Mar 27, 2021

دونیا سندن کیملر کئچدی؟!

"ادبیات سئونلر" گروهو

حسرتیم کیمی آخاجاق؟

گؤز یاشیما کیم باخاجاق؟
و آیریلیق دردی، دوست دردی بیزی یاندیریب یاخاجاق!

چوخ تاسفله، وطنیمیزین، ائلیمیزین تانینمیش شاعری، اجتماعی شخصیتی و تار اوستاسی «بهروز دولت‌آبادی»(چای‌اوغلو) بوگون 99/12/29 تهراندا آغیر کانسر خسته‌لیگیندن حیاتا گؤز یومدو.
«
چای‌اوغلو» 1317نجی ایلده تبریزین چای‌کنار محله‌سینده دونیایه گلمیشدیر. او گنج چاغلاریندا آذربایجانین مبارز ائولادلاری صمد بهرنگی‌ و بهروز دهقانی‌نین یاخین فیکیرداشی و یول یولداشی اولموشدور.


«چای‌اوغلو» بوتون عؤمرونو ائلینین، یوردونون سعادتی اوغروندا حصر ائتمیشدیر. گنج ایکن ایگیرمی ایل آذربایجانین موختلیف کندلرینده معلیم اولموشدور. او شاگیردلرینه تکجه مدرسه تکلیفی دئمیردی؛ بلکه هرگون اؤزویله بو مدرسه‌دن او مدرسه‌یه اویانیش مشعلی داشییردی.
اجتماعی عدالت «چای اوغلو»نون بؤیوک آرزوسو و بوتون عؤمرونو اونا حصر ائله‌دیگی یول ایدی. او بو یولدا یورولمادان چالیشدیغی اوچون گؤزونون ببگی کیمی سئودیگی آنا یوردو تبریزدن تهرانا قاچماق مجبوریتینده قالمیشدیر. تهراندا نئچه ایل یاخین دوستو آذربایجانین دونیا شؤهرتلی شاعری «بولود قاراچورلو»(سهند)ین تریکوبافی فابریکینده ایشله‌میش، ائله همان ایللرده (1348ده) «اوستاد شهریار»لا آذربایجان شاعری «محمد راحیم»ین آراسیندا ادبی کورپو یاراتمیشدیر.
نه زندان، نه زامانین آجی گونلری «چای اوغلو»نو اجتماعی و مدنی فعالیتدن ساخلایا بیلمیر. بیر اوستا تارزن کیمی موسیقی ساحه سینده ایکی آلبوم نشر ائدیر: بیرینجیسی صمد بهرنگی‌یه حصر اولموش و سهندین «صمد» شعرینه بستله‌دیگی و اؤز سسیله اوخودوغو آلبوم و ایکینجیسی‌ایسه سیاوش کسرایی‌نین آذربایجانین اؤلمز قهرمان اوغلو «صفرخان قهرمانی»یه تقدیم ائتدیگی شعرین اوستونه بستله‌دیگی اثردیر. هر ایکی آلبوم چای‌اوغلونون یارالی اوره‌ییندن چیخان حرارتلی سسیله یاییلیبدیر.
«
چای اوغلو»نون یارادیجیلیغینا بیر چوخ ادبی اثرلر ده داخیلدیر. «باباتی بایات اولماز» شعر مجموعه‌سی یاییلمیش و چوخلو اثرلری هله ده ایشیق اوزو گؤرمه‌ییبدیر.
اوستاد «بهروز دولت‌آبادی»(چای اوغلو) «صابر ادبی انجومنی»نین تانینمیش شخصیتلریندن‌ایدی و ایکی دؤرده صابر انجومنی‌نین اداره هیاتی ترکیبنده فعالیت ائتمیشدیر.
«
ادبیات سئونلر» گروهو بو آجی آیریلیغی آذربایجان خالقینا، چای اوغلونون محترم عائیله‌لرینه، صابر ادبی انجومنینه و ادبیات سئونلر عائیله‌سینه اوره‌ک ائویندن باش ساغلیغی وئریر.
بیز امینیک، آذربایجان تاریخینده و زحمتکشلرین مبارزه تاریخینده «بهروزدولت آبادی»(چای اوغلو)نون آدی و عزیز خاطیره‌سی بیر پارلاق اولدوز کیمی قالاجاقدیر. یولو دواملی و ابدی خاطیره‌سینه عشق اولسون.

«ادبیات سئونلر» گروهو
29/12/1399

 


No comments: