Aug 20, 2021

آذربایجان ادبیاتی‌نین ایلدیریمی سوسدو

آذربایجان ادبی درنک لری - اطاعیه

باشین ساغ اولسون آذربایجان!

بوردان بیر آتلی کئچدی

آتین اویناتدی کئچدی

آی کیمی شفق ساچدی

گون کیمی باتدی کئچدی

 

چوخ تاسفله بوگون مرداد آیی‌نین 28ی، ادبیاتیمیزین ایلدیریمی، عؤمرونو اجتماعی عدالت و آزادلیق عشقیله باشا ووران، دیلیمیزین، ادبیاتیمیزین و مدنیتیمیزین اینکیشافیندا یورولمازجاسینا بیر عؤمور چالیشان، آذربایجانین تانینمیش اجتماعی و ادبی شخصیتی، گؤرکملی شاعر و ژورنالیستی دوکتور حسن ریاضی (ایلدیریم) کرونا ویروسا یولوخما سببیندن حیاتلا ابدی‌لیک وداعلاشدی.

حسن ریاضی(ایلدیریم) 1337نجی ایلین بهمن آییندا اول‌لر ساراب، سونرالار ایسه هریس ماحالی‌نین تابعه‌سینده اولان جمال‌آباد کندینده دونیایا گؤز آچمیش، ابتدایی و راهنمایی تحصیلاتینی اؤز کندلری و هریس شهرینده، اورتا مکتبی ایسه تبریزده باشا چاتدیرمیشدیر. استعدادی و علمی سویه‌سینه گووه‌نرک، طب اختصاصیندا «علوم پزشکی ایران» دانیشگاهیندان قبول اولموش و تحصیلینی داوام ائتدیرمیشدیر و اوزون ایللر تهرانین «دکتر شریعتی» خسته‌خاناسیندا اینسانلارین ساغلاملیغی اوچون الیندن گلنی اسیرگمه‌میشدیر.

حسن ایلدیریمین آذربایجان ادبیاتیلا تانیشلیغی اؤز عائله‌سیندن باشلامیشدیر. آتاسی‌نین آذربایجان ملی نهضتی دؤرو روحونا و شخصیتینه هوپموش آذربایجانچیلیق، یئنی یئتمه ائولادینی ائوینده ساخلادیغی تورکو کیتابلارلا تانیش ائدیر. یئنی‌یئتمه حسن قیش گئجه‌لری ائولرینه ییغیشان قوهوم- قونشویا آذربایجانین کلاسیک ناغیل‌لاریندان اولان کوراوغلو و اصلی کرم کیمی چاپ اولموش کیتابلاری اوخویور و اؤزوده بو ناغیل‌لارین تاثیری آلتیندا 1354نجی ایلدن آذربایجان ادبیاتی ایله جیددی صورتده ماراقلانیر.

ایران انقلابینین غلبه‌سی حسن ایلدیریمین آذربایجان ادبیاتیلا تانیشلیغینا الوئریشلی شراییط یارادیر. گنج اولماغینا رغمن، انقلابدان سونرا گئنیش اوخوجو رغبتی قازانان «یولداش» مجله‌سی‌نین فعال امکداشلاریندان اولور. اونون بو مجله‌نین موختلیف نومره‌لرینده یاییلان یازیلاری حسن ایلدیریمین دونیا گؤروشونه، زحمتکش‌لرین تاپدالانمیش حاقلارینی مودافیعه ائتمه‌یینه و آذربایجان ملی وارلیغی‌نین حقیقت اولدوغونا آیدین ثوبوتدور.   

حسن ایلدیریم انقلابدان سونرا تزه دیل آچمیش آذربایجان مطبوعاتینا یارانان محدودیتلر زامانی اؤز قلمداشلاری و یولداشلاریلا برابر «آرزو کاروانی» آدلی ادبی درنک یارادیر و بو درنه‌یین چرچیوه‌سینده مبارز شعریمیزین اؤندری ساییلان اوستاد حبیب ساهرین نیسگیللی اؤلومونه قده‌ر ادبی فعالیتینه داوام ائدیر. سونرالار «ساهر ادبی مدنی درنه‌یی»نین قوروجولاریندان اولور و عؤمرونون سونونا کیمی بو درنه‌یین اداره هیاتینده چالیشمالاریلا ادبیاتیمیزا چوخ درین و مثبت تاثیرلر بوراخیر؛ عینی حالدا تهراندا فعالیت گؤسترن «صابر ادبی انجومنی»ایله چوخ یاخیندان امکداشلیق ائدیر و هر ایکی درنه‌یین ایش‌بیرلیگینده اؤنملی مسئولیتلر داشیییر. 

حسن ایلدیریمین 70نجی ایل‌لره دایر فعالیتی، آذربایجانین ادبی و مدنی شخصیتلری نامینه بیر چوخ طنطنه‌لی تدبیرلر و آغیرلامالارین قورولماسیندا و آذربایجان شاعرلری اثرلرینین چاپا حاضیرلانماسیندا قاباریق شکیلده اؤزونو گؤستریر. او بیر تعهدلی شاعر، ادبیاتشوناس و ژورنالیست اولاراق، آذربایجانین دیگر شاعر و یازیچیلارینین اثرلرینی یایماغی اؤز اثرلرینین یاییلماسیندان داها اوستون توتور و بو یولدا فداکارجاسینا ده‌یرلی ایشلر گؤرور.

