سورگونده گونئی آذربایجان (ایران) قلم انجومنی
آلديغيميز خبره گؤره، آذربايجانين ادبى اجتماعياتينا آغير بير ايتگى اوز وئرىيشدير. "هاشم ترلان" خلقيميزين ملى و مبارز شاعرى يكشنبه گونو آبان آيى نين ٢٥ نده، تهراندا حياتا گؤز يومموشدور. "هاشم ترلان" ٢١ آذر حركاتى نين يادگارى، ملى حكومتيميزين فدائى سى بير استعدادلى شاعر كيمى وطنده حاكم اولان ملى عدالت سيزليگه قارشى و بوتون دموكراتيك آماجلارا دوغرو، اؤز قلمى ايله حياتينين سونونا قدر مبارزه آپارميش و بو يولدا اليندن گلن هئچ بير ايشدن اسيرگه مه ميشدير. ملى شاعريميز، گئچن ايل، دى آيندا بئيين اينفاركتى سببيله خسته لنميش اوزون آيلار سوره ن خسته ليگدن سونرا ابديته قووشموشدور.
"هاشم ترلان"ين خاطره سى، اونون بؤيوك و چوخ حجملى ياراتديغى و گله جك نسله قويدوغو ادبى - بديعى ارثى واسطه سيله ابدى ياشاياجاقدير. بيز "سورگونده جنوبى آذربايجان (ايران) قلم انجمنى" طرفيندن بو آغير و آجى ايتگينى قهرمان ملتيميزه، دگرلى قلمداشلاريميزا و "هاشم ترلان" ين عائله عضولرينه (چشم آلوسى عائله سينه) صميم قلبدن تسليت دئيريك.
"شاعر هاشم ترلانا ابدى عشق اولسون"
سورگونده گونئی آذربایجان (ایران) قلم انجومنی
17 نوامبر 2014 برابر 26 آبان 1392
No comments:
Post a Comment