Jul 16, 2017

اؤزوم هارادا بالام هاردا

محمد حسین طهماسب پور (شهرک)

ماوی لییه اوچان قوشام،
قانا دیمدان وورولموشام،
حسرتینده یورولموشام؛
بیلمه ییرم قالام هاردا!
اؤزوم هاردا، بالام هاردا!

اووچو وروب یولداشیمی،
قاچاق سالیب سیرداشیمی،
سورگون ائدیب قارداشیمی،
انتقامین آلام هاردا!
اؤزوم هاردا، بالام هاردا!

آنام دئییر:
ـ اوچان قوشون ـ
ظولم الیندن قاچان قوشون،
گئجه گؤزو كؤچن قوشون ـ
قاداسینی آلام هاردا!؟
اؤزوم هاردا، بالام هاردا!
 


No comments: