درویش اوغلو
کئچن سپتامبر آییندا "گؤزلیم ساغلیغیمین قدرینی بیل" آدلی بیر قوشقو گؤندرمیشدیم حضورونوزا. بو قوشقونون موضوع سو قاطاردا گؤردوگوم بیر خانیم ایله بیر آقانین دانیشیقلاریندان عبارت ایدی.
کئچن یئددیلیک (هفته) بیر آخشام قاطار ایله ایشدن ائوه قاییدارکن بو ار- آرواد ایله تصادف اثری گئنه قارشیلاشدیم. مندن بیر نئچه دوراق سونرا میندیلر و گلیب دوز منیم اوتوردوغوم اوتوراغین (صندلین) قارشیسینداکی بوش اوتوراغا اوتوردولار.
گئنه عینی موضوعا یاخین دانیشدیقلاریندان سپتامبر آییندا قارشیلاشدیغیم ار- آرواد اولدوقلارینی تخمین ائتدیم. بیر آز صحبتلرینی ائشیتدیکدن سونرا "گؤزلیم ساغلیغیمین قدرینی بیل" قوشقوسونو خاطرلادیم. اؤزومو توتماق اوچون اوزومو پنجره دن ائشیگه چئویریب، دیلیمین اوجونو دیشلرکن گولمک، آغلاماق و اؤسگورمگین قاریشیغی بیر سس چیخدی بوغازیمدان. قارشیمداکی ار- آرواد دانیشیقلارینی کسدیلر و بیر سونلاکی دوراقدا قاطاردان ائندیلر. کئچن سپتامبردا بو خانیم و آقانین اوزلرینی گؤرمه دیگیمدن کیشی نین ده گنج اولدوغونو تخمین ائتمیشدیم. بو یول تام قارشیمدا اوتوردوقلاری اوچون کیشینین منیم تصوورومون تام ترسه سینه هئچ ده گنج اولمادیغینی، ساچینی، بیغینی قارا بویامیش چیرکین بیر قوجا کیشی اولدوغونو گؤردوم. ائشیده بیلدیگیم صحبتلری ده چوخ قیسسا اولدوغو اوچون، اونلارین احوالاتینا یازدیغیم قوشقو دا چوخ اوزون اولمادی.
بو قوشقودا کئچن آلمانجادان گلمیش ایکی سؤزو ایضاح ائدیرم:
مارکت: اصلینده "فلوه مارکت" دئییلیر، آنجاق قیسساجا مارکت دا دئییلر، کلمه کلمه سینه چئویررسک "بیت بازاری" دئمک اولور.
سنت: اویرو نون خیرادسی، دئملی اوروپادا اولان ان کیچیک پول بیریمی دیر.
آفرین
آفرین یاخچی نصیحت ائدیرسن بیلمه یه نه
نئچه مین خرچله میسن گؤزیاشیوی سیلمه یه نه
آغلین اولسایدی بلا اولماز ایدی س...ک باشیوا
باخ اؤزوندن نئچه یاشلارجا کیچیک قارداشیوا
اوشاغی، آروادی، باغی، ائوی، فرشی - خالیسی
باخچاسیندا اوزومو، آلماسی، آرموت – آلیسی
اوتوز ایلدیر چالیشیرسان، هارا ییغدین پولوو؟
نئچه سنته آلینار مارکت دا ساتسان چولوو؟
هانسی قانجیقلا ساووردون پولوو آنتالیا ساحیلینه؟
کی بیراخسین سنی گئتسین سونرا سندن داها چوخ قابیلینه!
کؤلن ده قویمامیسان گیرمه دیگین دیسکو و بار
ایندی مندن هله اسلامی حجاب گؤزله ییرسن، کؤهنه نیگار؟
نرگیسین باشماغینا شیشه (ویترین) دالیندان باخیرام
گؤز یاشیم سئیله دؤنور، منده اونونلا آخیرام
قیسیلارسان یانیما بیرده گئجه صبحه قدر!
یالواریشلارلا وئررسن نئچه یوز بوش وعده لر!
تؤکولوب دیش، بوکولوب بئل، یوخ گؤزونده ایشیغین
نه ائیله ییم من پوخونو سن کیمی بیر پیسمیریغین
کؤلن، مارس 2015
No comments:
Post a Comment