اوروجلوق، خورما و شراب

س. حاتملوی  

بو گون اعتباریله دونیا مسلمانلاری اوچون اوروجلوق آیی (رمضان) باشلامیشدی.

بیر نئچه ایل دی کی فئدرال آلماندا رمضان آیی باشلادیغیندا، بو اؤلکه نین‌ مئدیاسیندا مختلف پروگراملار حیاتا کئچیریلر و عمومیت ده بورادا یاشایان آلتی میلیون مسلمان و میلیونلار مسیحی و دیگر اینانج و دین منسویلارینین‌ حیاتیندا رمضان آیی نین‌ حضورو داها چوخ گؤزه دئمکده دی.

مسیحی آلمانلیلار اوچون، مسلمانلارین بعضا یاشادیقلاری ائولر و کوچه لرده عمومی افطار سفره لری ترتیب وئرمه لری و هر کسی او سفره یه دعوت‌ ائتمه لری، اؤنجه لر کیمی اونلاری داها قورخوتمور، عکسینه اونلارین بیر چوخونا ایلگینج ده گله بیلیر.

 

بیر باشقا دلیل ده کی بو ایل فئدرال آلماندا مسلمانلارین‌ رمضان‌ و اوروجلوقلارینا داها آرتیق اهمیت وئریلیر، مسلمانلارین‌ اوروجلوق آیی نین مسیحی لرین قیرخ گونلوک اوروجلوق سنت لریله اوست- اوسته دوشمه سیدی.

قاباقلار مسیحیت عالمینده ایل ده ایکی دفعه اروجلوق اولوردو. بیرینجیسی کریسمس زمانی و ایکینجیسی ایسه، عیسی مسیح ین صلیبه چکیلمه سی، عروج و یئنی ده ن حیاتا دؤنمه سی ایله علاقه ده اولان گونلرده اولوردو.

بیلدیییم قدر بو گونلر بیر چوخ‌ مسیحی لر‌ اوچون یالنیز قیرخ‌ گونده ن عیبارت اولان ایکینجی اوروجلوق مهم ساییلیر.

کاتولیک مسیحی لر اوچون اوروجلوق قیرخ گونو، حیاتین ابدی اولمامادیغینی گؤسته رمک اوچون، بیر چهارشنبه‌ گونو آننیلاریندا کول ده ن چکدیکلری بیر خاچ ایله باشلار (کول ده ن یارانیب، کول اولاجاغیق).

مومن مسیحی لر، بو قیرخ‌ گون ده حیات طرزلرینی رادیکال شکیلده دئیشیب، بیر نوع زهد و وارسته لیک ده یاشاییرلار.

بو قیرخ گونده اونلار داها آرتیق دوعا و نیایش ائدیب، هر نوع جشن، سفر، چال- چاغیر و تفریح لرده ن‌ اوزاق گزیب، ات‌ و شراب کیمی بیر چوخ اطمعه و اشربه نین یئمک و ایچمه سینده ن امنتاع ائدیب و همنوع لاریله داها چوخ ایلگیلنیب و احتیاج صاحبلارینین دردلریله آرتیق مشغول اولورلار.

بیلدیییم‌ قدر کئچن‌ عصرین اورتالارینا کیمی حتی اونلاردا، اوروجلوق گونلرینده مسلمانلار کیمی گون ده بیر دفعه ده ن* آرتیق یئمک یئمه ده ن امتناع ائدیردیلر.

قیرخ گون‌ اوروجلوق، مسیحی لرین ایناجینا گؤره، عیسی مسیح ین حیاتا دؤنمه سی و عروجی ایله (عید پاک)‌ سونا‌ چاتیر.

 

کاپیتالیزم سیستمی ده البته‌ کی، «موبارک» رمضان آیی نین «برکت لرینده ن» نصیب سیز قالا بیلمز. مگر مسلمانلارین‌ پیغمبری محمد اؤزو و اونون آروادی خدیجه تاجیر دئییلدیلر؟...

اونون‌ اوچون اروپا اؤلکه لرینین بیر چوخوندا اولدوغو‌ کیمی، فئدرال آلماندا دا بؤیوک زنجیره ماغازالاردا، اوروجلوق آیی ایله علاقه دار مختلف اطمعه و اشربه و حتی اوروجلوق تقویمی ساتیلماقدادی.

بو ماغازالارین بیرینده بو گون آلتی نوع «رمضان‌ خورماسی» نزدینده، بیربیرینین اوستونه قالانمیش «رمضان تقویمی» ده گؤزومه دئیدی.

ماغازادان منده بیر بسته خورما و اوچ شیشه شراب آلدیم.

دخیل دالیندا دوران چوخ‌ گؤزل بزه‌نمیش گؤیچک باشی آچیق قیزین اصلیتی یا تورکیه ده ن و یا عرب اؤلکه لرینین بیرینده ن اولمالیدی.

فئدرال آلماندا دونیایا گلیب، بورالاردا بؤیویوب بویا باشا چاتان بو گنج لر، سئیره ک ده اولسا، ایسلام دینی حقده مسلمان آتا- آنالاریندان بیر شئی لر ائشیدیب و اؤیره نمیشدیلر.

گؤیچک‌ قیز اؤنجه خورمانی و سونرا شراب لاری حسابلادیغیندا، صوراتیندا بیر چیچک کیمی آچیلان حیرت گؤزومده ن‌ قاچمادی.

یقین کی، قیزجیغاز دوشونوردو: عجبا بو «مسلمان قارداش» افطارینی خورما و شراب ایله آچیر می؟...

 

*البته اوباشدانلیغی حساب ائتسه ک، اوروجلوقدا مسلمانلار گون ده ایکی دفعه یئمک یئییرلر.