
یاریمچیق بیر سئودانین
ایشیلدایان یانغیسی
یاناغیندا کیمی نین!
بو جنایت تاریخین
چهره سنده بیر لکه!
بو جنایت انسانلیق
آمالینا تهلکه!
دونیا بیلیر شبهه سیز
بو جنایت، بو باسقی،
«رژیمین اوز قره سی
قاتل لرده بیلیر کی،
بوردا سوجسوز اؤلن لر «قهرماندیر هره سی
گون اولاجاق سمادن
چکیله جک بولوتلار؛
آچیلاجاق گول ـ چیچک
کسیله جک شاختا ـ قار!
گون اولاجاق، آل گونش
دوغولاجاق اؤلکه ده؛
ایگیتلرین آل قانی،
قرمزی لاله کیمی آچیلاجاق بلکه ده...
گون اولاجاق خلقیمیز
تام آیاغا دوراجاق،
کهنه نظمی داغیدیب،
یئنی حیات قوراجاق.
گون اولاجاق اؤلکه دن
قووولاجاق قارا قیش؛
آنلایاجاق خلقیمیز:
نه دهشتلر ایچینده
بو دوستاقلار یاشامیش!
گون اولاجاق خلقیمیز
حقیقتی بیله جک؛
قهرمانلار یئتیره ن
آنالارین اوزونده ن قان یاشلارین سیله جک.
گون اولاجاغاق بیله جک
بوتون ملت هامیسی
کیمی داردان آسیلیب؟
گوللـه لنمیش کیمی سی؟
بیلینه جک شبهه سیز
بیر گئجه ده نئچه یوز،
بیر گئجه ده نئچه مین،
قولی باغلی قهرمان
قانلارینا بَله نمیش؟
فیرتینالار اؤنونده،
نئچه ایگیت قهرمان
چنار کیمی دایانیب،
یارپاق کیمی النمیش!؟
بوگون دگیلسه یارین،
گون گلر کی اونلارین
قالدیردیغی بایراغی
خلق هاوایا قالدیرار.
آغیز دولو گولومسه ر
اوره ک دولو سئوینه ر
آزادلیغین مارشینی ـ ماهنی سینی چالدیرار.
اینانیرام من البت اینانیرام گونش تک،
گلیشینه او گونون؛
امینیم کی خلقیمیز
نقطه قویار سونونا زندانلارین، سورگونون.
اوندا اؤلوم تانیماز
تورپاق آلتدا قویلانان
آلوولی «جان» لاریمیز!
چیرپینار هر بیر کؤنول
عشقی ایله اونلارین،
تعریفینی سؤیله یه ر
اونلارین هر بیر آغیز!
اوندا سؤنمز شعله سی:
قارانلیغین محوینه
ایشیق سالان مشعلین؛
اوندا یانار آتشی،
«جان» لاریلا آلیشیب
آلوولانان مشعلین!!
گون گلر کی، اونلارین
او اؤلمز انسانلارین
داش مرمردن هیکلی
بزه ک اولار هر یئره؛
حیات وئره ر یئنی دن
اونلارین شن حیاتی،
اونلار حقده یازیلان،
هر یازیا، هر شعره!
مرداد ۱۳۹۳

No comments: