يحيى شئيدا
آى خسته قوش آواره گزيرسن بو
ديارى
زينداندى، قفسدى، چمنى، باغى،
باهارى
گؤزله اؤزيوى اووچودور هريانى
بو يوردون
قوزغون ليکى دؤرد گؤزلو گزير
کؤرپه شيکارى
فورصت داليسيجا گزير، ال يئرى
تاپسا
ويران قوياج يوردونو آى کؤينگى
سارى
تيک اؤز يووانى، قويما سنه ال
تاپا اووچو
سن بو يووانين صحيبى سن، قان!
يئنه بارى
جهد ائيله کى جان قورتارسان
اووچو اليندن
دوشسن تورا فرياد ائله‌مه، چک
بو فيشارى
گؤلشنده کى يوخ ذؤوق و صفا آى
سارى کؤينک
قاچ! قاچ! بو يئرين زهرلى‌دير
دارى- ندارى
ديللنسن اگر اووچو ائدر قانينا
غلتان
اوچسان آ يازيق! تير جفا
قلبينى يارى
مين فيرتينا قالخيب دؤگه‌جک
باشينا توفان
هر کيمده اولا داع کيمى
دونيادا ووقارى
گلسه باشيوا درد- بلا داغ کيمى
دور باخ
آيدين‌دير بو سؤز تؤستو گئدر
گؤيچگه سارى
ايستر سنى صيسد اؤزونه رام
ائده آمما
اويغودا دؤرر آج تويوق البته
کى دارى
بو ياخشى مثل‌دير کى بيزيم
ائلده دئميشلر
بير باخ آشاغى. باخما اؤزوندن
ده يوخارى
غم غوصه کئچيک قلبينى گر دؤگسه
سيخيلما
بو گون ده کئچر، آخيرى غملر ده
قوتارى
اوندا کى چيخار گون ياييلار
عالمه بيردن
اوندا کى قارا دان يئرى صوبح اولجاق
آغارى
داغى- داشى آسوده خياال ايله
گزرسن
گولشنده نه شاختا گؤرسن، داغدا
نه قارى
ظولمون ائوى ويران اولو. ظاليم
دوشر الدن
قان دورماز اگر کسسه بيچاق
قيرسا دامارى
باختين قاپيسى ايندى
قيفيللانسا داريخما
هر بير قيفيلين واردى طبيعتده
آچارى
اؤز جانيويلن اويناما بو عرصه‌ده
«شئيدا»!
لئيلاج دغلباز ايله قيزديرما
قومارى.
No comments:
Post a Comment