کشگه

درویش اوغلو

کؤلن شهرینده اونیورسیته اشتراسه (اونیورسیته خیاوانی) ایله آخنر اشتراسه نین کسیشدیگی یئرده بؤیوک بیرگؤل وار. باهارین گونشلی گؤنلرینده اؤگرنجی لر کیتاب - دفترلری، یوخسا لپ تاپ کامپیوترلری ایله بو گؤلون قوزئینده اولان کیچیک تپه ده، چیمن لرین اوستونده اوتوروب گونشلنرلر. هاوانین ایستی گونلرینده بیر چوخو دا پالتارلارینی چیخاردیب دری لرینی آلماندا آز تاپیلان گونشه تاپیشیرارلا

مای آیینین ایگیرمی بیری، دئملی خردادین بیرینده، گون اورتایا یاخین اینره کانال اشتراسه دن گلیب، آخنر اشتراسه نی کئچدیکدن سونرا اونیورسیته اشتراسه یه گیردیگیمیزده  خیاوانین اورتاسیندا بیر پولیسین موتور سیکلیتی نی خیاوانین ائنینه پارک ائتدیگینی، اؤزونون ده موتورن قاباغیندا، دئملی اوزو ماشینلارین گلدیگی طرفه ساری دوردوغونو گؤردوک.

خیاوانین اوبیری طرفینی ده آیری بیر موتورلو پولیس طرفیندن عینی شکیلده باغلامیشدی. خیاوانین ساغ یانیندا دورانلاردان بیر چوخو اللرینده کی موبایل تلفنلاری ایله شکیل چکیردیلر. اورتادا ماشین تصادوفو گؤرونموردو. "شهرین، یوخسا دؤلتین بؤیوکلریندن بیریسی گلیب ساووشاجاق" فیکری ایله ساغا سولا باخدیم. آنجاق نه آردی آردا دوزولموش قارا ماشینلاردان، نه موتورلو بادی گارد لاردان بیر خبر وار ایدی. پولیسین یولو باغلادیغینا گؤره، خیاوانین هر ایکی طرفینده اوچ سیرا دوران ماشینلارین سوروجولرینین بیر چوخو ماشینلارینی سؤندورموشدولدر. بیر پاراسی دا آشاغی ائنیب، سئوینج  و تبسم دولو بیر روحیه ده موبایل تلفن لاری ایله شکیل چکیردیلر. کیمسه سیگنال چالمیردی. کیمسه یاندان، ساغدان- سولدان اؤزونه بیر یول تاپیب قازا باساراق بیر اؤنجه دوران ماشینین اؤنونه کئچمه گه چالیشمیردی. کیمسه آلینینی بوزوشدوروب، "ایت اوغلو ایتلر، خیاوانی نیه باغلاییبلار.... ایشیمیز- گوجوموز وار..." دئیه دئگینمیردی.  نه اولدوغونو آنلایا بیلمه دیم. دؤنوب سئوال دولو باخیشیمی یانیمدا اوتوران یولداشیمین گؤزونه تیکدیم. او دا بیر شئی گؤرمه میش کیمی دوداغینی بوزدو.

فرصت دن یارارلانیم دئیه بیر سیگار ساریماق اوچون الیمی آتیب توتون پاکتیمی گؤتورمک اوچون ائگیلدیگیمده،  یانیمدا اوتوران یولداشیم چیگینیمه ووراراق، سوئینچ دولو بیرسس تونوندا، "آها باخ، اونلار اوچون یولو باغلاییبلار.." دئیه الی ایله خیاوانین اورتاسینداکی بوشلوقدا چیمنین اوستونده ایکی قوو قوشونون دوردوغونو گؤستردی. ایکی قوو قوشو، یانلاریندا یومورتادان تازا چیخمیش دؤرد- بئش جوجه لری ایله بیرلیکده خیاوانی کئچیب گؤله ساری گئدیرمیشلر. قوولارین،  هئچ تلسمه دن، یاییلا یاییلا خیاوانین اوبیر طرفینی ده کئچیب گؤله ساری گئدن یولا گیردیکلریندن سونرا پلیس لر موتورلارینی ایشله تمه دن اللرینده چکه چکه قوولارین آردیجا دوشوب بئش - آلتی آددیم اونلاردان اوزاق، اونلاری گؤله قدر یولا سالدیلار.

دالیمدا دوران ماشینین سیگنال سسی ایله اؤزومه گیب، حرکت ائتدیم.

بئش - آلتی یاشلاریمدا ایکن باهارین بئله گونشلی و گؤزل بیر گونونده یئملیک ییغماق اوچون آمنه خالا گیلین باغلارینا گئتمیشدیک. گون اورتادان سونرا ائوه قاییدارکن، او زامانلار توفارقاندا اولان تک بیر خیاوانین قیراغیندا دایانیب دوردوق. آنام بیر الی ایله بوروندوگو قارا چارشابی اوزونده سیخی توتماغا چالیشارکن، بیر الی ایله ده منیم قولومدان توتدو. باشینی خیاوانین بیر ساغینا، بیر سولونا چوئردی، "ماشین گلمیر" دئیه خیاوانی کئچمک اوچون قولومدان چکدی. او لحظه سرعت ایله قاباغیمیزدان کئچن بیر چرخ  منه توخوناراق یئره سردی. آنجاق نه اولدوغونو گؤرمک اوچون بئله دایانمادی. داها سرعتلی بیر شکیلده اوزاقلاشدی. آنام منیم چیغیرتیما باخمایاراق بیر الی ایله چارشابینی سیخی توتماغا چالیشارکن بیر الی ایله قولومدان توتوب، دالیسیجا سورویه رک خیاوانی کئچدیک. اوبیر یاندا بیر کیشی، "باجی شهربانی اوردا دیر، باخ.." دئدی. آنجاق آنام هئچ بیر جواب وئرمه دن باشینی آشاغی سالیب چاپارلار کوچه سینه گیردی و ان قیسسا زاماندا ائوه یئتیشدیک.

.سینیخچی سیتارا خالا قولوما یومورتا ساریسی سوواییب تنضیف ایله سیخی باغلادی.

یانیمداکی یولداشیم دالغینلیغیمی حس ائدرک، "سنه نه اولدو؟" دئیه سوروشدو."هئچ، کشکه بیر قوو جوجه سی اولسایدیم" دئدیم

.آنجاق هاردا و هانسی زاماندا؟" سوروسونو ایسه دیلیمه گئتیره بیلمه دیم.

کؤلن،  مای 2015