حسن ایلدیریم شعرده اوستاد حبیب ساهر مکتبی‌نین یئتیشمه‌سی اولسادا، ژورنالیسم فعالیتلرینده اوستاد بهزاد بهزادی‌ مکتبی‌نین استعدادلی و باجاریقلی یئتیشمه‌سی اولموشدور. او 1382نجی ایلدن آردیجیل نشر ائدیلن «آذری» درگیسی‌نین باش یازاری وظیفه‌سینده ائلیمیزین، دیلیمیزین و مدنیتیمیزین کئشیگینده دورموش و اؤز یازیلاری ایله بؤیوک بیر ادبی ایرثین یارانماسینا سبب اولموشدور.

حسن ایلدیریم اؤز ژورنالیسم فعالیتلریله برابر، یارانان هر بیر آذربایجان درنک، درگی و ادبی محفیل‌لری‌نین چوخ مسئولیتلی یاردیمجیسی اولموشدور. 1390نجی ایلین 12 شهریوریندن «ایشیق گنج‌لری» طرفیندن فعالیته باشلایان «ایشیق» (آذربایجان ادبیات و اینجه صنعت سایتی)نین ایلک مشورتچیلریندن اولموش و بو ادبی سایتین 10 ایل‌لیک فعالیتینده چوخ ده‌یرلری رای‌لر، مشورت‌لر و تکلیف‌لر ایره‌لی سورموشدور. 

حسن ایلدیریمین اوستاد بهزاد بهزادی ایله برابر نشره حاضیرلادیغی اوچ جیلدلیک «آنا دیلی» درسلیک کیتابلاری و دونیا شؤهرتلی تورک شاعری «ناظیم حیکمت‌ین حیات و یارادیجیلیغیا دایر تدقیق» سامباللی اثری اونون ادبی فعالیتلرینین چوخ ده‌یرلی بهره‌سیندندیر. تاسفله او، حیاتیندا باشقا اثرلرینین چاپ اولماسینا شاهید اولمادی. عؤمرونون سون آیلاریندا یاخین دوستلارینین تکلیفینی قبول ائده‌رک بوتون اثرلرینین چاپا حاضیرلانماسینا اجازه وئردی.

5 جیلدلیک «شعر مجموعه‌‌سی»، «ادبی پوبلئستیک مقاله‌لر توپلوسو»، «دونیا ادبیاتیندان ترجومه‌لر» اثری چوخ آز بیر مدتده رئداکته اولوب نشره حاضیرلاندی. بو کیتابلاردان «یاغیش یوخوسو» و «گؤزلریمدن آسیلدیم» عنوانلی ایکی شعر مجموعه‌سی یاخین گله‌جکده تبریزین «موغام» نشریاتی طرفیندن اوخوجولارا تقدیم ائدیله‌جک. چوخ تاسفله، سئویملی شاعریمیز، آذربایجانیمیزین فداکار اوغلو بو اثرلرینین یاییلماسی‌نین هئچ بیرینه شاهید اولمایاجاق. نییه کی اونون شاعر اوره‌یی‌نین سون چیرپینتی‌لاری اوزون ایللر باشقا خسته‌لره خیدمت گؤستردییی تهرانین «شریعتی» خسته‌خاناسیندا مرداد آیی‌نین 28ینده بیر یوللوق سوسموشدور.

حیات طرزی، یارادیجیلیق یوللاری و ادبی گؤروشلرینه فخر ائتدیگیمیز سئویملی آذربایجان شاعری، ژورنالیستی و ترجومه‌چیسی «حسن ایلدیریم»ین آغیر ایتگیسی بوتون آذربایجان ادبیاتینا و مدنی اجتماعیاتیمیزا اوز وئره‌ن سارسیدیجی و آغیر بیر ایتگی‌دیر‌. «آذربایجانیمیزین باشی ساغ اولسون!» دئیه، بو آغیر ایتگینی آذربایجان خالقینا، سئویملی شاعریمیزین حؤرمتلی عائله‌سینه، دوست تانیشلارینا و ادبی-مدنی جمعیتیمیزه باش ساغلیغی وئریر، آذربایجان خالقی‌نین فداکار اوغلو و تعهدلی ادبیاتچیسی حسن ریاضی(ایلدیریم)ین شرفلی خاطیره‌سینه عشق اولسون دئییریک.

 «ساهر ادبی – مدنی درنه‌یی»

«آذری» فصلنامه‌سی

«صابر ادبی انجومنی»

«ایشیق» – آذربایجان ادبیات و اینجه صنعت سایتی

«ادبیات سئونلر» گروهو

«ایشیق» درگیسی

«ائلدار موسیقی گروهو»

28/05/1400

 

No comments: